EXPLAINERS

Dumoble ang kita ng mga magsasaka ng palay sa Mamasapano, Maguindanao del Sur sa ilalim ng administrasyon ni Pangulong Ferdinand Marcos Jr.

Ito ay ayon kay Bangsamoro Transition Authority (BTA) Interim Parliament member Atty. Suharto Ambolodto na ibinahagi ang malaking progreso sa Mamasapano, partikular na sa sektor ng agrikultura.

Mula P13 per kilo, naibebenta na ng mga magsasaka ng palay sa Mamasapano ang kanilang ani ng mas mataas sa P22 per kilo. Ayon kay Atty. Ambolodto, kung dati ay kumikita ang kanilang magsasaka ng P65,000 per hectare, ngayon, nagkakahalaga na ang isang ektarya ng P248,000.

Malaki ang naging bahagi ng direksyon ni Pangulong Marcos sa pagpapalakas ng produksyon ng bigas, na siyang nakatulong sa mga magsasaka. Sa katunayan, nabawasan ng 300,000 metric tons (MT) ang rice imports ng bansa.

Sa ilalim din ng administrasyong Marcos, naitala ng Pilipinas ang pinakamalaking ani nitong 20.06 million MT ng palay noong 2023. Mas mataas ito ng 1.5% kumpara sa 19.76 million MT ng palay noong 2022.

Samantala, tiniyak naman ng Pangulo na makakaasa ang mga magsasaka na patuloy silang susuportahan ng pamahalaan at titiyaking mayroon silang modernong kaalaman sa agrikultura.

Kamakailan nga lang, namahagi si Pangulong Marcos ng financial assistance, hauling truck, rice seeds, fertilizer discount vouchers, at iba pang mga tulong sa higit 12,000 farmers at sampung kooperatiba at asosasyon sa Candaba, Pampanga.

Dahil sa mga napakahalagang hakbang na ito, umaasa ang Mamasapano na makikilala na ito hindi bilang war zone, kundi isang rice zone sa ilalim ng Bagong Pilipinas.

Karamihan sa mga Pilipino ang kuntento sa pamamalakad ni Pangulong Ferdinand Marcos batay sa ilang surveys na inilabas kamakailan lang.

Sa “Boses ng Bayan” survey na isinagawa ng RP-Mission and Development Foundation Inc. (RPMD), nakakuha si Pangulong Marcos ng overall 80% performance score para sa taong 2023.

Sa naturang survey, lumabas na 84.7% ng respondents mula sa Luzon ang kuntento sa pamamahala ng Pangulo; 79.02% sa Visayas; 75.98% sa Mindanao; at 71.72% sa National Capital Region (NCR).

Ayon naman sa pinakahuling “Tugon ng Masa” survey ng OCTA Research, tumaas ang satisfaction rating ng administrasyon ni Pangulong Marcos.

Sa survey na isinagawa mula December 10-14, 2023, lumabas na 59% sa mga Pilipino ang kuntento sa pamamahala ni Pangulong Marcos. Mas mataas ito kumpara sa 56% na score noong October 2023.

Pinakamataas ang satisfaction rate ng respondents mula sa NCR at Visayas sa 71%; habang 53% naman sa Luzon.

Samantala, tumaas din ang trust at approval ratings ni Pangulong Marcos sa survey namang pinangunahan ng Pulse Asia.

Mula 65% noong September 2023, tumaas ang approval rating ng Pangulo ng 68% para sa buwan ng Disyembre. Sa kaparehong survey, naipakita ring 73% ng mga Pilipino ang nagtitiwala sa kanya.

Ayon sa ulat, karamihan sa mga Pilipino ang kuntento sa administrasyong Marcos dahil sa mga ginawa nitong aksyon sa pagproteka sa overseas Filipino workers (78%), pagtulong sa mga nasalanta ng kalamidad (76%), pagprotekta sa kalikasan (62%), pagsulong sa kapayapaan at pagdepensa sa teritoryo (61%), pagsugpo sa krimen (56%), at pagpapatupad sa mga batas (51%).

