NATIONAL NEWS

Hindi magtataas ng presyo sa pasahe ang Light Rail Transit (LRT-1) matapos hindi aprubahan ng Department of Transportation (DOTR) ang hirit sa taas pasahe sa gitna ng pagtaas ng presyo ng mga bilihin.

 Ayon kay DOTR Undersecretary Timothy John Batan, tali ang kamay ng departamento sa panukalang pagtaas ng pamasahe ng LRT-1.

 Matatandaang sinampahan ng kaso ng Light Rail Manila Corporation (LRMC) noong unang bahagi ng buwan ang DOTR at light Rail Transport Authority (LRTA) dahil sa kawalan ng aksyon sa kanilang fare adjustment applications.

 Sa ngayon, pinag-aaralan pa ng DOTR ang susunod na hakbang hinggil sa kasong inihain ng LRMC.

 Sa kasalukuyan, ang halaga ng pasahe sa LRT-1 ay mula 15 pesos hanggang 30 pesos.

Hinikayat ng Manila LGUs ang publiko na samantalahin na ang pagbisita sa Manila Zoo habang libre pa ng entrance nito.

 Ayon sa pamahalaang lokal, umaabot sa libu-libong katao ang naaakit at bumibisita sa pinaka bagong pasyalan kada araw.

 Nabatid na nasa kabuuang sampung libo ang bilang ng mga bumibisita sa isang ordinaryong araw.

 Nagpaalala naman ang pamunuan ng zoo na sa susunod na buwan, maaaring magsara muna ang zoo bilang paghahanda sa formal operations nito.

 Patay ang isang motor-rider matapos mawalan ng preno ang isang trailer truck sa bahagi ng Ortigas Avenue kanto ng E. Rodriguez Avenue, C-5 Road sa Brgy. Ugong, Pasig City.

 Kinilala ang nasawing biktima na si Jhames Morga, 29-anyos, isang fitness ambassador, at residente ng Edsa South Triangle, Quezon City.

 Ayon sa mga otoridad, pitong sasakyan ang inararo ng nasabing truck na minamaneho ng suspek na kinilalang si Francis Figueroa, 42-anyos at residente ng Navotas City.

 Base sa imbestigasyon, magde-deliver sana ng mga kargang perishable goods o mga prutas at gulay ang naturang truck nang bigla itong mawalan ng preno at kontrol ang manibela.

 Ditto na naararo ng trailer truck ang tatlong Sports Utility Vehicle (SUV), tatlong motorsiklo at isang bus na nasa unahan nito at kasalukuyang nakatigil dahil sa trapik.

 Nakapiit na sa Pasig Traffic Division ang suspek at mahaharap sa kasong reckless imprudence resulting in homicide and multiple damage to property.

Gagawing pangunahing isolation facility ng Department of Health (DOH) ang Research Institute for Tropical Medicine (RITM) sa Muntinlupa City sakaling may magpositibo sa monkeypox virus.

 Nakikipagtulungan na ang Doh sa Field Implementation and Coordination Team (FICT) at ang One Hospital Command Center (OHCC) kaugnay hinggil sa naturang pasilidad.

Base sa Memorandum no. 2022-0220 o ang Interim Technical Guidelines for the Implementation of Monkeypox, magkakaroon ng surveillance screening, management, and infection control sa gitna ng ikinakasang 4-door alert system.

 Ito ay para maiwasan at makontrol ang paglaganap ng nasabing sakit na mabilis makahawa kumpara sa iba pang virus.

 Inatasan na rin ang mga ospital ng gobyerno na maglaan ng mga isolation at treatment facilities sakaling magkaroon ng aktibong kaso ng monkeypox virus.

 Sa ngayon, mahigpit na binabantayan ng DOH ang sitwasyon ng naturang sakit sa buong bansa at sa buong mundo.

Muling iginiit ng Department of Health (DOH) na ligtas at epektibo ang lahat ng mga bakuna laban sa COVID-19.

