EXPLAINERS

Nakatanggap ng mga papuri si Pangulong Ferdinand Marcos Jr. mula sa Vietnamese leaders. Ito ay dahil sa kanyang pamumuno na nagresulta sa pagtaas ng economic growth rate ng Pilipinas sa kabila ng mga pandaigdigang hamon sa world market.

Ayon kay Vietnam President Vo Van Thuong, naging mabunga at matagumpay ang bilateral talks sa pagitan ng Pilipinas at Vietnam kasama si Pangulong Marcos.

Matatandaang bumisita si Pangulong Marcos sa Vietnam nitong January 29, 2024 para sa kanyang two-day state visit upang palakasin ang ugnayan ng dalawang bansa.

Para kay Pres. Thuong, simula nang maupo si Pangulong Marcos bilang pinuno, maraming breakthroughs ang nakamit ng Pilipinas sa pag-unlad ng ekonomiya.

Sa major emerging economies sa Asya, naitalang second fastest ang ekonomiya ng Pilipinas batay sa gross domestic product (GDP) ng bansa para sa fourth quarter ng 2023 na umabot sa 5.6%.

Ayon pa sa Vietnam president, remarkable ang naging mga tagumpay ng bansa sa ilalim ng pamumuno ni Pangulong Marcos, partikular na sa mga sektor ng socioeconomics, foreign policies, at security and defense.

Samantala, sinabi ni Vietnam Prime Minister Pham Minh Chinh na nais nilang matutunan ang economic strategy at leadership style ni Pangulong Marcos na dapat aniyang tularan ng mga pinuno ng Vietnam.

Dagdag pa ng prime minister, hinahangaan niya ang naging papel ni Pangulong Marcos sa pagsulong at paglikha ng mga tradisyon sa pagnenegosyo na nakaambag sa socio-economic development ng Pilipinas.

Sa larangan naman ng trade and investment, tiniyak ni Prime Minister Chinh ang malalim na koneksyon ng ekonomiya ng Pilipinas at Vietnam. Handa aniya ang Vietnam na makinig sa mga rekomendasyon ni Pangulong Marcos.

Kinilala rin ng chairman ng National Assembly of Vietnam na si Vuong Dinh Hue ang administrasyon at economic performance ni Pangulong Marcos. Para sa kanya, nakagawa ang Pangulo ng mga makabuluhang pagbabago para sa ekonomiya ng Pilipinas.

Pinangunahan ni Pangulong Ferdinand Marcos Jr. ang turnover ng higit 360 housing units sa mga residente ng Cavite na naapektuhan ng Manila Bay rehabilitation .

Mula ang housing units na ito sa Ciudad Kaunlaran Housing Project. Bahagi ang proyektong ito sa flagship housing project ng administrasyong Marcos na Pambansang Pabahay para sa Pilipino program (4PH).

Ang Ciudad Kaunlaran Project ay mula sa collaborative effort ng National Housing Authority (NHA), City Government of Bacoor, at ilang government agencies at private sectors.

Ayon kay Pangulong Marcos, ipinatupad ang proyektong ito upang makapagbigay ng ginhawa sa mga Caviteñong apektado ng Writ of Continuing Mandamus ng Supreme Court sa paglilinis ng Manila Bay at sa paglilikas sa mga pamilyang nakatira sa baybayin nito.

Aniya, bilang agarang tugon, pinabilis ng pamahalaan ang relokasyon ng mga residente sa bagong tahanan na ligtas, dekalidad, kumportable, at may maayos na pamayanan.

Parte ang ipinamahaging 360 housing units sa Phase I ng Ciudad Kaunlaran Project. Target makumpleto ang unang phase bago mag-March 2024.

Samantala, pinangunahan din ni Pangulong Marcos ang groundbreaking ng Phase II kasabay ng turnover ceremony. Plano itong matapos sa unang quarter ng 2025 na inaasahang magiging bagong tahanan ng 120 families.

Kaugnay nito, iniulat ng Pangulo na nakapagtayo ang NHA ng higit sa 80,000 housing units sa buong bansa bilang bahagi ng pagsisikap ng administrasyon na makagbigay ng tahanan sa mga pamilyang Pilipino. Mayroon namang inilaang P700 million budget sa Emergency Housing Assistance Program (EHAP) para sa mga pamilyang naapektuhan ng natural at man-made disasters.

