NATIONAL NEWS

Kasado na ngayong buwan ang 2022 edition ng rim of the Pacific Exercise (RIMPAC), ang pinaka-malaking Naval War games, na pinangungunahan ng quad group na binubuo ng US, Japan, India at Australia.

Ito’y sa gitna ng inilunsad na military patrol ng China sa paligid ng taiwan na preparasyon umano sa pagsakop o pagbawi sa nasabing isla.

22 pang bansa ang lalahok sa RIMPAC kabilang ang limang claimants sa Spratly Islands, sa pangunguna ng Pilipinas, Malaysia at Brunei.

Isasagawa ang aktibidad sa Hawaii at bahagi ng California, USA simula June 29 hanggang August 4.

25 libong sundalo, halos 50 barkong pandigma, submarines at nasa 170 aircraft ang lalahok sa military exercise.

Inaasahang palalayain na ngayong umaga ang mga nakapiit na Pharmally officials sa Pasay City Jail na sina Lincon Ong at Mohit Dargani.

 Si Senate President Tito Sotto ang nag-isyu ng release order alinsunod sa Supreme Court ruling na dapat palayain ang ipinakulong ng senado kapag nag-adjourn sine die na ang sesyon ng kongreso.

 Inisyatibo ng tanggapan ni outgoing Senate President Sotto at hindi ng Blue Ribbon Commitee ang pagpapalaya kina Ong at Dargani.

 Para naman kay Committee Chairman, Senator Richard Gordon ay dapat ay sa June 30 pa palayain ang mga naturang opisyal ng Pharmally dahil sa katapusan pa ng Hunyo matatapos o magsasara ang 18th congress.

 Ipinunto nina Gordon at Minority Leader Franklin Drilon ang tanging natapos ngayon ay ang sesyon lamang.

 Gayunman, hindi anya nila haharangin ang pagpapalaya kina Ong at Dargani, mamayang alas otso ng umaga.

 Samantala, dadalhin ngayong umaga ni Senate Sergeant-at-Arms, Retired General Rene Samonte sa Pasay City Jail ang release order at asikasuhin ang proseso ng pagpapalaya sa dalawang Pharmally officials.

 Patay ang isa sa mga suspek sa pambobomba sa Koronadal City, South Cotabato matapos ang operasyon ng Philippine army sa bayan ng M’lang, North Cotabato.

 Kinilala ni Lt. Col. Rommel Mundala, Commanding Officer ng 90th Infantry Battalion ang suspek na si Monir lintukan habang naaresto ang kasabwat nitong si  Randy Saro, alyas Bobong.

 Nagsasagawa ng Military at Law Enforcement Operations sa barangay dunguan nang maka-engkwetro ng army ang grupo nina lintukan.

 Narekober ng mga tropa ng gobyerno ang ilang armas, bala at improvised explosive device (IED).

 Pinaniniwalaang miyembro ang dalawa ng Dawlah Islamiyah-Maguindanao group na pinamumunuan ni Almoben Camen Sebod alyas Polok.

 Sangkot umano ang grupo sa iba’t-ibang criminal activities at pinaniniwalaang nasa likod ng magkasunod na pambobomba sa Koronadal at Tacurong cities.

Pinasinayaan na ng Land Transportation Office (LTO) ang kauna-unahang Road Safety Inter-Active Center (RSIC) sa bansa.

 Tampok dito ang ilang driving simulators para sa manual at automatic na mga kotse, maging mga motorsiklo sa LTO main office sa Quezon City.

 Layunin ng RSIC na isulong ang driver education sa pamamagitan ng modernong pasilidad kung saan maaaring mag-practice ang publiko na magmaneho gamit ang virtual reality.

 Ang RSIC ay may kabuuang sampung istasyon gaya ng historical timeline, LTO artifacts, road safety campaigns, edutainment kiosk at ang 4D mini-theater.

 Gayunman, wala pang itinatakdang petsa ang LTO kung kailan magbubukas sa publiko ang nasabing pasilidad.

Niratipikahan na ng kamara ang Bicameral Committee Report na magtatatag ng Philippine Transportation Safety Board (PTSB).

 Ito ang magiging independent agency na pangunahing mandato ay mag-imbestiga ng mga transportation accidents.

 Sa plenary session, inaprubahan ng mababang kapulungan ng kongreso ang final version na nag-re-reconcile sa magkaibang mga probisyon ng House Bill 9030 at Senate Bill 1077.

 Alinsunod sa nasabing panukala, ang PTSB ang may hurisdiksyon sa lahat ng major o fatal transportation accidents o anumang malalaking aksidente na magkaroon ng malaking pinsala.

 Inaatasan din ang ahensya na bumalangkas ng transportation safety standards na na-aayon sa international safety standards at irekomenda ang pagpapatupad nito sa lahat ng sektor ng transportasyon.

Dismayado si Interior Undersecretary Jonathan Malaya sa kabiguan ng Facebook (FB) na alisin o i-block ang mga E-sabong pages sa platform nito.

 Ito’y sa kabila ng isinumiteng request ng Department of the Interior and Local Government (DILG) sa Facebook na nananawagang alisin na ang mga nasabing pages.

