NATIONAL NEWS

Nakahanda na ang Philippine National Police (PNP) para sa inagurasyon ni President-elect Ferdinand Bongbong Marcos Jr., sa Hunyo 30.

Sa panayam ng DWIZ, sinabi ni PNP Spokesperson Police Colonel Jean Fajardo na nakahanda na silang iprisinta ang security coverage at preparasyon para sa oath-taking ni Marcos.

Mayroon din aniyang binuong task force para dito, gayundin ang security task force sa Davao para naman sa inagurasyon ni Vice President-elect Sara Duterte-Carpio.

Kahapon inanunsyo ng kampo ni Marcos na ang National Museum of the Philippines sa Maynila ang pagdarausan ng panunumpa ni BBM bilang ika-17 pangulo ng Pilipinas.

Nananawagan naman ng kooperasyon at pang-unawa si Farjardo mula sa publiko para na rin sa kaligtasan at seguridad ng bawat isa.

Arestado ang dalawang suspek na umano’y nagbebenta ng prepaid sim card na mayroong verified e-wallet accounts.

 Ayon sa mga tauhan ng Philippine National Police Anti-Cybercrime Group (PNP-ACG), inaresto ang dalawang suspek matapos tangkaing bumili ang mga undercover na pulis ng sim card sa mga suspek.

 Ayon kay Police Col. Jay Guillermo, Deputy Chief ng PNP-ACG Crime Response Unit, ang mga prepaid sim card ay kayang makapag transfer ng pera, kayang makabili at makabenta online.

 Kaya din nitong manakaw ang mga pera mula sa mga gcash at iba pang E-wallet accounts.

 Tumangging magbigay ng pahayag ang mga suspek ngunit base sa inisyal na imbestigasyon, binibili ng mga mamimili ang bawat sim card sa halagang P150 tsaka iaalok sa mga online hackers ng tig-P400.

 Dahil dito, nagbabala sa publiko ang mga otoridad laban sa pagbebenta ng mga prepaid card at personal information.

Nag-alok ng trabaho abroad para sa mga Pilipino sa ilang industriya ang Japan, Saudi Arabia, at Israel.

 Daan-daang bakanteng trabaho sa iba’t-ibang industriya ang magagamit para sa mga Pilipinong gustong magtrabaho sa tatlong nabanggit na bansa.

 Nabatid na nangangailangan ngayon ng 300 caregivers at 50 nurses ang Japan; 850 registered nurses at 50 midwives sa saudi; at 60 hotel workers at 2,000 home-based caregivers na sasahod ng 77,000 kada buwan.

 Ang mga nasabing job openings ay hindi mangangailangan ng anumang placement fee sa pamamagitan ng government to government track.

Inireklamo ng mga residente sa isang barangay sa Batangas ang isang manukan dahil sa sangkaterbang langaw sa loob at labas ng kanilang bahay.

 Ayon sa mga residente, umaga pa lang ay puno na ng langaw ang dumadapo sa kanilang nakalatag na fly trap kung saan hindi na umano sila makakain dahil sa takot na baka madapuan ang kanilang mga pagkain.

 Ang itinuturo nilang pinagmumulan ng langaw, ang kapabayaan ng isang poultry farm o manukan na nasa kanilang barangay.

 Agad na binisita ng joint inspection team ng bayan ang isang manukan na sinasabing nagkaroon umano ng problema sa linya ng tubig.

 Ayon kay Ferdinand Hernandez, Sanitation Inspector, Rosario-LGU, kalimitan umanong pinagmumulan ng langaw ang ipot o dumi ng hayop partikular na ng manok kung saan, nagkakaroon ito ng larva.

 Iginiit naman ng namamahala sa manukan na kanila nang naayos ang problema sa kanilang manukan at patuloy ang kanilang pag-spray kontra sa langaw.

 Iminungkahi naman ng inspection team na dapat magkaroon ng ordinansa ang naturang barangay na magbibigay ng kapangyarihan sa mga opisyal na suspindihin ang operasyon ng manukan sakaling muling may magreklamo upang agad na  maaksyunan ang problema.

Aabot na sa 180,000 Public Utility Vehicles (PUV) operators ang nabigyan na ng tig-6,500 peso fuel subsidy ng Land Transportation Franchising and Regulatory Board (LTFRB).

 Ang nasabing bilang ay katumbas ng 264,578 mula sa 377,000 na kabuuang target na benepisyaryo ng ahensya.

