NATIONAL NEWS

Posibleng luwagan pa sa susunod na School Year ang ipinatutupad na social distancing measures sa mga paaralang nasa ilalim ng Alert level 1 at 2.

Ayon kay Department of Education (DepEd) undersecretary Nepomuceno Malaluan, inaasahan na nila ito sa bagong guidelines ng kagawaran tungo sa new normal sa darating na School Year 2022-2023.

Lahat ng detalye sa implementasyon ng face-to-face classes ngayong Agosto ay lalamanin nang isinasapinal nilang guidelines para sa recovery at pagpapatuloy ng school year.

Samantala, bukas naman ang DepEd na iprisinta sa bagong administrasyon ang gawain.

Posibleng umabot sa P100 kada litro ang presyo ng produktong langis kada araw sa Pilipinas.

Ito ay kung patuloy na tataas ang presyo nito sa pandaigdigang merkado resulta ng nagpapatuloy na giyera sa pagitan ng Russia at Ukraine.

Ayon kay Gerardo Erguiza Jr., undersecretary ng Department of Energy (DOE), magiging posible ang pagtataya kung magiging sunod-sunod ang taas-presyo sa langis.

Gayunman, nilinaw ng opisyal na hindi naman biglaang mangyayari ang isandaang pisong kada litrong presyo ng langis, kung isang beses lamang ang oil price hike.

Matatandaang una rito, sinabi ni Erguiza na imposibleng tumaas sa 100 piso ang presyo ng langis sa bansa dahil aniya, sapat naman ang ating suplay ng krudo.

Planong ihain ng grupo ng Transport Network Vehicle Service (TNVS) ang P10 hanggang P20 na dagdag sa flagdown rate bunsod ng pagsirit ng presyo ng produktong petrolyo.

Aminado ang naturang grupo na kumonti na ang bilang ng mga nagmamaneho sa kalsada kung saan, hirap silang pabalikin ang ilang mga tsuper na umalis na at naghanap nalang ng ibang pagkakakitaan.

Layunin ng naturang petisyon na mahikayat ang mga humintong drivers at bumalik sa kanilang pamamasada.

Sakaling maaprubahan ang hiling ng naturang grupo, para sa mga nagmamaneho ng sedan type, ang dating flagdown rate na P40 na may dalawang piso na dagdag kada minuto, gagawin na itong P55 na mayroong tatlong piso kada minuto.

Sa mga nagmamaneho naman ng SUV type, mula sa dating flagdown rate na P50 na may dalawang piso na dagdag kada minuto ay magiging P70 naman na may dagdag na tatlong piso kada minuto.

Ang dati namang P30 na flagdown rate sa mga hatchback na may dalawang piso na dagdag kada minuto ay magiging P40 na at tatlong piso ang magiging dagdag sa kada minuto.

Sa ngayon, umaasa ang naturang grupo na matutugunan ang kanilang hiling sa ilalim ng bagong administrasyon.

Umaasa ang Department of Tourism (DOT) na mas tataas pa ang bilang ng mga Pilipinong mabibigyan ng trabaho dahil sa mas maluwag na restriksyon sa bansa.

Ayon sa DOT, sa tulong na rin ng Tourism-related Industries at pag-alis ng Test-before-Travel, unti-unti nang bumabangon ang turismo sa Pilipinas.

Sinabi ng ahensya na nananatiling prayoridad ang panunumbalik ng kabuhayan ng tourism workers at pagpapanatili sa pagdami ng mga dayuhang turista ngayong taon.

Sa datos ng DOT, nasa upward trend pa rin ang tourist arrivals kung saan 682,949 ang naitala sa kalagitnaan ng buwan ng Hunyo habang umabot naman sa 5.2% ang kontribusyon ng Tourism Direct Gross Value added sa GDP ng bansa noong 2021 base sa naging datos ng Philippine Statistics Authority (PSA).

Kumpiyansa naman ang DOT na magpapatuloy ang pagsigla ng industriya ng turismo sa gitna ng pandemya.

Dinagsa ng mga motorista ang ilang mga gasolinahan sa Metro Manila matapos ang muling pagsirit sa presyo ng produktong petrolyo.

Bago pa ipatupad ng ilang kumpaniya ng langis ngayong araw ang taas-presyo, pasado alas-11 kagabi, sumugod ang mga motorista sa mga gasolinahan para magpafull-tank.

Sa pag-iikot ng IZ reporters sa Marikina City, pila-pila ang pampublikong mga sasakyan na nais habulin ang oras bago ipatupad ang panibagong paggalaw sa presyo ng langis.

Ayon sa ilang motorista, malaking bagay para sa kanila ang maagang pagpapakarga upang hindi maabutan ng taas-singil sa presyo ng oil products kung saan, naglaan sila ng P1,000 hanggang P1,500 sa pagpapakarga ng gasolina.

Dahil dito, umaaray ang mga motorista at mga tsuper dahil mas malaki pa umano ang presyo ng langis kaysa sa kanilang kinikita sa pamamasada.

Epektibo na ngayong araw ang taas-singil sa presyo ng produktong petrolyo.

Sa anunsiyo ng kumpaniyang Pilipinas Shell, Seaoil at Cleanfuel, papalo sa .80 centavos ang presyo sa kada litro ng gasolina.

Maglalaro naman sa P3.10 centavos ang presyo sa kada litro ng diesel habang P1.70 centavos naman sa kada litro ng kerosene.

Samantala, magpapatupad naman mamayang alas-8 ng umaga ng kaparehong presyo ang Cleanfuel maliban lang sa kerosene na wala sila.

Sa datos ng Department of Energy (DOE) nito lamang Hunyo a-14, ang year-to-date adjustments stand sa kada litro ng gasolina ay pumalo na sa P28.70 centavos; P41.15 centavos sa kada litro ng diesel; habang  P4.85 centavos naman sa kada litro ng kerosene.

Iginiit ni DOE Oil Industry Management Bureau Dir. Rino Abad, na ang pagkakaroon ng lockdown sa China at pagbabawal ng European Union sa pag-import ng Russia sa langis ang dahilan ng pagtaas ng mga presyo nito sa International market.

Nilinaw ng Metropolitan Manila Development Authority (MMDA) na ang clearing operations na kanilang ginagawa ay para sa buong kamaynilaan.

Sa panayam ng DWIZ sinabi ni MMDA chairperson Atty. Romando Artes na tanging ang tinututukan muna sa ngayon ang Mabuhay Lanes at mga alternatibong ruta para maiwasan ang mabigat na daloy ng trapiko sa EDSA.

Dagdag pa ni Artes, pansamantalang nagsasagawa ng repair operation ang mga tauhan ng MMDA sa Edsa Kamuning dahilan kaya mabagal ang daloy ng trapiko.

Iginiit ni Artes na sa ngayon, tanging ang mga maliliit na sasakyan at mga bus lamang ang maaaring makadaan sa nasabing lugar habang ang iba naman ay binigyan ng pansamantalang alternatibong ruta.

Ayon kay Artes, sinisilip din ng kanilang ahensya ang mga sasakyan na iligal na nakaparada sa ilang mga kalsada sa Metro Manila kung saan, kanilang hinihintay o nagbibigay muna sila ng limang minuto na makarating ang mga may-ari bago tuluyang i-tow ang mga ito.