Umakyat na sa 3, 335 ang bilang nang lumabag sa election gun ban.
Batay sa datos na inilabas ng PNP kahapon, nahuli ang mga ito sa 3, 127 operasyon na isinagawa mula Enero a-9 nang ipatupad ang gun ban.
3, 201 sa mga nahuli ay sibilyan, 61 ang security guard, 25 ang pulis, 22 ang sundalo at 26 ang mula sa ibang sektor.
Pinakamarami sa mga nahuli ay mula sa Metro Manila sinundan ng CALABARZON, Central Visayas, Central Luzon at Western Visayas.
Kinontra ng isang malaking commuters advocacy group ang napapabalitang muling paghirang kay DOTr Secretary Arturo Tugade bilang kalihim ng departamento at sinabing bingi at manhid ang kasalukuyang liderato ng ahensya sa hinaing ng mga commuters.
Ayon kay Toix Cerna, tagapagsalita ng commuters advocacy group na Komyut, wala na ring tiwala ang transport sector kay Tugade at maging sa mga nakaupo sa Land Transportation Franchising and Regulatory Board (LTFRB).
“Napabayaan talaga ng kasalukuyang liderato ng DOTr ang pampublikong transportasyon. May nabuo mang programa para tugunan ang pangangailangan katulad ng ayuda at service contracting, hindi naman naging maayos ang implementasyon. Naging bingi at tahimik at manhid ng liderato sa mga reklamo ng transport sector at ng mga mananakay,” ani Cerna.
Aniya, ang kasalukuyang liderato ng DOTr ay nagdulot ng malaking sugat sa buhay at kabuhayan ng transport sector at mas mainam aniya na ang papasok na administrasyon ay magtalaga ng bagong opisyal na maaaring magbigay ng pag-asa sa napabayaang sektor.
“Mainam sa panimula ng isang bagong gobyerno ang makapagtalaga ng lideratong magbibigay ng pag-asa sa sektor. Malaki ang naging pagkukulang ng dating liderato sa transportasyon at malalim ang sugat na idinulot sa buhay at kabuhayan ng mga mananakay at trabahador sa sector,” ayon kay Cerna.
Nauna rito, halos magkasunod ding umapela ang dalawang malaking grupo sa transportasyon kay presumptive President Ferdinand “Bongbong” Marcos Jr. na palitan si Tugade.
Noong Martes, hiniling ng National Public Transport Coalition kay Marcos na palitan si Tugade at sinabing ang transport sector ay pinaka-napabayaang sektor sa gitna ng pandemya at patuloy na pagtaas sa presyo ng gasolina.
Ang NPTC ay kinabibilangan ng mga kinatawan mula sa National Confederation of Tricycle and Transport Operators and Drivers Association of the Philippines (NACTODAP), Pagkakaisa ng mga Samahan ng Tsuper at Operator Nationwide (PISTON), Federation of Jeepney Operators and Drivers Association of the Philippines (FEJODAP), Samahan ng mga Tsuper at Operator tutol sa Phase Out (STOP), Association of Taxi Operators in Metro Manila (ATOMMI), at Unified Transport Alliance of the Philippines (UTAP).
Nasa hanay din nila ang Small Bus Operators of the Philippines, Philippine Bus Operators Association of the Philippines, Pilipino Society and Development Advocates, Alliance of Philippine Customs Brokers and Trucking Associations (CTAP), Inland Haulers and Truckers Association (INHTA), Haulers and Truckers Association in the Watersouth (HATAW), Lawyers for Commuters Safety and Protection, Truck Drivers Association of the Philippines, Motorcycle Rights Organization (MRO), Motorcycle Riders of the Philippines at Alliance of Concerned Transport Organization (ACTO).
“…Isa pong solusyon sa transport sector ay ang pag-appoint ng bagong secretary [ng] DOTr na tutulong, mag-aalaga at magpapalakas ng aming hanay,” ayon kay coalition spokesperson Ariel Lim.
Magugunitang noong Biyernes ay gumawa din ng hiwalay na apela ang FEJODAP at ang Liga ng mga Transportasyon at Operators sa Pilipinas (LTOP) na palitan na si Tugade dahil sa kabiguan umano nitong aksyunan ang mga suliranin ng transport sector sa anim na taon nitong panunungkulan.
“Hindi lang sila nabigong tugunan ang mga problema sa transportasyon, dumagdag pa sila,” ani LTOP president Orlando Marquez sa press conference noong Biyernes.
Inaasahan na ng isang eksperto ang surge sa COVID-19 cases sa bansa, dalawang linggo matapos ang Halalan noong Mayo a-9.
Ayon kay Rontgene Solante, OCTA research fellow, magiging superspreader event ang pagtitipon at paglabas ng mga tao para bumoto noong eleksyon.
Habang dahilan din ang malamig na panahon kaya tumataas ang kaso dahil nasa loob lang ng bahay ang karamihan.
