NATIONAL NEWS

Ikinokonsidera ng global alliance covax facility na palitan ang mga mag-eexpire na COVID-19 vaccines ng bansa sa June 30.

Ito ang sinabi ni National Vaccination Operations Center (NVOC) Chair at Health Undersecretary Myrna Cabotaje kung saan nakikipag-ugnayan na sila sa covax para sa replacement ng mga bakuna na binili ng gobyerno at ng pribadong sektor.

Nabatid na nasa 2M doses ng COVID-19 vaccines ang nakatakdang masira sa naturang buwan.

Nasa 2M doses ng bakuna laban sa COVID-19, mag-eexpire sa June 30

Nasa 2M COVID-19 vaccine doses ang inaasahang mag-eexpire sakaling hindi magamit sa June 30.

Ito ang sinabi ni Department of Health Undersecretary Myrna Cabotaje pero sa katapusan ng buwang ito pa malalaman ang kabuuang bilang ng mga bakunang masasayang.

Dagdag pa niya na nagsumite na ang kagawaran ng demand forecast ng mahigit 30M doses ng bakuna.

Ito aniya ay ang mga pamalit sa mga nag-expire na at mag-eexpire pa lamang na bakuna kabilang ang brand na Sinovac, Aztrazeneca at Pfizer.

Samantala, sinabi ni Cabotaje na mahigit pitumput tatlo punto pitong milyong indibidwal na ang nabakunahan ng unang dose habang 6.71 ang nakatanggap na ng kumpletong bakuna laban sa COVID-19.

Iniulat ng Department of Health (DOH) na tumaas ang COVID-19 reproduction number ng Metro Manila.

Batay sa datos ng ahensya, nitong Mayo 23  ay tumaas sa 1.25 ang reproduction rate ng rehiyon, mula sa naitalang 1.05 mula Mayo 13 hanggang 19.

Gayunman, sinabi ng doh na ang bahagyang pagtaas ng COVID-19 cases sa NCR ay hindi pa nakakaalarma.

Ayon sa ahensya, nananatiling mabagal ang virus transmission at hindi pa nakakaapekto sa kapasidad ng mga ospital ang naobserbahang pagtaas ng infections.

Prayoridad ng nagbabalik na pinuno ng National Economic and Development Authority (NEDA) ang pagpapalakas ng sektor ng paggawa para maibsan ang kahirapan at pasiglahin ang paglago ng ekonomiya.

Ito ang inihayag ni returning NEDA Chief Arsenio Balisacan na sa ilalim ng administrayon ni President-elect Ferdinand “Bongbong” Marcos Jr. ay pagtutuunan nito ang nabanggit na sektor.

Binigyang-diin din ni Balisacan na ang pag-alis ng potential concerns of investors kabilang na rito ang lagging digitization ay dapat ding nangunguna sa mga hakbang ng bansa para sa pag-unlad ng ekonomiya.

 Naglatag ang pamunuan ng Department of Education (DEPED) ng Competency-based Merit Selection Plan para paigtingin ang kanilang recruitment process at dagdagan ang mga dekalidad na mga tauhan.

Layon nito na masiguro na ang organisasyon at mga kawani ay kayang tumugon sa hamon at oportunidad sa 21st century na nakatuon sa paghahatid ng may kalidad, accessible, relevant at libreng basic education.

Tiniyak naman ni Education Secretary Leonor Briones na sa nabanggit na polisiya ay makakakuha ng tamang empleyado ang kagawaran para mapabuti pa ang human resource policies para magkaroon ng mas mabuting serbisyo sa mga mag-aaral at stakeholder.

Nasa halos isang daan at tatlumpung libong(129,782) drayber ng pampublikong sasakyan na ang nakatanggap ng anim na libo’t limang daang pisong fuel subsidy.

Ito ay katumbas ng higit 840 milyong piso.

Ayon sa transport group na pinagkaisang samahan ng mga tsuper at Operator Nationwide (PISTON), 10% pa lamang sa 40 libong miyembro nila sa Metro Manila ang nabigyan ng fuel subsidy.

Sa kabuuan, nasa 264,578 ang mga benepisyaryo ng naturang subsidiya sa ilalim ng programa ng Land Transportation Franchising and Regulatory Board (LTFRB), habang mayroong 27,777 delivery service beneficiaries sa ilalim ng Department of Trade and Industry (DTI).

Umakyat pa sa 2,323 ang aktibong kaso ng COVID-19 sa bansa kahapon kumpara sa 2,257 noong Miyerkules.

Ito’y makaraang makapagtala ang Department of Health ng karagdagang 199 COVID cases kahapon.

Dahil dito, sumampa na sa 3,689,656 ang kabuuang kaso kabilang ang 3,626,878 ang recoveries.

Nangunguna pa rin ang National Capital Region sa may pinaka-mataas na COVID-19 cases sa 995 sa nakalipas na dalawang linggo.

Sinundan naman ito ng Region 4-A na mayroong 349 at Region 3, na may 274.

Isang araw matapos iproklama bilang nanalong  presidential candidate sa May 9 Elections, inilabas na ni Incoming President Ferdinand “Bongbong” Marcos Jr. ang partial list ng kanyang economic team.

Kabilang sa nadagdag sina Bangko Sentral ng Pilipinas (BSP) Governor Benjamin Diokno na itinalagang Finance Secretary at dating University the Philippines President Alfred Pascual bilang Trade and Industry Secretary.

Una nang napili ni Marcos si dating Philippine Socioeconomic Planning Secretary Arsenio Balisacan na pamunuan muli ang National Economic and Development Authority.

Itatalaga rin ni BBM si SMC Tollways President and Chief Executive Officer Manuel “Manny” Bonoan bilang Public Works and Highways Secretary.

Tiwala si Marcos na sina Diokno, Pascual at Balisacan ang pinaka-mainam na mga italaga bilang economic managers ng bansa lalo’t mahalaga ang economic team sa pagbangon muli ng bansa mula sa epekto ng COVID-19 pandemic.

Prayoridad anya ng kanyang administrasyon ang ekonomiya kaya’t pinili niya nang maigi ang mga itinalagang economic manager.

Karagdagang 333 distressed Overseas Filipinos ang dumating mula Kuwait.

Ini-repatriate ang mga nasabing Pinoy sa pamamagitan ng chartered flight ng Department of Foreign Affairs (DFA).

Kabilang sa mga dumating ay apat na sanggol at dalawang medical repatriates, maging ang mga manggagawang inabuso ng mga kanilang mga employer.

Ito, ayon kay DFA Undersecretary for Migrant Workers’ Affairs Sarah Lou Arriola, ang ikalimang repatriation flight ng DFA mula Kuwait.

Patuloy anya ang pakikipag-ugnayan ng kagawaran sa mga foreign service post sa iba’t-ibang panig ng mundo at nakahandang sumaklolo sa lahat ng distressed OFW.