NATIONAL NEWS

Kalaboso ang isang opisyal ng Bureau of Internal Revenue (BIR) dahil sa paghingi umano nito ng “padulas” upang ibaba ang buwis ng mga binibiktima niyang negosyante sa Zamboanga City.

 Inaresto ng NBI – Western Mindanao Regional Office (WEMRO) ang suspek na si Flora Albao, Revenue Officer 4 ng BIR-Zamboanga City matapos tanggapin sa entrapment operation ang marked money.

 Narekober kay Albao ang pulang paper bag na naglalaman ng kalahating milyong piso na nasa ilalim ng kanyang mesa.

 Ayon kay NBI–WEMRO acting Regional Director, Head Agent Moises Tamayo, modus ng opisyal na magbigay ng napakataas na tax assessment sa mga bibiktimahin para mapupuwersa ang mga ito na makipag-areglo.

 Isinumbong anya ng isang biktima si Albao sa NBI matapos maningil ng 3 million peso tax pero ibababa ito sa 2 million kapalit ng pera.

 Nahaharap na sa kasong robbery-extortion at paglabag sa anti-graft and corrupt practices act ang BIR official.

Tila nawalan ng pag-asa na makumpirma ng limang Duterte appointees kabilang ang tatlong opisyal ng Commission on Elections (COMELEC) matapos na ma-bypass ng Commission on Appointments (CA) ang kanilang ad interim appointments.

 Kabilang sa mga hindi na nakumpirma ng ca sina:

• Commission on Audit (COA) Chairperson Rizalina Noval Justol
• Civil Service Commission (CSC) Chairperson Karlo Nograles
• Commission on Elections (COMELEC) Chairperson Saidamen Pangarungan
• COMELEC Commissioner Aimee Torrefranca-Neri
• At COMELEC Commissioner George Garcia

Nabatid na nilaktawan ng Bicameral Commission ang kanilang appointment dahil hindi na pwedeng magsagawa ng hearing at plenary deliberations ang CA sa pag-adjourn ng sesyon ng kamara bukas, Hunyo a-3.

Dahil dito, dismayado si COMELEC Commissioner George Garcia hinggil sa pag-bypass ng CA.

Umabot na sa mahigit 18 milyon ang bilang ng mga pasaherong naserbisyuhan ng Metro Rail Transilt Line 3 (MRT-3) sa libreng sakay program ng pamahalaan mula noong March 28, 2022.

 Ayon sa MRT-3 management, nasa kabuuang 8,472,637 pasahero ang naka-avail ng libreng sakay sa unang buwan ng programa, mula March 28 hanggang April 30.

 Habang nasa 9 million 596 thousand 886 naman mula a-primero ng Mayo hanggang katapusan na siyang huling araw ng unang extension ng programa.

Asahan pa raw aniya na mas tataas pa ang bilang nito dahil muli pang pinalawig ang libreng sakay sa ikatlong pagkakataon hanggang sa katapusan ng Hunyo.

 Tiniyak ni incoming Senate President Juan Miguel Zubiri na mananatiling independent ang senado at patuloy na magiging senado ng taumbayan sa ilalim ng kanyang pamumuno.

 Ayon kay Zubiri magiging malaya ang bawat senador na maghayag ng sariling  pananaw at paniniwala.

 Matatandaang umatras si Senator Cynthia Villar sa hangarin nito na mag senate president at sinabing susuporta na lamang niya ang super majority sa senado.

 Iginiit ni Zubiri na ang kanyang karanasan bilang majority leader sa 14th, 17th at 18th congress ay makakatulong ng malaki para mapangasiwaan ng maayos ang mga affairs sa senado.

 Sa pagpasok ng 19th congress inilagay bilang Senate President si Zubiri habang Senate President Pro Tempore Si Senator elect Loren Legarda at Majority Leader na si Senator elect Joel Villanueva.

 Pagdating naman sa committe chairmanship:

• Senator Sherwin Gatchalian ay inilagay sa Committee On Ways and Means at Committee On Basic Education
• Senator Nancy Binay bilang Committee on Tourism at Committee on Accounts
• Senator Sonny Angara ay mananatiling Chairman ng Committee on Finance
• Senator Francis Tolentino bilang Blue Ribbon Committee
• Senator Imee Marcos bilang Committee on Foreign Relations
• Senator Raffy Tulfo bilang Committee on Energy at Committee on OFW
• Senator Robin Padilla bilang Committee on Constitutional Amendments
• Senator Bong Go bilang Committee on Health at Committee on Sports
• Senator Chiz Escudero bilang Committee on Justice
• Senator Bong Revilla bilang Committee on Public Works
• Senator Grace Poe bilang Committee on Public Services at Committee on Banks
• Senator Lito Lapid bilang Committee on Games and Amusement
• Senator JV Ejercito bilang Committee on Local Gov’t at Committee on Higher Education
• Senator Jinggoy Estrada sa Committee on Labor and Employment at Committee on Public Order and Dangerous Drug
• At Senator Cynthia Villar na mananatili naman bilang Chairman ng Committee on Agriculture at Environment Committee. –  sa ulat ni Cely Ortega-Bueno (Patrol 19)

Ideklara ni outgoing Senate President Vicente “Tito” Sotto III ang sine die adjournment ng sesyon o pagtatapos ng sesyon ng  18th congress.

