NATIONAL NEWS

Isinailalim na ng Philippine National Police (PNP) sa pinaka-mataas na security alert status ang lahat ng kanilang unit, matapos ang magkakasunod na pambobomba sa Mindanao.

 Ito, ayon kay PNP Officer-In-Charge, Lt. Gen. Vicente Danao Jr., ay upang maiwasan ang mga kahalintulad na insidente sa ibang bahagi ng bansa, lalo sa Metro Manila.

 Umapela naman si Danao ng pang-unawa sa publiko, lalo sa mga commuters, dahil sa ipinatutupad na mas mahigpit na security measures sa lahat ng public transportation hubs.

 Dapat anyang sumunod ang mga mananakay sa random inspections ng mga pulis, dahil kailangan ito para na rin sa kanilang proteksyon.

Hinimok din ni Danao ang publiko na agad isumbong ang sinumang kahina-hinalang tao maging ang kanilang mga aktibidad at unattended items, tulad ng mga bag na naiiwan sa kalsada.

Inaalam na ng Philippine National Police (PNP) ang posibleng kakulangan sa security measures matapos ang apat na magkakasunod na pagpapasabog sa Mindanao.

 Binalaan din ng PNP ang mga police commander laban sa palpak na trabaho na protektahan ang mga mamamayan sa kanilang Areas of Responsibility.

 Ayon kay PNP Director for Operations, Maj. Gen. Valeriano De Leon, nagsasagawa na ng assessment ang Regional Director ng Police Regional Office 9 kung nagkaroon ng lapses sa intelligence-gathering at security measures sa Isabela City, Basilan.

 Dalawang indibidwal ang sugatan sa magkasunod na pagsabog sa naturang lungsod noong Lunes.

 Ipinag-utos din anya ni PNP Officer-In-Charge, Lt. Gen. Vicente Danao Jr. sa police regional directors na patuloy na imbestigahan ang mga pagsabog upang mabatid kung nagkulang ang intelligence units at mga tauhan.

 Matapos ang magkasunod na bus bombings sa Tacurong City at Koronadal City noong linggo, naglabas si De Leon ng memorandum sa lahat ng regional directors at unit commanders na paigtingin ang seguridad sa kanilang mga nasasakupan upang maiwasang maulit ang insidente.

Bahagyang tumaas sa 2,334 ang aktibong kaso ng COVID-19 sa bansa, kahapon kumpara sa naitala ng Department of Health (DOH) na 2,320 cases noong Miyerkules.

Ito’y makaraang makapagtala ng karagdagang 182 COVID-19 cases ang DOH, kahapon.

Dahil dito, umakyat sa 3,690,889 ang total cases kabilang ang 3,628,100 recoveries habang nananatili sa 60,455 ang namamatay makaraang walang madagdag sa death toll.

Nangunguna pa rin ang National Capital Region (NCR) sa may pinaka-mataas na kaso sa nakalipas na dalawang linggo na 1,044; Calabarzon, 394 at Central Luzon, 248.

Nilinaw ni Resto PH President Eric Teng na wala pang food shortage sa bansa at hindi pa ito nararamdaman sa fastfood at restaurant industry.

 Stable pa anya ang food production sa Pilipinas at maaari pa naman silang kumuha ng kanilang raw food materials sa mga local farmer sa halip na mag-import ng supply.

 Aminado si Teng na nahihirapan ang ilang maliliit na restaurant owner na kumuha ng mga imported supply.

 Hinikayat naman ni Teng ang mga restaurant at fastfood chain owner na gumamit ng mga altenatibong sangkap gaya ng rice flour o kamote flour sa halip na harina upang maiwasang magtaas ng presyo ng kanilang produkto.

Nananatiling sapat ang suplay ng harina sa bansa sa kabila ng mataas na presyo ng tinapay bunsod ng price increase sa raw materials o sangkap.

 Tiniyak ni Philippine Association of Flour Millers (PAFMIL) Executive Director Ricardo Pinca, na mayroong 90 araw o tatlong buwang supply ng harina ang bansa.

 Gayunman, tumaas anya ang presyo ng asukal, mantika, supot ng tinapay maging ang pang-delivery dahil sa oil price hike.

 Naapektuhan din ng giyera ang suplay ng trigo mula Ukraine at Russia kung saan nagmumula ang kabuuang tatlumpung porsyento ng wheat supply ng buong mundo.

 Dahil dito, tumaas ang demand at presyo ng trigo mula sa Amerika, Canada at Australia kung saan kumukuha ang Pilipinas.

 Tiniyak ni incoming Information and Communications Technology Secretary Ivan Enrile Uy na i-pa-prayoridad niya na mabigyan ng internet connectivity ang mga malalayong lugar sa bansa upang magkaroon ng access sa medical services at mapahusay ang education system.

Ayon kay Uy, makailang-ulit silang nagkaroon ng pulong kay President-elect Ferdinand “Bongbong” Marcos Jr. upang talakayin ang mga programa na ipatutupad sa ilalim ng bagong administrasyon.

 Kabilang anya ang pagbibigay ng internet connectivity sa malalayong sa marching orders ni PBBM upang magkaroon ng maayos na education system, partikular ang online learning ng mga estudyante.

