NATIONAL NEWS

Hindi nakikita ng isang eksperto sa susunod na dalawang linggo ang pangangailangang i-akyat ang Metro Manila sa alert level 2 kahit pa naitala ang bahagyang pagtaas ng kaso ng COVID-19.

 Kinontra ni Infectious Diseases Expert Dr. Edsel Dr. Salvaña ang naging pagtaya ng OCTA Research na mula sa low risk ay maaaring mag-moderate risk ang sitwasyon ng COVID-19 sa National Capital Region (NCR) sa darating na dalawang linggo.

 Ayon kay Salvaña, sa ngayon ay wala pang indikasyon na kailangang magtaas ng alerto dahil gumagana ang epekto ng bakuna at mababa ang bilang ng mga naoospital.

 Aniya malaking bagay sa ngayon na ipagpatuloy ang paggamit ng face mask dahil nakakatulong ito laban sa kontaminasyon ng COVID-19.

 Umaapela si Infectious Diseases Expert Dr. Edsel Salvaña sa mamamayan na hindi pa rin nagpapa-booster shot na magpabakuna na dahil sa kumakalat na COVID variants at subvariants.

 Ayon kay Salvaña, mas malaking bentahe ang naka-booster shot para magkaroon ng malakas na proteksyon laban sa COVID-19.

Nanawagan din ang eksperto sa mga magulang ng batang edad 12 hanggang 17 na payagang magpa-booster ang kanilang mga anak sa sandaling may go signal na ang Department of Health (DOH) para sa booster shot ng nabanggit na age bracket.

 Aniya, bagama’t tumataas ang mga naitatalang kaso ngayon ng COVID-19 hindi kailangang mangamba o mag-panic dahil mababa na ang antas ng mga namamatay o nabibingit sa peligro dahil sa bakuna at sa patuloy na pagsunod sa public minimum health standards ng publiko.

Aminado ang Teacher’s Dignity Coalition (TDC) na hindi nila maituturing na matagumpay ang pagpapatupad ng blended learning sa gitna ng COVID-19 pandemic.

 Ayon kay TDC Chairperson Benjo Basas, bagama’t matagumpay na nairaos ang implementasyon ng blended learning ay hindi nila lubos na natutukan ang mga bata lalo na ang mga sumailalim sa purong modular distance learning.

 Bagama’t bukas pa rin sila sa online learning bilang altertibong paraan ng pagtuturo ay nanawagan ang grupo na ibalik na ang face-to-face classes.

 Samantala, binigyan ng TDC ng gradong 7 si outgoing DEPED Secretary Leonor Briones kung pagbabasehan ang naging performance nito sa ahensya at pagtugon sa concerns ng mga guro.

Lumabas sa ulat ng Commission on Audit (COA) ang mga kawani ng gobyerno na kumita ng pinakamalaki para sa taong 2021 ay ang mga opisyal ng Bangko Sentral ng Pilipinas (BSP).

 Batay sa Report on Salaries and Allowances ng COA, pinakamalaki ang nakuhang sahod at allowance ni BSP Governor Benjamin Diokno mula sa lahat ng kawani ng gobyerno noong nakaraang taon.

 Bukod kay Diokno na tumanggap ng 41.8 milyon pesos ay mayroon pang ibang opisyal ng BSP ang pasok sa top 10 sa mga pinakamalaki ang kinita noong 2021.

 Kasama sa mga ito sina BSP Monetary Board members Victor Tolentino, Felipe Medalla, Antonio Abacan, Peter Favila at Anita Aquino.

 Kasama rin sina chuchi fonacier, maria almasara amador at Francisco Dakila, Jr. na mga kapwa Deputy Governor at  si BSP Senior Assistant Governor Ma. Ramona Santiago.

Inihayag ni Vice President-elect Sara Duterte na wala siyang isang tao na pinakikinggan sa pagdedesisyon sa politika matapos tanungin kung kukuha ito ng political adviser.

 Ayon kay Duterte pinakikinggan nito ang mga sinasabi ng mga politikong mas may karanasan sa kanya at saka siya bumabase sakanyang gut feeling.

 Sinabi rin ni Duterte na hindi na si Liloan, Cebu Mayor Christina Frasco ang kanyang magiging spokesperson sa Office of the Vice President (OVP) matapos itong mapili ni President-elect Ferdinand ‘Bongbong’ Marcos Jr. na pamunuan ang Department of Tourism (DOT).

 Maaalala na una nang sinabi ni Duterte na isasama nito ang ilan sa mga opisyal ng Davao City government sa OVP, bagama’t tumanggi itong pangalanan kung sinu-sino.

