Hinirang ni Pangulong Ferdinand Marcos Jr. bilang bagong Commissioner ng Commission on Elections (COMELEC) si Nelson Java-Celis.
Mababatid na mayroong 37 taon na karanasan sa information technology at management si Celis at naging outstanding Electronics Engineer din ito noong 2012.
Ang appointment ni Celis ay pinirmahan ng pangulo noong August 11, 2022, upang palitan si Commissioner Aimee Torrefranca-Neri.
Samantala, tatagal ang termino ng bagong opisyal hanggang sa Pebrero 2029.
Nangangailangan ng 12,030 pesos kada buwan na ang isang pamilyang Pilipino na binubuo ng limang miyembro.
Ito’y ayon sa Philippine Statistics Authority (PSA) ay upang mapunan lamang ang kanilang pangunahing mga pangangailangan.
Nabatid na tumaas ito kumpara sa 10,756 pesos na kailangan ng isang pamilya sa isang buwan noong 2018.
Samantala, kasama sa kinuwenta ng PSA ang gastusin sa pagkain, bahay, tubig, damit, edukasyon, kalusugan, komunikasyon at transportasyon.
Inihayag ng Department of Transportation (DOTR) na isinasaalang-alang nila ang pagbubukas ng mas marami pang bus stop sa Edsa busway bilang paghahanda sa pagsisimula ng face-to-face na pagpasok ng mga mag-aaral.
Ayon kay Transportation Secretary Jaime Bautista, pinag-aaralan din ng DOTR ang pagtatayo ng bus terminal sa Caloocan City upang matugunan ang pagsisikip ng trapiko bunsod ng mahabang pila ng mga bus.
Matatandaan na kamakailan ay nagbukas ang ahensya ng dalawang busway station sa Roxas Boulevard at Macapagal Avenue.
Mababatid na sa kasalukuyan tinatayang nasa 400 units ang dumadaan sa Edsa busway at magpapatuloy ang libreng sakay dito hanggang Disyembre a-31.
Target na simulan na ng Commission on Elections (COMELEC) ang pag-imprenta ng mga official ballots para sa December 2022 Barangay at Sangguniang Kabataan elections.
Ayon kay COMELEC Chairman George Garcia, batay sa kanilang timetable, kailangan na nilang simulan ang printing ng mga balota sa Setyembre dahil ang pinakamaraming naiimprinta nila sa loob ng isang araw ay 4 million.
Mababatid na sa kasalukyan ay nasa 70 million ang kabuuang bilang ng mga botante.
Giit nito, na makikita dito kung gaano lang kaiksi ang kanilang panahon sa printing ng mga balota, hanggang sa pag-verify sa size, color at positions.
Mababatid na una nang sinimula ng poll body ang pagbili ng ilang election paraphernalia gaya ng padlocks para sa ballot boxes, habang isusunod naman ang pagbili ng ballpens, indelible ink at ballot papers.
Makikipagpulong si Philippine National Police (PNP) Chief Rodolfo Azurin sa National Police Commission (NAPOLCOM) para plantsahin ang sistema ng appointment at promotion ng mga opisyal ng PNP.
Kasunod na rin ito nang nilagdaan resolusyon ni NAPOLCOM Chairman at Department of the Interior and Local Government (DILG) Secretary Benjamin Abalos kung saan pinapaalalahanan ang PNP na isumite muna sa NAPOLCOM para sa kaukulang kumpirmasyon ang promotion ng 3rd level officials, batay na rin sa direktiba ng komisyon.
Sinabi ni Azurin na mayruon nang naunang kasunduan ang PNP at NAPOLCOM nuong panahon ni yumaong dating NAPOLCOM Vice Chair Rogelio Casurao na uubrang mag-promote ang PNP ng mga opisyal nito kahit wala pang kumpirmasyon ang komisyon.
Subalit handa naman anya silang makipag-usap sa NAPOLCOM para maayos ang sistema sa pagpo-promote ng PNP officers.
Inapela ng mga mambabatas sa mga resource speaker ang kahandaan nito sa gaganaping imbestigasyon sa Huwebes para sa hindi otorisadong planong importasyon ng Sugar Regulatory Administration (SRA) ng 300,000 metriko tonelada ng asukal.
Ang pahayag ay kasunod ng naganap na briefing ng House Committee on Good Governance and Public Accountability katuwang ang House Committee on Agriculture and Food kaugnay sa nasabing isyu ng ilegal na resolusyon ng sra dahil sa anila’y numinipis na suplay ng asukal sa bansa at pagtaas ng presyo nito kung saan hindi ito alam ni Pangulong Ferdinand Marcos Jr.
