NATIONAL NEWS

Matapos ang dalawang dekada, ipinag-utos na ng Marinduque Regional Trial Court (RTC) Branch 38 sa Marcopper Mining Corporation ang pagbabayad ng danyos perwisyo sa mga residenteng naapektuhan ng mine spill noong 1993.

 Sa May 16, 2022 decision ni RTC Branch 38 Judge Emmanuel Recalde, inatasan ang Marcopper na bayaran ang 30 plaintiffs o nagsasakdal ng tig-200,000 peso temperate damages at 100,000 peso moral damages.

 Ang temperate damages ay para sa mga ari-arian, pananim at mga livestock na nawala sa bawat nagsasakdal habang ang moral damages ay para sa physical at mental suffering ng mga plaintiff dahil sa kawalan ng kabuhayan at peligrong hatid ng Maguila-guila dam.

Pinagbabayad din ng korte ang kumpanya ng karagdagang isang milyong piso bilang exemplary damages sa mga nagsakdal.

 Disyembre a – sais, 1993 nasira ang bahagi ng Maguila-guila dam na pagmamay-ari ng Marcopper na nagdulot ng pagbaha ng nakalalasong kemikal sa Mogpog River, na kalauna’y idineklarang “biologically dead” dahil sa epekto ng mining waste.

 Ang nabanggit na ilog din ang pangunahing pinagkukunan ng ikabubuhay ng mga taga-Mogpog.

Bumisita si Pangulong Rodrigo Duterte sa huling lamay ng yumaong Queen of Philippine Movies at aktres na si Susan Roces.

Kasamang nagtungo ng pangulo sa Heritage Park, Taguig City si Senator Bong Go.

Sinalubong naman si Pangulong Duterte at Go ng anak ni Roces na si Senator Grace Poe.

Mayo a – bente nang pumanaw si Roces o Jesusa Purificacion Levy Sonora-Poe dahil sa cardiopulmonary arrest o atake sa puso, sa edad na 80.

Nakatakda namang ihimlay ang aktres sa tabi ng puntod ng kanyang asawang si “The King” Fernando Poe Jr., sa Manila North Cemetery, mamayang alas otso ng umaga.

Nakatakda nang itigil ng Overseas Workers Welfare Administration (OWWA) ang transportation at accommodation assistance para sa mga returning Overseas Filipinos Worker (OFW).

 Batay sa advisory ng OWWA sa kanilang official Facebook page, suspendido na ang transpo at accommodation assistance sa Hunyo a – uno, sa ilalim ng alert level 1.

 Sa kabila nito, tuloy ang pagbibigay ng nasabing assistance sa mga distressed OFW na sertipikado ng Philippine Overseas Labor Offices o in-evaluate ng OWWA Airport Officers; at mga babalik sa bansa sa pamamagitan ng government-initiated mass repatriation flights.

 Sasagutin pa rin ng DOLE at OWWA ang accomodation ng mga partially vaccinated o unvaccinated ofw na kailangang isailalim sa mandatory facility-based quarantine.

 Gayunman, hindi na sasagutin ng gobyerno ang pamasahe ng mga OFW na pauwi sa kanilang mga probinsya kaya’t ititigil na rin sa june 1 ang OWWA-chartered bus sa Parañaque Integrated Terminal Exchange (PITX) at OWWA-sweeper flights sa NAIA Terminal 2.

 Nakatakda nang buksan sa mga pasahero ng Philippine National Railways (PNR) ang ruta nitong San Pablo, Laguna hanggang sa Lucena City, Quezon bago matapos ang termino ni Pangulong Rodrigo Duterte.

 Inihayag ni PNR General Manager Junn Magno na isinailalim na sa test ang San Pablo-Lucena Line na muling aarangkada bago mag-Hunyo 30 o magtapos ang termino ni Pangulong Duterte.

 Oktubre 2013 nang itigil ang operasyon ng 44 kilometer Provincial Commuter Railway line na bahagi ng Commuter Train Service patunong Bicol.

 Sa oras na muling mag-operate, magiging isang oras at 15 minuto na lamang anya ang biyahe mula San Pablo hanggang Lucena vice versa.

 Samantala, posible namang hindi lalampas sa 100 pesos ang pamasahe sa nabanggit na ruta.

 Tiniyak ng COMELEC na iimbestigahan at pananagutin ang kanilang mga opisyal at tauhan na mapapatunayang responsable sa pagkawala ng ilang Certificate of Canvass (COC) na hindi agad naipadala sa kongreso.

 Ayon kay COMELEC Spokesman John Rex Laudiangco, magbibigay ng testimonya ang mga sangkot na tauhan upang mabatid kung ang tunay na nangyari at tutukuyin ang kanilang kapabayaan.

 Nagkaroon umano ng ‘procedural error’ sa parte ng poll body, partikular na sa mga Provincial Board of Canvassers.

 Magugunitang ipinagpaliban ng National Board of Canvassers, ang pag-canvass ng mga boto para sa presidente at bise-presidente sa Pampanga, Sultan Kudarat, Surigao del Sur, Mandaluyong City, Sulu at Maynila dahil sa mga nawawalang mga COC.