Ikinatuwa naman ni Pangulong Marcos ang nakuha nitong rating. Aniya, sumasalamin ito sa solid confidence ng publiko sa pamumuno niya sa buong bansa.

Upang mapalakas ang produksyon at kakayahan ng mga kawani sa agriculture sector, tinalakay ng Department of Agriculture (DA) ang 3-year plan ng ahensya sa isang sectoral meeting na pinangunahan ni Pangulong Ferdinand Marcos Jr.

Ayon kay Agriculture Secretary Franciso Tiu Laurel Jr., goal ng ahensya na i-modernize ang agrikultura sa bansa kung saan makakakuha ang mga magsasaka at mangingisda ng “fair value” o tamang halaga para sa kanilang mga naani at nahuli. Nais din nilang maging abot-kaya ang presyo ng mga pagkain para sa consumers habang may sapat na kinikita ang traders at retailers.

Upang makamit ang layuning ito, plano ng DA na mag-invest sa post-harvest facilities at magkaroon ng big digitalization move.

Magpapatayo ang ahensya ng cold storage facilities na may 5,000 pallet positions para sa high-value crops gaya ng mga gulay upang maiwasan ang oversupply ng agricultural products. Ayon kay Sec. Laurel, ang overproduction ay resulta ng poor planning at coordination sa merkado.

Para naman magkaroon ng mas accurate na production data sa pangangasiwa ng food supply sa bansa, isusulong ng ahensya ang digitalization sa sektor ng agrikultura.

Kabilang din sa plano ng DA ang pagpapalawak at pagsasaayos ng agri-fishery areas sa pamamagitan ng pagtatatag ng bagong irrigation facilities, zoning, at identification ng key areas, gayundin ang pagpapabuti sa imprastraktura ng bansa.

Samantala, isinusulong ng agriculture chief ang panukalang pag-amyenda sa Philippine Fisheries Code at ang executive order para sa pagtatag ng Strategic Agriculture and Fisheries Development Zones.

Matatandaang nagbigay noon si Pangulong Marcos kay Sec. Laurel ng marching order na maging pro-production at hindi pro-importation. Sa patuloy na pagsisikap na mapalakas ang food production, inaasahan ang pagkakaroon sa bansa ng food security at sapat at abot-kayang pagkain para sa pamilyang Pilipino.

Ipinakita ng House of Representatives ang kanilang buong suporta kay Pangulong Ferdinand Marcos Jr. at sa kampanya nitong Bagong Pilipinas sa pamamagitan ng paghahain sa House Resolution (HR) 1557 nitong January 29, 2024.

Sa HR 1557 na pinangunahan ni House Speaker Martin Romualdez, nakalahad na nagkakaisa ang Kamara sa hangarin ni Pangulong Marcos na maisulong ang Bagong Pilipinas at ang pagkakaroon ng mas magandang buhay para sa mga Pilipino.

Ayon sa HR 1557, strong testament ang Bagong Pilipinas sa commitment ni Pangulong Marcos na magsagawa ng reporma upang maibalik ang tiwala ng publiko sa pamahalaan. Hangarin din nitong maging accessible para sa bawat Pilipino ang mga serbisyo at financial assistance programs ng pamahalaan.

Sa naturang resolusyon, nakasaad na nakasentro ang Bagong Pilipinas sa pagkakaroon ng “principled, accountable, and dependable government” na pinalakas ng mga nagkakaisang institusyon sa lipunan.

Ayon pa sa Kamara, nananawagan ang naturang programa sa pagkakaisa ng mga Pilipino, sa kabila ng mga pagkakaiba, upang magkaroon ng mas masagana at mas maunlad na hinaharap.

Samantala, tiniyak ni Pangulong Marcos na walang itinatagong agenda ang Bagong Pilipinas.

Matatandaang sa ginanap na Bagong Pilipinas kick-off rally sa Quirino Grandstand sa Manila noong January 28, 2024, binigyang-diin ni Pangulong Marcos na hindi isang political game plan ang Bagong Pilipinas kung saan mabibigyan ng privilege ang iilan lang. Sa halip, isa itong master plan para sa genuine development ng bansa na mapakikinabangan ng lahat.

