NATIONAL NEWS

Lalo pang sumadsad ang halaga ng piso sa ika-apat na sunod-sunod na trading day dahilan upang maitala ang panibagong all-time low record mula sa naiulat kahapon.

 Sa inilabas na bulletin ng Bankers Association of the Philippines, nagsara na sa 57 pesos ang halaga ng piso kada dolyar.

 Matatandaan na naitala kahapon ang pinakamababang record matapos magsara ang palitan sa 56 pesos & 99 centavos.

 Samantala, pumalo ang inflation clocked sa 6.3% para sa buwan ng Agosto, na mas mabagal kumpara sa 6.4% na naitala noong Hulyo.

Inanunsiyo ng Department of Social Welfare and Development (DSWD) na patuloy nilang sinasala ang listahan ng benepisyaryo ng Pantawid Pamilyang Pilipino Program (4Ps).

Ayon kay DSWD Secretary Erwin Tulfo, nasa 1.3 million na pamilya ang kanilang hinihimay upang malaman kung sinu-sino sa mga ito ang dapat nang alisin.

Mababatid na una nang inihayag ng ahensiya na mayroon nang naalis na 187,617 mula sa naturang listahan.

Samantala, nilinaw naman ni Tulfo na walang magiging savings ang DSWD sa pag-alis ng benepisyaryo at agad na mapapalitan ang mga maaalis dahil mahaba aniya ang kanilang waiting list.

Inihayag ng OCTA Research Group na bumaba sa 12.1% ang positivity rate sa National Capital Region (NCR) hanggang nitong Setyembre a-tres.

 Ayon kay OCTA Research Fellow Dr. Guido David, mas mababa ito ng 0.8% kumpara sa 12.9% positivity rate na naitala hanggang Agosto a-27.

 Bukod sa NCR ay bumaba rin ang positivity rates sa Bataan, Batangas at Pangasinan sa 10%.

 Habang tumaas naman ang positivity rate sa Albay, Camarines Sur, Nueva Ecija at Tarlac.

Hindi pabor ang Infectious Diseases Expert na si Dr. Rontgene Solante sa naging aksiyon ni Cebu City Mayor Mike Rama sa optional na paggamit ng face mask sa kanilang lungsod.

 Ayon kay Solante, sa kasalukuyan ay mababa pa ang bilang ng mga nakatanggap ng booster sa bansa bilang dagdag na proteksiyon laban sa COVID-19.

 Iginiiit ng eksperto na dapat manatili pa rin ang pagsunod sa umiiral na health protocols.

 Aniya, bagama’t nakakalabas na ang mga tao ay hindi nangangahulugan na dapat ay luwagan na rin ang mga health protocol, dahil hindi pa COVID-free ang bansa.

 Binigyang-diin naman ni Solante na marami pa rin ang tinatamaan ng nasabing sakit kaya dapat ay ipagpatuloy ang mga ginagawang pagpapabakuna at palaging pagsusuot ng face mask.

Kinumpirma ng Department of Health (DOH) na nakarekober at natapos na ang isolation ng isang kaso ng monkeypox virus sa bansa.

Nabatid na ang sinabing gumaling ay ang naitalang ikalawang kaso ng nagpositibo sa naturang sakit.

Ayon sa DOH, sa kasalukuyan ay naka-isolate pa rin ang dalawang iba pa na positibo sa monkeypox.

Samantala, nananatili namang asymptomatic ang 18 indibidwal na pawang mga naging close contact ng naturang pasyente.

Napag-usapan nina Department of Foreign Affairs (DFA) Secretary Enrique Manalo at ng kanyang Indonesian counterpart ang kasong kinakaharap ng Pilipinang si Mary Jane Veloso na nasa death row sa Indonesia.

Ito ang kinumpirma ni Press Secretary Trixie Cruz-Angeles na matapos na si Secretary Manalo mismo ang nag-anunsyo nito sa publiko.

Pero pagdating sa naging pag-uusap nina Pangulong Ferdinand Marcos Jr. at Indonesian President Joko Widodo, hindi na kinumpirma ng kalihim kung natalakay ito ng dalawang lider.

Matatandaan, na una nang nanawagan kay Pangulong Marcos Jr. ang mga magulang ni Mary Jane na sana’y mabigyan ito ng clemency ng gobyerno ng Indonesia. –  sa ulat ni Jopel Pelenio (Patrol 17)

Paglalaanan ng Department of Social Welfare and Development (DSWD) na aabot sa higit 115.6 billion pesos ang Pantawid Pamilyang Pilipino Program (4Ps) mula sa panukalang budget ng kagawaran na p196.8-b para sa susunod na taon.

Ayon sa DSWD, 4,400,000 ang makikiinabang na benepisyaryo ng programa.

Sinabi pa ni DSWD Secretary Erwin Tulfo, na hinihintay pa ng kagawaran ang listahan mula sa samahan ng mga 4Ps beneficiary upang ikumpara sa record ng ahensya.

Paglilinaw pa nito, walang matitipid ang ahensya sa pag-aalis ng mga pangalan ng benepisyaryo dahil papalitan rin ito ng mga bagong mas karapatdapat na beneficiaries.

Habang ilang buwan pa naman aniya bago maalis sa listahan ang mga ito at maaari mag-enrol ang mga naalis na benepisyaryo sa livelihood program ng kagawaran

Samantala pumangalawa naman sa pinakamalaking paglalaanan ng pondo ng DSWD ang pensyon para sa mga mahihirap na senior citizen na batay sa proposed budget nito ay paglalaanan ng 25.3-billion pesos. –  sa ulat ni Tina Nolasco (Patrol 11)

Kasado na ang nationwide face to face earthquake drills sa Huwebes, September 8.

Ayon kay Asec. Bernardo Rafaelito Alejandro IV, National Disaster Risk Reduction and Management Council (NDRRMC) Spokesperson, katuwang nila ang lokal na pamahalaan ng Makati City sa isasagawang earthquake drill.

Ang naturang ceremonial area naman ay isasagawa sa Ayala Property’s Management Corporation Headquarters.

Unang tututukan ng ahensya ang Makati Business Center para i-check ang kanilang operational plan o protocol sa sandaling tumama ang the big one.

Sinabi ng opisyal ng NDRRMC na mandatory ang earthquake drill para sa lahat ng ahensya ng gobyerno at pampublikong paaralan, lalo na ngayong mas maraming estudyante na ang bumalik sa mga eskwelahan.

Nasa 13 Pilipino ang naaresto ng Hong Kong authorities dahil sa iligal na pagsusugal sa gilid ng kalsada.

Kabilang sa mga nahuli ay ang dalawang Pinoy at isang Pilipina.

Maliban dito, ang apat na Pakistani sa mga dinampot ng mga otoridad dahil sa illegal gambling.

Nabatid na nilabag din ng mga ito ang protocol sa Prevention and Control of Disease o Prohibition of Gathering Regulation Cap. 599g na may karampatang na multa.

Maliban dito, papatawan rin ng dalawang taong pagkakakulong.

Walang Pilipinong naapektuhan sa malakas na lindol na tumama sa Sichuan Province sa China.

Ito ang siniguro ng Department of Foreign Affairs (DFA) na halos 200 Pinoy ang naninirahan ngayon Sichuan.

Sa nasabing lindol, mahigit 50 ang nasawi habang daan-daan ang nasugatan at may ilang missing.

Samantala, patuloy pa ring nararamdaman ang aftershocks sa nasabing lugar at pahirapan ngayon ang komunikasyon doon.