NATIONAL NEWS

Aabot sa  P1-B halaga ng pondo ang inilaan ng pamahalaan bilang kompensasyon ng mga biktima ng Marawi Siege noong 2017.

Ayon kay Budget Secretary Amenah Pangandaman, ang naturang pondo ay sakop ng 2023 national budget sa ilalim ng          P 31-B calamity fund.

Sinabi ni Pangandaman na prayoridad ng administrasyong Marcos ang marawi victims at ang rehabilitasyon sa mga imprastraktura kabilang na ang mga lawful na may-ari ng residential, cultural, commercial structures, at iba pang ari-arian na nasira sa Marawi’s main affected areas na totally o partially damage.

Kasama rin ang mga may-ari ng mga private properties na na-demolish dahil sa implementasyon ng marawi recovery, rehabilitation, at reconstruction program.

 Matatandaang taong 2018, unang naglaan ng pondo ang nagdaang administrasyon pero para lamang ito sa rehabilitasyon ng marawi.

 Iginiit ni Pangandaman na ang paglaan sa naturang pondo ay patunay lang na prayoridad at hindi nakakalimutan ng pamahalaan ang mga kapatid nating Maranao.

Welcome kay Pangulong Ferdinand “Bongbong” Marcos Jr. na magkaroon ng maritime border talks ang Pilipinas at China hinggil sa usapin sa West Philippine Sea (WPS).

Ayon sa Pangulo, dapat na gamitin ang istratihiya na 1994 Filipino at Indonesian maritime border, dahil isa itong pagkakataon upang mabuksan ang talakayan at pakikipag-ugnayan ng bansa sa china na inaasahang mangyayari.

Sa kabila nito, nangako si Pangulong Marcos na dedepensahan ng kanyang administrasyon ang interes ng bansa pagdating sa West Philippine Sea (WPS)

Matatandaang nagkakaroon ng girian ang Pilipinas at China dahil sa agawan ng teritoryo sa West Philippine Sea (WPS).

Aabot sa 2,000 Overseas Filipino Workers (OFWS) ang humiling sa Department of Migrant Workers (DMW) na makabalik na ng Pilipinas.

Ayon kay Migrant Workers Secretary Susan Ople, nakarating sakaniya ang nais ng mga OFW na makauwi na ng bansa sa tulong narin ng one repatriation command center kung saan, pinakamaraming humiling ang mga household service wokers sa Middle East.

Sinabi ni Ople na kabilang sa ibat-ibang dahilan ng mga OFW ay ang paglabag sa kanilang kontrata, hindi maayos na pagpapasuweldo, may mga sakit, habang ang iba naman ay inaabuso ng kanilang employer.

 Matatandaang itinayo ang one repatriation command center upang maging takbuhan ng mga pamilya ng mga inaabusong OFWS.

Humigit-kumulang 784 milyong spam at scam text messages ang naharang ng isang telecommunications company (telco) mula Enero hanggang Hulyo ngayong taon sa pinaigting na pagsisikap nitong masala ang mga mensaheng may masasamang hangarin.

Nabatid na na-deactivate din ng Globe ang 14,058 mobile numbers na ginagamit sa panloloko at na-blacklist ang 8,973 na iba pa.

“Mayroon kaming koordinasyon sa mga partner namin sa industriya para maprotektahan ang publiko sa ganitong mga scam. Tuloy-tuloy din ang awareness drive namin para masiguro na ang aming mga kostumer ay hindi magiging biktima ng mga malisyosong aktibidad na ito na para bang personal silang kilala,” wika ni Anton Bonifacio, Chief Information Security Officer ng telco.

Kaya nanawagan sa publiko ang Globe na mag-ingat sa tumataas na mga insidente ng mga scam text na nagpapanggap na galing sa mga lehitimong organisasyon.

Sa bagong modus, nakalagay pa ang buong pangalan ng target na numero na inaalok ng mga pekeng trabaho, pera, papremyo, at iba pa.

Kasabay nito, inanunsiyo ng telco na mayroon itong 24/7 na operasyon para malabanan ang scam at spam messages habang naglatag din ito ng mga filter para maharang ang mga kahina-hinalang pinanggagalingan ng mga mensahe gaya ng mga numero at domain na ginagamit sa modus.

Sa gitna ng pagbubuo at pagpapalakas ng Globe sa kakayahan nito na pigilan ang mga cyber attacks sa imprastraktura ng kompanya at sa mga customer, binanggit ni Bonifacio na mahalaga rin ang pakikiisa ng publiko para mapigilan ang paglaganap ng mga spam at scam messages.

“Hangga’t may mga tao na naniniwala at nagpapadaya sa mga alok na ito, hindi titigil ang mga text scam. Hinihikayat namin ang publiko na mag-ingat. Huwag i-click ang mga link o magbigay ng personal na impormasyon sa mga nagpapadala ng mga kahina-hinalang text messages mula sa ‘di kilalang numero. Huwag din basta-basta maniwala sa mga alok na papremyo at trabaho,” giit ni Bonifacio.

Dahil dito, hinihikayat ng kompanya ang mga subscriber na i-report agad sa kanilang Stop Spam portal ang posibleng spam at scam messages na matatanggap nila.

Bukod dito, maaari ring i-set up ang spam filter kung gumagamit ng Android phone at sundin lamang ang mga sumusunod na hakbang:

1. I-download ang “Messages” app ng Google
2. Gawin itong default Android SMS messenger
3. Pumunta sa Settings at i-enable ang Spam Protection

Samantala, sa pamamagitan ng #makeITsafePH campaign at Digital Thumbprint Program (DTP), patuloy ding nagbibigay ang Globe ng karagdagang kaalaman sa mga tao tungkol sa responsableng paggamit ng internet para maprotektahan ang kanilang sarili sa mga panloloko.