NATIONAL NEWS

Inihayag ng World Health Organization (WHO) na maaaring kumakalat ang kaso ng Monkeypox virus nang hindi nade-detect.

Ayon kay World Health Organization Chief Tedros Jebri-Hesus, itinuturing nang endemic sa 30 bansa sa west at central african nations ang 550 confirmed Monkeypox cases.

Bagamat nilinaw ng WHO na ang Monkeypox, na kumakalat sa pamamagitan ng close contact sa ibang indibidwal, ay hindi naman ito gaanong malala.

Mababatid na ang mga sintomas ng naturang sakit ay mataas na lagnat at mga pantal na parang bulutong-tubig.

Umaasa ang Department of Agrarian Reform (DAR)  na mapapalakas ang sektor ng agrikultura sa Zamboanga Peninsula pagkatapos mamahagi ng agricultural lands sa mga magsasaka.

Papalo sa mahigit 1,800 ektarya ng lupa ang ipinagkaloob sa 1, 074 agrarian reform beneficiaries bukod pa sa iba’t ibang support services projects na may kabuaang halaga na P50M.

Samantala, ipinabatid ni DAR Secretary Bernie Cruz, layunin ng suportang ito ng pamahalaan na palakasin ang mga magsasaka at mapagyaman ang kanilang mga lupain.

Aniya, ang aktibidad na ito ay naisakatuparan dahil sa pagtutulungan ng iba’t ibang ahensiya at suporta ng local hanggang national level.

Ang mga ipinamahaging lupain ay mula sa mga lalawigan ng Zamboanga Del Norte, Zamboanga Sur, at Zamboanga Sibugay.

Mananatiling operational ang mga escalator sa mga istasyon ng MRT 3.

Ito ang tiniyak ng Metro Rail Transit Line 3 (MRT-3) sa publiko kasunod ng pag build up ng mga pasahero sa hagdan at footbridge area ng ortigas avenue station kahapon dahil sa sirang escalator na isinara sa publiko.

Ang pagsara ng escalator ay nagresulta sa single entry at exit sa northbound stairway ng pinaghalong mga pasahero at mga passers by.

Samantala, magdedeploy na ng mga  stand-by technician ang MRT-3 at makikipag-koordinasyon sa road sector upang hindi na maulit ang insidente.

Umaasa ang National Press Club (NPC) na masusunod ng mga vloggers at online broadcaster ang code of ethics ng mga mamamahayag.

Kasunod ito ng pahayag ni Incoming Presidential Communication Operation Office Secretary (PCOO) na pagbibigay ng access sa vloggers para sa mga press briefing sa malakanyang.

Ayon kay NPC Secretary Paul Guttierez, suportado aniya niya ang plano ni Angeles at sa katunayan aniya ay isa ang NPC sa mga nagtulak para mabuo ang Philippine Online Broadcasters Association (POBA).

Samantala, naniniwala si Gutierrez na magiging gabay ng vloggers ang code of ethics sa npc tungo sa responsableng pamamahayag.

Binubuo na ng PNP Directorate for Operations at PNP Information Technology Management Service ang isang drug war database system.

Sinabi ni PNP Director for Operations Police Major General Val De Leon na ang nasabing database ay tataguriang Drug Related Data Integration and Generation System (PNP-DRDIGS).

Ayon kay De Leon, ang naturang sistema ay magsisilbing digital library ng lahat ng datos, intelligence reports at makabuluhang impormasyon kaugnay sa kampanya ng pnp laban sa iligal na droga.

Ito rin aniya ang magiging basehan para maisagawa ng epektibo ang anti illegal drug operations.

Hindi muna magtatrabaho sa anumang ahensya ng gobyerno si Vice President Leni Robredo.

Sagot ito ni Atty. Barry Gutierrez, Spokesperson ni Robredo sa posibilidad na pagsisilbi muli ng vice president sa gobyerno sa ilalim ng Marcos administration.

Sinabi ni Gutierrez na naka-focus lamang ang atensyon ni Robredo sa pagtatapos ng kanyang termino at magkaruon ng maayos na transition at pagsasara ng lahat ng programa ng Office of the Vice President.

Maaari aniyang makikiisa si Robredo sa isang civil society non-government organization para maipagpatuloy ang serbisyo sa mga Pilipino.

Ipinabatid ni Gutierrez ang plano ni Robredo na paglulunsad ng magugunitang inanunsyo ng kampo ni Robredo ang paglulunsad ng non-government organization na Angat Buhay sa July 1 o isang araw matapos siyang bumaba sa pwesto.

Nasabat ng mga otoridad ang mahigit kalahating bilyong pisong halaga ng hinihinalang shabu sa magkahiwalay na operasyon sa Cavite kaninang umaga.

Unang naaresto ng pinagsanib na pwersa ng PDEA, Task Force Noah, Team Navy, at PNP-PDEG sina Dominador Robasto Omega Jr. at Siegfred Omega Garcia sa Hyacinth St., Camella Homes, Dasmariñas City.

Nakumpiska sa operasyon ang nasa 60 kilo ng umano’y shabu na nagkakahalaga ng mahigit 400 milyong piso, drug paraphernalia, cellphone, ilang piraso ng IDs, at mga hinihinalang sangkap at kagamitan sa paggawa ng shabu.

Sa isa pang operasyon sa Buenavista Townhomes, General Trias, nadakip naman sina Elaine Maningas, Ricardo Santillan at Laurel Dela Rosa, kung saan nasabat mula sa mga ito ang nasa 20 kilo ng pinaniniwalaang shabu na tinatayang nagkakahalaga ng 136 million pesos, limang cellphone, at identification cards.

Nakatakdang sampahan ng reklamong paglabag sa Comprehensive Dangerous Drugs Act ang mga naturang suspek. —sa ulat ni Gilbert Perdez (Patrol 13)

Pursigido si House Deputy Speaker Rufus Rodriguez na isulong ang apat na taong suspensyon ng Excise Tax sa fuel at iba pang oil products.

Ito ayon kay Rodriguez ay dahil inaasahan niyang sisirit pa ang presyo ng diesel, gasolina, cooking gas at iba pang produktong petrolyo dahil sa desisyon ng European Union na suspendihin ang 90% ng oil imports nito mula sa Russia hanggang katapusan ng 2022.

Ipinabatid ni Rodriguez na priority niyang ihain muli sa pagbubukas ng 19th Congress ang panukalang itigil ang pangongolekta ng fuel taxes sa loob ng apat na taon kung kailan inaasahan naman aniyang makakarekober na ang ekonomiya mula sa COVID-19 pandemic.

Kasabay nito, kinontra ni Rodriguez ang panukalang magpatupad ng mga bagong buwis o itaas ang kasalukuyang tax rate para makaipon nang pambayad sa halos 13 trillion pesos na utang ng bansa.