NATIONAL NEWS

Dumami ang mga public school sa bansa na magsasagawa ng face-to-face classes simula sa Lunes, Agosto 22.

Inihayag ng Department of Education na 90% na ng 47,000 public schools ang handa para sa face-to-face classes ngayong taon kumpara sa 76% na nagkasa ng in-person classes noong 2021.

Ayon kay DepEd undersecretary Epimaco Densing III, karamihan sa mga pribadong paaralan ay magpapatupad pa rin ng blended learning hanggang Oktubre 31.

Sa pagbubukas ng klase sa Lunes, may opsyon anya ang mga eskwelahan na magsagawa ng remote classes, blended learning mode o in-person classes.

Gayunman, lahat ng pampubliko at pribadong paaralan ay kailangang magsagawa ng in-person classes pagsapit ng Nobyembre, alinsunod sa DepEd order 34.

Patuloy ang preparasyon para sa biyahe ni Pangulong Bongbong Marcos sa Estados Unidos na nakatakda sa susunod na buwan.

Ito’y upang dumalo sa United Nations General Assembly sa New York para sa kanyang unang foreign visit sa International Diplomatic Arena kung saan inaasahan siyang magtatalumpati.

Ayon kay Philippine Ambassador to U.S. Jose Manuel Romualdez,  may ilang bilateral meetings ang nakalinya na dadaluhan ng Pangulo pero hindi naman binanggit kung kasama ang pulong kay U.S. President Joe Biden.

Una nang inihayag ni Romualdez na nais niyang magkaroon ng hiwalay na Inaugural Bilateral Summit sa pagitan nina Pangulong Marcos at Biden sa Washington D.C. na may napagkasunduan ng petsa ngayong taon.

Habang nasa Amerika, nakatakda ring makipagkita si PBBM sa iba’t ibang American Business Groups at Investors na nais na palawigin ang kanilang operasyon sa Pilipinas.

Wala ng buhay nang matagpuan ang isang dalagitang siklista na unang napaulat na nawawala sa Lalawigan ng Bulacan.

Kinilala ang biktimang si Princess Marie Dumantay, 15- anyos na narekober sa isang madamong lugar sa Bypass Road sa Barangay Bonga Menor, Bustos.

Natagpuan si Princess na nakadapa, may mga pasa, mga pasó ng sigarilyo at suot ang puting T-shirt na may chinese characters, itim na short, puting medyas at pares ng rubber shoes.

Ayon kay Rolando Dumantay, Agosto a – 9 nang hindi na umuwi sa bahay ang kanyang anak.

Nagpasya naman ang pamilya ng biktima na iuwi ang labi ni Princess sa kanilang bahay sa Navotas City.

Nagsasagawa na ng imbestigasyon ang Bulacan Provincial Police Office upang matukoy kung sino ang mga posibleng nasa likod ng krimen.

Sinuspinde ng Philippine Overseas Employment Administration ang implementasyon ng Expanded Compulsory Insurance Coverage para sa land-based returning at directly hired Overseas Filipino Workers.

Alinsunod ito sa utos ni Migrant Workers secretary Susan Ople at Subject ng Department Order Number 228 na ininsyu naman ng Department of Labor and Employment noong October 2021.

Ayon kay Ople, makatitipid ang mga umuuwing OFW ng P1, 700 na halaga ng Mandatory Insurance Coverage at mababawasan ang requirements ng gobyerno dahil sa suspensyon.

Gayunman, mananatili anya ang mandatory insurance coverage para sa mga Newly-hired OFW alinsunod sa batas.

Itinalaga ni Pangulong Bongbong Marcos si dating Agriculture Secretary Domingo Panganiban bilang Undersecretary ng Department of Agriculture.

Sa isang Facebook post, inihayag ni Pangulong Marcos, na siyang kalihim ng DA, na naganap ang oath-taking noong Biyernes, Agosto a – 12.

Nagsilbi si Panganiban bilang Agriculture Secretary sa termino nina Dating Pangulong Joseph Estrada at Gloria Macapagal-Arroyo.

Sa ilalim ng termino ni Panganiban, ipinagpatuloy nito ang implementasyon ng Agriculture and Fisheries Modernization Act bilang comprehensive framework at platform para sa rural development ng gobyerno sa kanyang panunungkulan noong Enero 2001.

Sa kanya namang ikalawang termino, idinivelope ang kabuuang 203, 000 hectares ng idle lands at lumikha ng 313, 000 jobs sa ilalim ng goal 1 at 10 outstanding markets na tinukoy sa Goal 2.

