NATIONAL NEWS

Muling pinalawig ng Department of Transportation (DOTR) ang libreng sakay sa Metro Rail Transit Line (MRT-3).

 Maaaring i-avail ng mga pasahero ang free ride program hanggang sa Hunyo a-30, mula 4:40 ng umaga hanggang 10:10 ng gabi.

Ayon kay Transportation Secreary Arthur Tugade, napagdesisyunan nilang i-extend ang nasabing programa upang mas maraming pasahero ang makinabang at matulungan nito.

 Unang ipinatupad ang libreng sakay sa MRT-3 noong March 28, 2022 hanggang April 30, 2022 at pinalawig hanggang May 30, 2022 upang makatulong sa publiko sa epekto ng mataas na presyo ng produktong petrolyo at bilihin, at bilang selebrasyon na rin sa nakumpletong rehabilitasyon ng tren.

Sinusuri na ng kumpanyang Moderna sa pre-clinical trials ang potential vaccines laban sa Monkeypox virus.

 Ayon sa  World Health Organization (WHO), nasa 131 na ang kumpirmadong kaso ng nasabing virus at 106 pang suspected cases mula nang mai-report ito noong Mayo a-siyete.

 Samantala, sa naging pahayag ng US Centers for Disease Control and Prevention, nasa proseso ng pamahalaan ang paglalabas ng doses ng smallpox vaccine na Jynneos at gawa ng Bavarian Nordic para sa Monkeypox cases.

 Sa ngayon ay wala pang inilalabas na detalye ang Moderna kaugnay sa Monkeypox vaccines.

 Nakatakdang magpulong sa ikalawang linggo ng Hunyo sina Interior Secretary Eduardo Año at susunod na magiging kalihim ng ahensya na si dating MMDA Chairman Benhur Abalos.

 Layunin ng formal meetings ang maayos na transition sa susunod na administrasyon.

 Ayon kay Año, masusundan pa ito ng informal meetings upang maipakilala niya kay Abalos ang mga key person ng local government sector at maging ng interior sector.

 Sinabi pa ng kalihim na nakahanda na ang dilg para sa transition bago pa man idaos ang 2022 elections.

 Tiniyak ni Act Teachers Party-List Representative France Castro na makakatanggap ng 2,000 pesos na karagdagang honoraria ang lahat ng mga gurong nag-overtime sa nagdaang eleksyon.

 Sa panayam ng DWIZ, sinabi ni Castro na nakausap niya si COMELEC Commissioner Marlon Casquejo kung saan, sinabi nitona mayroon nang budget para dito at isinasapinal na ng COMELEC ang listahan.

 Mababatid na inaprubahan ng poll body ang nasabing additional honorarium para sa mga miyembro ng Electoral Board, Department Of Education Supervisor Officials at Support Staff na nagtrabaho ng lampas sa oras.

 Sinabi ni Castro na maliit ang nasabing dagdag-honoraria, kaya’t kanilang ihihirit ang additional service credits.

Mas pinaigting ng pamahalaan ang mga hakbang laban sa panibagong sakit na Monkeypox virus.

 Ayon kay Infectious Diseases Expert Dr. Edsel Salvana ng Department of Health (DOH), nagsasagawa na ng border control kung saan, mahigpit na sinusuri ang mga dayuhan at mga Pilipino bago bumiyahe o sumakay ng eroplano.

 Sinabi ni Salvana na siniguro ng pamahalaan na walang sintomas ang lahat ng mga bibiyahe papasok at palabas ng bansa.

 Dagdag pa ni Salvana, na mayroong strategy ang mga Local Government Units (LGUs) kung saan, isinasailalim sa testing, contact tracing at pagbabakuna ang mga magpapakita ng sintomas ng Monkeypox virus.

 Ang hakbang na ginagawa ng gobyerno ay may layuning makontrol o mapigilan ang pagpasok ng naturang sakit sa Pilipinas.

 Inaprubahan na ng Regional Tripartite Wages and Productivity Board (RTWPB) ang 31 pesos na dagdag sa sahod ng mga manggagawa sa Central Visayas.

 Dahil dito, magiging 435 pesos na ang minimum sa arawang sahod ng mga non-agricultural worker habang 425 pesos naman para sa agricultural workers sa Region 7.

 Bukod pa diyan, aprubado narin ang 500 pesos na dagdag sa buwanang sahod ng mga kasambahay kaya magiging 4,500 pesos hanggang 5,500 pesos na ang magiging sahod nila kada buwan.

 Nakatakda namang isumite ang wage order upang talakayin at busisiin ng National Wages and Productivity Commission.

Posibleng matanggap na sa Biyernes, Mayo a-27 ng mga guro ang dalawang libong pisong honorarium mula sa Commission on Elections (COMELEC).

 Ang nasabing honoraria ay para sa mga gurong nagsilbi at nag overtime noong eleksiyon, Mayo a-nueve matapos magkaroon ng aberya sa mga Vote Counting Machines (VCMs) at mga SD card.

 Ayon kay COMELEC Commissioner George Garcia, aprubado na ang resolusyon para sa dalawang libong dagdag na sahod ng mga guro matapos hindi maaprubahan ang hiling ng Department of Education (DEPED) na tatlong libong pisong honoraria.

Sa ngayon, inaalam na ng COMELEC ang eksaktong bilang ng mga pangalan ng electoral board o ng mga gurong nag-extend ng kanilang duty sa nagdaang eleksiyon.

Ikakasa ng Commission on Elections (COMELEC) mamayang hapon, Mayo a-26 ang proklamasyon para sa mga nanalong partylist group sa 2022 national and local elections.

 Ito ay matapos makumpleto ng komisyon ang pagbibilang ng mga boto sa mga resulta ng special elections sa tubaran, Lanao del Sur.

 Matatandaang sinabi ng COMELEC na posibleng makaapekto ang mga nakuhang boto mula sa Lanao del Sur para sa ika-62 hanggang ika-64 na puwesto ng partylist group.

 Sisimulan ang proklamasyon ganap na alas-kuwatro mamayang hapon.

Kumpiyansa ang National Economic and Development Authority (NEDA) na kayang mapababa ang utang ng Pilipinas sa ibang mga bansa sa tulong ng bagong papasok at uupong administrasyon.

 Nabatid na naiproklama na bilang president elect si Ferdinand “Bongbong” Marcos Jr. at vice president elect Sara Duterte-Carpio.

 Ayon kay NEDA Chief Karl Kendrick Chua, kabilang sa posibleng maging solusyon ay ang mas pinaigting na pagkokolekta ng buwis at pagbabalik ng face to face classes para tuluyang makabangon at magbukas ang ekonomiya ng bansa.

 Iginiit ni Chua na dapat mapagtuunan ng pansin ni Marcos ang lahat ng panukala at programang hindi natuloy bunsod ng COVID-19 pandemic.