NATIONAL NEWS

Inanunsyo ng Department of Budget and Management (DBM) kanina na plantsado na ang panukalang 5.268 trillion pesos na national budget para sa 2023.

 Mababatid na ito nakatakdang isumite sa kamara sa susunod na linggo ang unang full-year budget plan ng Administrasyong Marcos Jr.

 Nauna nang ilahad ng DBM na kabilang sa budget priorities ng administrasyon ang edukasyon, kalusugan, social safety nets, imprastraktura at agrikultura.

 Samantala ang pagsusumite sa 2023 budget sa kamara ay alinsunod sa timeline na nakasaad sa 1987 constitution na kinakailangan itong isumite 30 araw mula sa pagbubukas ng regular session ng kamara.

Inanunsyo ng Department of Trade and Industry (DTI) na itinaas na sa pinakabagong Suggested Retail Price (SRP) ang presyo ng 67 Basic Necessities and prime commodities (BNPC) sa bulletin.

 Ayon sa ahensya, nagkaroon ng 3.29 hanggang 10% na pagtaas sa mga srp bunsod ng pagtaas sa presyo ng raw materials, packaging at iba pang gastusin.

 Kabilang sa mga tumaas ang presyo ang de-latang sardinas, kape, noodles, detergent soap, bottled water, kandila, processed canned goods parti na rin ang presyo ng condiments.

 Samantala, binigyang-diin DTI Consumer Protection Group Undersecretary Ruth Castelo, na regular na mino-monitor ng DTI ang presyo at paggalaw ng raw materials ng mga nabanggit na BNPC.

Binuksan ng Land Transportation Franchising and Regulatory Board (LTFRB) ang mahigit isandaang ruta na dati nang ginagamit bago ang pandemya para sa mga Public Utility Vehicle (PUV) bilang paghahanda sa pasukan sa Agosto a-22.

Ayon kay LTFRB Chairperson Cheloy Garafil, nasa 133 ruta ang muling bubuksan sa Metro Manila, kung saan tinatayang nasa 11 PUV ang makikinabang.

Mababatid na nakapaloob sa dalawang memorandum circular ng LTFRB ang pagbubukas ng mga ruta.

Samantala, inaasahan na bubuksan ang 33 pang ruta para naman sa mga City bus na hindi dumadaan sa Edsa.

Niyanig ng magnitude 5.1 na lindol ang Surigao del Norte kaninang alas-singko trenta’y singko ng hapon.

Ayon sa Philippine Institute of Volcanology and Seismology (PHIVOLCS), yumanig ang lindol na may lalim na 129 kilometers sa Socorro, Surigao del Norte at tectonic ang origin nito.

Samantala, wala namang inaasahang pinsala o aftershocks mula sa lindol.

 Binalaan ng Department of Health (DOH) ang publiko na huwag maging kampante habang nagpa-plateau ang numero ng kaso ng COVID-19 sa bansa.

Batay sa datos ng DOH, ang Pilipinas ay nakapagtala ng 2,633 na bagong kaso ng naturang virus kahapon.

Matatandaan na sinabi ng OCTA Research group noong nakaraang linggo na ang mga impeksyon sa COVID-19 sa Metro Manila ay maaaring tumaas na matapos bumaba ang COVID-19 growth rate sa National Capital Region (NCR).

Gayunpaman, nagbabala si OCTA Research Fellow Dr. Guido David sa posibleng paglaganap ng COVID-19 sa pagbubukas ng face-to-face classes sa bansa.

Umapela ang Commission on Elections (COMELEC) sa kongreso para sa karagdagang tatlong bilyong piso para sa Barangay at Sangguniang Kabataan (BSK) election.

Nanawagan si COMELEC Chief George Garcia sa pagdinig ng House Suffrage and Electoral Reforms Committee na taasan ang bawat araw na honoraria ng mga guro.

Ayon kay Garcia, ibinigay sa poll body ang walo punto apat na bilyong piso na budget ng COMELEC para sa Baragay at SK polls sa december 5 2022 bago na-veto ang tax exemption sa honoraria.

Dagdag pa niya, magsisilbing compensation sa pagkawala ng tax exemption ang dagdag sa sahod ng mga guro.

Matatandaang ivineto ni Pangulong Ferdinand Marcos Jr. ang panukalang nage-exempt ng kompensasyon ng poll duty mula sa buwis at may layuning i-wasto ang hindi pagkakapantay-pantay sa sistema ng buwis sa bansa.

Muli namang inihain ng House of Representatives Makabayan Bloc ang panukalang mage-exempt sa serbisyo ng halalan mula sa mga buwis.

Posibleng palawigin ang state of public health emergency hanggang sa katapusan ng taon.

 Ito ang inanunsiyo ni Pangulong Ferdinand Bongbong Marcos Jr. sa harap ng nalalapit na pagtatapos nito sa a-12 ng Setyembre.

 Ayon kay Pangulong Marcos Jr., maraming tulong ang ibinibigay ng international medical community partikular na ang World Health Organization (WHO) sa ilalim ng public health emergency.

 Dagdag ng punong ehekutibo na kapag itinigil ang implementasyon nito, matitigil din ang mga tulong at suporta na natatanggap ng bansa mula sa international medical community para malabanan ang COVID-19 kaya naman kabilang sa kanilang tinitignan ngayon ang pag-amyenda sa naturang batas.

 Maliban dito, hindi na rin magiging libre ang bakuna laban sa COVID-19 dahil aalisin na ang Emergency Use Authorization (EUA) at bibilhin na sa pribadong sector ang mga bakuna laban sa COVID-19.

 Unang idineklara ang state of public health emergency ni dating Pangulong Rodrigo Duterte noong Marso 2020. –  sa panulat ni Hannah Oledan

Nakatakdang i-deploy ang nasa 23 libong pulis sa buong bansa para sa pagbubukas ng klase sa susunod na linggo.

Ayon kay Philippine National Police (PNP) Spokesperson Police Colonel Jean Fajardo, ide-deploy ang kapulisan sa paligid ng mga paaralan at sa mga assistance desk.

Aniya, kung may mga security concern ang mga magulang at estudyante madali silang makakalapit sa mga nakadeploy na mga pulis.

Dagdag pa niya, Hulyo palang ngayong taon ay nakikipag-ugnayan na sila sa mga school administrators at mga ahensya ng gobyerno.

Samantala, ani Fajardo na maliban sa mga paaralan ay inaasahan na rin ang pagdagsa ng mga tao sa mga transport hubs at terminals kaugnay sa pagpapatupad ng full face-to-face set up sa mga paaralan.  – sa panulat ni Hannah Oledan

Pinag-aaralan ng World Health Organization (WHO) na palitan ang pangalan ng monkeypox virus para mabawasan ang stigmatizing designation sa naturang sakit.

Magugunitang kamakailan ay naiulat sa Brazil ang pag-atake sa mga unggoy dahil sa takot na makakuha ng sakit.

Ayon kay WHO Spokesperson Fadela Chaib, nais nilang humanap ng pangalan na hindi nakakabahala para sa publiko.

Pinangalanan itong monkeypox makaraang matukoy ang virus sa unggoy sa Denmark nuong 1958 na nakita rin sa ibang hayop.

Unang nadiskubre ang naturang virus nuong 1970 sa Democratic Republic of Congo partikular sa West at Central Africa. – sa panulat ni Hannah Oledan