NATIONAL NEWS

Pinuri ni 4^th District Leyte Rep. Richard Gomez si outgoing President Rodrigo Duterte dahil sa naitulong nito upang maging maayos ang bansa.

Ayon kay Gomez, malaki umano ang kaniyang pasasalamat sa pangulo dahil nabawasan ang kriminalidad at nasugpo ang iligal na droga sa Ormoc City.

Bukod pa dito, malaki din ang naitulong ng pangulo sa pagsasakatuparan ng mga infrastructure programs sa ilalim narin ng administrasyong Duterte.

Naging emosyunal din si Gomez nang magpasalamat sa pangulo, lalo nat malapit na itong bumaba sa puwesto sa Hunyo 30.

Nagpaabot ng pagbati si COMELEC Spokesperson James Jimenez kay Outgoing Davao City Mayor at Vice President-Elect Sara Duterte-Carpio.

Ito ay kasunod ng naging inagurasyon ni Duterte-Carpio kahapon Hunyo 19 sa Davao City.

Matatandaang pinayagan ng Commission on Elections (COMELEC) na mapaaga ang inagurasyon ni Duterte-Carpio habang sa darating na Hunyo 30 naman gaganapin ang inagurasyon ni President Elect Ferdinand “Bongbong” Marcos, Jr.

Ipinagdiwang ng pamahalaang Lungsod ng Maynila ang ika-161 anibersaryo ng kapanganakan ng Pambansang Bayaning si Dr. Jose Rizal.

Idinaos ang aktibidad sa pamamagitan ng isang wreath-laying ceremony sa Rizal Park, kahapon.

Iba’t ibang indibidwal, organisasyon at mga kaanak ni Rizal, na kilala rin bilang “Pepe”, ang nag-alay ng bulaklak sa pangunguna ni Vice Mayor Honey Lacuna.

Nagkaroon din ng kahalintulad na aktibidad sa Calamba City, Laguna na hometown ni Pepe.

Isinabay ni Calamba City mayor-elect Roseller “Ross” Rizal, na apo sa tuhod ng pambansang bayani, ang kanyang inagurasyon sa kaarawan ng lolo sa Rizal shrine sa barangay Poblacion.

Bago nag-alay ng bulaklak ang nakababatang Rizal sa bantayog ng ninuno, nanumpa si Roseller kay barangay Batino chairman Pio Dimapilis.

Nagpasalamat ang Malacañang sa ibinigay na suporta at tiwala ng publiko kay Outgoing Davao City Mayor at Vice President-Elect Sara Duterte-Carpio.

Ayon kay Acting Presidential Spokesperson at PCOO Secretary Martin Andanar, kailangang magkaroon ng pagkakaisa at suportahan ang bagong administrasyon upang masiguro ang tagumpay ng bansa.

Sa naging inagurasyon ni Vice President Elect Sara Duterte-Carpio na dinaluhan ng mga opisyal, kaniyang ama na si Pangulong Rodrigo Duterte at pamilya Marcos sa pangunguna ni President Elect BBM, pinasalamatan ni Inday ang mga pilipinong nasa likod ng tagumpay ng bagong administrasyon.

Hinikayat din ni Duterte-Carpio, ang publiko na ipakita ang pagmamahal sa bansa sa pamamagitan ng pag-iingat sa komunidad at sariling pamilya sa kabila ng mga hamon na dumarating sa buhay ng bawat isang Pilipino.

Samantala, kasabay ng pagdiriwang ng Father’s Day kahapon, binati din ni Duterte-Carpio ang lahat ng mga tatay na nagsakripisyo para itaguyod ang kanilang pamilya.

Sampung araw bago ang inagurasyon ni President-elect Ferdinand “Bongbong” Marcos Jr., puspusan na ang preparasyon sa National Museum sa Lungsod ng Maynila.

Abala na sa pagpipintura sa bukana ng museyo ang mga tauhan ng Department of Public Works and Highways, na nangunguna rin sa paglilinis at pagpapaganda sa buong paligid ng gusali.

