NATIONAL NEWS

Binaha ang ilang lugar sa Quezon City matapos ang malakas na pag-ulan kahapon na inabot ng halos dalawang oras.

 Dahil dito, hindi madaanan ng mga sasakyan ang ilang mga kalsada sa nabanggit na lungsod dahil sa baha.

 Kabilang sa mga binaha ang kahabaan ng araneta avenue kasama na ang maranto patungong Sto. Domingo at Calamba St. patungong Maria Clara St. sa Quezon Avenue.

 Sa ngayon, tumigil na ang pagbuhos ng ulan sa Metro Manila pero asahan pa rin ang pulu-pulong mga pag-ulan, pagkulog at pagkidlat sa hapon hanggang sa gabi bunsod parin ng localized thunderstorms.

Itutuloy ni President elect Ferdinand “Bongbong” Marcos Jr. ang kaniyang ipinangako sa taumbayan noong kampanya na babaan ang presyo o halaga ng bigas sa bansa.

Nabatid na ibababa ni Marcos sa 20 pesos ang presyo sa kada kilo ng bigas sa pamamagitan ng pagtatakda ng price cap at pagbuo sa value chain.

Ayon kay Marcos, magiging hakbang ng kaniyang administrasyon ay ang pagpapanatili ng presyo sa ilang buwan ang mga bigas.

Sa ngayon, patuloy pang nakikipag-usap si Marcos sa mga trader upang i-hold ng ilang buwan ang presyo ng bigas sa Pilipinas.

Ikinatuwa ng mga negosyante ang ginawang pagtatalaga ni President elect Ferdinand “Bongbong” Marcos Jr. sa mga miyembro ng kaniyang economic team.

 Sa pahayag ng Makati Business Club, magbibigay umano ng kumpiyansa sa mga lokal na dayuhan at negosyante ang mga itinalagang miyembro para sa economic team dahil mas maraming karanasan ang mga napili ni Marcos.

 Mas mabilis ding maisusulong ng Marcos administration ang mga polisiya hinggil sa paglikha ng trabaho, kompetisyon at pagrekober ng ekonomiya ng bansa.

 Inihayag naman ng mga bagong talagang miyembro ng economic team na handa sila sa mga hamon upang mapalakas at muling maibangon ang ekonomiya ng Pilipinas.

 Nangako din sila na gagawin ang lahat ng kanilang makakaya para masiguro ang maayos na pamamalakad sa economic team.

Ipaprayoridad ng bagong administrasyon ang ekonomiya ng bansa sakaling manungkulan na si President elect Ferdinand “Bongbong” Marcos Jr. at Vice President elect Sara Duterte-Carpio sa Malacañang.

 Matapos ang proklamasyon ni Marcos ay agad niyang sinimulan ang kaniyang trabaho kung saan, nagsagawa ng pagpupulong kasama ang mga lider ng kamara at senado para pag-usapan ang mga dapat gawin para sa mapayapa at maayos na bansa.

 Tinukoy narin ni Marcos ang magiging miyembro ng economic team sa ilalim ng kaniyang administrasyon kabilang na diyan ang kasalukuyang  Bangko Sentral ng Pilipinas (BSP) governor na si Benjamin Diokno na itatalaga sa Department of Finance (DOF).

 Papalit naman sa posisyon ni Diokno si BSP Monetary Board member na si Felipe Medalla habang pamumunuan naman ni dating UP President at Management Association President Alfredo Pascual ang Department of Trade and Industry (DTI).

 Samantala, plano din ni Marcos na kuhanin si SMC Tollways CEO Manuel Bonoan bilang Public Works Secretary at dating Congressman Anton Lagdameo bilang susunod na Special Assistant to the President.

 Sa ngayon, hinihintay pa ni Marcos ang tugon nina Congressman Rodante Marcoleta at Professor Clarita Carlos kung sa tingin nila ay malaki ang kanilang maitutulong sa gobyerno.

Nilinaw ng Department of Agriculture (DA) na ang ginagamit na patatas ng mga fastfood chain sa Pilipinas ay ang mga inaangkat mula sa ibang bansa na tinatawag na chicken potatoes.

 Ito ay hindi itinatanim sa Pilipinas dahil iba ang klima ng bansa at hindi naaayon o umaakma sa pagtatanim nito.

 Sa panayam ng DWIZ sinabi ni DA Assistant Secretary Kristine Evangelista na tanging ang white potato o table potato lamang ang itinatanim ng mga magsasaka sa Pilipinas.

 Ang white potato o table potato ay hindi maaaring gamitin sa paggawa ng frenchfries na paborito ng mga kabataan at kadalasang nakikita sa mga fast food chain.

 Ayon pa kay Evangelista, nagsasagawa na ng testing ang kanilang ahensya sa mga lugar sa Pilipnas na may malamig na temperatura para sa pagtatanim ng chicken potatoes dahil mas mataas ang demand nito sa bansa kumpara sa Filipino potatoes.

