NATIONAL NEWS

Binalaan ni PNP Director for Operations Police Major General Valeriano De Leon ang mga police commander na mananagot sila kapag hindi sila nakagawa ng aksyon para mapigilan ang pambobomba sa kani-kanilang area of responsibility.

Ang babala ay ginawa ni de Leon kasunod ng apat na pagsabog na naganap sa Mindanao kamakailan.

Ayon kay de Leon, pinaimbestigahan na ni PNP Officer-In-Charge Police Lieutenant General Vicente Danao Jr. sa Regional Director ng Police Regional Office 9 kung saan nagkaroon ng “failure of intelligence” sa kambal na pagsabog sa Isabela City, Basilan na nangyari ilang araw lang kasunod ng pambobomba sa Koronadal City, South Cotabato at Tacurong City, Sultan Kudarat.

Matatandaang kasunod ng unang dalawang pagsabog, nagpalabas ng memorandum si de Leon sa lahat regional directors at unit commanders na paigtingin ang intelligence monitoring at seguridad sa kani-kanilang area of responsibility upang hindi na maulit ang insidente.

Ngunit tatlong araw lang ang nakalipas ay nangyari ang dalawang pagpapasabog ng improvised bombs sa parking lot ng isang fast food outlet at bus terminal sa Isabela City. -sa ulat ni Gilbert Perdez (Patrol 13)

Wala pang indikasyon ng community transmission ng Omicron subvariants BA.2.12.1 at BA.4 sa bansa.

Mababatid na kinumpirma ng Department of Health (DOH) ang 22 kaso ng BA.2.12.1 at isang kaso ng BA.4 sa Pilipinas.
Sa ngayon ay tanging local transmission ng BA.2.12.1 ang idinedeklara ng DOH.

Sa kabila nito, patuloy na hinihimok ng ahensya ang publiko na mag-ingat, at magpabakuna na at magpaturok ng booster shot bilang proteksyon laban sa iba’t -bang variant ng COVID-19.

Naobserbahan ang ”positive growth” ng COVID-19 cases sa 70% ng mga lalawigan, siyudad at munisipalidad sa bansa.

Ayon sa Department of Health (DOH), nananatiling mas mababa sa 1.5% ng total hospital admissions ang severe at critical cases ng COVID-19.

Gayunman, sinabi ng DOH na nasa “low risk” classification pa rin ang Pilipinas.

Patuloy namang pinag-iingat ng ahensya ang publiko laban sa nakakahawang sakit.

Fully vaccinated na kontra COVID-19 ang 70,917,708 na mga Pilipino.

Batay sa pinakahuling datos mula sa National Vaccination Operations Center (NVOC), nasa 14,197,202 ang nakatanggap na ng third dose o booster shot hanggang nitong Hunyo a-primero.

Aabot naman sa 107,452 doses ng COVID-19 vaccine ang average daily vaccination rate sa bansa sa nakalipas na pitong araw.

Base pa sa datos ng NVOC, 152,012,792 jabs na ang na-administer mula sa 245,233,560 total vaccines na binili ng pamahalaan at ibinigay sa Pilipinas, mula noong Pebrero ng nakalipas na taon.

200 kaso ng tuberculosis ang naitala sa unang kwarter ng taon sa lalawigan ng South Cotabato.

Ayon kay John Codilla ng Integrated Health Office ng lalawigan, natukoy ang nasabing mga kaso matapos ang isinagawang active case finding sa lugar.

Aniya, namimigay sila ngayon ng libreng gamot sa mga pasyenteng may tuberculosis.

Gayunman, sinabi ni Codilla na kinakapos sila sa supply ng ilang mga gamot.

Kaugnay nito, nanawagan sila ng tulong sa national government upang masuplayan sila ng mga gamot mula sa Maynila.

Hinimok ng Information Technology Experts ang Commission on Elections (COMELEC) na palitan ang smartmatic bilang technology provider ng ahensya at lumipat sa hybrid election system sa 2025 polls.

Ayon kay National Citizens’ Movement for Free Elections o (NAMFREL) Chairman Augusto Lagman, ang sistemang ito ay mangangailangan ng manual precinct counting para sa transparency at para sa mabilis na automated canvassing.

Binigyang-diin ni dating Information and Communications Technology Undersecretary Eliseo Rio, Jr. na mayroong katanungan tungkol sa kredibilidad ng halalan noong Mayo a-nueve dahil hindi transparent ang pagbibilang ng mga boto sa presinto.

Bagama’t itinanggi ng mga eksperto ang sinasabing nangyari ang pandaraya, hinikayat nito ang COMELEC na magpalit ng bagong provider para maiwasan ang tanong tungkol sa kredibilidad ng mga susunod na eleksyon.

Patuloy na mataas na gasolina.

Ito ang pangunahing pinapasan ng mga mangingisda ayon kay Fernando Hicap, National President ng Pamalakaya bukod pa sa tumaas ding presyo ng mga gamit nila sa pangingisda.

Hirap na hirap aniya ang mga mangingisda subalit nagsasakripisyo pa rin para lamang makaraos sa bawat araw.

Gayunman, ipinabatid sa DWIZ ni Hicap na maraming mangingisda na rin ang naghanap na ng ibang trabaho dahil sa kakarampot na kita sa pangingisda.

Siniguro ng Department of Budget and Management (DBM) na maibibigay sa pinakamahirap na pamilya ang unang dalawang buwan ng tag-500 pisong ayuda bago matapos ang administrasyong Duterte.

Ayon kay DBM acting Secretary Tina Rose Canda, pirmado na ang Memorandum Joint Circular na pinondohan ng apat na bilyong piso kada buwan na inaasahang maipapamahagi sa loob ng buwang ito.

Sa loob ng tatlong buwan mula Abril hanggang Hunyo nasa 1,500 pesos ang matatanggap ng bawat beneisyaryo.

Nabatid na ipinangako ni Pangulong Rodrigo Duterte ang naturang ayuda para maipamahagi sa mahihirap na pamilyang Pilipino na naapektuhan ng serye ng pagtaas ng presyo ng langis.

Nakiisa ang Metropolitan Manila Development Authority (MMDA) sa Department of Health (DOH) para mapalakas pa ang kampanya kontra dengue lalo na ngayong tag-ulan.

Paalala ng ahensya na dapat sundin ang 4s strategy ng DOH na “Search and Destroy, Self-Protection Measures, Seek Early Consultation, at Support Fogging/Spraying” para malabanan ang pagkalat ng dengue.

Dapat din anilang ugaliin ang pagtatapon ng basura sa tamang lagayan para hindi magsilbing “breeding ground” ng mga lamok.

Pansamantalang isasara sa publiko simula sa Lunes, Hunyo a-sais hanggang Hulyo a-kwatro ang National Museum of Fine Arts sa old legislative building bilang paghahanda sa inagurasyon ni President-elect Ferdinand Marcos Jr.

Ito’y ayon sa pamunuan ng National Museum, matapos ihayag ng kampo ni Marcos na ang makasaysayang gusali ang mainam na lugar para pagdausan ng panunumpa ni Marcos bilang ika-17 pangulo ng bansa.

Sinabi naman ng National Museum of the Philippines (NMP) na muli itong bubuksan sa publiko sa Hulyo a-singko.

Samantala, magpapatuloy naman ang regular operation ng National Museum of Anthropology at National Museum of Natural History.