Magkakabit ng mas marami pang closed-circuit television (CCTV) ang Bureau of Immigration (BI) sa Ninoy Aquino International Airport (NAIA) hinggil sa kontrobersyal na “Pastillas Scheme” na kinasasangkutan ng mga opisyal at kawani ng nasabing ahensya.
Matatandaang sinibak sa serbisyo ng Office of the Ombudsman ang 45 opisyal at tauhan ng BI matapos mapatunayan ang pagkakasangkot ng mga ito sa “Pastillas” Scheme.
Nabatid na nagpapabayad umano ng aabot sa 10,000 piso kada isang Chinese ang mga kawani para makapasok ang mga dayuhan sa Pilipinas.
Ayon kay BI Spokesperson Dana Sandoval, mag-iimprove ng mga equipment ang kanilang ahensya para mas malinaw at kitang kita ang aktibidad o ginagawa ng mga nasasangkot sa katiwalian.
Sinabi ni Sandoval na binigyan na rin ng supervisory powers ang ilang unit ng ahensya maging ang paglilipat ng control and intelligence unit sa intelligence division na susubaybay sa galaw ng mga opisyal at kawani nito na nakatalaga sa airport.
Samantala, siniguro naman ni Sandoval na patuloy paring nasusunod ang guidelines na ipinatutupad ng Department of Justice (DOJ).
