EXPLAINERS

Lahat tayo, kabisado ang Filipino folk song na “Bahay Kubo.” Sa kantang ito, 18 masusustansyang gulay ang nabanggit.

Ang mga gulay na ito ang mismong itinanim sa community gardens sa ilalim ng Kalinisan Day campaign ni Pangulong Ferdinand Marcos Jr.

Ayon sa datos ng Department of the Interior and Local Government (DILG), umabot na sa 25,000 barangays sa buong bansa ang nakapagpatayo ng sariling community garden na may layong palakasin ang food security sa bansa.

Matatandaang inilunsad ang Kalinisan Day campaign ni Pangulong Marcos sa bisa ng Memorandum Circular No. 41 noong January 6, 2024, kasabay sa pagdiriwang ng Community Development Day.

Sa Kalinisan program, inatasan ang mga barangay sa buong bansa na mamigay ng mga binhi ng gulay at itanim ito sa kanilang community garden.

Ayon kay DILG Undersecretary Chito Valmocina, kadalasang instant noodles at sardinas ang kinakain ng mga mahihirap dahil mura ang mga ito. Upang matugunan ang isyu sa malnutrisyon, lalo na sa mga kabataan at senior citizens, hinihikayat ng DILG ang lahat ng sektor na makiisa sa pagtatanim.

Batay sa tala ng DILG, pinangunahan ng ahensya ang 42,000 na barangay; 82 na probinsya; at 1,700 na lungsod sa pagsasagawa ng cleanup drive, kabilang na ang community gardens at fisheries.

Pagtitiyak ni Usec. Valmocina, patuloy na sinisikap ng DILG ang pagkakaroon ng mas malinis na komunidad, alinsunod sa direktiba ni Pangulong Marcos.

Sa tuloy-tuloy na pagpapatupad at mahigpit na pagtutok sa Kalinisan program, maraming isyu sa bansa ang mareresolba katulad ng kalinisan, kagutuman, kahirapan, kalusugan, kalikasan, climate change, at global warming. Upang makamit ang pagkakaroon ng mas malinis at ligtas na komunidad saanmang sulok ng bansa, ayon kay Pangulong Marcos, kailangang manatili ang bayanihan spirit ng bawat Pilipino.

Patuloy ang pagsugpo ng administrasyon ni Pangulong Ferdinand Marcos Jr. sa kahirapan.

Binigyang-diin ng Office of the Presidential Adviser for Poverty Alleviation (OPAPA) ang commitment nitong suportahan ang programa ni Pangulong Marcos laban sa kahirapan na alinsunod sa “Bagong Pilipinas” campaign ng administrasyon.

Sa katunayan, nakikita ni Presidential Adviser for Poverty Alleviation Secretary Larry Gadon ang taong 2024 bilang “promising” pagdating sa kanyang kampanya kontra sa kahirapan.

Noong 2023, pinangunahan ng OPAPA ang ilang poverty reduction programs katulong ang Department of Social Welfare and Development (DSWD), National Intelligence Coordinating Agency (NICA), Department of Agriculture (DA), at Philippine National Police (PNP).

Nakipag-ugnayan din ang opisina sa Federation of Filipino Chinese Chambers of Commerce and Industry Inc. (FFCCCII) at National Housing Authority (NHA).

Ayon kay Sec. Gadon, titiyakin ng OPAPA ang mas mahusay na pagpapatupad ng food programs para sa mga batang mag-aaaral na nasa critical areas. Nangako rin siyang pagtutuunan ng pansin ang panghihikayat sa foreign investors para sa Public-Private Partnership (PPP) at infrastructure projects na makakaambag sa layunin ng administrasyong Marcos na mabawasan ang poverty incidence sa bansa.

Naniniwala ang Poverty Alleviation secretary na susi ang energy security sa pag-unlad ng ekonomiya. Sa katunayan, nakikipagpulong siya sa ilang foreign investors na interesadong magpatayo ng power plants sa bansa. Aniya, malaki ang maitutulong ng power plants lalo na sa mga pinakamahihirap na komunidad kahit 10 to 20 megawatts lang ang capacity nito. Matatandaang alinsunod ang energy security sa adbokasiya ni Pangulong Marcos na makapag-suplay ng kuryente saanmang sulok ng bansa.