Kaugnay nito, inapela ng mga mambabatas na magkaroon ng hard copy at soft copy ng position paper ang mga resource speaker kung saan nakasaad ang inventory ng asukal sa bansa, pangalan ng mga sugar cartel at hoarders, traders na nagtutulak ng importasyon ng asukal at kung saan napunta o ano ang sitwasyon ng dalawandaang libong metriko toneladang nauna nang na-import.
Gayondin inaanyayahan din sa gagawing pagdinig sa Huwebes ang pagdalo ng Department of Agriculture (DA), Department of Trade and Industry (DTI) at Nestle bilang isa sa pinaka malaking consumer ng asukal sa bansa. – sa ulat ni Tina Nolasco (Patrol 11)
Hindi nakatutok si Pangulong Ferdinand Marcos Jr. sa unang isandaang araw nito sa pwesto.
Ayon kay Press Sec. Trixie Cruz-Angeles, mas pinagtutuunan kasi ng pansin ni Pang. Marcos Jr. ang pagbibigay ng longterm, medium term at short term solutions sa mga kinakaharap na problema ng bansa.
Sa katunayan, ani Angeles, ang Office of the Press Secretary o ang kanyang tanggapan mismo ang nakatutok at tumitingin sa kung ano ang magiging accomplishments nila sa first 100 days.
Kabilang aniya sa kanilang tinitingnan at ina-assess ay ang pagiging responsive ng kanilang opisina sa mga pangangailangan ng pangulo, at kung mabilis at malinaw ba nilang naihahayag sa publiko ang mensaheng nais na ipaabot ng Chief Executive sa taumbayan.
Ngunit base ani Sec. Angeles sa kanyang nakikita, medyo mas nagiging efficient na ngayon ang kanilang team habang lumilipas ang mga araw at tiwala siyang nakakaresponde naman sila ng mabilis sa mga nais ni PBBM. – sa ulat ni Jopel Pelenio (Patrol 17)
Hinimok ng isang election watchdog ang kongreso na magpasa ng batas na magsi-synchronize sa datos ng Philippine Statistics Authority (PSA) at Commission on Elections (COMELEC) para alisin ang proseso ng voter registration.
Ginawa ng National Citizens’ Movement for Free Elections (NAMFREL) ang rekomendasyon sa COMELEC gayundin sa Senate at House of Representatives matapos ang ulat ng resumption ng voter registration noong July 4 hanggang 23.
Anila, isa sa listahan ng kanilang mungkahi ang pag-apruba ng isang batas na “pahihintulutan ang data sharing” sa pagitan ng PSA at COMELEC para makatipid sa gastos at oras ng mga lokal na tanggapan ng ahensya maging sa mga botante na magsusumite ng aplikasyon.
Samantala, hinimok din ng grupo ang kongreso na pag-aralan ang sistema na ginagamit sa Indonesia kung saan inaatasan ang gobyerno nito na magbigay ng datos sa populasyon ng mga potensyal na botante sa halalan na gagamitin ng Indonesian General Elections Commission.
Ikinokonsidera ng Pilipinas na makipagtulungan sa Japan para sa kontruksyon ng mga railway project sa bansa matapos maantala ang deal nito sa China dahil sa kakulangan ng pondo.
Ayon kay Department of Transportation (DOTR) Secretary Jaime Bautista, nakipag-usap na siya sa Japan International Cooperation Agency (JICA) kaugnay sa posibleng pagbibigay nito ng pondo para sa mga nasabing proyekto.
Giit pa ng kalihim na hindi nililimitahan ng pamahalaan ang opsyon nito sa China kaya’t naghahanap din ito ng iba pa.
Noong nakaraang linggo nang makipag renegosasyon ang bansa sa China para sa tatlong project deals na kinabibilangan ng Philippine National Railway (PNR) South Long Haul Project o ang North-South Commuter Railway, Subic-Clark Railway at ang Mindanao Railway o ang Tagum-Davao-Digos Railway.
Pinag-aaralan ng Philippine National Police (PNP) ang posibleng pagsama ng rehabilitation and livelihood programs sa kampanya ng gobyerno laban sa ilegal na droga.
Kaugnay nito, pinuri ni PNP Chief Police Lieutenant General Rodolfo Azurin Jr. ang administrasyon ni dating Pangulong Rodrigo Duterte sa pagbibigay ng kamalayan sa resulta ng iligal na droga sa bansa.
Pero, binigyang-diin din ni Azurin na kailangang suriin at i-recalibrate ang pagpapatupad nito sa ilalim ng bagong administrasyon.
Nabatid na umabot sa mahigit 6,200 ang mga nasawing suspek sa war on drugs ng Duterte administration mula Hulyo a-primero noong 2016 hanggang Mayo a-31 ng taong kasalukuyan.