NATIONAL NEWS

Nagsimula na ang DPWH sa pag-repair ng EDSA Kamuning Flyover sa Quezon City matapos makitaan ng mga butas.

Isinara muna ang isang lane sa Southbound dahil kailangan munang alisin ang semento sa ibabaw para mabatid kung hanggang saan ang kailangang i-repair.

Dahil dito, tanging mga maliliit na sasakyan lamang at EDSA carousel buses ang pinapayagang gumamit ng Flyover sa Southbound direction.

Sinabi ng DPWH na kakayanin sa loob ng isang linggo ang pag-repair sa nasabing bahagi ng EDSA Kamuning Flyover.

Hiniling ng National Grid Corporation of the Philippines (NGCP) sa gobyerno ang provisional authority para sa implementasyon ng Camarines Sur-Catanduanes Interconnection Project.

Layunin nitong magkaroon ng access sa mas maasahan at maayos na generation power source ang mga consumer sa Luzon grid.

Sa inihaing aplikasyon sa energy regulatory commission, inihayag ng NGCP na umabot sa 15 megawatts ang peak demand sa Catanduanes noong 2020 pero ang total contracted supply lamang ay 10.18 megawatts.

Ipinunto ng grid operator na hindi kayang i-accommodate at sumabay ng mga power plant sa Catanduanes sa lumalaking demand sa kuryente.

Kailangan anilang ipatupad ang isang long-term solution para sa mas maaasahang power supply hangga’t maaga lalo’t mayroon lamang ang NGCP na apat na taon bago tuluyang makumpleto ang implementasyon ng CCIP.

Kabilang sa proposal, maglalagay ng submarine cables at overhead transmission lines upang suportahan ang lumalaking power demand sa isla at isulong ang socio-economic development sa pamamagitan ng economic plans at programa ng gobyerno.

Inaasahang aakyat sa 400,000 metric tons ang pork imports sa Pilipinas ngayong taon.

Ito, ayon sa United States Department of Agriculture-Foreign Agricultural Service, ay makaraang tapyasan ang taripa sa imported na karneng baboy.

Ayon sa USDA, ang bagong forecast ay mataas kumpara sa initial projection na 375,000 metric tons ng pork imports ngayong taon.

Ang pagdami ng imported na karne ay bunsod ng inilabas na Executive Order 171, na nagpapataw ng mas mababang taripa sa pork imports hanggang katapusan ng taon.

Mayo 21 nang lagdaan ni Pangulong Rodrigo Duterte ang naturang kautusan na layuning ibaba ang presyo at pananatilihing matatag ang supply ng karne sa bansa.

Aabot na sa 400,000 healthcare workers at iba pang personnel na kasama sa pagtugon sa pandemya ang nakatanggap na ng One COVID-19 Allowance (OCA).

Tugon ito ng Department of Health sa pahayag ni Private Hospitals Association Philippines President, Dr. Jose Rene de Grano na ang karamihan sa mga healthcare worker sa pribadong ospital ay hindi pa nakatatanggap ng kanilang OCA.

Nasa 126,000 naman mula sa kalahating milyong healthcare workers ang hindi pa nakatatanggap ng OCA mula sa Department of Budget and Management.

Tiniyak ni health undersecretary at treatment czar Leopoldo Vega na nakikipag-ugnayan na sila sa PHAPI hinggil sa listahan ng mga ospital na pinag-ta-trabahuhan ng mga health worker na hindi pa tumatanggap ng OCA.

Kahit anya magpalit na ng administrasyon ay makatitiyak  ang mga health worker na matatanggap nila ang benepisyo.

Una nang naglaan ang DBM ng P7.92-B budget para sa COVID-19 allowance ng mga pampubliko at pribadong healthcare worker at non-healthcare worker.

Magiging mahusay sa kanyang bagong posisyon si Vice President-elect Sara Duterte.

Ito ang inihayag ng kanyang running mate na si incoming President Ferdinand “Bongbong” Marcos, Jr. matapos ang inagurasyon ng presidential daughter kahapon.

Ayon kay Marcos, inaasahan niyang ipamamalas ni outgoing Davao City Mayor Duterte-Carpio ang husay sa paggampan sa tungkulin nito bilang susunod na Pangalawang-Pangulo.

Kasamang dumating kahapon ni PBBM sa Davao City kahapon ang asawang si Liza, panganay na anak na si incoming Ilocos Norte Rep. Sandro Marcos, upang saksihan ang oath-taking ni Duterte.

Dumating din ang kapatid ni Marcos na si Senador Imee, sa seremonya para sa ika-15 bise presidente ng bansa.

Isa na namang plebo ng Philippine National Police academy o PNPA Sa Silang, Cavite ang patay matapos ang endurance test na kanyang pinagdaanan sa nakalipas na dalawang linggo.

Kinilala ang biktimang si Rafael Sakkam, na binawian ng buhay dakong ala-6 ng gabi noong Sabado, Hunyo 18 habang ginagamot sa Qualimed Hospital sa Sta. Rosa City, Laguna.

Ayon sa Police Regional Office-4A, nag-collapse si Sakkam noong June 3 matapos umanong mahirapang huminga sa reception rites at agad dinala sa PNPA dispensary.

Makalipas ang apat na araw ay inilipat ang biktima sa Qualimed Hospital kung saan siya binawian ng buhay, pero hindi tinukoy ang sanhi ng kanyang kamatayan.

Sa reception rites, inaatasan ang mga kadete na magsagawa ng serye ng mga pagsasanay sa ilalim ng matinding sikat ng araw upang masubok ang kanilang endurance o katatagan, na tinaguriang baptism of fire.

Nagsasagawa na ng imbestigasyon ang PNP upang matukoy ang tunay na sanhi ng kamatayan ng biktima.

Umangat ang Pilipinas sa 125^th rank mula sa 163 bansa sa Global Peace Index o GPI ngayong taon.

Kabilang din ang Pilipinas sa limang bansang may pinakamalaking improvement sa peace and security indicators, bukod sa Libya, Egypt, Saudi Arabia at Algeria.

Sa peacefulness scale na 1 hanggang 5, nakakuha ang Pilipinas ng kabuuang score na 2.339.

Naitala rin ng bansa ang pinaka-malaking improvement sa Asia-pacific region at ang ika-limang pinaka-malaking improvement sa kapayapaan.

Gayunman, nakasaad sa ulat ng GPI na ang Pilipinas ay nananatiling pangatlo sa hindi gaanong mapayapang bansa sa rehiyon sa ikalawang sunod na taon, na sinundan ng Myanmar at North Korea.

Samantala, ang Iceland pa rin ang pinaka-mapayapang bansa simula noong 2008, na sinundan ng New Zealand, Ireland, Denmark, Austria, Portugal, Slovenia, Czech Republic, Singapore at Japan.