Welcome sa Samahang Industriya ng Agrikultura (SINAG) ang naging desisyon ni President-Elect Ferdinand ‘Bongbong’ Marcos Junior na pangasiwaan ang Department of Agriculture.
Sa panayam ng DWIZ, sinabi ni Rosendo So, Chairman ng SINAG, na tiwala silang masosolusyunan ang mga problema sa sektor ng agrikultura kapag pinamunuan ni Marcos ang nasabing ahensya.
Kabilang aniya sa mga kailangang ayusin o matugunan ng papasok na administrasyon ang smuggling at suliranin sa pataba.
Pinamamadali na ni President-elect Ferdinand ‘Bongbong’ Marcos Jr. ang paglalabas ng National ID para sa mga Pilipino.
Sa naganap na impromptu press briefinig ni Marcos kahapon sa BBM headquarters sa Mandaluyong City, sinabi ng susunod ng Pangulo na nakukulangan siya sa 12 milyong National ID cards na naipalabas na ng Philippine Statistics Authority.
10% pa lang kasi ito ng populasyon ng bansa na nakatatanggap ng identification cards.
Sakaling makumpleto, sinabi ni BBM tulong ang National ID cards lalo na sa paglipat ng Pilipinas sa digital system.
Noong 2020 unang sinimulan ang paggawa ng National ID o ang Philsys ID na planong gamitin ng gobyerno sa pamamahagi ng ayuda sa gitna ng COVID-19 pandemic.
Dalawang motibo ang tinututukan ng mga otoridad sa Amerika kaugnay sa pagkakapaslang kay Pinoy Lawyer Atty John Albert “Jal” Laylo.
Kabilang sa mga motibong ito, ayon kay New York Consul General Elmer Cato ay Mistaken Identity kung saan posibleng nagkamali ang gunman sa pinaputukang sasakyan na maaaring kapareho ng sinasakyan ni Laylo.
Bukod pa ito sa anggulong random shooting.
Isang pulong na ang hiniling ni Cato kay Philadelphia Mayor Jim Kenney at Police Commissioner Daniella Outlaw kaugnay sa estado ng imbestigasyon sa krimen.
Kasabay nito, tinawag namang heinous at senseless ni Kenney ang nangyari kay Laylo matapos ipaabot ang pakikiramay sa buong pamilya.
Binigyang diin ni Kenney na ang krimen ay resulta ng maluwag na pagdadala ng mga armas sa kanilang lungsod na hindi na talaga aniya katanggap tanggap.
All set na ang ipatutupad na seguridad ng National Capital Region Police Office (NCRPO) sa nalalapit na inagurasyon ni President-elect Ferdinand “Bongbong” Marcos Jr.
Gaganapin ito sa National Museum of the Philippines sa darating na Hunyo 30.
Ayon kay NCRPO chief, Maj. Gen. Felipe Natividad, naisapinal na nila ang security preparation para matiyak ang zero casualty at posibleng untoward incident.
Wala pa namang namo-monitor na banta ang NCRPO pero tiniyak nilang patuloy ang kanilang monitoring at koordinasyon sa kanilang mga counterparts.
Ang otorisado lamang na magdala ng baril sa event ay ang mga police, military at ilang law enforcers na mayroong official duties.
Samantala, muli namang ipinaalala ni NCRPO Public Information Officer, Lt. Col. Jenny Tecson na hindi papayagan ang mga backpack sa lahat ng VIP areas para masiguro ang kaligtasan ng bawat isa.
Pawang positibo ang naging reaksyon ng ilang grupo sa pahayag ni President-elect Ferdinand ‘Bongbong’ Marcos Jr. na ito na muna ang mamumuno sa Department of Agriculture (DA) para masolusyunan ang problema sa sektor.
Ayon kay Federation of Free Farmers chairman Leonardo Montemayor, welcome sa kaniya ang desisyon ni Marcos dahil ang susunod na presidente mismo ang makakakita sa problema ng bansa sa agrikultura.
Malaking tulong naman para sa micro, small, at medium-sized enterprises ang desisyon ni Marcos dahil maraming programa ang maipatutupad sa ilalim ng bagong administrasyon.
Samantala, natuwa rin ang grupong Samahang Industriya ng Agrikultura, Federation of Small Fisherfolk Organizations in the Philippines at si dating agriculture secretary Manny Piñol sa pasya ni Marcos na hawakan muna ang agriculture department.
Magiging tulong kasi anila ito para masolusyunan ang nagpapatuloy na problema sa agri-fisheries sector na nakakaapekto sa presyo ng bilihin sa bansa.
Tinanggap na ng security guard na si Christian Floralde ang paghingi ng sorry ng SUV driver na sumagasa sa kaniya sa Mandaluyong City noong nakaraang linggo.
