NATIONAL NEWS

Nakahanda na ang mga evacuation centers sa National Capital Region (NCR) partikular na sa mga mabababang lugar na mabilis bahain bunsod ng patuloy na pag-ulan dahil sa bagyong Karding.

Nabatid na ang ilan sa mga Metro Manila LGUs, ay nagpatupad na ng paglilikas sa kanilang mga nasasakupan bago pa man naglandfall ang bagyong Karding sa Luzon.

Nagdeploy na rin ng mga Emergency personnel at naglaan na ng evacuation centers ang mga Alkalde ng lungsod bilang handa sa epektong idudulot ng Typhoon Karding.

Bukod pa dito, inihanda narin ng mga NCR Mayors ang mga food packs para sa mga residenteng maaapektuhan ng bagyo.

Iniulat ni Department of Social Welfare and Development secretary Erwin Tulfo na aabot sa 10,000 hanggang 13,000 pamilya ang inilikas sa mga evacuation center dahil sa pananalasa ng bagyong Karding.

Sa ginanap na National Disaster Risk Reduction and Management Council briefing kaninang umaga, ipinabatid ni Tulfo kay Pangulong Ferdinand Marcos Jr., na patuloy ang kanilang pakikipagtulungan sa Office of Civil Defense sa paglilikas sa naturang mga pamilya.

Sinabi pa ni Tulfo na kagabi pa lamang ay namahagi na ang kanilang ahensya ng mga pagkain maging sa mga indibidwal na naistranded sa mga pantalan.

Patuloy naman aniya ang distribusyon ng food packs at iba pang relief items sa mga apektadong lugar.

Region 4-A sir yang dinaanan talaga ng track ng typhoon, Metro Manila we have evacuation center in Marikina and Region 3 ‘yung talagang dinaanan po ng Typhoon Karding…’yun lang po ‘yung nasa evacuation centers ‘yung problem natin.

Tinig ni Department of Social Welfare and Development Secretary Erwin Tulfo.

Tinututukan na ng Manila Electric Company (MERALCO) ang mga lugar na nawalan ng kuryente bunsod ng pananalasa ng bagyong Karding.

Sa panayam ng DWIZ, sinabi ni Claire Feliciano, tagapagsalita ng MERALCO, karamihan sa mga naapektuhang kustomer ang mga residente ng Bulacan, Cavite, Rizal at Metro Manila partikular sa ilang lugar sa Quezon City.

Sinabi pa ni Feliciano na ongoing ang kanilang restoration activities upang kaagad na maibalik ang kuryente sa nasabing mga lugar.

Naka-full alert rin aniya ang kanilang mga tauhan upang tugunan ang mga emergency power outages.

So karamihan po dito mga emergency line trouble…pero katulad po ng nabanggit ko kaunti na lang naman itong pending cases natin since yesterday nakita natin at itong mga nakita natin and ito pong mga remaining natin mga sustained power interruption po ito…ibig sabihin lasting more than 5 minutes. And then ‘yung restoration activities po tuloy-tuloy po para agad maibalik ang mga serbisyo dyan.

Ang pahayag ni MERALCO spokesperson Claire Feliciano, sa panayam ng DWIZ.

Naglabas ng paalala ang Department of Health kaugnay sa leptospirosis kasabay ng pananalasa ng bagyong Karding.

Pinayuhan ng DOH ang mga indibidwal na lumulusong sa baha, may sugat man o wala, na kaagad na magpakonsulta sa doktor.

Ang mga high risk sa naturang sakit ay kinakailangan na uminom ng dalawang capsules ng doxycycline kada linggo hanggang sa hindi na lumulusong sa baha.

Paalala pa ng DOH, kailangan ng reseta ng doktor upang makakuha ng nasabing gamot.

Nagpatupad na ng forced evacuation ang Quezon City Disaster Risk Reduction and Management Office sa ilang flood-prone area dahil sa epekto ng bagyong Karding.

Kabilang sa mga sapilitang inilikas ang nasa 1,800 kataong naninirahan sa tabi ng creek sa barangay Bagong Silangan na nagpalipas sa Bagong Silangan Elementary School, ilan pang residente ng barangay Tatalon at Batasan Hills.

Isa sa mga sanhi ng pagbaha ang pag-apaw ng tubig sa mga ilog Marikina at Tullahan.

Nalubog din sa baha ang ilang bahagi ng kanto ng A. Bonifacio at Araneta Avenues habang lagpas gutter din ang tubig sa Valencia St. sa Barangay del Monte.

Nanawagan naman si Mayor Joy Belmonte sa mga residente na iwasan munang bumalik sa kanilang bahay hangga’t walang abiso ang lokal na pamahalaan.