 Nabatid na bago nag adjourn sine die, nagkaroon ng valedictory speech sina SP Tito Sotto, Senate Pres Pro Tempore Ralph Recto at Minority Leader Franklin Drilon.

 Sa nasabing speech, nanawagan si Sotto sa papasok na 19th congress na panatiliin ang integridad at independence ng senado.

 Hiniling din ni Sotto na huwag payagang mabahiran ng politika ang  serbisyo sa taumbayan at ingatan ang respetong ibinibigay ng bawat Pilipino sa senado.

 Samantala naging emosyonal si Senator Ronald Bato Dela Rosa ng lapitan at yakapin si Senator Drilon matapos ang valedictory speech nito dahil na-appreciate nito ang tulong ni Drilon sa kanya para mas magampanan ang kanyang trabaho bilang  bagitong  senador noon. - sa ulat ni Cely Ortega-Bueno (Patrol 19)

Nakaambang tumaas ang singil sa kuryente bunsod ng patuloy na pagsirit sa presyo ng langis sa bansa.

 Nabatid na ang patuloy na girian sa pagitan ng Russia at Ukraine ang posibleng dahilan ng patuloy na pagtaas ng lahat ng presyo kabilang na diyan ang langis at mga pangunahing bilihin.

 Ayon kay Power4people Lead Convenor Gerry Arances, nakasalalay ang presyo ng panggatong sa presyuhan ng langis mula sa mga plantang tumatakbo sa coal at iba pang fossil fuel saka ipinapasa sa mga consumer.

 Bukod pa dito, ang dalawang araw na trading sa pandaigdigang merkado, tumaas ng limampiso ang imported diesel; tatlong piso naman sa gasolina bunsod ng pagbabawal ng maraming bansa sa Europa sa Russian oil.

 Kaugnay nito, inihirit ng grupo sa susunod na administrasyon na repasuhin ang mga kontrata at tanggalin ang “pass-thru provision” o pagpapasa ng fuel costs sa mga consumer.

Inihayag ni Commission on Elections (COMELEC) Chairman Saidamen Pangarungan, ang naging desisyon ng Commission on Appointment (CA) na hindi aksiyonan ang kanilang ad interim appointment.

 Ito ay sa kabila ng pag-bypass dahil sa kakulangan ng quorum sa gitna ng pagsasara ng 18^th congress.

 Nabatid na ipinagmalaki ni Pangarungan ang naging tagumpay ng 2022 national and local elections dahil nabigyan ng karapatan ang mga Pilipino na makaboto kung saan, umabot sa 83.07% ang voter turnout.

 Matatandaang inihayag ng ahensya na naging mapayapa ang nagdaang botohan dahil sa mabilis na pagbibilang ng mga boto maging ng proklamasyon.

 Naniniwala si Pangarungan na sa naging tagumpay ng halalan, maaari sana siyang makumpirma ng CA hinggil sa ad interim appointment kung nagkaroon lamang ng quorum bago nagsara ang 18^th congress.

 Ang ad interim appointment ay ginagawa kapag nagkaroon ng recess o “period of time” sa kongreso hinggil sa gampanin ng mga tungkulin at kapangyarigan ng posisyon.

 Sa kabila nito, nagpasalamat si Pangarungan sa mga tauhan ng kanilang ahensya na tumulong para maging matagumpay ang 2022 elections.

Sinakyan ng komedyanteng si Jayson Gainza ang biro ng mga netizen matapos iugnay sakaniya ang hiwalayan ng singer na si Moira Dela Torre at asawang si Jason Hernandez.

Sa post ng komidyante sa kaniyang Instagram account, kaniyang ini-repost ang ginawang video ng isang netizen na sinisisi siya dahil sa hiwalayan nina Moira at asawang si Jason.

Ayon kay Gainza, hindi siya ang tinutukoy sa isyu at nadadamay lamang silang matitino na Jayson.

Sinundan pa ito ni Jayson ng isa pang post kung saan, ipinakita niya ang larawang kasama si Moi Marcampo na personal assistant ni Piolo Pascual na may caption na “Moi kapit lang tayo wag tayong bibitaw.”

Umani naman ito ng ibat-ibang reaksiyon na nagpangiti sa mga netizen.

Ang naturang larawan ay ni-repost din ni Moi na kumalat naman sa social media at ginawang meme ng mga netizen kaugnay sa paghihiwalay nina Moira at Jason.