Nagtayo na rin ang DPWH ng scaffolding sa harapan ng museyo.

Inaasahang maraming kilalang personalidad at matataas na opisyal ng gobyerno ang dadalo sa nasabing aktibidad na isang napakahalaga at makasaysayan para sa bansa.

Kilala ang National Museum bilang dating ‘legislative building’ na nagsilbi ring venue ng inagurasyon nina dating Pangulong Manuel Quezon noong 1935, Jose Laurel noong 1943 at Manuel Roxas noong 1946.

Inihayag ng Philippine Charity Sweepstakes Office (PCSO) na wala paring nakakasungkit ng tumataginting na mahigit 219,236,988 pesos na jackpot prize sa grand lotto 6/55.

Ayon sa PCSO, sa huling bola noong Sabado, walang nakahula sa six-digit winning combination na 48-55-21-05-18-52.

Dahil dito, inaasahang lalo pang madaragdagan ang naturang premyo sa susunod na lotto draw na gagawin naman mamayang gabi.

Samantala, nasungkit naman ng isang residente sa Batangas ang mahigit 5.9 million pesos na jackpot prize sa grand lotto 6/42.

Matagumpay na nahulaan ng lucky bettor ang six-digit winning combination na 08-15-11-23-36-33 kung saan, nabili ng mapalad na mananaya ang kanyang lucky ticket sa Taal, Batangas.

Para makuha ang premyo, kinakailangan lamang ng lucky bettor na magtungo sa PCSO Main Office sa Mandaluyong City at iprisinta ang kanyang lucky ticket kasama ng dalawang valid ids.

Patuloy namang hinihikayat ng PCSO ang publiko na tangkilikin ang kanilang lotto games upang magkaroon na ng tiyansang maging susunod na milyonaryo.

Inirekomenda sa pamahalaan ni Infectious Disease Expert Dr. Rontgene Solante, miyembro ng Vaccine Expert Panel (VEP) ang paggamit ng variant-specific vaccines bilang booster dose.

Ayon kay Solante, mataas ang posibilidad na mas mabisa itong panlaban sa nakakahawang Omicron variant para masolusyonan ang humihinang bisa ng primary vaccine series pagkalipas ng ilang buwan.

Iginiit ni Solante na ang variant-specific vaccines ay may mataas na proteksiyon laban sa Omicron variant kaysa sa ibang mga bakuna.

Sa kabila nito, mabisa pa rin ang booster shots na ginagamit ng pamahalaan laban sa Omicron kung saan, ayon sa National Vaccination Operations Center (NVOC), nasa 14,704,514 indibidwal na ang tumanggap ng unang booster shots habang aabot naman sa 648,555 ang nabigyan na ng second booster dose ng pamahalaan.

Nakatakdang maglunsad ng panibagong ospital ang pamahalaang lokal ng Maynila sa Hunyo 24 kasabay ng pagdiriwang ng ika-450^th Founding Anniversary ng lungsod.

Ang nasabing konstruksiyon ang pinaka bago at modernong pagamutan kung saan, nasa 99.6% na itong tapos.

Ayon kay Manila City Mayor Isko Moreno, lahat ng major equiment ng nasabing ospital ay nakaayos na kung saan, nais na maibigay ang first-class service sa mga pasyente.

Ang bagong Ospital ng Maynila ay mayroong 384-bed capacity, 12 intensive care units (ICUs) at 20 private rooms, 30 emergency rooms gayundin ng iba pang amenities gaya ng three-storey parking building, helipad at iba pa.

Sinabi ni Moreno na ang naturang pagamutan ay maaaring ihanay sa mga nangungunang pribadong ospital sa bansa, pagdating sa mga pasilidad at serbisyong maaaring i-avail ng bawat isa at libre ipagkakaloob para sa mamamayan.

Pinasalamatan naman ni Moreno ang mga construction worker at engineers sa pagsusumikap na agad matapos ang 10-storey, fully air-conditioned hospital sa lalong madaling panahon.