 Binigyang-diin ni Uy na mas lalong kailangan ang internet ngayong may pandemya upang mabigyan ng access sa medical services ang mga lugar na kailangan ng telemedicine.

 Ang internet anya ay may malaking bahagi sa buhay ng mga pilipino at mahalagang ma-improve ang digital infrastructure at ito ang unang bagay na kailangang tugunan.

Binalaan ng Land Transportation Franchising and Regulatory Board (LTFRB) ang ride-hailing companies laban sa sobrang paniningil sa kanilang mga pasahero na hindi tugma sa fare structure para sa transport network vehicles na itinakda ng board.

 Ito’y makaraang makatanggap ng ulat ang LTFRB na naniningil ang transport network company na joyride sa mga pasahero ng 1,000 peso ‘priority boarding fee’ para sa one-way trip.

 Tiniyak naman ng board na kanilang iniimbestigahan ang nasabing alegasyon.

 Sa ilalim ng Memorandum Circular 2019-036, ang flagdown rate para sa sedan-type Technology- and app-based transport network vehicle service (TNVS) ay 40 pesos, na may 15 pesos sa kada kilometrong pamasahe at 2 pesos kada minutong travel fare.

Para sa mga premium AUV at SUV, ang flagdown rate ay nasa 50 na may 18 pesos sa kada kilometrong pamasahe at 2 pesos sa kada minutong travel fare.

Ang hatchback o sub-compact type TNVS ay mayroong 30 peso flagdown rate na may 13 pesos sa kada kilometrong fare rate at 2 pesos sa kada minutong travel fare.

 Samantala, plano naman ng LTFRB na mag-deploy ng mystery passenger sa mga susunod na araw upang alamin kung sumusunod ang mga operator sa kanilang utos at sinumang mahuhuling lumalabag ay pagmumultahin.

Asahan na ang panibagong dagdag-presyo sa ilang pangunahing bilihin ngayong buwan.

 Sa tansa ng Philippine Amalgamated Supermarkets Association (PAGASA), lima hanggang sampung porsyento ang itataas ng ilang brand ng sardinas, meat loaf, kape, evaporated milk, suka, asukal at instant noodles.

 Aminado si PAGASA President Steven Cua na nangangamba sila na patuloy na tumaas ang presyo o magkaroon ng “runaway inflation”.

 Marami pa anyang manufacturer ng mga produktong may suggested retail price ang humihirit ng price increase sa Department of Trade and Industry (DTI).

 Gayunman, nilinaw ni Trade Undersecretary Ruth Castelo na pinag-aaralan pa ang panibagong hiling na dagdag-presyo sa gitna ng walang prenong oil price increase.

 Tiniyak naman ng DTI na hindi na nila aaprubahan ang mga bagong hirit na increase dahil ipauubaya na nila ito sa papasok na administrasyon.

Aabot sa 14.29 billion pesos ang halaga ng iligal na droga na nakumpiska ng mga tauhan ng Philippine Drug Enforcement Agency (PDEA) sa ikinasang operasyon sa Integrated Waste Management Incorporated sa Trece Martires City, Cavite.

 Ayon kay PDEA Director General Wilkins Villanueva, ang kinikasang aktibidad ay alinsunod sa guidelines na itinakda ng batas kaugnay ng mga nakumpiskang iligal na droga.

 Sinabi ni Villanueva na ito na ang batch na may pinakamalaking volume ng iligal na droga na nakumpiska ng kanilang mga tauhan.

 Sa ngayon, nasa 5,061 na barangay na ang kanilang nalinis kontra iligal na droga noong April 30, 2022 habang mayroon pang 10,410 na barangay ang kailangang linisin laban sa mga iligal na aktibidad.

Aabot sa 47 libong litro ng langis ang ipamamahagi ng Bureau of Customs (BOC) sa Armed Forces of the Philippines (AFP) at Philippine Coast Guard (PCG).

Nabatid na ang mga stock ng gasolina ay nasamsam sa panahon ng pagpapatupad ng mga aktibidad ng BOC sa ilalim ng fuel marking program.

Ito ay matapos aprubahan ng Department of Finance (DOF) Secretary Carlos Dominguez III ang pag-turn over ng 41,356.8 liters ng gasolina para sa PCG at 6,000 liters naman para sa military.

Batay sa section 1141 ng Customs Modernization and Tariff Act (CMTA), pinahihintulutang ipamigay sa mga ahensya ng gobyerno ang mga kalakal na napapailalim sa forfeiture proceedings sa oras na aprubahan ito ng Finance Secretary.

Bilang kasunduan, ang AFP ay magbibigay ng kinakailangang “manpower” o tauhan upang tulungan ang BOC sa kanilang mga aktibidad sa pagpapatupad ng batas.

Samantala, sa ilalim naman ng section 7 ng DOF-BOC-Bureau of Internal Revenue Joint Circular no. 001.2021, ang mga produktong petrolyo na walang marka, may mga diluted na marker, o may mga pekeng marker ng gasolina ay isasailalim sa mga tungkulin at buwis, kasama ang naaangkop na mga multa at parusa.