Pero ayon kay Floralde, kahit tinanggap na niya ang sorry ng driver ay hindi pa rin niya i-aatras ang isinampang kaso laban dito.
Hindi pa rin naaaresto ang suspek na si Jose Antonio Sanvicente kahit lumantad na ito sa Philippine National Police dahil wala pa itong warrant of arrest.
Hindi naman maiwasang sabihin ng netizens na mayroong special treatment na naganap na mariing pinabulaanan ng pulisya.
Ilang linggo matapos ang insidente, nasa preliminary investigation stage pa lang ang reklamong frustrated murder at abandonment of one’s own victim na isinampa laban kay Sanvicente.
Sa Hunyo 23, nakatakda ang susunod na preliminary imbestigation sa kaso.
Walang nasaktan sa 420 pasahero at crew ng Saudia Flight S-V-8-6-2 na nabalahaw sa Taxiway ng Ninoy Aquino International Airport (NAIA) terminal 1.
Ito ay matapos lumagpas ang anim na right landing gears ng eroplano, sa dulo ng Taxiway Charlie habang papunta sa paradahan nito sa Terminal 1.
Naganap ang insidente bandang ala-1:47 kahapon.
Batay sa ulat, naghintay pa nang higit dalawang oras sa arrival area ng terminal ang mga pasahero para mailabas ang kanilang mga bagahe.
Hindi naman nila namalayan ang nangyari, dahil nagbigay lang ng anunsyo sa eroplano na matatagalan ang kanilang pagbaba.
Naialis na rin ang eroplano sa Taxiway pasado alas-5:30 kahapon.
Kinansela na muna ang return flight ng Saudia Flight na nakatakda sanang lumipad kahapon.
Nagpapasalamat naman ang mga sakay na pasahero na ligtas silang nakauwi.—ulat mula kay Raoul Esperas (Patrol 45)
Mahigpit na binabantayan ng Department of Health (DOH) ang NCR dahil sa inaasahang pagtaas na naman ng kaso ng COVID-19 sa darating na linggo.
Ayon kay health undersecretary Maria Rosario Vergeire, sumampa sa 70% ang pagtaas ng COVID-19 cases sa Metro Manila.
Habang dumoble rin ang average number of cases sa rehiyon kumpara noong nagdaang linggo, at nasa 1.02 ang Average Daily Attack Rate.
Itinuturong dahilan ng pagtaas ang pagdami ng nahahawa sa Omicron subvariants na BA 2.12.1, BA.4, at BA.5.
Bukod pa rito ang muling paggalaw o pagbiyahe ng mga tao, at humihinang bisa ng bakuna kontra COVID-19 dahil marami ang hindi nagpapaturok ng booster shots.
Bukod sa NCR, binabantayan na rin ng DOH ang pagtaas ng mga kaso ng COVID-19 sa Ilocos Region, Cagayan Valley, Calabarzon, Mimaropa, Western Visayas, at Northern Mindanao.
Umabot sa 521 ang karagdagang COVID-19 cases ang naitala ng Department of Health nitong Lunes, na mas mababa kumpara sa 612 cases na naitala noong linggo.
Dahil dito, bahagya pang umakyat sa 4,740 ang aktibong kaso ng COVID-19 sa bansa.
Pumalo naman sa 3, 696, 793 ang nationwide COVID-19 caseload, 3, 631, 586 recoveries at 60,467 deaths.
Nangunguna pa rin ang National Capital Region sa may pinaka-mataas na bagong kaso na 2,365 sa nakalipas na dalawang linggo na sinundan ng CALABARZON, 726; at Western Visayas na may 396.
Sa Metro Manila, ang Quezon City ang may pinakamaraming naitalang kaso na may 544, Maynila na may 303; at Makati na may 292 cases.
Umaasa si Vice President-elect Sara Duterte-Carpio na magiging priority sa susunod na administrasyon ang pagbabalik ng mandatory Reserve Officer Training Corps (ROTC).
Ayon kay Duterte-Carpio, ang Presidente at kongreso ang nagdedesisyon sa mga executive at legislative agenda.
Kaya hiling ni Duterte-Carpio na maisama sa legislative agenda ang ROTC lalo’t maraming pending bills ang may kaugnayan dito.
Noong Enero, una nang sinabi ni Duterte-Carpio na sa oras na manalong bise-presidente ay isusulong niya ang mandatoryong military service para sa lahat ng kabataang Pilipino na tutuntong sa edad na 18, babae man o lalaki.
Ang mga panukala sa pagbuhay ng ROTC ay kailangang ihain muli sa 19th congress at sumailalim sa proseso ng paggawa ang batas.