Nagpapatuloy sa pamamahagi ng Housing Assistance ang National Housing Authority para sa mga biktima ng lindol sa Northern Luzon sa ilalim ng Emergency Housing Assistance Program ng pamahalaan.

Pinangunahan ni NHA General Manager Jeoben Tai ang pamamahagi ng ang pamamahagi ng nasabing tulong sa mga nasalanta ng lindol sa Abra at Ilocos Sur.

Nabatid na nasa 388 na pamilya ang nawalan ng tirahan na makatatanggap ng tig- P20, 000 habang mayroon namang 26, 280 pamilya ang bahagyang nasiraan ng kabahayan na makatatanggap ng tig-P10, 000 bilang tulong pinansiyal.

Ayon kay Tai, dumaan ang mga benepisyaryo sa masusing inspeksyon at balidasyon ng mga opisina ng NHA sa rehiyon sa tulong ng mga Lokal na Pamahalaan, partikular na ng mga lokal na opisina ng Social Welfare and Development.

Umaasa ang NHA na magagamit ng mga benepisyaryo ang tulong na kanilang natanggap para makapagsimulang muli at makapagtayo ng komportableng tirahan.

Nangako rin ang ahensya na patuloy nilang susuporta ang iba pang mga kababayan na nangangailangan din ng pabahay.

Tiniyak ni Pangulong Ferdinand “Bongbong” Marcos Jr., na sapat ang suplay ng asukal sa bansa.

Ayon sa Pangulo, batay sa Sugar Inventory, hindi pa kailangang mag-angkat ng panibagong suplay ng asukal dahil sapat pa ang suplay nito sa local industry.

Sinabi ni PBBM, kailangan munang ubusin ang suplay sa bansa bago mag-import ng panibagong suplay ng asukal.

Iginiit ng Pangulo na pinag-aaralan at binabalanse na ng pamahalaan ang importasyon ng asukal maging ang mga butil at feed wheat para masiguro ang seguridad ng pagkain sa bansa.

Bukod pa dito, iniiwasan ng Pamahalaan na tumaas ang presyo ng sugar product, maibigay sa abot kayang halaga ang presyo nito sa taumbayan at para hindi makompromiso ang lokal na produksyon ng mga magsasaka.

Nasamsam ng mga tauhan ng Philippine National Police (PNP) Drugs Enforcement Group ang aabot sa tatlong kilo ng hinihinalang shabu na nagkakahalaga ng P20 milyong sa dalawang suspek sa Pasong Tamo, Quezon City.

Kinilala ang mga suspek na sina Jerome Labita at John Lester Lacaba na inaresto matapos pagbentahan ng iligal na droga ang isang tauhan ng PDEG sa Varsity Lane West, Pasong Tamo.

Nakumpiska sa mga suspek ang itim na SUV Toyota Fortuner na ginamit ng dalawang suspek bilang transportasyon.

Narekober din ang dalawang cellphone na ginamit sa pakikipagtransaksyon sa mga parokyano.

Hawak na ngayon ng mga otoridad ang mga suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.

Hindi na muna bibili ng mga bakuna laban sa COVID-19 ang pamahalaan hanggang sa katapusan ng taon.

Kasunod ito ng 8.42% wastage rate o mahigit 20 milyong doses ng bakuna na nagkakahalaga P10.33 billion sa halagang P500 kada bakuna ang nasayang sa iba’t ibang kadahilanan.

Ayon kay Department of Health (DOH) OIC Usec. Maria Rosario Vergeire, iniiwasan ng kanilang ahensya ang pagsasayang ng mga bakuna.

Batay sa tantya ng DOH, kakasya na ang mga natitira pang bakuna hanggang sa katapusan ng Disyembre gayundin sa pagpasok ng 2023 para sa natitira pang bakuna mula sa 245 million doses na binili ng gobyerno at pribadong sektor.

Naniniwala si Vergeire na sapat pa ang mga bakuna dahil ang mga na-expire na COVID-19 vaccines ay handang palitan ng COVAX Facility kung saan, nakikipag-ugnayan na ang ahensya para iakma ang schedule ng delivery ng mga vaccine sa gitna ng nagpapatuloy na bakunahan sa bansa.

Sinabi ni Vergeire na kanilang itataas sa 50% mula sa dating 20% ang eligible population na tatanggap ng COVID-19 booster shot.