 Lumalabas anya na “accessory to a crime” ang naturang social media giant sa hindi nito pag-block sa mga online cockfighting page at maituturing na konsintedor ng mga iligal na aktibidad sa Pilipinas.

 Nababahala naman si malaya lalo’t ang FB ay isang business entity sa Pilipinas at kailangan silang tumalima sa mga batas sa bansa.

Magugunitang ipinag-utos ni Pangulong Rodrigo Duterte na ipatigil na ang operasyon ng online talpakan dahil sa pagdami ng mga nalulong sa nasabing sugal.

Aminado si Agriculture Secretary William Dar na lumalala na ang smuggling ng agri-products sa bansa.

 Inihayag ni Dar na maituturing na ring banta sa national security ang problema ng bansa sa food security na nag-ugat sa smuggling ng agricultural products.

 Sa pagdinig ng House Committee on Agriculture and Food, nagpasaklolo ang kalihim sa mga mambabatas upang masugpo ang smuggling ng mga nasabing produkto.

 Ipinanawagan din ni Dar ang buong suporta mula sa gobyerno upang mapalakas ang anti-smuggling ng ahensya sa pamamagitan ng paglalagay ng karagdagang pondo sa sektor ng agrikultura.

 Iniulat din ni Atty. Karen Yambao ng Bureau of Customs Legal Service, sa naturang pagdinig na 158 apprehensions na ang naitala ng ahensya kaugnay sa mga ipinupuslit na gulay, poultry at iba pang farm products sa bansa.

 Samantala, umapela naman ang Department of Trade and Industry (DTI) na tulungan ang ahensya na ma-i-institutionalize ang sub-task group na binuo upang tugisin ang mga agricultural smuggler.

 Samantala, agad na pinagsusumite ni committee chairman mark enverga ang DTI at DA ng mga dokumento para sa personnel at budgetary requirements upang maaksyunan agad ng kongreso ang kanilang panawagan.

Kinasuhan na ng Philippine Coast Guard (PCG) ang apat na crew ng cargo vessel na MV Happy Hiro matapos ang maritime incident sa Palawan.

 Kinilala ang mga opisyal ng cargo vessel na sina Captain Meshay Amir, na isang Croatian; second mate Bogdan George, na isang Romanian; officers Tyrone Albina Maquiling at Mckinley Panuncialman Amante, na kapwa Filipino.

 Kasong reckless imprudence resulting in multiple homicide; multiple injuries at damage to properties ang isinampa laban sa mga nabanggit na crew sa Antique Prosecutor’s Office.

 Ayon kay PCG Commandant, Admiral Artemio Abu, hindi muna papayagang makaalis ng bansa ang nasabing bansa at maaaring makulong ang apat sa sandaling magdesisyon ang korte.

 Pitong mangingisda mula sa 20 sakay ng FB JOT-18 ang nawawala matapos makabanggaan ang Happy Miro noong Sabado.

 Hindi pa itinuturing na patay ang pito lalo’t nagpapatuloy pa anya ang search and retrieval operations.

 Samantala, napatunayan ding nagkaroon ng paglabag sa panig ng FB JOT-18 at maaaring magmultahin base sa enforcement inspection apprehension report ng PCG Station Antique sa nasabing fishing vessel.

Tukoy na ng Philippine Coast Guard (PCG) ang sanhi ng sunog sa MV Mercraft 2 sa Quezon Province noong Mayo a-23.

 Kinumpirma ni PCG Commandant, Admiral Artemio Abu na isang “highly combustible material” sa engine room ng barko ang dahilan ng pagkalat ng apoy.

 Ayon kay Abu, nagsumite na sila ng initial findings sa kanilang imbestigasyon sa sunog na ikinasawi ng pito katao.

 Hindi na nagbigay ng karagdagang detalye ang PCG official dahil ang Department of Transportation (DOTR) na anya ang nangunguna sa pagbabahagi ng mga resulta ng imbestigasyon.

 Bukod sa mga nasawi, 121 naman ang nailigtas habang 29 ang nasugatan sa nasunog na barko na patungo sanang Real mula Polilio Island.

Umabot na sa 81.4 million passengers ang naserbisyuhan sa “Libreng Sakay” Program at iba pang serbisyo sa ilalim ng Service-Contracting Program ng Land Transportation Franchising and Regulatory Board (LTFRB).

 Ayon sa LTFRB, ang nasabing bilang ay simula noong Abril a–tres hanggang Mayo a–trenta o sa ikatlong phase ng implementasyon ng transportation subsidy program.

 Pinalawak naman ang programa mula sa Edsa busway hanggang sa iba pang bahagi ng metro manila at iba pang rehiyon.

 Layunin ng programa na tulungan ang transportation sector sa gitna ng pagtaas sa presyo ng mga produktong petrolyo at iba pang bilihin.

 Samantala, binuksan din ang rutang PITX-NLET at Cubao-NLET para sa mga mananakay na patungo at palabas ng Metro Manila mula Regions 1, 2, 3 at CAR.