Para kay Pangulong Marcos, puno ng bagong pag-asa ang Ciudad Kaunlaran, hindi lang para sa mga benepisyaryo, kundi para sa lahat ng makakakita sa tagumpay ng proyektong ito. Aniya, sigurado siya na ang mga proyektong pabahay ng pamahalaan ang magiging daan tungo sa Bagong Pilipinas na nararapat para sa lahat ng Pilipino.

Pinangunahan ni Pangulong Ferdinand Marcos Jr. ang paglulunsad ng Lung Transplant Program sa Lung Center of the Philippines (LCP) sa Quezon City noong January 23, 2024.

Naging posible ang paglikha ng pinakaunang lung transplant program sa bansa dahil sa pagtutulungan ng LCP at National Kidney and Transplant Institute (NKTI).

Kabilang ang pneumonia at iba pang respiratory diseases sa top 20 causes of death ng mga Pilipino ayon sa datos mula January hanggang July 2023. Kasama naman ang acute lower respiratory tract infection at tuberculosis sa mga pangunahing sakit sa bansa.

Bilang pangangalaga sa kalusugan ng mga Pilipino, mag-aalok ang Lung Transplant Program ng mga serbisyong magpapabuti sa buhay ng mga kababayan nating may irreversible lung diseases.

Sinimulan ng NKTI at LCP ang paglikha ng Joint Lung Transplant Program noong November 25, 2022 upang bumuo ng lung transplant manual na tumutugon sa mga isyu katulad ng organ donation, allocation system, limitadong access sa trained personnel, at financial constraints.

Bilang bahagi rin ng programa, inaayos ng LCP ang kanilang infrastructure capacity, kabilang na ang renovation sa post-anesthesia care unit at surgical intensive care unit.

Ayon kay Pangulong Marcos, naging patunay ang Lung Transplant Program ng LCP at NKTI sa kasabihan na, “Two heads—two hospitals—are better than one.” Aniya, una lang ito sa mga gagawing kahalintulad na programa ngayong taon.

Nararamdaman na sa ilang industriya sa Pilipinas ang epekto ng foreign trips ni Pangulong Ferdinand Marcos Jr.

Ito ang tiniyak ni Department of Trade and Industry (DTI) Undersecretary Kim Bernardo-Lokin na sinabi ring mas maraming Pilipino ang makakaramdam sa mga benepisyo ng diplomatic at business meetings ni Pangulong Marcos sa ibang bansa.

As of December 21, 2023, lumagpas na sa P4 trillion ang total consolidated and processed investments na nakalap ni Pangulong Marcos para sa bansa ayon sa datos ng DTI. Inaasahang makalilikha ang mga ito ng additional 224,000 jobs para sa mga Pilipino.

Naitalang 41% sa mga karagdagang trabaho ay mapupunta sa sektor ng information technology and business process management (ITBPM); 32% sa manufacturing; 10.5% sa infrastructure, transport, and logistics; 9% sa renewable and traditional energy; at 2.6% sa agriculture; bukod pa sa ibang mga sektor at industriya.

Sa isang panayam, nilinaw ni Usec. Lokin na matagal ang gestation period ng foreign investments. Kadalasang umaabot ito ng tatlo hanggang limang taon. Sa kabila nito, iginiit niyang unti-unti nang nararamdaman at naipapatupad ang naturang investments.

Halimbawa na lang dito ang partnership sa pagitan ng Filipino chocolate company na Auro Chocolate at retail giant na Mitsukoshi ng Japan.

Nakatakdang gumawa ng product lines ang dalawang kumpanya kung saan ibibida ang cacao beans ng Davao at ang mga tradisyonal na sangkap ng Japan tulad ng matcha, hojicha, at miso.

Ayon kay Usec. Lokin, mapakikinabangan ang partnership na ito ng higit sa 1,000 pamilya ng mga magsasaka.

Pagtitiyak ng DTI, ipagpapatuloy ng ahensya ang panghihikayat upang makakalap ang bansa ng mas maraming investments na lilikha ng mga trabahong may mataas na kalidad at sahod para sa bawat Pilipino.

