NATIONAL NEWS

Arestado ang apat na suspek matapos ikasa ang buy-bust operation ng mga tauhan ng Philippine Drug Enforcement Agency (PDEA) at Quezon City Police District (QCPD) sa Barangay Baesa, Quezon City.

 Kinilala ang mga nadakip na suspek na sina Marco Magbanua, 38-anyos; Regelio Sus Jr., 47-anyos; Rommel Bustamante, 50-anyos; at Benjielito  Comedor, 53-anyos.

 Ayon PDEA NCR Director Christian Frivaldo kay PDEA Director General Wilkins Villanueva, nakatanggap sila ng tip mula sa isang concerned citizen hinggil sa iligal na gawain ng mga suspek.

 Agad na nagkasa ng operasyon ang mga otoridad kung saan, isang ahente ang bumili ng shabu at nang magkaabutan ay dito na dinakma ang mga suspek.

 Nasamsam sa mga inaresto ang 15 gramo ng shabu na nagkakahalaga ng p102,000; iba’t-ibang drug paraphernalia; at P500 na ginamit bilang buy-bust money.

 Nakakulong na ngayon ang mga suspek na mahaharap sa kasong paglabag sa R.A. 9165 o ang Comprehensive Dangerous Drugs Act of 2002.

Arestado ang dalawang suspek matapos makuhanan ng 15 piraso ng tanim na marijuana sa likod mismo ng kanilang bahay sa Brgy. Babuyan Claro sa Calayan, Cagayan.

 Ayon sa mga otoridad, nakatanggap sila ng impormasyon na gumagamit ng ipinagbabawal na gamot ang dalawang suspek na hindi na muna isinapubliko ang mga pangalan.

 Aabot sa tatlong kilo ng marijuana ang nasamsam ng mga otoridad na nagkakahalaga ng 360,000 pesos.

 Sa ngayon, nasa kustodiya na ng pulisya ang mga suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.

Aabot sa tatlo punto apat na milyong pisong halaga ng pinaghihinalaang shabu ang nakumpiska ng mga tauhan ng Philippine Drug Enforcement Agency (PDEA)-National Capital Region (NCR) sa isang umano’y drug pusher sa Barangay Santo Niño, San Pedro City, Laguna.

 Kinilala ang suspek na si Armand Endozo, alyas “Boy” 45-anyos sa ikinasang anti-drug operation ng PDEA-NCR-Regional Special Enforcement Team 3 (RSET3) sa Anastacio Olivares Street sa nabanggit na lalawigan.

 Nakuha sa suspek ang mahigit sa 500 gramo ng umano’y shabu, drug paraphernalias, at marked money.

 Nakakulong na ngayon sa PDEA Central Office sa Quezon City ang suspek na nahaharap sa paglabag sa Republic Act 9165 o Comprehensive Dangerous Drugs Act of 2002.

Niyanig din ng magnitude 4.8 na lindol ang Davao Oriental alas-onse y sais kahapon ng umaga.

 Ayon sa PHIVOLCS, namataan ang pagyanig sa layong 174 kilometers sa munisipalidad ng Tarragona, Davao Oriental.

 May lalim ang lindol na 84 kilometers at tectonic ang origin o pinagmulan nito.

 Wala namang naiatalang nasawi o nasugatan habang wala ring inaasahang damage at aftershock matapos ang lindol.

Niyanig ng magnitude 4.8 na lindol ang Surigao del Sur alas-siete singkwenta’y singko kagabi.

 Ayon sa PHIVOLCS, namataan ang pagyanig sa layong 7 kilometers sa Bayabas, Surigao del Sur.

 May lalim ang lindol na 55 kilometers at tectonic ang origin o pinagmulan nito.

 Naitala ang Intensity IV sa Bayabas, Tago, at Tandag City, Surigao del Sur.

Intensity III sa Cagwait at Marihatag, Surigao del Sur maging ang Rosario, Agusan del Sur.

habang Instrumental Intensity I naman ang naitala sa Tandag City, Surigao del Sur; Nabunturan, Davao de Oro; at Cabadbaran City, Agusan del Norte.

 Wala namang naiatalang nasawi o nasugatan habang wala ring inaasahang damage at aftershock matapos ang lindol.

Generally fair weather condition pa rin ang mararanasan sa bahagi ng Luzon maliban nalang sa mga tiyansa ng mga pag ulan sa hapon hanggang sa gabi.