Ayon sa DOH, ang mga bakunang binili ng gobyerno ay masusing pinag-aralan ng mga eksperto upang gamiting lunas laban sa nakakahawang sakit sa buong bansa at sa buong mundo.

Hinimok naman ng DOH ang publiko na bisitahin ang kanilang officials website upang maiwasan ang mga maling impormasyon na kumakalat sa social media hinggil sa mga bakuna.

Nilamon ng apoy ang dalawang bahay matapos sumiklab ang isang sasakyang nasa garahe sa Barangay Sta. Teresita, Quezon City.

 Ayon kay Agham Fire Station Commander Insp. Alex Maglaya, inabot ng mahigit isang oras bago idineklarang fire under control dahil gawa sa mga light materials ang naabong mga bahay.

 Wala naman naiulat na nasawi o nasugatan habang iniimbestigahan pa ng Bureau of Fire Protection (BFP) ang sanhi ng sunog.

 Naka-high alert status ngayon ang PNP Region-12 matapos maganap ang pagsabog sa isang bus sa Koronadal City, South Cotabato.

 Ayon kay PNP Region 12 Commander Brig. Gen. Alexander Tagum, isang tricycle driver at isang sibilyan ang nasugatan kung saan, nagpakalat na sila ng mga tauhan na mag-iikot at magbabantay sa nabanggit na lugar.

 Sinabi pa ni Tagum na bumuo narin ang kanilang ahensya ng task group upang tutukan ang imbestigasyon at huhuli sa mga salarin.

Samantala, nanawagan naman sa publiko ang PNP Region 12 na i-report sakanilang tanggapan sakaling may makitang kahina-hinalang kilos sa nabanggit na lugar.

Hinihintay na lang ng pamahalaan ang abiso mula sa World Health Organization (WHO) hinggil sa pagbili o paggamit ng Pilipinas ng mga bakuna ng smallpox na gagamitin laban sa monkeypox virus.

 Ayon kay National Taskforce against covid-19 Special Adviser Dr. Ted Herbosa, wala pang inilalabas na panuntunan ang who hinggil sa naturang sakit.

 Base sa pag-aaral ng mga eksperto, nasa 80% epektibo ang bakuna ng smallpox laban sa bagong virus na matagal nang ginagamit sa Africa.

 Sa ngayon, wala pang naitatalang kaso ng monkeypox sa Pilipinas.

Tumaas ang presyo ng asukal sa mga pamilihan sa Metro Manila at iba pang lugar sa bansa.

 Nabatid na mula sa dating 1, 500 hanggang 1, 700 pesos, pumalo na sa 3,250 pesos ang kada sako ng asukal na puti.

 Mula sa dating 2,000 pesos, maglalaro naman sa 2,700 pesos hanggang p3,000 pesos ang kada sako ng asukal na pula.

 Ayon sa Sugar Regulatory Administration (SRA), nagkulang ang suplay ng asukal matapos masira ang ilang sugar refinery sa Negros dahil sa mga nagdaang bagyo.

 Dahil dito, posibleng umabot ng tatlong buwan ang itatagal sa mga stock ng raw sugar at halos dalawang buwan naman para sa refined sugar bago dumating ang susuod na tonelada ng mga asukal na aabot sa apat na milyong sako mula sa China at Vietnam.

Limitado ngayon ang pagpalaot ng mga mangingisda dahil sa patuloy na paggalaw sa presyo ng produktong petrolyo sa international market.

Ayon sa Bureau of Fisheries and Aquatic Resources (BFAR), nahihirapang pumalaot ang mga mangingisda maging ang mga maliliit na sasakyang pandagat dahil sa mataas na presyo ng krudo.

Dahil dito, nagkukulang ang suplay ng isda kung saan, kinakailangang palawigin ang pag-aangkat ng imported na isda sa bansa.

Sa datos ng BFAR nasa 90 libong metrikong tonelada ng isda ang inaasahang kakapusan sa mga susunod na quarter ng taon.

Sinabi ng BFAR na mayaman ang Pilipinas sa produksiyon ng isda pero hindi sapat ang catching effort dahil sa limitadong pagpalaot ng mga mangingisda.