NATIONAL NEWS

Patuloy ang apela ng Federation of Jeepney Operators and Drivers Association of the Philippines (FEJODAP) kaugnay sa ipinatutupad na modernization program ng gobyerno sa sektor ng transportasyon.

Iginiit sa DWIZ ni FEJODAP President Ricardo Boy Rebano na hindi kakayanin ng mga jeepney driver at operator ang mga requirement sa modernisasyon kaya’t maraming prangkisa na nila ang nawalan ng silbi.

Sinabi ni Rebano na mawawalan ng saysay ang mga ganitong hakbangin kung hindi naman makaka comply partikular ang mga maliliit na driver at operator na hirap na hirap na lalo na ngayong may pandemiya.

Kinumpirma ni Incoming Presidential Communications Operations Office Sec. Atty. Trixie Cruz Angeles, na nagkausap na sila ni Outgoing PCOO Secretary Martin Andanar para sa kanilang transition.

Ayon kay Atty. Angeles, nagpapatuloy ang koordinasyon ng kani-kanilang transition team para mailatag ang lahat ng kinakailangan.

Nagsimula na rin aniya ang incoming heads  ng ahensya at  mga attached offices ng pcoo hinggil sa bagay na ito.

Samantala, siniguro naman ni Atty. Angeles na ipagpapatuloy nila ang pag-upgrade sa government-owned stations gaya ng PTV at IBC 13, upang tuluyan nang maging Digital Terrestrial TV.

Ngunit sa ngayon aniya ay mahalagang tutukan ang paghahanap ng pondo upang matiyak na maisasakatuparan ang pangakong pagsasaayos at pagpapalakas ng mga nabanggit na istasyon ng gobyerno. —sa ulat ni Jopel Pelenio (Patrol 17)

Nagkasa ng Joint Training Exercise ang mga tropa ng Joint Task Force Sulu na binansagang  “Lupah Sug 03-2022″ sa Siasi, Sulu.

Nilahukan ito ng 500 miyembro ng Philippine Army, Navy at Air Force, kung saan tampok ang iba’t ibang “battlefield scenario”.

Ayon kay Maj. Gen. Ignatius Patrimonio, Commander ng 11th Infantry “Alakdan” Division at JTF Sulu, bukod sa paghasa ng kakayahang pandigma ng mga tropa, ang pagsasanay ay magandang pagkakataon para mapahusay ang “interoperability” ng iba’t ibang unit ng JTF Sulu, at mapatatag ang kanilang “camaraderie”.

Bukod sa “war games”, kasama din sa ehersisyo ang “Civic and Humanitarian Action Activity” kung saan nagkaloob ng libreng gupit, pag-tuli, medical check-up at gamot ang mga tropa sa 130 residente sa lugar.

Tiniyak naman ng heneral na nakikiisa ang militar sa lokal na pamahalaan at komunidad sa paghahatid ng pangmatagalang kapayapaan at tuloy-tuloy na pag-unlad sa lalawigan ng Sulu. —sa ulat ni Gilbert Perdez (Patrol 13)

Nakapagtala ang Department of Health (DOH) Eastern Visayas ng 53 kaso ng leptospirosis mula Enero 1 hanggang Mayo 29.

Sa nasabing bilang, 22 ay naitala mula sa Leyte; 10 mula sa Samar; tig-7 sa Southern Leyte at Eastern Samar; 7 mula sa Southern Leyte; 5 sa Northern Samar; at 2 mula sa Biliran.

Ayon kay Jelyn Malibago, Regional Information Officer ng DOH, walo ang nasawi sa sakit, kung saan tatlo ang naitala sa Leyte, tig-dalawa sa Southern Leyte at Samar; at isa mula sa Eastern Samar.

Kaugnay nito, pinayuhan ni Malibago ang publiko na huwag lumusong sa baha upang hindi makakuha ng mga bacteria mula sa ihi ng hayop tulad ng daga.

Ang pagtaas ng presyo ng tinapay ay dahil sa mataas na presyo ng sangkap at hindi dahil sa kakulangan sa harina.

Ito ang nilinaw ni Philippine Association of Flour Millers Inc. (PAFMIL) Executive Director Ricardo Pinca na walang shortage sa suplay ng harina.

Binigyang diin din niya na ang mga panaderyay magiging dehado kung hindi nila maisasaayos ang mga presyo ng tinapay ayon sa tumataas na halaga ng produksyon.

Nilinaw din ni Pinca na kahit na patuloy na may problema sa wheat exports sa Russia at Ukraine ay hindi ito direktang makakaapekto sa Pilipinas dahil tatlong pangunahing pinagkukunan ng wheat na kinabibilangan ng United States, Canada at Australia.

Nanawagan ang Philippine Nurses Association (PNA) na maipasa ang Philippine Nursing Act, na layong mag-standardize sa suweldo ng mga nurse na nagtatrabaho sa pribado at gobyernong sektor.

Ayon kay PNA President Melvin Miranda, mas mababa ang kinikita ng ilang nurse sa maliliit na pribadong ospital sa ilang mga rehiyon sa bansa kaysa sa ospital ng gobyerno.

Batay sa Department of Health (DOH) National Health Human Resource, 9,517 pesos hanggang 14,000 pesos ang base pay ng private hospitals habang 32,503 pesos sa mga nurse sa public hospitals.

Dagdag pa niya na marami na ring nurse ang umaalis sa trabaho sa pribadong ospital para pumasok sa government healthcare institutions o sa abroad.

Sakali aniyang maipasa ang naturang Proposed Act ay mapapabuti rin nito ang performance ng mga nabanggit na indibidwal.

Tiniyak ng Department of Environment and Natural Resources (DENR) na magkakaroon ng maayos na turnover ang ahensiya ng mga programa at proyekto para sa susunod na administrasyon.

Ayon kay DENR Acting Secretary Jim Sampulna, bumuo na siya ng transition team at handa na ang mga dokumento na ipapakita sa susunod na DENR secretary.

Aniya, ang hakbang na ito ay base sa bilin ni Pangulong Rodrigo Duterte sa kaniyang cabinet officials.

Samantala, kabilang sa malalaking programa ng kagawaran na ipapasa sa susunod na administrasyon ang Boracay rehabilitation at Manila Bay rehabilitation.

Tinitignan ng Department of Education (DepEd) na simulan ang klase para sa school year 2022-2023 sa August 22.

Ayon kay DepEd Assistant Secretary for Curriculum and Instruction Alma Ruby Torio, mayroon na silang draft ng proposed school calendar para sa susunod na taon.

Pero ito aniya ay nakadepende sa aprroval ni Executive Committee Head Education Secretary Leonor Briones.

Una nang sinabi ng DepEd na nais nitong ma-implenta sa lahat ng pampublikong paaralan sa  bansa ang face-to-face classes.

Patay ang siyam na taong gulang na batang babae sa sumiklab na sunog sa bayan ng Asturias, Cebu.

Naganap ang sunog nitong Martes na nagmula sa isang tindahan, at idineklarang under control makalipas ang mahigit isang oras.

Sinabi ng Bureau of Fire Protection na na-trap ang biktima sa loob ng isang pawnshop kaya’t hindi na nito nagawang makalabas.

Nabatid na aabot sa 270,000 pesos ang halaga ng pinsala ng nangyaring insidente.

Kasalukuyang iniimbestigahan pa ng mga otoridad ang posibleng pinagmulan ng sunog.