Ipinahayag ng Buklod Bayani Coalition (BBC) ang kanilang suporta sa mga pagsisikap ni Pangulong Ferdinand Marcos Jr. na palakasin ang ekonomiya sa ilalim ng kampanya ng administrasyon na Bagong Pilipinas.

Sa katunayan, ipinakita ng grupo ang kanilang suporta at tiwala sa administrasyon ni Pangulong Marcos sa pamamagitan ng paglagda sa isang Memorandum of Agreement (MOA) kasama ang Anti-Red Tape Authority (ARTA) at Office of the Special Assistant for Investment and Economic Affairs (OSPAIEA) nitong January 24, 2024.

Binubuo ang BBC ng mga negosyante, civic leaders, at employers.

Ayon kay Jose D. Lina ng nasabing grupo, ginagawa ng pamahalaan sa pamumuno ni Pangulong Marcos ang lahat upang mas lumakas ang ekonomiya, makalikha ng mas maraming trabaho at livelihood opportunities, at makamit ang mithiin ng Bagong Pilipino.

Upang mas maraming investors ang mahikayat na mamuhunan sa bansa na siyang mas magpapalakas sa ekonomiya, nagkasundo ang koalisyon na tulungan ang ARTA sa pagsisikap nitong bawasan ang red tape.

Ayon kay Lina, tutulungan ng BBC ang ARTA sa pamamagitan ng pagtukoy sa bottlenecks o mga nagpapabagal sa pag-unlad ng bansa, partikular na dahil sa red tape at bureaucratic inefficiency. Aniya, kapag matugunan, mapuksa, at matuwid agad ang mga isyung ito, lalago ang mga negosyo at sa kalaunan, ang ekonomiya.

Plano rin ng grupong maglunsad ng isang nationwide network upang matulungan ang ARTA sa pagtiyak na magiging madali ang proseso ng pagnenegosyo sa bansa at mabilis at maayos na maihahatid ang mga serbisyo mula sa pamahalaan papunta sa publiko.

Para kay Lina, marami pa ang kailangang gawin sa bansa. Kaya panawagan niya sa publiko: “We, the citizens, have to share out time, talent and, treasure to help our government realize the set goals and dreams.”

Tinatayang 30% ng mga gulay ang nasasayang sa bansa dahil sa overproduction.

Ito ay ayon mismo kay Department of Agriculture (DA) Secretary Francisco Tiu Laurel Jr. Dahil dito, inatasan ni Pangulong Ferdinand Marcos Jr. ang DA na tugunan ang isyung ito.

Sa isang pagpupulong kasama ang agriculture officials sa Malacañang noong January 16, 2024, sinabi ni Pangulong Marcos na dapat magkaroon ang mga magsasaka ng mga kinakailangang impormasyon upang malimitahan ang produksyon ng mga produktong pang-agrikultura na sellable o mabili sa merkado.

Upang maiwasan ang overproduction, binigyan ng Pangulo ng direktiba ang DA na magpatupad ng data-driven information system kada planting season.

Kapag nakabase sa datos ang mga impormasyon na ibabahagi sa mga magsasaka at producers, makakapag-desisyon sila kung ano lang ang mga dapat itanim batay sa kung anong mga produkto ang mabenta sa partikular na panahon. Sa ganitong paraan, hindi na magkakaroon ng agricultural products na basta-basta lang na nabubulok at nasasayang.

Binigyang-diin din ni Pangulong Marcos na dapat magkaroon ang mga magsasaka ng technical knowledge; i-upgrade ang pag-proseso sa mga kalakal; at bumuo ng mga pasilidad na magpapataas sa halaga ng kanilang mga produkto.

Kaugnay nito, tiniyak ng DA na magpapatayo sila ng mas maraming cold storage facilities; partikular na sa La Union o Baguio, Taguig, Quezon, at Occidental Mindoro. Plano ring magtatag ng ahensya ng 5,000 pallet position cold storage para sa mga gulay at high-value crops na inaasahang magagamit sa June 2025.

Sa pagpapatayo ng cold storage facilities, mababawasan ang kaso ng overproduction at pagkalugi ng mga magsasaka at mangingisda dahil magsisilbi itong imbakan na magpapahaba sa shelf life ng kanilang mga produkto.

Pinuri ni Quezon City Councilor Alfred Vargas ang bagong kautusan ni Pangulong Ferdinand Marcos Jr. na magbibigay ng proteksyon sa mga kababayan nating street dwellers o mga nakatira sa lansangan.

