NATIONAL NEWS

Umabot na sa mahigit pitong libo ang naitala ng mga otoridad na dumalaw sa sementeryo sa Barracks sa Pasig ngayong bisperas ng Undas.

Ayon sa mga otoridad, tuloy-tuloy ang pagdating ng mga bumibisita sa sementeryo upang dalawin ang kani-kanilang mga yumaong mahal sa buhay.

Sa ngayon, pinapayagan pa rin ng pamunuan ng sementeryo ang cremation pero hanggang ngayong araw na lamang, dahil bukas ay inaasahan nilang daragsain ito ng mga bibisita sa puntod.

Kaugnay nito, kinukumpiska naman ng mga otoridad ang mga ipinagbabawal na gamit gaya ng mga matatalim na bagay tulad ng cutter at kutsilyo, gayundin ang sigarilyo.

Samantala, posible namang tumaas bukas ang presyo ng mga kandila na sa ngayon ay nasa 10 pesos kada tatlong piraso, habang 150 pesos naman ang pinakamahal.

Sa bulaklak, sa ngayon ay nasa singkwenta pesos hanggang 350 pesos.

Bantay-sarado naman ng PNP ang paligid ng sementeryo upang matiyak ang seguridad sa lugar.

Iniimbestigahan na rin ng Land Transportation Office ang ilang regional at assistant regional directors ng LTO-Mimaropa dahil sa umano’y korapsyon.

Kasunod ito ng ulat na nangungurakot umano ang regional director ng LTO-Mimaropa.

Ayon kay LTO Chief Assistant Secretary Markus V. Lacanilao, bahagi ito ng pinaigting na kampanya ng ahensya laban sa katiwalian at iregularidad, alinsunod sa direktiba ni Pangulong Ferdinand R. Marcos Jr. sa ilalim ng pamumuno ni DOTr Acting Secretary Giovanni Z. Lopez.

Patuloy ang masusing imbestigasyon ng LTO upang mapanagot ang mga sangkot sa korapsyon.

Kakaunti pa lamang ang bumibisita sa Barangka Municipal Cemetery ngayong bisperas ng Undas.

Sa datos ng Philippine National Police, nasa dalawandaang indibidwal lamang ang naitala kaninang alas dose ng tanghali.

Sa ngayon, abala ang mga caretaker sa pagpipintura ng mga nitso.

Pagpasok pa lamang sa loob ng sementeryo, ilang mga kabataan at caretaker ang nag-aalok ng pagpipintura.

Ayon sa mga caretaker, dalawandaang piso hanggang tatlundaang piso ang sinisingil nila sa mga magpapapintura, pero depende pa ito sa laki ng nitso.

Mayroon ding naniningil ng 500 pesos kada taon, pero depende sa pamilya ng mga yumao kung ipapaalaga ito.

Pakinggan natin ang tinig ng isa sa mga caretaker sa Marikina.

Inaasahan naman ng lokal na pamahalaan ng Marikina na posibleng umabot sa mahigit animnaraang libong katao ang daragsa sa mga sementeryo sa lungsod bukas.

Tumaas ang presyo ng bulaklak at kandila sa Himlayang Pilipino Memorial Park sa Barangay Pasong Tamo, Quezon City ngayong bisperas ng Undas.

Ayon sa mga nagtitinda, tumaas ng isandaang piso hanggang 120 pesos ang presyo ng bulaklak, na dating nasa singkwenta pesos lamang.

Sa ngayon, nagbebenta na ang mga tindera ng dalawang 150 pesos ng mga maliit na bulaklak, habang ang pinakamahal naman ay maaaring makabili ng hanggang 500 pesos depende sa arrangement.

Samantala, tumaas naman ng kwatro hanggang limang piso ang presyo ng kandila.

Dati, maaaring makabili ng kinse pesos ng dose piraso ng kandila, ngayon ay nasa bente pesos na.

Sa ngayon, pumapatak na sa sampung piso hanggang 140 pesos ang presyo ng kandila.

Posible namang tumaas pa bukas ang presyo ng dalawang produkto.

Nag-deploy ang Land Transportation Franchising and Regulatory Board ng mga tauhan sa iba’t ibang transport terminal sa Metro Manila upang alalayan ang mga pasaherong babiyahe ngayong bisperas ng Undas.

Kabilang sa mga lugar na binabantayan ng ahensya ang Valenzuela Gateway Complex, Market Market, Ayala Cloverleaf, Arca South/FTI, Araneta Center, Trinoma/SM North, at Megamall.

Layunin ng Oplan Undas 2025 na matiyak na lahat ng pampublikong sasakyan ay ligtas, maayos ang kondisyon, at sumusunod sa mga patakaran ng LTFRB habang inaasahan ang pagdagsa ng mga pasahero.

Para sa karagdagang impormasyon, maaaring makipag-ugnayan sa LTFRB-NCR sa mga numerong 8929-6789, 8926-6346, o sa Facebook/Messenger page ng ahensya.

