Pumalo na sa 3, 695, 068 ang nationwide tally ng COVID-19.
Ito’y matapos makapagtala ng 539 na bagong kaso kung saan ito ang pinakamataas na naitala sa nakalipas na dalawang buwan.
Habang bahagyang tumaas ang aktibong kaso ng virus sa 3,829 mula sa 3, 462.
Umakyat naman sa 3, 630, 772 ang kabuuang bilang ng gumaling sa sakit.
Pumalo naman sa sa 60,467 ang nasawi sa naturang virus.
Nakatakdang umupo si Congressman Rodante Marcoleta bilang kinatawan ng isang Party-list.
Ito ay matapos tanggapin ng Commission on Elections (COMELEC) ang substitution ni Marcoleta bilang nominee sa SAGIP Party-list.
Matatandaang, nuong halalan ay umatras si Marcoleta sa kanyang kandidatura sa pagka-senador.
Kabilang si Marcoleta sa second nominee ng nasabing Party-list sa papasok na 19th Congress.
Samantala, nakakuha naman ng 2 seats sa kongreso ang naturang Party-list.
Nagkaroon na rin ng paggalaw sa presyo ng itlog at bigas sa ilang palengke sa Metro Manila.
Sa E. Cabacang stall, nasa P5.50 na ang presyo ng kada piraso ng small na itlog.
Mayroon ding ibinebenta rito na P30 katumbas ng limang piraso na at P180 sa kada tray naman ng itlog.
Habang ang pinakamahal na itlog ay mabibili na sa halagang P8 kada piraso para sa large na itlog at P240 naman ang kada tray.
Isa pa rin sa dahilan ng pagtaas ng presyo ng itlog ay ang tumaas na presyo ng produktong petrolyo gayundin ang feeds sa manok.
Habang sa bigas naman ang pinakamura rito ang P35 kada kilo na regular milled rice, habang ang pinakamahal ay P60 kada kilo.
Dahil naman marami ang nagtitipid, karamihan ay bumibili ng P40 kada kilo na malambot na rin.
Hindi pa naaabot ng Philippine Overseas Employment Administration (POEA) ang Overseas Deployment Cap para ngayong 2022.
Dahil dito, tuluy-tuloy pa rin ang pagde-deploy ng POEA ng mga Pinoy Healthcare Workers (HCWs) abroad.
Sinabi ni POEA Chief Bernard Olalia, nananatiling sapat ang bilang ng mga nurses ngayon sa Pilipinas kahit na mayroong ipinapadala sa ibang bansa.
Tinukoy nito ang katatapos lamang na PRC Examination para sa mga nurses na inaasahang magdaragdag sa bilang ng working force.
Ipinabatid pa ni Olalia na hindi naman awtomatikong aalisin ang Deployment cap oras na ma-lift na ang COVID-19 National Emergency sa bansa.
Walang nakikitang Election offense o Criminal at Administrative Liability ang F2 Logistics kasunod ng sinasabing “Mishandling” ng mga election paraphernalia sa Hatol ng Bayan 2022.
Ito’y base na rin sa pagsisiyasat ng Commission on Elections (Comelec) Packing and Shipping Committee.
Ayon kay Acting Comelec Spokesperson John Rex Laudiangco na ang panel ay nagsumite sa en banc ng ulat ng imbestigasyon “na sinusuri”.
Sinabi pa ni Laudiangco na ang nakikita lamang ngayon na inaaral ay ang pananagutan sa pagpapatupad ng kontrata.
Ibinahagi naman ni Laudiangco sa media ang buod ng ulat ng imbestigasyon, na nagsabing ang mga Vote Counting Machine (VCM) at labis na materyales sa halalan tulad ng indelible ink, appointment papers, at seal, ay inilagay sa loob ng “black corrugated boxes for the official ballots.”
Samantala, ang F2 Logistics ay umani ng pagsisiyasat sa publiko matapos makuha nito ang kontrata para maging poll logistics provider ng Comelec para sa Eleksyon 2022.
Masusing pinag-aaralan ng Department of Trade and Industry (DTI) ang kahilingan ng ilang manufacturers sa taas-presyo ng mga tinapay at sardinas.