Matatandaang noong January 18, 2024, inilabas ni Pangulong Marcos ang Executive Order No. 52 na magpapalawak sa Pag-Abot program ng Department of Social Welfare and Development (DSWD). Sa bisa ng kautusang ito, kabilang na ang mga homeless sa mga magiging benepisyaryo ng naturang programa.

Ayon kay Hon. Vargas, konktretong halimbawa ng malasakit ng administrasyong Marcos sa mga mahihirap na Pilipino ang pagpapalawak sa Pag-Abot program. Aniya, pioneering social protection measure ito na napapanahon sa paglobo ng populasyon sa bansa.

Dagdag pa ng Quezon City councilor, ikinakatuwa niya ang inisyatibong ito ng pamahalaan dahil magbibigay ito sa mga mahihirap na pamilya ng pagkakataong makaahon sa buhay.

Matatandaang sa ilalim ng Pag-Abot program, mayroong nine assistance packages na makukuha ang mga benepisyaryo. Ito ang mga sumusunod:

• financial assistance
• transportation or relocation assistance
• transitory shelter assistance
• livelihood assistance
• employment assistance
• psychosocial support
• capability building of communities
• capacity building of local government units (LGUs)
• community assistance

Ayon kay Hon. Vargas, innovative at praktikal ang polisiyang ito ni Pangulong Marcos. Bilang dating Chairperson ng House Committee on Social Services sa Kongreso, pinuri rin niya ang whole-of-government approach ng Pag-Abot program para sa mga pamilya at batang nakatira sa lansangan. Para sa kanya, ang polisiyang ito ang magliligtas sa kinabukasan ng napakaraming kabataan sa lansangan.

Iniulat ng Local Water Utilities Administration (LWUA) noong January 16, 2024 na higit sa P1 billion na halaga ng water and sanitation infrastructure projects ang nakumpleto noong nakaraang taon sa ilalim ng Patubig sa Buong Bayan sa Mamamayan (PBBM) program.

Alinsunod ang PBBM program sa panawagan ni Pangulong Ferdinand Marcos Jr. na mabigyan ng sapat na tubig ang mga Pilipino.

Nais ng Pangulo na matiyak ang water security sa Pilipinas. Tumutukoy ang water security sa kapasidad ng bansa na magkaroon ng sapat at dekalidad na tubig para sa lahat. Layon nitong na ma-maximize ang paggamit ng tubig, kasabay sa paglimita ng mga panganib at pagkasira nito sa kalikasan.

Upang makamit ang pagkakaroon ng water security, inilunsad ng LWUA ang PBBM program kasama ang lahat ng water districts.

Layon ng PBBM program na tiyakin ang pagkakaroon ng efficient, sustainable, at uninterrupted water service sa buong bansa.

Ayon kay LWUA administrator Vicente Homer Revil, 8 water projects ang natapos nila sa taong 2023. Napakikinabangan na ito ng higit sa 22.3 million Filipinos.

Iniulat din ni Atty. Revil na 700 water supply projects ang na-bid out o nasa implementation phase, samantalang 40 sanitation projects ang nasa pipeline o kasalukuyang binubuo.

Bilang paghahanda naman sa epekto ng El Niño phenomenon, inatasan na ng LWUA ang lahat ng local water districts na magkaroon ng water supply inventory. Binigyan na rin ng direktiba ang water districts na bawasan ang pag-aaksaya ng tubig o non-revenue water nang hindi hihigit sa 20%. Dagdag pa ni Atty. Revil, kasalukuyang isinasagawa rin ang conservation measures at information drive upang mabawasan ang masamang epekto ng tagtuyot.

Hangad ni Pangulong Marcos na mabigyan ng sapat na tubig ang lahat ng mga sektor, probinsya, munisipyo, siyudad, at barangay sa buong bansa. Upang makamit ito, hindi lang pamahalaan, kundi pati rin tayong mga mamamayan, ang may trabahong pangalagaan at tipirin ang tubig. Sabi nga ni Pangulong Marcos, “Ang tubig ay kasing-halaga rin ng pagkain. Kailangan nating tiyakin na may sapat at malinis na tubig para sa lahat at sa mga susunod na salinlahi.”