Hindi nabanggit ni Vice President Elect Sara Duterte-Carpio sa kaniyang inaugural speech ang mga plano niya bilang kalihim ng Department of Education (DepEd).
Ayon kay Professor Herman Kraft ng UP Political Science Department, pawang motherhood statements ang laman ng talumpati ni Duterte at uubra sanang banggitin niya ang kanyang mga plano sa education sector.
Sinabi ni Kraft na sadyang naghihintay ang publiko ng mga polisiyang ikakasa ni Duterte sa DepEd.
Nasa 1,500 Undocumented Filipino sa Sabah ang tinulungan ng Philippine Embassy sa Kuala Lumpur, Malaysia.
Partikular ang mga Pinoy na nagtatrabahao sa palm oil plantations sa lugar na hindi nare-regular dahil sa kawalan ng pasaporte.
Sa ngayon, pinoproseso na ng embahada ng Pilipinas ang mga passport at birth certificates ng kanilang dependents na nag-aaral sa eskwelahan na nasa plantasyon.
Suportado ni Vice President elect Sara Duterte ang planong pagbabalik ng face-to-face classes sa Agosto.
Pero aniya, magsasagawa pa sila ng pagpupulong ni Education Secretary Leonor Briones sa Sabado, June 25.
Dagdag pa ni Duterte-Carpio na makikipag-ugnayan din siya sa iba pang mga stakeholders kaugnay sa naturang usapin.
Nabatid na nasa 38,000 na mga paaralan ang handa na sa in-person classes sa naturang buwan.
Mas maraming kaso ng COVID-19 sa bansa ang inaasahang maitatala sa mga susunod na linggo.
Ito ay matapos makita ng Department of Health (DOH) ang muling pagtaas o “peak” ng mga impeksyon.
Ayon kay Health Undersecretary Maria Rosario Vergeire, mahigpit nilang binabantayan ang Metro Manila na nakitaan ng pagsirit ng COVID-19 cases na ngayon ay nasa 70%.
Aniya, dumoble rin ang average number ng mga kaso sa rehiyon kumpara noong nakalipas na linggo habang tumaas din sa 1.02 ang average daily attack rate.
Bukod sa NCR, minomonitor rin ng DOH ang pagtaas ng COVID-19 cases sa Ilocos Region, Cagayan Valley, CALABARZON, MIMAROPA, Western Visayas at Northern Mindanao.
Nilinaw naman ng kagawaran na hindi pa muling nararanasan ng bansa ang COVID-19 surge.
Inihayag ni House Ways and Means Committee Chairperson Joey Salceda na posibleng tumaas ang inflation rate o pagtaas ng presyo ng mga bilihin sa bansa sa 8.1% sakaling magpatuloy pa ang giyera sa pagitan ng Russia at Ukraine.
Ayon kay Salceda, maaari pang lumampas sa 5.4% ang inflation rate batay sa ulat ng Philippine Statistics Authority (PSA).
Nabatid na ang naturang rate ay mas mataas sa 4.9% na naitala noong april at 4.1% sa kaparehong buwan noong nakaraang taon.
Sinabi naman ni Salceda na upang matugunan ang nakaambang problemang ito, dapat na pagsikapan ng pamahalaan ang pangangalaga sa mahihirap na Pilipino at pagtiyak sa food security ng bansa.
Dalawa ang sugatan habang nasa 100 pamilya ang nawalan ng tirahan sa sumiklab na sunog sa Parañaque City.
Naganap ang sunog sa Valley 6 barangay San Isidro bago mag-ala-1 ng madaling araw na umabot sa ika-apat na alarma.
Nasa 50 bahay ang naapektuhan at pansamantalang nananatili ang mga residente sa isang covered court.
Tinatayang aabot sa 600,000 pesos ang halaga ng pinsala at ari-arian ang natupok ng sunog.
Walang naitalang bagong kaso ng COVID-19 ang Department of Health sa dalawang lugar sa National Capital Region.
Batay sa datos ng DOH, walang bagong kaso ng infection sa Navotas at bayan ng Pateros habang ang Quezon City ang may pinakamataas na bilang ng bagong kaso ng COVID-19 na may 71.
Sumunod naman ang Makati na mayroong 41 new cases; Parañaque, 33 cases; Maynila, 31; pasig, 29; Taguig, 24; Las Piñas, 12; Mandaluyong, 10; Muntinlupa at Pasay na may tig-siyam; Marikina, walo; Caloocan, lima; San Juan, apat; at Malabon at Valenzuela na may tig-tatlong bagong kaso ng COVID-19.
Kahapon nang makapagtala ang ahensya ng 612 panibagong bilang ng nahawa sa COVID-19, na pinakamataas na new COVID cases simula noong April 3.
Nanawagan si President-elect Bongbong Marcos Jr., sa publiko na makibahagi sa mga hakbang na makakatulong upang maiwasan ang panibagong surge ng COVID-19.
Kaugnay nito, hinimok ni Marcos ang publiko na magpaturok na ng booster dose laban sa nakahahawang sakit.
Binigyang diin ni PBBM na kailangan ng dagdag na proteksyon lalo’t may ilang COVID variants na resistant sa first at second dose ng bakuna.
Sinabi pa nito na dapat ding ipagpatuloy ng publiko ang pagsunod sa minimum health standards upang hindi na lumobo ang bilang ng infections na makakahadlang sa muling pagbangon ng ekonomiya ng bansa.
Makikipag-ugnayan pa ang PNP sa pamunuan ng Philippine Arena kaugnay sa posibleng pag-hook up nito sa inagurasyon ni President-elect Ferdinand “Bongbong” Marcos, Jr. sa June 30.
Ayon ito kay PNP Director for Operations, Police Brigadier General Valeriano de Leon dahil nasa halos 300 hanggang 350 guests lamang ang ma-a-accommodate sa National Museum at hindi rin naman lahat ay kaya pang makapag-biyahe para masaksihan ang makasaysayan aniyang inagurasyon ni BBM.
Nanawagan si UN special Rapporteur Mary Lawlor sa awtoridad sa Pilipinas na i-atras na ang mga kaso laban sa human rights defenders.
Sa gitna na rin ito nang pagsalang sa witness stand ng national officers ng karapatan sa perjury case na isinampa ni outgoing national security adviser Hermogenes Esperon, Jr. laban sa grupo.
Sinabi ni Lawlo na ang paghahain ng kaso ay malinaw na retaliation o pagganti sa mga hakbangin ng human rights defenders ng bansa.
Una nang inihayag ng karapatan na ang kaso ay isinampa nila katuwang ang Gabriela at Rural Missionaries of the Philippines matapos nilang isama si Esperon bilang respondent sa mga inihain nilang petition for writs of amparo at habeas corpus.