NATIONAL NEWS

Nakapagtala ang Department of Health (DOH) ng karagdagang 1,326 COVID-19 cases, kahapon.

Ito na sa ngayon ang pinakamababang daily new cases na naitala ng DOH simula noong July 6.

Bumagsak din sa 23,272 ang active cases sa bansa kahapon, kumpara sa 24,493 noong Lunes.

Nakapagtala naman ang Kagawaran ng karagdagang 2,432 recoveries kaya’t sumampa na sa kabuuang 3,809,450 ang gumaling.

Tumungtong naman sa 62,062 ang delth toll matapos madagdagan ng 56 habang sumirit pa sa 3,894,840 ang total case load.

Ang National Capital Region pa rin ang nangunguna sa may pinaka-maraming kaso sa nakalipas na dalawang linggo, mahigit 9K; sinundan ng CALABARZON, higit 4K at Central Luzon, higit 2K.

Patuloy pa ring makararanas ng mga pag-ulan, pagkulog at pagkidlat ang bahagi ng Zambales, Bataan, Kalayaan Islands at Palawan dahil pa rin sa Southwest monsoon o Hanging Habagat.

Ayon kay PAGASA weather specialist Ana Clauren, magiging maayos at maaliwalas naman ang kondisyon ng panahon sa Metro Manila at nalalabing bahagi pa ng Luzon Pero kailangan pa rin ng ibayong pag-iingat at panatilihing maging alerto laban sa banta ng pagbaha at pagguho ng lupa.

Ugaliin din ang pagdadala ng payong at iba pang panangga para sa biglaang pagbuhos ng ulan bunsod ng localized thunder storm at matinding sikat ng araw.

Asahan naman ang kalat-kalat na pag-ulan sa Western Visayas habang magiging maaliwalas naman sa bahagi ng Central at Eastern Visayas pero may posibilidad parin ng mga isolated rain showers sa hapon hanggang sa gabi.

Wala namang inaasahan na malawakang pag-ulan sa Mindanao kaya asahan na magiging mainit ang panahon lalo na sa umaga at tanghali.

Agwat ng temperatura sa Metro Manila ay maglalaro sa 25°C hanggang 34°C habang sisikat naman ang haring araw mamayang 5:44 ng umaga at lulubog naman ito mamayang 6:04 ng hapon.

Tinapos na ng Senate Blue Ribbon Committee ang imbestigasyon sa tinaguriang “Sugar Fiasco”.

Ito’y matapos humarap na sa pagdinig si Executive Secretary Victor Rodriguez at sagutin ang katanungan ng ilang senador.

Mismong si Senate President Juan Miguel Zubiri ang nagmungkahing i-terminate ang imbestigasyon para makagawa agad ng Committe report.

Lalamanin ng Committee report na inaasahang ilalabas bukas ang rekomendasyong kasuhan ang ilang indibidwal na sangkot.

Humingi naman ng paumanhin si Rodriguez dahil sa hindi pagdalo sa dalawang nakaraang pagdinig, na humantong sa pag-isyu ng Subpoena sa kanya.

Mariin ding itinanggi ni Rodriguez na  may Go Signal niya ang Senate Order Number 4 para sa importasyon ng mahigit 300,000 metric tons ng asukal.

Samantala, tiniyak naman ni Zubiri na agad nilang aaksyunan ang isusumiteng report bago mag-session break sa katapusan ng Setyembre.

Target na maipasa ng kongreso sa susunod na buwan ang proposed 5.268 trillion pesos na General Appropriations Bill o ang panukalang pambansang budget para sa susunod na taon.

 Ayon kay House Committee on Appropriations Chairperson at Ako Bicol Party-List Representative Elizaldy Co, ‘on-track’ ang kamara sa pagkamit ng kanilang target na petsa upang maipasa ang proposed national budget.

 Binigyang-diin ni Co na 14 na mula sa 34 na ahensya na may kanya-kanyang budget proposals ang sumailalim sa kanilang deliberasyon at kanilang nahimay.

 Sinabi rin ng mambabatas na inaasahang matatapos ang mga budget hearings sa September 16 at pagsapit ng September 21 ay masisimulan naman ang plenary debates para rito.

 Matatandaan na una nang sinabi ni House Speaker Martin Romualdez na posibleng sa unang bahagi ng buwan ng Oktubre ay maipapasa na nila sa upper chamber ang 2023 National Budget Bill.

Nagbabala ang isang grupo sa posibleng pagtaas ng presyo ng bigas sa Oktubre.

Ayon kay Rice Watch Group Bantay Bigas Spokesperson Cathy Estavillo, ito ay bunsod ng mababang agricultural output.

Batay sa kanilang monitoring posibleng magbayad sa mga mamimili ang karagdagang tatlo hanggang apat na piso sa presyo ng regular-milled rice sa susunod na buwan.

Bagama’t binigyang-diin ng tagapagsalita na posibleng maiwasan ang naturang price hike kapag agad na umaksyon ang pamahalaan, kabilang na ang pagpapabilis ng pamamahagi ng cash aid sa mga magsasaka ng palay.

Samantala, sa kasalukuyan ay wala pang komento ang Department of Agriculture (DA) ukol dito.

Umapela sa kamara ang Department of Social Welfare and Development (DSWD) na dagdagan ang pondo nito upang maipatupad ang kanilang mga programa sa susunod na taon.

Sa deliberasyon ng House Committee on Appropriations, sinabi ni Dswd Secretary Erwin Tulfo na kailangan nito ng 25.2 billion pesos upang maibigay ang dagdag na 500 pesos na buwanang social pension ng nasa 4.85 million na senior citizens.

Ayon kay Tulfo hindi kasama sa sa nasabing halaga na nakalagay sa 2023 National Expenditure Program ang dagdag sa buwanang pensyon alinsunod sa Social Pension Act.

Aniya, kailangan din ng DSWD ng 66.2 million pesos para naman maibigay ang 100,000 pesos cash gift ng mga centenarian na nasa waiting list.

Dagdag pa rito dahil na rin sa pagtaas ng presyo ng mga bilihin kakailanganin din anang kalihim ng dagdag na 2.56 billion pesos ng ahensiya para sa supplementary feeding program.