Ayon nga sa Pangulo, “Bagong Pilipinas serves no narrow political interest. It serves the people.”

Kaya panawagan ni Senior Deputy Speaker Aurelio Gonzales Jr., sponsor ng HR 1557, makiisa sa likod ni Pangulong Marcos at suportahan ang naturang resolusyon. Aniya, mahalaga ang bawat personal commitment ng Bagong Pilipino upang magkaroon ng isang malakas at progresibong bansa.

Kamakailan lang, inilatag ni dating Pangulong Rodrigo Duterte ang ideya ng Mindanao secession. Tumutukoy ang secession sa desisyon ng isang estado na bumukod mula sa pamahalaan.

Agad naman itong kinontra ng ilang opisyal ng pamahalaan, kabilang na ang chief minister ng Bangsamoro Autonomous Region in Muslim Mindanao (BARMM) na si Ahod Ebrahim na nagpahayag ng suporta kay Pangulong Ferdinand Marcos Jr. at sa kampanya nitong Bagong Pilipinas.

Ayon kay Minister Ebrahim, dapat protektahan ang proseso sa kapayapaan at patuloy na suportahan ang administrasyon ni Pangulong Marcos kasabay sa pagsusulong ng peace at civility sa bansa.

Sa isang mensahe, sinabi ng opisyal ng Bangsamoro Transition Authority (BTA) na si Atty. Suharto Ambolodto na naniniwala siyang posibleng makamit ang kapayapaan at kasaganaan sa ilalim ng Bagong Pilipinas sa pamamagitan ng pagkakaisa at katatagan.

Sa Senado naman, sinabi ni Senate President Juan Miguel Zubiri na ang pinakahuling kailangan ng bansa ay hatiin ito. Aniya, dapat mas pagtuunan ng pansin ang kapakanan ng publiko.

Tutol din si Senate Minority Leader Koko Pimentel sa apela na paghiwalayin ang anumang bahagi ng teritoryo ng Pilipinas.

Maging ang national security officials, kontra sa iminungkahi ng dating Pangulo.

Ayon kay Defense Sec. Gilbert Teodoro Jr., mandato ng Department of National Defense (DND) na tiyakin ang seguridad ng soberanya ng bansa at ang integridad ng teritoryo na naaayon sa Konstitusyon. Mahigpit umano itong ipatutupad ng ahensya.

Hindi naman magdadalawang-isip ang pamahalaan na gamitin ang awtoridad nito upang pigilan ang anumang pagtatangkang paghiwalayin ang Republika ayon kay National Security Adviser Eduardo Año.

Para kay Pangulong Marcos, walang puwang ang paninira at paghahatakan pababa sa Bagong Pilipinas dahil mas kailangang unahin ang bansa. Kaya naman sa halip na pagkakawatak-watak, pagkakaisa ang patuloy na isinusulong nito.

Tiniyak ni Pangulong Ferdinand Marcos Jr. ang maayos na pagpapatupad sa panukalang Maritime Industry Development Plan 2028 (MIDP 2028).

Ayon kay Pangulong Marcos, kasalukuyang tinatapos ang development plan na may layong gawing prayoridad ang kapakanan ng Filipino seafarers.

Tumutukoy ang maritime industry sa transportasyon ng mga tao at produkto sa katubigan. Malaki ang direktang epekto ng maritime industry sa pang-araw araw nating buhay dahil ang ilan sa mga kadalasan nating ginagamit tulad ng langis, damit, at pagkain, ay mula sa ibang bansa na dala ng mga barko.

Sa Pilipinas, nilikha ang Maritime Industry Authority (MARINA) noong June 1, 1974 sa bisa ng Presidential Decree No. 474 o Maritime Industry Decree of 1974. Layon ng MARINA na tiyaking ligtas ang mga tao at ari-arian sa karagatan, protektahan ang marine environment, at pangasiwaan ang promotion, development, at regulation sa maritime industry.

