NATIONAL NEWS

Kinastigo ni Migrant Workers Secretary Abdullah Mama-O si Labor Secretary Silvestre Bello, III sa pagharang nito sa kautusan na nag-re-assign sa mga opisyal at empleyado ng Philippine Overseas Employment Administration (POEA).

Sa liham na ipinadala sa tanggapan ni Bello, iginiit ni Mama-O na walang “pakialam” ang kapwa kalihim sa re-assignment at designation ng 16 na POEA Officials, na karamihan ay division chiefs at directors sa mga bagong tungkulin.

Ayon kay Mama-O, walang ligal na batayan si Bello upang sabihing hindi pa umiiral ang Department of Migrant Workers.

Wala rin anyang pakialam ang labor secretary sa sinuman at lahat ng opisyal at personnel ng POEA.

Sa memorandum ni Bello kay POEA Administrator Bernard Olalia noong May 23, hindi maaaring ipag-utos ni Mama-O ang re-assignment ng sinumang opisyal at empleyado ng POEA dahil nasa ilalim pa rin ito ng DOLE at wala pang implementing rules and regulations ang DMW.

Disyembre lamang noong isang taon nang lagdaan ni Pangulong Rodrigo Duterte ang batas na nagtatag sa  DMW.

Tiniyak ni incoming President Bongbong Marcos Jr, na ipagtatanggol ng kanyang administrasyon ang soberanya ng Pilipinas sa pamamagitan ng pakikipag-usap sa China nang may paninindigan.

 Sa kanyang kauna-unahang press briefing matapos iproklama bilang presidente, inihayag ni Marcos na sagrado ang soberanya ng bansa at hindi ito dapat i-kompromiso anuman ang mangyari.

 Sa usapin naman ng West Philippine Sea (WPS), iginiit ni BBM na sa ilalim ng kanyang administrasyon ay walang kahit isang bahagi ng teritoryo ng naturang karagatan ang ma-aangkin o masasagasaan, lalo ng ibang claimants.

 Samantala, binigyang-diin ni Marcos na hindi kailanman makikipag-giyera ang Pilipinas sa Tsina para lamang igiit ang karapatan sa WPS.

 Magsasagawa ng “Motu Proprio Investigation” ang Commission on Human Rights (CHR) sa Region 2 sa diumano’y panghahalay at pagpatay sa sampung taong gulang na babae sa Santiago City, Isabela.

 Natagpuan ang bangkay ng bata noong Miyerkules sa Mabiret River, Purok 4 sa Barangay Balluarte.

 Ayon kay CHR Spokesperson Jacqueline Ann de Guia, nakababahala ang ganitong mga krimen, lalo’t may kahalintulad din itong insidente sa Batangas kung saan limang taong gulang naman ang biktima.

 Kinudena naman ng komisyon ang karumal-dumal na krimen at iba pang uri ng karahasan sa kabataan, partikular sa mga menor de edad.

 Samantala, nakiramay din si de Guia at buong CHR sa mga naulilang pamilya at mahal sa buhay ng dalawang paslit.

Dalawa hanggang tatlong trabaho ang kailangan ng mga Filipino upang maka-alpas sa tanikala ng kahirapan.

Ito, ayon kay Commission on Population and Development Executive Director Juan Antonio Perez, III, ang mga dapat ikunsidera ng susunod na administrasyon sa pagkakaloob ng living wage upang mapigilan ang tumataas na poverty incidence sa bansa.

Ipinapanukala anya nila sa POPCOM Board na pag-aralan ang posibilidad na magkaroon ng living wage sa halip na minimum wage na hindi makasabay sa tumataas na cost of living.

Una nang itinakda ng Philippine Statistics Authority (PSA) sa 12,000 pesos kada buwan ang poverty threshold kahit ang minimum wage sa karamihan ng rehiyon ay mababa pa sa poverty threshold.

Ipinunto ni Perez na kung sa NCR nakatira ang isang pamilya na may dalawang anak, dapat ay kapwa may trabaho ang mga magulang.

Gayunman, sa labas ng NCR, gaya sa Southern Luzon, Visayas at Mindanao, kailangan ng tatlong trabaho batay sa minimum wage.

Ipauubaya na ng palasyo sa susunod na administrasyon at economic team ni President-elect Bongbong Marcos Jr. ang pagpapataw ng bagong buwis.

 Magugunitang isinulong ng Department of Finance (DOF) ang nasabing hakbang kung saan nais ipagpaliban ang mga personal income tax reductions at ipinatatanggal ang ilang tax exemptions upang makalikom ng pondo upang makabayad ang gobyerno sa utang ng bansa.

