NATIONAL NEWS

Ikakasa ng Commission on Elections (COMELEC) mamayang hapon, Mayo a-26 ang proklamasyon para sa mga nanalong partylist group sa 2022 national and local elections.

 Ito ay matapos makumpleto ng komisyon ang pagbibilang ng mga boto sa mga resulta ng special elections sa tubaran, Lanao del Sur.

 Matatandaang sinabi ng COMELEC na posibleng makaapekto ang mga nakuhang boto mula sa Lanao del Sur para sa ika-62 hanggang ika-64 na puwesto ng partylist group.

 Sisimulan ang proklamasyon ganap na alas-kuwatro mamayang hapon.

Kumpiyansa ang National Economic and Development Authority (NEDA) na kayang mapababa ang utang ng Pilipinas sa ibang mga bansa sa tulong ng bagong papasok at uupong administrasyon.

 Nabatid na naiproklama na bilang president elect si Ferdinand “Bongbong” Marcos Jr. at vice president elect Sara Duterte-Carpio.

 Ayon kay NEDA Chief Karl Kendrick Chua, kabilang sa posibleng maging solusyon ay ang mas pinaigting na pagkokolekta ng buwis at pagbabalik ng face to face classes para tuluyang makabangon at magbukas ang ekonomiya ng bansa.

 Iginiit ni Chua na dapat mapagtuunan ng pansin ni Marcos ang lahat ng panukala at programang hindi natuloy bunsod ng COVID-19 pandemic.

Nagsasagawa na ng imbestigasyon ang Commission on Human Rights (CHR) hinggil sa naganap na girian sa pagitan ng mga militanteng grupo at mga tauhan ng Philippine National Police (PNP) sa Quezon City.

 Ayon kay CHR Executive Director Atty. Jacqueline de Guia, karapatan ng mga Pilipino na magdaos o magsagawa ng pagkikilos kung saan, kailangang magkaroon ng maximum tolerance o mahabang pasenya ang mga pulis sa lahat ng pagkakataon.

 Sa kabila nito, nanawagan ang CHR sa mga raliyista na maging responsable sa pagpapahayag ng kanilang saloobin sa gobyerno.

Nagpaabot ng pagbati ang Malacañang matapos ang proklamasyon nina president elect Ferdinand “Bongbong” Marcos Jr. at vice president elect Sara Duterte-Carpio.

 Ayon kay Presidential Spokesperson at Presidential Communications Operations Office (PCOO) Secretary Martin Andanar, ang proklamasyon sa dalawang mataas na posisyon sa bansa ay malinaw na bagong kasaysayan sa mundo ng politika.

 Nanawagan naman sa taumbayan si Andanar na suportahan ang mga bagong halal na pangulo at bise pangulo para sa kanilang pagsisimula na magampanan at harapin ang mga hamon sa seguridad ng kanilang tangapan.

Pinasalamatan ni vice-president elect Sara Duterte-Carpio ang publiko sa pagbigay ng tiwala at suporta mula sa kanilang naging kampaniya hanggang sa kanilang proklamasyon.

 Kabilang din sa kaniyang pinasalamatan ay ang Commission on Elections (COMELEC), mga guro na nagsilbing polll watchers at mga miyembro ng kongreso hinggil sa mapayapa at maayos na eleksiyon.

 Pinasalamatan din ni Duterte, ang mga tauhan ng Philipppine National Police (PNP) at Armed Forces of the Philippines (AFP) sa pagtiyak at mahigpit na pagmo-monitor ng botohan maging ng bilangan ng mga boto.

 Sa kabila nito, nangako si Duterte na kaniyang gagampanan ang tungkulin o serbisyo at susuportahan ang bansa laban sa terorismo, pang-aabuso at kriminalidad.

 Pinasalamatan din ni Inday ang lahat ng bumoto at nagtiwala sa kanila ni president elect Ferdinand “Bongbong” Marcos Jr. Sa pagbigay ng pagkakataon na pamunuan ang Pilipinas tungo sa mapayapa at nagkakaisang bayan.

Humiling sa taumbayan ng mataimtim na pagdarasal si president elect Ferdinand “Bongbong” Marcos Jr.

 Ayon kay Marcos, ito ay para magampanan ang kaniyang tungkulin bilang bagong pangulo ng Pilipinas.

