NATIONAL NEWS

Nasamsam ng mga tauhan ng Philippine National Police (PNP) Drugs Enforcement Group ang aabot sa tatlong kilo ng hinihinalang shabu na nagkakahalaga ng P20 milyong sa dalawang suspek sa Pasong Tamo, Quezon City.

Kinilala ang mga suspek na sina Jerome Labita at John Lester Lacaba na inaresto matapos pagbentahan ng iligal na droga ang isang tauhan ng PDEG sa Varsity Lane West, Pasong Tamo.

Nakumpiska sa mga suspek ang itim na SUV Toyota Fortuner na ginamit ng dalawang suspek bilang transportasyon.

Narekober din ang dalawang cellphone na ginamit sa pakikipagtransaksyon sa mga parokyano.

Hawak na ngayon ng mga otoridad ang mga suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.

Hindi na muna bibili ng mga bakuna laban sa COVID-19 ang pamahalaan hanggang sa katapusan ng taon.

Kasunod ito ng 8.42% wastage rate o mahigit 20 milyong doses ng bakuna na nagkakahalaga P10.33 billion sa halagang P500 kada bakuna ang nasayang sa iba’t ibang kadahilanan.

Ayon kay Department of Health (DOH) OIC Usec. Maria Rosario Vergeire, iniiwasan ng kanilang ahensya ang pagsasayang ng mga bakuna.

Batay sa tantya ng DOH, kakasya na ang mga natitira pang bakuna hanggang sa katapusan ng Disyembre gayundin sa pagpasok ng 2023 para sa natitira pang bakuna mula sa 245 million doses na binili ng gobyerno at pribadong sektor.

Naniniwala si Vergeire na sapat pa ang mga bakuna dahil ang mga na-expire na COVID-19 vaccines ay handang palitan ng COVAX Facility kung saan, nakikipag-ugnayan na ang ahensya para iakma ang schedule ng delivery ng mga vaccine sa gitna ng nagpapatuloy na bakunahan sa bansa.

Sinabi ni Vergeire na kanilang itataas sa 50% mula sa dating 20% ang eligible population na tatanggap ng COVID-19 booster shot.

Gumagawa na ng paraan ang Department of Health (DOH) para mapataas at mapalakas ang pagbabakuna sa bansa.

Siniguro ni DOH Officer In Charge Undersecretary Maria Rosario Vergiere, na mas paiigtingin ng kanilang ahensya ang mga hakbang para maabot ang target na bilang ng mga bakunado kontra COVID-19 bago ang ika-100 araw sa puwesto ni Pangulong Ferdinand “Bongbong” Marcos Jr.

Ayon kay Vergeire, mas nagkakaroon ng interes ang publiko kapag inilalapit nila sa mga lugar na madalas puntahan ng tao ang pagbabakuna.

Dahil dito, tumataaas ang bilang ng mga nababakunahan kung saan, target ng DOH ang 50% para sa unang booster shot o katumbas ng nasa 23 million Filipinos.

Sinabi ni Vergeire na sa ngayon, nakapagpatayo na ang kanilang ahensya ng 18, 000 vaccination sites sa buong bansa kabilang na ang palengke, malls, health centers, at iba’t ibang ahensya ng gobyerno na makakatulong sa pagpapataas ng antas sa Vaccination Program ng pamahalaan.

Inaasahan pa rin ang pinagsamang epekto ng Low Pressure Area (LPA) at Southwest Monsoon o Hanging Habagat sa malaking bahagi ng Luzon maliban na lamang sa bahagi ng Bicol Region na inaasahan namang makakaranas ng maulap na kalangitan hanggang sa mainit at maalinsangang panahon.

Ayon kay PAGASA senior weather specialist Chris Perez, may tiyansa pa rin ng mga isolated rain showers ang Bicol Region dulot ng localized thunderstorms lalo na sa hapon hanggang sa gabi.

Makakaranas naman ng mainit at maalinsangang panahon ang malaking bahagi ng Visayas at Mindanao pero may tiyansa ng mga isolated thunderstorms lalo na sa hapon hanggang sa gabi.

Wala namang nakataas na gale warning ang PAGASA kayat malaya paring makakapalaot ang mga kababayan nating mangingisda at maliliit na sasakyang pandagat.

Agwat ng temperatura sa Metro Manila ay maglalaro sa 25°C hanggang 30°C habang sisikat naman ang haring araw mamayang 5:42 ng umaga at lulubog naman ito mamayang 6:18 ng hapon.

Inihayag ng Philippine Statistics Authority (PSA) na nadagdagan pa ang bilang ng mga Pilipinong mahihirap sa nagdaang taon.

 Batay sa naitalang Poverty Incidence noong 2021, sumampa sa 18.1% o katumbas 19.99 million ang bilang ng mga mahihirap na Pilipino.

Mababatid na mas mataas ito kumapra sa 16.7% o katumbas ng 17.67 poor Filipinos noong 2018.

 Samantala, ang isang pamilya na mayroong limang miyembro ay kailangan ng 12,030 pesos kada buwan upang maibasan ang mga pangunahing pangangailangan, habang 8,379 naman para naman sa basic food needs.

Nakapgtala ang Department of Health (DOH) ng karagdagang 28,008 na bagong kaso ng COVID-19 sa bansa.

 Sa lingguhang case bulletin ang naturang bilang ay naitala mula Agosto a-otso hanggang Agosto a-katorse na tatlong porsyentong mataas kumpara sa 27,331 kaso na naitala naman mula noong Agosto a-uno hanggang Agosto a-siete.

 Nabatid na ang Average Daily Attack Rate (ADAR) ay sumampa rin sa 4,001 mula sa nakaraang 3,904.

 Samantala, may kabuuang 72,107,090 indibidwal o 92.33% na ng target na populasyon ng gobyerno ang ganap nang nabakunahan laban sa COVID-19.

Pumalo na sa mahigit 100,000 ang mga kaso ng dengue na naitala sa bansa ngayong taon.

 Ayon sa Department of Health (DOH), umabot na sa 102,619 ang kabuuang bilang ng naturang sakit sa bansa mula lamang Enero a-uno hanggang Hulyo a-trenta.

 Mababatid na, 44,361 lamang ang mga naitalang kaso ng dengue, sa parehong mga buwan noong 2021.

 Samantala, nangunguna sa bilang ng kaso ang Central Luzon na mayroon nang 18,664, na sinundan ng Central Visayas na may 10,034 at Metro Manila na mayroon namang 8,870 recorded dengue cases.

Hinirang ni Pangulong Ferdinand Marcos Jr. bilang bagong Commissioner ng Commission on Elections (COMELEC) si Nelson Java-Celis.

Mababatid na mayroong 37 taon na karanasan sa information technology at management si Celis at naging outstanding Electronics Engineer din ito noong 2012.

Ang appointment ni Celis ay pinirmahan ng pangulo noong August 11, 2022, upang palitan si Commissioner Aimee Torrefranca-Neri.

Samantala, tatagal ang termino ng bagong opisyal hanggang sa Pebrero 2029.

Nangangailangan ng 12,030 pesos kada buwan na ang isang pamilyang Pilipino na binubuo ng limang miyembro.

Ito’y ayon sa Philippine Statistics Authority (PSA) ay upang mapunan lamang ang kanilang pangunahing mga pangangailangan.

Nabatid na tumaas ito kumpara sa 10,756 pesos na kailangan ng isang pamilya sa isang buwan noong 2018.

Samantala, kasama sa kinuwenta ng PSA ang gastusin sa pagkain, bahay, tubig, damit, edukasyon, kalusugan, komunikasyon at transportasyon.