Nitong January 17, 2024, nakipagpulong si Pangulong Marcos kay MARINA administrator Sonia Bautista Malaluan upang pag-usapan ang pag-apruba sa MIDP 2028.

Sa MIDP 2028, isusulong ang pagkakaroon ng strong at reliable Philippine Merchant Fleet. Kabilang sa core programs nito ang modernization at expansion ng Philippine domestic shipping, promotion at expansion ng Philippine overseas shipping, modernization ng shipbuilding at ship repair industry, at promotion ng highly-skilled Filipino at competitive maritime workforce.

Ayon kay Pangulong Marcos, maraming rules at operations sa maritime industry ang hindi na ginagamit dahil sa kakulangan sa unified system. Kaya bago ipatupad ang mga panukalang programa, inatasan niya ang MARINA na magkaroon muna ng standardized system alinsunod sa international systems.

Kasalukuyan mang inaayos at tinatapos ang MIDP, kumpiyansa si Pangulong Marcos na magiging epektibo ang pagpapatupad nito at makikilala sa buong mundo ang mga marinong Pilipino.

Target ni Pangulong Ferdinand Marcos Jr. na makapagpatayo ng karagdagang 179 medical specialty centers bago matapos ang kanyang termino sa 2028.

Sa ginanap na launching ng pinakaunang lung transplant program ng Lung Center of the Philippines (LCP) at National Kidney and Transplant Institute (NKTI) noong January 23, 2024, iniulat ni Pangulong Marcos na nakapagtayo na ang administrasyon ng kabuuang 131 specialty centers sa buong bansa sa ilalim ng Regional Specialty Centers Act.

Nilagdaan ni Pangulong Marcos bilang batas ang Republic Act No. 11959 o Regional Specialty Centers Act noong August 24, 2023. Bahagi ang pagpapatupad ng batas na ito sa pagsisikap ng administrasyon na i-institutionalize o paramihin ang healthcare centers sa bansa, partikular na sa rural areas. Layon nitong makapagbigay ng accessible at abot-kayang serbisyong medikal para sa bawat Pilipino.

Sa ilalim ng Regional Specialty Centers Act, inatasan ang Department of Health (DOH) na magtatag ng specialty centers sa bawat rehiyon kung saan mabibigyan ng prayoridad ang cancer care, cardiovascular care, lung care, renal care and kidney transplant, brain and spine care, trauma care, at burn care.

Mag-aalok din ang specialty centers ng serbisyo para sa mental health, neonatal care, infectious disease and tropical medicine, orthopedic care, physical rehabilitation medicine, at iba pa.

Binibigyang-diin ng batas na dapat sumunod sa guidelines ng DOH ang pagpapatayo ng specialty centers, batay sa pag-uupgrade, service capability, health needs at demands, at geographic o physical access ng ospital.

Dahil sa pagsasabatas ng Regional Specialty Centers Act, hindi na kailangang bumiyahe pa papuntang Manila ang mga kababayan nating may mga malalang sakit. Sa patuloy na pagpapatayo ng specialty centers sa iba’t ibang bahagi ng bansa, inaasahang mas lalakas ang healthcare system sa Pilipinas at mas magiging accessible ang serbisyong medikal para sa bawat Pilipino.

Nakatanggap ng mga papuri si Pangulong Ferdinand Marcos Jr. mula sa Vietnamese leaders. Ito ay dahil sa kanyang pamumuno na nagresulta sa pagtaas ng economic growth rate ng Pilipinas sa kabila ng mga pandaigdigang hamon sa world market.

Ayon kay Vietnam President Vo Van Thuong, naging mabunga at matagumpay ang bilateral talks sa pagitan ng Pilipinas at Vietnam kasama si Pangulong Marcos.

Matatandaang bumisita si Pangulong Marcos sa Vietnam nitong January 29, 2024 para sa kanyang two-day state visit upang palakasin ang ugnayan ng dalawang bansa.