Hindi naman nakikita ni Solante na makakaapekto ang surge sa hospitalization rate ng bansa at magiging kagaya ito ng surge noong Enero.
Kung hindi mangyayari ang ganitong scenerio, sinabi ni Solante na patunay lang ito na nananatiling mataas ang proteksyon ng bansa laban sa COVID-19.
Nagbabala ang Department of Agriculture (DA) sa posibleng pagtaas ng presyo ng gulay sa mga pamilihan dahil sa masamang panahon.
Partikular dito ang mga gulay na kinukuha mula sa Benguet.
Ilan sa gulay na posibleng magtaas ng presyo ay ang repolyo na sisipa sa P16 hanggang P18 ang kada kilo mula sa P12 kada kilo.
Posible ring tumaas ang presyo ng seafood sa mga merkado sa Metro Manila maliban sa Balintawak Market sa Quezon City na hindi apektado ng masamang panahon.
Hindi naman nagbabago ang demand sa karneng baboy sa kabila ng pag-akyat sa P320 kada kilo ng presyo nito.
Puspusan ang paglilinis ng MMDA o Metropolitan Manila Development Authority sa mga daluyan ng tubig sa Kamaynilaan para maiwasan ang pagbaha ngayong tag-ulan.
Ayon kay MMDA general manager Frisco San Juan Jr., nililinis na ng kanilang mga tauhan ang mga estero at kanal para masigurong hindi ito barado.
Nabatid na idineklara na ng pagasa ang pagsisimula ng panahon ng tag-ulan nitong Miyerkules.
Aarestuhin ng Metropolitan Manila Development Authority (MMDA) ang mga motoristang magpapatakbo nang mabilis o higit pa sa speed limit ngayong tag-ulan.
Ayon kay MMDA general manager Frisco San Juan Jr., mas magiging aktibo ang mga tauhan ng ahensya sa paghuli ng mga pasaway na motorista.
Samantala, wala pang inilalabas na desisyon ang ahensya hinggil sa proposal na bagong number coding scheme na layong bawasan ang bilang ng mga sasakyang dumadaan sa pangunahing kalsada sa Metro Manila.
Na-detect ng Department of Health (DOH) ang kaso ng Omicron subvariant na BA.4 sa bansa.
Batay sa pahayag na inilabas ng DOH, na-detect ang BA.4 sa isang Pilipino na dumating sa bansa mula sa Middle East noong may 4 at nagpositibo sa test result na isinagawa noong May 8.
Pero ayon sa kagawaran, ang nasabing indibidwal ay asymptomatic.
Samantala, itinuturing na variant of concern ng European Center for Disease Prevention and Control o ECDC ang naturang subvariant ng omicron.
Nanawagan sa Food and Drug Administration o FDA ang isang mambabatas na pagkalooban ng ‘full approval’ ang mga magagandang brand ng bakuna kontra COVID-19 na mayroon nang emergency use authorizations o EUA.
Ayon kay Senior Citizen Party-list Rep. Rodolfo Ordanes, sa pamamagitan nito’y tiyak na tataas ang vaccination rates sa bansa dahil mabibigyan na ng ‘certificate of product registration’ ang ilang brand ng bakuna.
Sa kasalukuyan, mahigit 68 million Filipinos na ang fully vaccinated laban sa virus.
Nagbabala sa publiko ang Catholic Bishops’ Conference of the Philippines (CBCP) laban sa phishing scams na gumagamit ng pangalan ng Apostolic Nunciature sa Maynila.
Ayon kay CBCP Secretary General Msgr. Bernardo Pantin, sa pamamagitan ng e-mail ay nagpapanggap ang mga scammer bilang si Archbishop Charles Brown ang Apostolic Nuncio to the Philippines.
Dahil dito, nagbabala si Pantin sa mga deboto na huwag i-click ang ipapadalang link sa kanila dahil maaaring ito’y phishing attempt para makuha ang mga detalye ng kanilang e-mail account.
MAHIGIT anim na raang milyong pisong halaga ng mga pekeng produkto ang nasabat ng mga elemento ng Bureau of Customs o BoC sa magkahiwalay na operasyon sa Cavite at Bulacan.
Bitbit ang Letters of Authority o LOA na inisyu ni Customs Commissioner Rey Guerrero, unang ininspeksiyon ang warehouse ng Maclane Storage Facility sa Niog Road, Bacoor City kung saan nadiskubre rito ang mga counterfeit goods na tinatayang nagkakahalaga ng P590 milyon.
Sa hiwalay namang operasyon, aabot sa P78 milyong halaga ng mga peke ring produkto ang natagpuan sa warehouse ng Fochun Industrial Compound sa Balagtas, Bulacan.
Posibleng ipagharap ang dalawang kompanya ng mga kasong paglabag sa Intellectual Property Code of the Philippines, Consumer Act of the Philippines, at Customs Modernization and Tariff Act.