NATIONAL NEWS

Pinag-aaralan na ng Sugar Regulatory Administration (SRA) na magpalabas ng kautusan na magpapahintulot sa importasyon ng 150,000 metriko tonelada ng asukal sa kalagitnaan ng Setyembre.

Sinabi ito ni SRA Acting Administrator David Alba kasunod ng rekomendasyon ni Pangulong Bongbong Marcos upang mapatatag ang suplay at presyo ng asukal sa merkado.

Ayon kay Alba, itatakda nila sa Setyembre ang importasyon upang hindi makasabay sa pagsisimula ng operasyon ng mga tubuhan sa Nobyembre.

Noong Martes, unang sinabi ni Executive Secretary Vic Rodriguez na nagkasundo si Pangulong Marcos at ang SRA na hatin sa industrial at consumption use ang aangkating asukal.

Bilang solusyon na rin ito sa shortage ng asukal sa bansa, dahil sa mga nasirang tubuhan bunsod ng mga nagdaang bagyo.

Nakapagtala ang Department of Health (DOH) ng 3,126 bagong nahawa sa COVID-19 kahapon.

Ayon sa DOH, pangalawang araw na itong mababa sa 3,000.

Bahagya namang tumaas ang active cases sa 31,037 kahapon kumpara sa 30,240 noong Miyerkules.

Samantala, nakapagtala rin ang DOH ng 2,197 bagong gumaling sa COVID-19 dahilan para umabot sa 3,774,515 ang recoveries.

Tumungtong naman sa 61,519 ang death toll matapos madagdagan ng 43 kahapon.

Dahil sa mga bagong bilang, sumampa na sa 3,867,071 ang nationwide COVID-19 tally sa Pilipinas.

Isinusulong ng isang kongresista ang panukalang ikulong at pagmultahin ang mga indibidwal na mapapatunayang nambu-bully.

Sa inihaing House Bill 2886 o Stop Bullying Act ni PBA Party-List Rep. Margarita Nograles, layunin nitong palakasin pa ang RA 10627 o ang Anti-Bullying Law.

Sa ilalim nito, papatawan ng hanggang anim na taong kulong at multang 50,000 hanggang 100,000 ang mapapatunayang guilty sa bullying.

Hindi naman kasama sa makakasuhan ang mga kabataang edad 15 pababa.

Samantalang ang mga lagpas 15 bago mag 18 ay magiging exempted kung mapatutunayan na hindi nila alam ang kanilang ginagawa.

Isinusulong ng isang kongresista ang panukalang pagbawalan ang mga grab drivers at riders na mag-abono sa mga ipinapabili ng kanilang mga kostumer.

Sa House Bill 3784 na inihain ni Pinuno Rep. Howard Guintu, ikinabahala nito ang dumaraming kaso ng mga nalolokong delivery riders at drivers na pinagbabayad ng mga produkto na hindi naman pala kukunin.

Karamihan sa mga nanggagantso ay gumagamit ng pekeng pangalan at address kaya nahirapan ang mga otoridad na hanapin ang mga ito.

Sa oras na maisabatas, kapag kinansela na ng customer ang confirmed order ay dapat ding bayaran ng service provider ang rider.

Aatasan din ng mga service provider ang kanilang riders na magsumite ng valid identification card at address kapag sila ay nagparehistro.

Ang mga lalabag ay maaaring makulong ng hanggang anim na buwan o multa na hanggang 100,000 pesos at kanselasyon ng permit.

Bumababa na ang naitatalang kaso ng dengue sa bayan ng San Miguel sa Malolos City, Bulacan.

Ayon kay Dr. Hamir Hechanova, Municipal Health Officer ng San Miguel, bumagsak sa 92 ang naitalang active cases ng dengue nitong ikatlong linggo ng Agosto, mula sa 478 dengue cases na noong July 6.

Ang mga solusyong nakita ng City Health Office na naging epektibo kontra dengue ay ang pagbuo ng Dengue Task Force at malimit na pagsasagawa ng misting.

Sa huling datos ng Provincial Health Office, 23 bayan na lang sa Bulacan ang mayroong dengue cases.

Bineberipika na ng Philippine National Police – Anti Cybercrime Group (PNP-ACG) ang mga kumakalat na video sa social media kaugnay sa mga krimen.

