NATIONAL NEWS

Abiso sa mga motorista!

Magsasagawa ng road reblocking ang Department of Public Works and Highways (DPWH) sa ilang lugar sa Metro Manila simula mamayang alas-11 ng gabi hanggang Hunyo 6.

Sakop ng road reblocking ang mga lugar ng:

• Edsa Santolan Southbound sa San Juan City mula sa V.V. Soliven driveway patungong Rochester Street;
• Edsa Quezon City northbound sa harap ng Cubao farmers at Aurora Blvd. Gayundin paglagpas ng Kamuning road.
• C5 road northbound paglagpas ng Mckinley road sa Makati City
• C5 road Southbound sa Makati City;
• Tandang Sora Ave. Quezon City: Visayas Avenue papunta ng San Miguel St.;
• Times street, Quezon City corner West Ave. sa harap ng Kowloon house;
• Commonwealth Ave. Quezon City: Zuzuareggui St.papunta sa harap ng Diliman preparatory school.
• Edsa southbound Quezon City sa service road 2nd block ng Timog Ave. Intersection service road, 2nd block ng Kamuning road at service road at 2nd block corner ng  Kamuning road;

• P. Garcia Avenue Quezon City sa tapat ng UP Ayala TBI

Pinapayuhan naman ng MMDA na dumaan sa mga alternatibong ruta ang mga motorista.

Nasa 16.2% o katumbas ng 2,018,289 na populasyon sa Central Luzon ang nakatanggap na ng booster shots laban sa COVID-19.

Batay sa datos ng Department of Health (DOH), mayroong 12,422,172 na populasyon ang pitong lalawigan sa naturang rehiyon noong 2020 census.

Sa inilabas na COVID-19 case bulletin noong May 29 ng Central Luzon Center for Health Development (CLCHD), nasa 8,308,681 o 66.9% ng kabuuang populasyon ng rehiyon ang fully vaccinated na laban sa sakit.

Nabatid na nakapagtala ng 139 new COVID-19 cases ang Region 3 noong May 24 hanggang 30.

Naniniwala si incoming finance Secretary Benjamin Diokno na posibleng bumaba sa isa sa sampung Pilipino sa taong 2028 ang lebel ng kahirapan sa bansa pagkatapos ng termino ni president-elect Ferdinand “Bongbong” Marcos Jr.

Pero ito ay kung lalago ang ekonomiya ng bansa sa 7% ngayong taon at 6% sa susunod na anim na taon.

Dagdag pa ni Diokno na layon din ng economic managers na mapababa ang debt-to-gross domestic product o GDP ratio sa 3% sa pagtatapos ng termino ni Marcos Jr., sa paniniwalang ito ay magagawa dahil sa kasalukuyang sistema ng buwis na iiwan ng administrasyong Duterte.

Samantala, inirekomenda ng kasalukuyang Department of Finance ang mga bago at mas mataas na buwis kasama ang tatlong taong pagpapaliban ng income tax reduction na naka-iskedyul sa mga indibidwal na nagbabayad ng buwis para mabayaran ang utang ng bansa.

Hindi pa napapanahon na alisin ang State of Calamity sa bansa.

Ayon kay Department of Health undersecretary Maria Rosario Vergeire, may naitatala kasing kaunting pagtaas ng kaso sa ibang lugar at pumapasok na subvariants na mas nakahahawa at may immune escape mechanism.

Nabatid na na-detect sa Pilipinas ang mas nakahahawang Omicron subvariant na BA.2.12.1 kung saan nasa 22 na ang bilang ng mga kaso nito.

Nasabat ng Ninoy Aquino International Airport ang mahigit 700 gramo ng shabu na itinago sa laruan ng bata na nanggaling sa Mexico.

Ayon kay customs district collector Carmelita Talusan, ang droga ay pagmamay-ari ng isang indibidwal na taga-San Juan.

Nang isagawa ng Bureau of Customs ang eksaminasyon, nadiskubre na itinago sa loob ng laruan na drum ang naturang ilegal na droga na idinaan sa Central Mail Exchange Center.

Gayunpaman, naaresto ng awtoridad ang hindi pinangalanang suspek at isinailalim sa custodial investigation habang isinasagawa ang imbentaryo ng customs at PDEA para sa pagsampa ng kaukulang demanda.—mula sa ulat ni Raoul Esperas (Patrol 45)

Siniguro ng Department of Budget and Management (DBM) na maibibigay sa pinakamahirap na pamilya ang unang dalawang buwan ng tig-500 pisong ayuda bago matapos ang administrasyong Duterte.

Ayon kay DBM acting secretary Tina Rose Canda, pirmado na ang memorandum joint circular na pinondohan ng apat na bilyong piso kada buwan na inaasahang maipapamahagi ngayong buwan.

P1,500 naman ang matatanggap ng bawat beneisyaryo sa loob ng tatlong buwan mula abril hanggang Hunyo.

Nabatid na ipinangako ni Pangulong Rodrigo Duterte ang naturang ayuda para maipamahagi sa mahihirap na pamilyang Pilipino na naapektuhan ng serye ng pagtaas ng presyo ng langis.

Nakiisa ang Metropolitan Manila Development Authority (MMDA) sa Department of Health para mapalakas pa ang kampanya kontra dengue lalo na ngayong tag-ulan.

Paalala ng ahensya na dapat sundin ang 4s strategy ng DOH na “Search and destroy, Self-protection measures, Seek early consultation, at Support fogging/Spraying” para malabanan ang pagkalat ng dengue.

Dapat din anilang ugaliin ang pagtatapon ng basura sa tamang lagayan para hindi magsilbing “breeding ground” ng mga lamok.