 Sinabi ni Marcos sa taumbayan, na kaniyang gagawin ang responsibilidad na ibinigay sakaniya ng mga tagasuporta ng BBM-SARA uniteam.

 Umaasa si Marcos na makikipagtulungan ang publiko sa bagong administrasyon upang mas mapaganda at mas maiayos pa ang bansa.

Nagpasalamat naman si Marcos sa lahat ng bumoto sakanila ni vice president elect Sara Duterte-Carpio at nangakong gagawin ang lahat ng kanilang makakaya para sa bayan.

Nakapagtala na ng unang kaso ng Monkeypox virus ang United Arab Emirates (UAE) na kauna-unahang nagkaroon ng nasabing sakit sa Arab States of the Persian Gulf.

 Ang Arab States of the Persian Gulf ay binubuo ng Kuwait, Bahrain, Qatar, UAE, Oman, Saudi Arabia at Iraq.

 Kabilang pa sa mga bansang nakapagtala ng kaso ng Monkeypox virus ay ang Australia; Austria; Belgium; Czech Republic; Denmark; Finland; France; Germany; Italy; Netherlands; Portugal; Slovenia; Madrid, Spain; Sweden; Switzerland; England, United Kingdom; Israel; Argentina; Quebec Province, Canada; at United States.

 Inaasahan naman na mas tataas pa ang bilang ng kaso ng Monkeypox virus sa buong mundo.

 Samantala, naniniwala ang maraming eksperto na nananatiling mababa ang overall risk  nito sa general population.

Makakaranas ng mainit at maalinsangang panahon ang bahagi ng Luzon, maliban nalang sa mga tiyansa ng pag-ulan sa hapon hanggang sa gabi dala ng localized thunderstorm.

 Ayon kay DOST-PAGASA Weather Forecaster Daniel James Villamil, asahan na magiging generally fair weather condition ang Visayas pero posibleng ulanin na may kasamang pagkulog at pagkidlat sa hapon hanggang sa gabi.

 Mababa naman ang tiyansa ng pag-ulan sa bahagi ng Mindanao pero maaaring makaranas ng pag-ulan sa hapon hanggang sa gabi kabilang na diyan ang Cagayan De Oro, Zamboanga at Davao region.

 Agwat ng temperatura sa Metro Manila ay maglalaro sa 26 hanggang 33 degrees celsius habang sisikat naman ang haring araw mamayang 5:26 ng umaga at lulubog naman ito mamayang 6:20 ng hapon.

Matapos ang isinagawang canvassing ng kongreso ay opisyal nang inhayag ang panalo nina Ferdinand Marcos Jr. sa pagka-pangulo at Sara Duterte sa pagka-pangalawang pangulo sa nakaraang May 9 elections.

Dumalo sina Marcos at Duterte sa proklamasyon na isinagawa matapos na ideklara ng senado at kamara de representantes ang kanilang panalo.

Mababatid na dalawang araw lamang ang itinagal ng canvassing, kung saan na-canvass ng kongreso ang 98.84% ng mga boto o 171 sa 173 na certificates of canvass.

Hindi naman naisama sa canvassing ang boto mula sa Syria at Buenos Aires dahil hindi dumating sa oras ang resulta nito sa kongreso.

Samantala, sa kabuuan ay nakakuha ng 31,629,783 votes si Marcos na sinundan ni Vice President Leni Robredo na nakapagtala ng 15,035,773 na boto.

Si Duterte naman ay nakakuha naman ng 32,208,417 votes habang nakakuha naman ng 9,329,207 ang pumangalawa sakanya na si Sen. Kiko Pangilinan.

Inamin Ng National Economic and Development Authority (NEDA) na isang malaking banta sa ekonomiya ng bansa ang muling pagsirit ng kaso ng COVID-19.

Ayon kay NEDA Secretary Karl Kendrick Chua, malaki ang nagiging epekto ng COVID-19 sa domestic economy.

Aniya, mahalaga pa rin sa ngayon na ipagpatuloy ang programa ng pagbabakuna at dapat unahin ang mga bata at senior citizen sa vaccination program dahil sila ang vulnerable sa mga sakit.

Dagdag pa ng kalihim, ang mga naturang patakaran at mga reporma ay mahusay para mapalago ang domestic economy.