Sinabi ni DTI Assistant Secretary Ann Claire Cabochan ng Consumer Protection Group, nanawagan ang mga gumagawa ng tinapay dahil sa mataas na presyo rin sa mga produkto tulad ng harina.
Humihiling din ang mga gumagawa ng sardinas ng price increase dahil sa pagtaas ng presyo ng mga isda.
Binigyang diin ni Cabochan na tinitignan nila ng mabuti ang mga naturang kahilingan dahil marami silang kinokonsidera hinggil sa pagtaas ng presyo ng mga pangunahing bilihin.
Samantala, sisikapin nilang panatilihin sa pinakamababa ang pagtaas ng presyo ng mga bilihin sa bansa.
Pinangalanan na rin ng Marcos Administrastion ang mga bagong mamumuno sa National Intelligence Coordinating Agency (NICA) at Bureau of Internal Revenue (BIR).
Sa inilabas na pahayag ni Marcos’ incoming Press Secretary Atty. Trixie Cruz-Angeles, itinalaga na ni President-elect Ferdinand “Bongbong” Marcos Jr. sina Lilia Guillermo bilang bagong BIR Commissioner.
Si Guillermo ang kasalukuyang namumuno sa Technology and Digital Innovation Unit ng Bangko Sentral ng Pilipinas at nagma-manage ng IT modernization plan nito.
Samantala, tatayo naman si Ret. Philippine National Police (PNP) Deputy Director General Ricardo de Leon bilang National Intelligence Coordinating Agency (NICA) Director-General.
Magsisilbi rin siyang Secretariat ng Anti-Terrorism Council ng bansa at isang cluster ng Anti-Terrorism Council.
Nabatid na si de Leon ay kasalukuyan presidente ng Philippine Public Safety College kung saan siya ang humahawak sa training ng Police officer cadets, Police rookies, Fire at Jail personnel.
Naging miyembro rin ito ng Philippine Military Academy (PMA) Matatag Class of 1971 at naging commander ng Anti-Illegal Drugs Special Operations Task Force noong 2004 sa ilalim ng administrasyon ni former President Gloria Macapagal-Arroyo.
Inatasan ng Metropolitan Waterworks and Sewerage System – Regulatory Office (MWSS-RO) ang Maynilad na magbigay ng rebate sa ilang customers na kanilang sinerserbisyuhan.
Ito’y matapos magkamali ang Maynilad sa kompyutasyon ng bill na hindi alinsunod sa mga rate na kanilang inaprubahan.
Gumamit anila ang Maynilad ng Local Franchise Tax (LFT) ng Local Government Units kung saan sila nagseserbisyo sa halip na approved rate ng MWSS Board of Trustees (BOT).
Dahil dito, ipinag-utos ng MWSS na bigyan ng rebate ang kanilang mga customers na mula sa mga lungsod ng Muntinlupa, Las Pinas, Malabon, Valenzuela at Quezon City.
Ang naturang rebate ay saklaw ng bill ng Maynilad customers mula nitong Marso hanggang ngayong buwan.
Pinalawig ng Light Rail Transit Authority (LRTA) ang operating hours ng LRT2.
Batay sa abiso, sinabi ng LRTA na mula kahapon ay ipinatupad na ito upang mas maraming pasahero ang maserbisyuhan ng LRT2.
Mula sa orihinal na iskedyul na 8:30pm, aalis ito sa Antipolo Station ng alas-9 ng gabi.
Gayundin, aalis ang huling commercial train mula sa Recto Station ng 9:30 ng gabi mula sa naunang alas-9 ng gabi.
Ang 17 kilometrong LRT 2 ay mayroong 13 istasyon , mula Recto Avenue sa Maynila hanggang Masinag sa Antipolo, Rizal.
Nakaamba na naman ang isa pang yugto ng oil price hike sa susunod na linggo.
Ito na ang ikatlong sunod na pagkakataon na magtataas sa presyo ng produktong petrolyo sa bansa.
Base sa oil trading monitoring, tataas ng P2 hanggang P2. 30 sa kada litro ng diesel
Habang, tataas naman ng .20 sentimo hanggang .50 sentimo sa kada litro naman ng gasolina.
Karaniwang ipinatutupad ng oil companies ang fuel price adjustments kada Lunes, na epektibo naman sa pagsapit ng Martes.