Alinsunod sa direktiba ni Pangulong Ferdinand “Bongbong” Marcos Jr. at sa patnubay ni DOTr Acting Secretary Atty. Giovanni Z. Lopez at LTFRB Chairman Atty. Vigor D. Mendoza II, nag-deploy si LTFRB-NCR Regional Director Atty. Zona Russet M. Tamayo ng mga tauhan sa iba’t ibang transport terminal sa Metro Manila para magsagawa ng inspeksyon sa mga pampasaherong sasakyan (PUVs) at tumulong sa mga biyahero ngayong Undas.

Kabilang sa mga lugar na binabantayan ang Valenzuela Gateway Complex, Market Market, Ayala Cloverleaf, Arca South/FTI, Araneta Center, Trinoma/SM North, at Megamall.

Layunin ng Oplan Undas 2025 na matiyak na lahat ng pampublikong sasakyan ay ligtas, maayos ang kondisyon, at sumusunod sa mga patakaran ng LTFRB habang inaasahan ang pagdagsa ng mga pasahero.

Patuloy na dinaragsa ng mga pasaherong uuwi sa kani-kanilang probinsiya ang iba’t ibang transport terminal sa Metro Manila.

Batay sa pag-iikot ng DWIZ team sa mga bus terminal sa EDSA, dinagsa na ng mga pasahero ang Baliwag Transit kung saan nakapagtala ang pamunuan nito ng mahigit labintatlong libo simula kagabi.

Sa Parañaque Integrated Terminal Exchange (PITX0 naman, umabot na sa mahigit 700,000 na pasahero.

Pero as of 8 a.m. ngayong araw, pumalo na sa halos apatnapung libo.

Samantala, mula 12:00 a.m. hanggang 6:00 a.m. ng Oktubre 31, 2025, nakapagtala ang Philippine Coast Guard (PCG) ng 23,320 outbound passengers at 17,388 inbound passengers sa iba’t ibang pantalan sa buong bansa.

Patuloy rin na nakakakumpiska ang mga pamunuan ng terminal ng mga ipinagbabawal na gamit gaya ng itak, kutsilyo, gunting, lighter, cutter, at iba pa.

Pinag-aaralan na ng Office of the Ombudsman ang pag-live stream sa mga preliminary investigation ng mga hawak nitong kaso.

Ayon kay Ombudsman Jesus Crispin Remulla, ito’y upang mas maging bukas at transparent ang proseso ng imbestigasyon, kabilang ang multi-billion peso flood control scandal.

Maliban dito, ikinukunsidera rin ng tanggapan ang posibilidad ng pagdisenyo ng isang sistema na magbibigay-daan sa publiko na mapanood nang live ang mga pagdinig ng preliminary investigation.

Kaugnay nito, sisimulan na ng Ombudsman ang pagpapalabas ng mga desisyon, kabilang na ang mga naunang resolusyon sa kaso ni Senador Joel Villanueva hinggil sa sinasabing maling paggamit ng Priority Development Assistance Fund o PDAF noong siya pa ay kongresista.— sa panulat ni Mark Terrence Molave

Pinababantayang maigi ng Supreme Court sa Office of the Court Administrator ang mga kaso ng korapsyon sa mga infrastructure projects na isasampa sa mga Regional Trial Courts.

Paliwanag ng Korte Suprema, sakaling may maisampang kaso ay magtatalaga sila ng mga special courts na tututok sa pagdinig at pagresolba sa mga nasabing kaso.

Layunin ng programa na matugunan ang problema sa mabagal na pag-usad ng mga kaso at backlog sa mga korte, habang pinapalawak ang access sa hustisya para sa lahat.

Bahagi ang naturang hakbang sa pagpapatupad ng Strategic Plan for Judicial Innovations para palakasin ang transparency, efficiency, at accountability sa hudikatura sa pamamagitan ng digitalization programs.

Saklaw ng reporma ang lahat ng antas ng korte — mula sa trial courts hanggang sa Court of Appeals, Sandiganbayan, Court of Tax Appeals, at sa mismong Supreme Court.— sa panulat ni Mark Terrence Molave

Isinusulong ni House Deputy Minority Leader at Mamamayang Liberal Partylist Rep. Leila de Lima sa Kamara ang panukalang batas na layong bigyan ng kapangyarihan ang Office of the Ombudsman na i-access at suriin ang bank accounts at records ng mga indibidwal na nasa ilalim ng imbestigasyon.

Sa ilalim ng panukala, target amyendahan ang Republic Act 6770 o ang Ombudsman Act of 1989 at Bank Secrecy Law upang ma-access ang bank records ng mga nasa ilalim ng imbestigasyon kahit hindi na kailanganin ng court order.

Para sa mambabatas, nagiging hadlang ang Supreme Court ruling sa mabilis na imbestigasyon ng Ombudsman, dahilan kaya nababale-wala ang kapangyarihan nitong maglabas ng subpoena na may kinalaman sa bank accounts at records ng mga nasasakdal.

Sakaling maisabatas, magkakaroon ng kapangyarihan ang Ombudsman na mag-administer ng panunumpa, magpalabas ng subpoena, at wala na ring ligtas ang mga tiwaling opisyal at kanilang mga kasabwat na sinasamantala ang legal loopholes sa banking system.

— sa panulat ni Mark Terrence Molave