 Mababatid na magsisismulang manungkulan si Duterte bilang Bise Presidente sa Hunyo a-30.

Tinanong sa isang press conference si Vice President-elect Sara Duterte kaugnay ng panawagan na i-abolish ang K to 12 program ng Department of Education (DEPED) na sinimulan ng Aquino administration.

 Ayon kay Duterte, ipinarerepaso ni President-elect Ferdinand Marcos Jr. ang naturang programa at target din aniya na maibalik sa face-to-face ang klase sa susunod na school year na magsisimula sa Agosto.

 Mababatid na si Duterte ay nominado ni Marcos na maging susunod na kalihim ng DEPED.

 Samantala, nagpahayag din ito ng kaniyang kahandaan na makinig sa mga stakeholder sa sektor ng edukasyon.

Nakapagtala ang Department of Health (DOH) ng kabuuang 3,051 COVID-19 infections mula June 13 hanggang 19.

 Batay sa weekly report ng DOH, nasa 436 ang average daily cases mula sa 240 cases noong nakaraang linggo.

 Pero karamihan sa mga naitalang bagong kaso ng COVID-19 ay mild infection lamang at nasa 15 individuals o 0.50% ng total new cases ang nasa severe o critical case.

 Sa kabila ng pagtaas ng COVID-19 cases, bumaba naman ang non-ICU-bed utilization rate sa 18.2% mula sa 20.3% noong nakaraang linggo gayundin ang ICU-bed utilization rate na nasa 14.3% mula sa 16.6%.

 Samantala, umabot na sa 3,696,264 ang kabuuang kaso ng COVID-19 sa bansa, 3,631,268 naman ang bilang ng mga gumaling habang 60,467 ang mga nasawi.

Mayroon pang pag-asa ang mga magsasaka at mamimili kaugnay sa gagawin ng papasok na administrasyon sa sektor ng agrikultura.

 Ito ang sinabi ni Pork Producers Federation of the Philippines Incorporated, Vice President Nick Briones sa gitna ng pagtaas ng presyo ng mga bilihin.

 Iginiit pa niya na walang ibang ginawa ang kasalukuyang administrasyon kundi mag-angkat ng mga produkto mula sa ibang bansa para mapababa ang presyo ng mga bilihin pero mas lalo pa itong tumaas.

 Sa ngayon aniya, umaabot na sa 390 pesos hanggang 420 pesos ang kada kilo ng karneng baboy mula sa 220 pesos kada kilo bago maupo si Agriculture Secretary William Dar.

 Nasa 220 pesos kada kilo naman ang presyo ng manok na dati ay nasa 110 pesos hanggang 120 pesos kada kilo lamang.

 Samantala, sinabi ni Briones na dapat magkaroon ng food security summit ang administrasyong Marcos para matugunan ang mga problema ng bansa.

Dapat tumulong si Vice President-elect at incoming Education Secretary Sara Duterte na mapataas ang sahod ng mga guro at matiyak na handa ang mga paaralan para sa school year 2022-2023.

 Ito ang inihayag ng Alliance of Concerned Teachers Secretary-General Raymond Basillio na hindi lamang aniya ito ukol sa pagtataas ng sweldo kundi para itama ang hustisya sa mga guro.

 Tulad aniya nang hindi pagbibigay ng tulong sa mga guro na nagkasakit at namatay dahil sa COVID-19.

 Nabatid na nilagdaan ni pangulong rodrigo duterte ang Salary Standardized Law of 2019 na layong taasan ang sahod ng government wokers kabilang na ang public school teachers.

Hindi malayong maapektuhan ang growth rate ng bansa dahil sa kawalan ng kontrol ng gobyerno na mapigilan ang kada linggo na labis na pagtaas ng presyo ng langis na nagpapahirap ngayon sa mga Pilipino.

 Ayon kay Presidential Adviser for Entrepeneurship Joey Concepcion, malaki ang epekto sa mga mamimili ng tila wala nang katapusan na oil price increase dahil tiyak na limitado na lamang ang mga bibilhin nilang produkto upang mapagkasya ang kanilang budget.

 Sakaling mangyari ito, siguradong tatamaan ang Groos Domestic Product (GDP) growth at mahihirapan nang makuha ang target na 7% economic growth rate ngayong taon.

 Malaking hamon aniya ito sa bansa, at ang isa sa mga maaring gawin ay tulungan ang mga nasa Micro, small and medium enterprises (MSMEs)  sa gitna ng di maabatang labis na pagtaas ng halaga ng mga produktong petrolyo. –  sa ulat ni Jopel Pelenio (Patrol 17)