Patuloy pa rin ang maaliwalas at maalinsangang panahon sa bahagi ng Luzon kasama na diyan ang Metro Manila bunsod ng isolated rain showers at localized thunderstorm.

 Ayon kay PAGASA Weather Specialist Raymond Ordinario, mataas pa rin ang antas ng temperatura ngayong araw kaya huwag kalilimutang uminom ng tubig at laging magdala ng payong bilang panangga sa matinding sikat ng araw at para maiwasan ang dehydration.

 Asahan naman ang maulap na kalangitan na may kalat-kalat na pagkulog at pagkidlat sa bahagi ng Visayas at Mindanao.

 Agwat ng temperatura sa Metro Manila ay maglalaro sa 24 hanggang 34 degrees celsius habang sisikat naman ang haring araw mamayang 5:26 ng umaga at lulubog naman ito mamayang 6:20 ng hapon.

Ipinroklama na ng Commission on Elections (COMELEC), ang mga nagwaging party-list group nitong nagdaang 2022 National and Local Elections.

Tumanggap ng Certificates of Proclamation sa seremonya ang may kabuuang 55 party-list group kaninang hapon sa Pasay City.

Mababatid na mayroong 63 puwesto na inilaan para sa mga party-list na mambabatas.

Kung saan nanguna ang ACT-CIS (Anti-Crime and Terrorism Community Involvement and Support) na nakakuha ng tatlong upuan sa 19th congress.

May tig-2 seats naman ang 1-rider partylist, tingog, 4ps, ako bicol at sagip.

Pasok rin ang mga bagong party-list na APEC, Pusong Pinoy, Tucp, Patrol, Manila Teachers, Aambis Owa, Philreca at Alona.

Samantala, ang mga sumusunod na grupo ay magkakaroon ng tig-isang puwesto sa mga party-list seat:

• ANG PROBINSYANO
• USWAG ILLONGGO
• TUTOK TO WIN
• CIBAC
• SENIOR CITIZENS PARTYLIST
• DUTERTE YOUTH
• AGIMAT
• KABATAAN
• ANGAT
• MARINO
• AKO BISAYA
• PROBINSYANO AKO
• LPGMA
• API
• GABRIELA
• CWS
• AGRI
• P3PWD
• AKO ILOCANO AKO
• KUSUG TAUSUG
• AN WARAY
• KALINGA
• AGAP
• COOP NATCO
• MALASAKIT@BAYANIHAN
• BHW
• GP PARTY
• BH
• ACT TEACHERS
• TGP
• BICOL SARO
• DUMPER PTDA
• PINUNO
• ABANG LINGKOD
• PBA
• OFW
• ABONO
• ANAKALUSUGAN
• KABAYAN
• MAGSASAKA
• 1-PACMAN
• APEC
• PUSONG PINOY
• TUCP
• PATROL
• MANILA TEACHERS
• AAMBIS-OWA
• PHILRECA
• ALONA

Ipinauubaya na sa susunod na administrasyon ng Malacañang kung may pangangailangan pang magsumite ng courtesy resignation ang mga appointed officials sa ilalim ng duterte administration.

Ayon kay acting presidential spokesman Martin Andanar, ang pag-papasya kung kailangan pang pormal na magbitiw ang mga opisyal na inappoint ni Pangulong Rodrigo Duterte ay naka depende na sa bagong administrasyon.

Sinabi rin ng kalihim na hindi na kailangang magsumite pa ng resignation ng mga opisyal at kawani ng gobyerno na coterminous.

Aniya, otomatiko ba na matatapos ang termino ng mga co-terminus sa june 30 kasabay ng pagbaba sa puwesto ni Pangulong Duterte.

Inihayag ni President-Elect Ferdinand ‘Bongbong’ Marcos Jr., na walang problema kung piliin ng sambayanan na tawagin siya na PBBM kapag siya ay opisyal nang nanungkulan sa Malacañang.

Ayon kay Marcos, mayroong nagbigay ng suhestiyon na PBBM sakanya at kilala na rin siya ng publiko na BBM dahil sa kanyang pangangampanya.

Matatandaan na noong nasa senado pa si Marcos ay tinatawag itong sbbm.

Samantala, mababatid na magsisimula ang anim na taong termino ni Marcos sa tanghali ng Hunyo 30.

Tiniyak ni President-Elect Ferdinand Bongbong Marcos Jr., na mas paiigtingin ng kanyang administrasyon ang paglaban kontra sa kurapsiyon.

Inihayag ni Press Secretary-Designate Atty. Trixie Cruz-Angeles, na walang puwang ang katiwalian sa gobyerno subalit nakakalungkot isipin na nakaugat na umano ito sa pamahalaan.

Nabatid na umaasa si marcos na hindi aabot sa puntong kailangan palitan ang lahat ng kawani sa isang ahensiya bunsod ng kurapsiyon, ngunit iminungkahi niya na handa siya na gawin ito kung kinakailangan.

Aniya, hindi magtatagumpay ang Pilipinas kung magpapatuloy ang kalakaran ng katiwalian sa mga ahensiya ng gobyerno.