Para kay Pres. Thuong, simula nang maupo si Pangulong Marcos bilang pinuno, maraming breakthroughs ang nakamit ng Pilipinas sa pag-unlad ng ekonomiya.

Sa major emerging economies sa Asya, naitalang second fastest ang ekonomiya ng Pilipinas batay sa gross domestic product (GDP) ng bansa para sa fourth quarter ng 2023 na umabot sa 5.6%.

Ayon pa sa Vietnam president, remarkable ang naging mga tagumpay ng bansa sa ilalim ng pamumuno ni Pangulong Marcos, partikular na sa mga sektor ng socioeconomics, foreign policies, at security and defense.

Samantala, sinabi ni Vietnam Prime Minister Pham Minh Chinh na nais nilang matutunan ang economic strategy at leadership style ni Pangulong Marcos na dapat aniyang tularan ng mga pinuno ng Vietnam.

Dagdag pa ng prime minister, hinahangaan niya ang naging papel ni Pangulong Marcos sa pagsulong at paglikha ng mga tradisyon sa pagnenegosyo na nakaambag sa socio-economic development ng Pilipinas.

Sa larangan naman ng trade and investment, tiniyak ni Prime Minister Chinh ang malalim na koneksyon ng ekonomiya ng Pilipinas at Vietnam. Handa aniya ang Vietnam na makinig sa mga rekomendasyon ni Pangulong Marcos.

Kinilala rin ng chairman ng National Assembly of Vietnam na si Vuong Dinh Hue ang administrasyon at economic performance ni Pangulong Marcos. Para sa kanya, nakagawa ang Pangulo ng mga makabuluhang pagbabago para sa ekonomiya ng Pilipinas.

Pinangunahan ni Pangulong Ferdinand Marcos Jr. ang turnover ng higit 360 housing units sa mga residente ng Cavite na naapektuhan ng Manila Bay rehabilitation .

Mula ang housing units na ito sa Ciudad Kaunlaran Housing Project. Bahagi ang proyektong ito sa flagship housing project ng administrasyong Marcos na Pambansang Pabahay para sa Pilipino program (4PH).

Ang Ciudad Kaunlaran Project ay mula sa collaborative effort ng National Housing Authority (NHA), City Government of Bacoor, at ilang government agencies at private sectors.

Ayon kay Pangulong Marcos, ipinatupad ang proyektong ito upang makapagbigay ng ginhawa sa mga Caviteñong apektado ng Writ of Continuing Mandamus ng Supreme Court sa paglilinis ng Manila Bay at sa paglilikas sa mga pamilyang nakatira sa baybayin nito.

Aniya, bilang agarang tugon, pinabilis ng pamahalaan ang relokasyon ng mga residente sa bagong tahanan na ligtas, dekalidad, kumportable, at may maayos na pamayanan.

Parte ang ipinamahaging 360 housing units sa Phase I ng Ciudad Kaunlaran Project. Target makumpleto ang unang phase bago mag-March 2024.

Samantala, pinangunahan din ni Pangulong Marcos ang groundbreaking ng Phase II kasabay ng turnover ceremony. Plano itong matapos sa unang quarter ng 2025 na inaasahang magiging bagong tahanan ng 120 families.

Kaugnay nito, iniulat ng Pangulo na nakapagtayo ang NHA ng higit sa 80,000 housing units sa buong bansa bilang bahagi ng pagsisikap ng administrasyon na makagbigay ng tahanan sa mga pamilyang Pilipino. Mayroon namang inilaang P700 million budget sa Emergency Housing Assistance Program (EHAP) para sa mga pamilyang naapektuhan ng natural at man-made disasters.

Para kay Pangulong Marcos, puno ng bagong pag-asa ang Ciudad Kaunlaran, hindi lang para sa mga benepisyaryo, kundi para sa lahat ng makakakita sa tagumpay ng proyektong ito. Aniya, sigurado siya na ang mga proyektong pabahay ng pamahalaan ang magiging daan tungo sa Bagong Pilipinas na nararapat para sa lahat ng Pilipino.