 Ayon kay PAGASA Weather Specialist Patrick del Mundo, patuloy na binabantayan ng pagasa ang Low Pressure Area (LPA) na namataan sa bisinidad ng Coron, Palawan na nagdadala ng intermittent rain showers at thunderstorms sa Bicol Region, Quezon, Marinduque, Occidental Mindoro, Oriental Mindoro, Palawan, at Romblon.

Mababa naman ang tsansa nito na maging bagyo at posibleng malusaw na sa loob ng 12 hanggang 14 na araw.

 Samantala, asahan naman ang maaliwalas na panahon sa Visayas at Mindanao na may mga tiyansa ng pag-ulan, pagkulog at pagkidlat sa hapon hanggang sa gabi dulot pa rin ng localized thunderstorm.

 Agwat ng temperatura sa Metro Manila ay maglalaro sa 25 hanggang 33 degrees celsius habang sisikat naman ang haring araw mamayang 5:26 ng umaga at lulubog naman ito mamayang 6:22 ng hapon.

Naglabas ng memorandum ang Metropolitan Manila Development Authority (MMDA) kaugnay sa mga tauhan nito na gumagamit ng mga hindi rehistradong sasakyan na walang plaka.

Ayon kay MMDA Chairman Atty. Romando Artes, nakasaad sa memo, pinaalalahanan ang mga tauhan ng MMDA sa kanilang mga tungkulin sa publiko, lalo na ang mga traffic enforcer na naatasang hulihin ang mga motoristang gumagawa ng mga paglabag sa trapiko.

Binigyang diin naman ni Artes na dapat ay ang mga mmda personnel ang manguna sa pagiging mabuting halimbawa sa pamamagitan ng papatupad ng batas trapiko at hindi  manguna sa pag-labag sa mga traffic enforcers na nanghuhuli sa mga lumalabag dito.

Sinuportahan ng kamara ang plano ng Department of Education (DepEd) na ipatupad na ang 100% face-to-face classes sa susunod na pasukan.

Ayon kay House Assistant Minority Leader at ACT Teachers Party-List Rep. France Castro, dapat tiyakin ng DEPED na nakahanda ang mga eskuwelahan para rito at mayroong maayos na bentelasyon ang mga silid-aralan, hugasan ng kamay at sanitation facility.

Dagdag pa ni Castro, kailangan na mabakunahan ang mga estudyante na kwalipikado at magpatupad ng libreng testing sa mga guro at education support personnel na lalahok sa face-to-face classes.

Samantala, bukod sa pagkuha ng mga school nurse, ani Castro ay dapat ding magkaroon ng medical fund na gagamitin sa pagpapagamot ng mga estudyante at guro na tatamaan ng COVID-19.

Pinayuhan ng Department of Budget and Management (DBM) na huwag munang magtaas ng buwis kapag nagsimula na sa pangangasiwa sa gobyerno, ang Marcos Administration.

Ayon kay DBM acting Secretary Tina Rose Canda, hindi makakatulong sa problemang pinansiyal ng bansa ang pagpapataw ng dagdag na buwis dahil hindi pa nakakabangon ang mamamayan sa kalbaryong pinagdaanan mula sa epekto ng pandemie.

Batay sa pahayag ng Ibon Foundation, P5.9T ang utang ng gobyerno noong 2016 at lumobo ito ng P12.7T ngayong 2022 na iiwan ng Duterte administraton.

Samantala, binigyang diin ni Canda, na may dahilan kung bakit nangutang ang gobyerno at ito ay dahil sa covid-19 pandemic kung saan walang isolation facilities, kulang ang hospital beds at hindi puwedeng i-sakripisyo ang buhay ng mga Pilipino.

Hindi lumagda sa draft report na inilabas ni Blue Ribbon Committee Chairman Senator Richard Gordon ukol sa pharmally controversy sina Senators Juan Miguel Zubiri, Sherwin Gatchalian at Imee Marcos.

Ayon kay Zubiri, hindi niya nilagdaan ang naturang report dahil kabilang si Pangulong Rodrigo Duterte sa mga inirekomendang sampahan ng kasong plunder o pandarambong.

Samantala, sinabi naman ni Senator Imee Marcos na masiyadong maraming konklusyon sa draft report na hindi naman suportado ng mga nakalap nilang ebidensya.

Anang dalawa, walang ebidensya na lumitaw sa labing walong pagdinig ng senado na direktang nagsasangkot sa pangulo sa maanomalyang transaksyon ng pamahalaan sa pharmally pharmaceutical corporation.