 Mahigit isa punto isang bilyong piso naman ang na-disburse na halaga ng pondo.

 Ayon sa LTFRB, nagpapatuloy ang pamamahagi ng subsidiya sa mga public transport operators.

 Marso nang simulan ng ahensya ang distribusyon ng fuel subsidy sa 377,000 qualified PUV drivers at operators.

 Layunin nitong maibsan ang epekto ng walang prenong oil price increase sa public transport sector.

 Sa kabila nito, mayroon pa ring ilang PUVdrivers ang nagrereklamo dahil sa bagal ng proseso para lamang makuha ang kanilang fuel subsidies.

Humingi na ng paumahin ang MRT-3 sa publiko matapos ang nag-viral na larawan sa social media ng mahabang pila ng mga pasahero sa Ortigas Avenue Station noong Miyerkules, Hunyo a – uno.

 Ayon sa pamunuan ng MRT-3, dahilan ng mahabang pila ang depektibong escalator sa northbound ng istasyon matapos isara kaya’t nagkaroon na lamang ng single entry at exit point para sa mga pasahero at dumaraan.

 Kumitid din ang daanan sa street-level area kaya’t nagsiksikan ang mga nakapilang pasahero o isang tao lamang ang maaaring dumaan paakyat at pababa ng istasyon.

 Gayunman, wala namang mahabang pila sa loob mismo ng MRT-3 platform o pag-akyat ng Ortigas Station.

 Inalerto na ng MRT-3 ang maintenance provider nito sa insidente habang nagpatupad na ang kanilang mga security personnel ng “stop-and-go” scheme upang ma-control ang dami ng mga pasahero.

 Nanindigan ang China na wala silang nilalabag na International Law sa kanilang ipinatupad na fishing  ban sa West Philippine Sea (WPS).

 Tugon ito ng China matapos ang panibagong diplomatic protest ng Pilipinas laban sa unilateral fishing ban simula Mayo a – uno hanggang Agosto a – disi sais.

 Iginiit ni Chinese Foreign Ministry Spokesman Zhao Lijian na tumalima sila sa United Nation on the Convention on the Laws of the Sea nang ipatupad ang nasabing moratorium.

 Ayon kay Zhao, pino-protektahan lamang nila ang marine biological resources sa karagatang nasa huridiksyon ng China.

 Gayunman, hindi kinikilala ng pilipinas ang fishing ban dahil sinaklawan nito ang ilang isla at bahurang nasa loob ng Philippine Exclusive Economic Zone.

Sumuko na si NBN-ZTE Deal Whistleblower Rodolfo Noel “Jun” Lozada Jr. at kanyang kapatid na si orlando sa National Bureau of Investigation (NBI).

 Kinumpirma ito ni NBI Deputy Director Ferdinand Lavin makaraang pagtibayin ng korte suprema ang conviction laban sa magkapatid kaugnay sa graft case noong 2016.

 Magugunitang nag-issue ang sandiganbayan ng arrest warrant laban sa magkapatid na Lozada matapos ang desisyon ng supreme court sa kanilang graft case hinggil sa land deal sa Philippine Forest Corporation.

 Si Jun Lozada ang Pangulo ng Philforest nang i-award niya ang nasa 6.5 hectares ng public land sa kanyang kapatid sa ilalim ng lupang hinirang program ng ahensya noong 2007.

Naniniwala ang Isabela City Police sa Basilan na grupong Abu Sayyaf ang nasa likod ng magkasunod na pambobomba sa isang fastfood restaurant at bus terminal, noong Lunes.

 Ayon kay Isabela City Police Chief, Lt. Col. Junpikar Sitin, base ito sa kanilang inisyal na imbestigasyon sa insidente.

 Sa kuha sa Closed-Circuit Television (CCTV) cameras sa Barangay Isabela Proper, isang motorcycle rider na nakasuot na dilaw na t-shirt ang nag-iwan ng container na sumabog makalipas ang ilang minuto.

 Karaniwan nang istilo ng bandidong grupo ang magsagawa ng small-scale bomb attack, gaya ng pag-iiwan ng mga bagahe na naglalaman ng pampasabog.

 Hinimok naman ni Isabela City Mayor Sitti Djalia Turabin-Hataman ang Philippine National Police (PNP) na ipagpatuloy ang imbestigasyon at paigtingin ang checkpoints at police visibility upang maiwasang maulit ang insidente.