Base anya sa kanilang initial investigation ay nagkamali ng paglagay ng envelope ang kanilang mga tauhan.

 Samantala, iginiit ni Laudiangco na walang ebidensya na may nangyaring ‘vote shaving’ o padding’ sa halalan noong Mayo a – 9.

Tinanggap na ng kilalang Vlogger at DWIZ Anchor na si Atty. Rose Beatrix Cruz-Angeles, ang nominasyon niya bilang Press Secretary ni incoming President Ferdinand “Bongbong” Marcos Jr.

 Inanunsyo ni Atty. Vic Rodriguez, incoming Executive Secretary ng bagong administrasyon, ang pagtanggap ni Attorney Trixie sa kanyang nominasyon kung saan kanyang pamumunuan ang Presidential Communications Operations Office (PCOO).

 Nagpasalamat naman si Attorney Trixie sa oportunidad na maging bahagi ng administrasyon ni BBM.

 Inihayag naman ni acting Presidential Spokesman Martin Andanar na welcome sa Malacañang ang pagkakatalaga kay Cruz-Angeles bilang bagong Press Secretary.

 Hindi naman na bago si Angeles sa PCOO Dahil nagsilbi ito sa nasabing tanggapan noong bago pa ang administrasyong Duterte.

 Si Attorney Trixie ay isa sa mga host ng programang Karambola sa DWIZ.

Umakyat sa 2,257 ang active COVID-19 cases sa bansa kahapon kumpara sa 2, 235 cases noong Martes.

 Sa datos ng Department of Health (DOH), karagdagang 176 COVID-19 cases ang naitala kahapon dahilan upang lumobo pa sa 3,689,457 ang kabuuang kaso.

 Walang panibagong COVID deaths sa nakalipas na apat na araw.

 Umakyat naman sa 3,626,745 na ang recoveries.

 Samantala, nangunguna pa rin ang National Capital Region (NCR) sa mga rehiyong may pinaka-maraming bagong kaso sa nakalipas na dalawang linggo na 982; Region 4-A, 332 at Region 3, na mayroong 265.

Muling nakasabat ng mga iligal na droga ang mga tauhan ng Bureau of Jail Mangement and Penology (BJMP) sa  Quezon City Jail Male Dormitory sa panibagong greyhound operation na inilarga, kahapon.

 Ito’y kahit na isinailalim sa demolition work ang storage area kung saan nakita ang mas malaking imbakan ng iligal na droga ay nakakapuslit pa rin ang mga kontrabando, partikular na ang shabu at marijuana.

 Ayon sa BJMP, gumamit na sila ng metal detector, jackhammer at sledge hammers sa paghahanap sa iligal na droga sa ilalim ng concrete pavement na pinag-imbakan nito.

 17 pakete ng shabu at isang maliit na pakete ng marijuana ang narekober sa ilalim ng semento habang sampu pang sachet ang natuklasang nakatago sa ilalim ng kahoy na hagdanan patungo sa mezzanine.

 Sa kabuuan, aabot na 53 grams ng shabu na nagkakahalaga ng 360,000 at 3.6 grams ng marijuana ang narekober mula sa male dormitory, bukod pa ito sa ilang improvised weapons.

 Mayo a-13 nang sumiklab ang riot sa nasabing piitan na nagresulta sa pagkakadiskubre sa mga kontrabando sa male dormitory.

Patuloy na gagampanan ni Pangulong Rodrigo Duterte ang kanyang mandato sa bayan hanggang sa huling araw niya sa palasyo.

 Ito ang inihayag ni acting Presidential Spokesman, PCOO Secretary Martin Andanar sa gitna ng nalalabing araw sa pwesto ni Pangulong Duterte.

 Sa Hunyo 30 ay opisyal na magtatapos ang termino ni pangulo at papalitan siya ni President-Elect Ferdinand “Bongbong” Marcos Jr.

Ayon kay Andanar, anuman ang mga naka-schedule sa kalendaryo ni Pangulong Rodrigo Duterte ay tiyak na pagbubuhusan pa rin ito ng oras ng punong ehekutibo.

 Kabilang aniya rito ang mga dapat kaharapin na mga tao at mga official event o mga pagtitipon.

 Samantala, tiniyak din ni Andanar na lahat ng mga dokumento o batas na kailangang lagdaan ng presidente ay kanyang pipirmahan.

 Sinibak sa serbisyo ang nasa 105 pulis sa Police Regional Office (PRO-2) Cagayan Valley dahil sa ibat-ibang mga dahilan.

 Ayon Discipline Law and Order Section (DLOS) Chief Police Major Melchor Aggabao, karamihan sa mga inalis sa puwesto ay napatunayang guilty sa Grave Misconduct at Grave Neglect of Duty o Absence Without Official Leave.

 Ang iba naman ay na-dismiss, ay dahil sa pag-uugaling hindi nararapat sa isang opisyal.

 Bukod pa dito, tinanggal din sa kanila ang lahat ng kanilang benepisyo sa gobyerno bilang bahagi ng internal cleansing campaign sa Philippine National Police (PNP) na nagsimula noong 2016 nang maupo si Rodrigo Duterte bilang pangulo ng bansa.