 Ayon kay acting presidential spokesman at Communications Secretary Martin Andanar, nasabing mungkahi ni Finance Secretary Carlos Dominguez III ay dapat pagpasyahan ng susunod na administrasyon.

 Layunin ng plano na matiyak na epektibong matutugunan ang kakulangan sa budget habang pinopondohana ang mga imprastruktura, edukasyon, healthcare at ekonomiya.

 Samantala, pag-aaralan ni outgoing Bangko Sentral ng Pilipinas (BSP) Governor at incoming Finance Secretary Banjamin Diokno ang mga bagong panukala sa pagpapatupad ng mga bagong buwis.

Isa pang hinihinalang miyembro ng Daulah Islamiyah-Turaife group ang patay sa nagpapatuloy na operasyon ng militar sa bayan ng Datu Salibo, Maguindanao.

 Kinilala ng Philippine Army-6th Infantry Division ang nasawing si Abdul Patir, na miyembro umano ng Bangsamoro Islamic Freedom Fighters-Karialan Faction (BIFF).

 Lunes nang mapatay naman sa airstrike ang isa pa umanong BIFF member na si Sadam Salandang alyas Sadam sa sitio patawali, Barangay Ganta.

 Nasa 17 pang bandido kabilang ang pinuno nilang si Abu Turaife ang sugatan sa operasyon.

 Samantala, nagsilikas na ang mga residente sa naturang lugar at pansamantalang tumutuloy sa daycare centers sa kanilang mga barangay.

Kinausap na ni President-elect Ferdinand “Bongbong” Marcos Jr. sina House Deputy Speaker Rodante Marcoleta at retired U.P. Professor Clarita Carlos hinggil sa kanilang potential appointments sa ilalim ng kanyang administrayson.

 Ayon kay Marcos, hinihintay pa niya ang tugon nina Marcoleta at Carlos kung ano ang magiging papel na nais ng mga itong gawin sa gobyerno.

 Malaking tulong anya ang tulong sa pamahalaan ng “legal prowess” ni Marcoleta, na kinatawan ng Sagip Party-List at tumakbong senador sa ilalim ng Marcos ticket sa 2022 elections pero umatras.

 Aminado naman ang susunod na pangulo na makatutulong si Carlos sa kanyang administrasyon sa pamamagitan ng kaalaman sa foreign policy at international politics.

 Hindi malayong amyendahan ng susunod na administrasyon ni incoming President Bongbong Marcos Jr. ang Electric Power Industry Reform Act (EPIRA) upang mapababa ang presyo ng kuryente.

 Ayon kay Marcos, dapat maging mahigpit sa pagpapatupad ng EPIRA pero dapat ding silipin ang posibilidad na amyendahan ito lalo’t may ilang probisyon sa nasabing batas ang “outdated” na.

 Gayunman, hindi tinukoy ng susunod na pangulo kung anong probisyon ng EPIRA ang nais nitong amiyendahan.

 Taong 2001 nang pagtibayin sa ilalim ng Arroyo administration ang naturang batas, na layuning tiyakin ang maaasahan at murang kuryente.

 Samantala, bumuo na si Marcos ng grupong titingin kung anong items sa electricity bills ang maaaring ibaba para maibsan ang pasanin ng mga consumers.

Aminado si President-elect Ferdinand “Bongbong” Marcos Jr. na mayroon siyang reservations hinggil sa ratipikasyon ng Mega Trade Deal Regional Comprehensive Economic Partnership (RCEP), kung saan ang Pilipinas ang signatory.

 Inihayag ni Marcos na nais niyang makita kung paano at ano ang magiging epekto ng RCEP sa agriculture sector ng bansa.

 Dapat anyang talakayin muna na hindi malulugi ang ating agri- sector sa sandaling ratipikahan ito at dapat handa na ang sistema pagdating sa kompetisyon.

 Ang RCEP, ay isang trade agreement sa pagitan ng sampung miyembro ng ASEAN kasama ang China, India, Japan, South Korea, Australia at New Zealand, na inaprubahan ng malakanyang noong Setyembre at isinumite sa senado upang sang-ayunan.

Umabot na sa mahigit 500 bilyong piso ang halaga ng epektong idulot ng climate change sa ekonomiya ng Pilipinas.

 Ayon kay Robert Borje, Vice Chairperson at Executive Director ng Climate Change Commission, lumala ang epekto ng climate change sa bansa maging sa iba pang developing countries.

 Sinabi ni Borje na ang Pilipinas ang nakararanas ngayon ng severe weather and climate matters kung saan, aabot sa 1.6 billion dollars o katumbas ng 60% na budget ang naitalang pinsala sa agrikultura sa mga nagdaang bagyo sa bansa.

 Dahil dito, nasa 60 hanggang 65% na mga Pilipino ang apektado bunsod ng climate change.