Ayon kay PNP-ACG Acting Director, Pol. Brig. Gen. Joel Doria, inatasan na niya ang lahat ng acg commanders na i-validate ang mga videos.

Ginawa ni Doria ang kautusan matapos kumalat ang isang post, kung saan humihingi ng tulong ang isang babae na tinatangkang gahasain ng isang lalaki.

Nakita rin sa video ang pagsaklolo ng mga sibilyan at pagkuyog sa umano’y rapist.

Sa ngayon, bagaman itinuring na magandang development ang ginawa ng mga mamamayan ay marami pa ring video na kumalat na hindi naman ngayon nangyari.

Karamihan sa mga ito ay ni-recycle lang, para manghikayat ng followers na paniwalaang “unstable” ang gobyerno.

Mahigpit nang binabantayan ng Department of Trade and Industry (DTI) ang presyo ng mga pangunahing bilihin sa pamilihan, grocery stores at supermarkets.

Ito ay matapos maglabas ang DTI ng suggested retail price sa mga pangunahing bilhin lalo na sa mga school supplies, kasabay ng pag-arangkada ng face-to-face classes.

Ayon kay Trade Secretary Alfredo Pascual, dapat nilang tiyaking nasusunod ng mga nagtitinda ang ipinapatupad na srp alinsunod sa Republic Act 7581 o Price Act.

Tiniyak naman ng kalihim na mahigpit na babantayan ang mga nananamantala o yung mga lumalabag sa price freeze kasunod ng deklarasyon ng state of calamity o emergency.

Binawian na ng lisensya ng Land Transportation Office (LTO) ang SUV driver, na nanagasa ng isang security guard sa Mandaluyong City.

Ginawa ito ng LTO matapos ibaba ng Mandaluyong Prosecutors Office ang kasong frustrated murder laban kay Jose Antonio Sanvicente.

Ayon sa LTO, ipapaubaya na nila sa korte ang kapalaran ni Sanvicente.

Tiwala naman ang pamunuan na naresolba na nila ang kasong reckless driving laban sa SUV driver.

Matatandaang June 5 nang mag-viral ang video ni San Vicente matapos nitong banggain si Christian Joseph Floralde na nagmamando ng trapiko malapit sa isang mall.

Nagbabala sa publiko ang Department of Health (DOH) kaugnay sa kumakalat na impormasyon sa social media tungkol sa pagbebenta ng organs.

Ayon sa DOH, walang kaugnayan sa iligal na organs donations ang mga ospital sa bansa dahil dumaraan sa ligal, ligtas at boluntaryong ang kanilang mga programa.

Nanawagan naman ng tulong ang DOH sa kanilang mga partner stakeholders at sa media upang mapagilan ang pagkalat pa ng fake news.

Hinimok din nito ang publiko na iwasang maniwala sa nakikita sa social media at tanging sa DOH facebook page at website lamang kumuha ng impormasyon.

Nanindigan ang grupo ng mga guro na dapat panagutin at makulong ang mga sangkot sa kontrobersyal na pagbili ng overpriced at outdated laptops ng Department of Education (DepEd) at ng Procurement Service ng Department of Budget and Management (PS-DBM).

Sa naganap na pagdinig ng Senate Blue Ribbon Committee, nanawagan ang dalawang grupo na hindi maaaring palagpasin ang isyu ng overpriced laptops at hindi dapat ito itulad sa isyu ng Pharmally, kung saan sangkit din ang PS-DBM sa bilyong bilyong pagbili ng personal protective equipment o ppes at pinalagpas na lang.

Ayon sa Alliance of Concerned Teachers, hirap silang tanggapin ang naging dahilan ng DepEd na nahirapan silang abutin ang timeline upang makapag-distribute ng mga laptop.

Naniniwala naman ang Teachers’ Dignity Coalition, na pinaiikot lamang ng mga resource person ang tanong ng mga senador sa nasabing pagdinig.

Iginiit din ng grupo na dapat mayroong makulong sa isyu dahil hindi biro ang  naturang isyu kung saan, sinamantala umano ng naturang ahensya ang pandemya upang kumita sa gitna ng maraming krisis sa edukasyon.