Para kay Sec. Gadon, makalilikha ng mas maraming trabaho para sa mga Pilipino ang pagkakaroon ng matatag na energy security. At kung may trabaho ang isang Pilipino, mas malaki ang pagkakataon nitong makaalis sa kahirapan.

Nakipagpulong si Pangulong Ferdinand Marcos Jr. sa Department of Agriculture (DA) at sa iba pang mga kaukulang ahensya upang talakayin ang iba’t ibang isyu sa agricultural development noong January 16, 2024.

Sa naturang pagpupulong, ipinakita ng DA ang kanilang status report sa pagpatatayo ng cold storage at postharvest facilities sa bansa, alinsunod sa utos ni Pangulong Marcos noong nakaraang buwan.

Ang cold storage facility ay isang specialized storage warehouse na mayroong temperature-controlled environment. Ang pangunahing function nito ay maging imbakan ng perishable goods o ‘yung mga produktong mabilis masira; katulad ng gulay, prutas at isda. Sa paggamit ng cold storage facilities, matitiyak ang quality at mapapahaba ang shelf life ng mga produkto.

Ayon kay Agriculture Secretary Francisco Tiu Laurel Jr., 30% ng agricultural products ang nasasayang dahil sa poor logistics system sa food supply chain ng bansa.

Kaya naman upang maiwasan ang oversupply, overproduction, at pagkalugi ng mga magsasaka at mangingisda dahil sa pagkabulok ng kanilang mga produkto, magpapatayo ng mas maraming cold storage facilities ang DA; partikular na sa La Union o Baguio, Taguig, Quezon, at Occidental Mindoro.

As of November 2023, naitalang nakapagpatayo na ang DA ng 268 cold chain facilities sa bansa. Target ng ahensya na makapagtatag ng karagdagang 47 cold chain facilities bago sumapit ang June 2028.

Samantala, magpapatayo rin ang DA ng 5,000 pallet position cold storage para sa mga gulay at high-value crops. Ayon kay Sec. Laurel, inaasahang magagamit ito sa June 2025.

Para kay Quezon City Councilor Alfred Vargas, kapuri-puri ang naging aksyon ni Pangulong Marcos na gawing prayoridad ang pagpapatayo ng cold storage facilities. Aniya, magbibigay ito ng ginhawa sa bawat Pilipino dahil posibleng maging mas mura ang presyo ng mga bilihin; kaya para sa Konsehal, ang hakbang na ito ng Pangulo ay maituturing ding “anti-poverty initiative.”

Sa isang video message, sinabi ni Pangulong Ferdinand Marcos Jr. na gaya ng karamihan, mayroon din siyang sariling New Year’s resolution. Gayumpaman, idiniin niyang nangingibabaw pa rin ang hangad niya para sa bansa—ang tuloy-tuloy na pagsulong papunta sa isang ‘Bagong Pilipinas.’

Makakamit ng bansa ang Bagong Pilipinas sa tulong ng ‘Bagong Pilipino.’

Ayon kay Pangulong Marcos, upang maging Bagong Pilipino, maaari kang magsimula sa iyong sarili at pamilya, gaya na lang sa pagiging maagap, produktibo, at masinop. Aniya, may maitutulong sa bayan ang mga commitment sa sarili na may kinalaman sa disiplina at improvement.

Dagdag pa ng Pangulo, maaari mong i-develop ang sarili sa pamamagitan ng pagbabasa ng libro, pag-aaral sa paggamit ng makabagong teknolohiya, pag-obserba sa personal grooming at self-discipline, at pagiging mabuting miyembro ng pamilya at pamayanan.

Kaugnay nito, matatandaang ipinagdiwang ng bansa ang Community Development Day nitong January 6. Ayon kay Pangulong Marcos, nagsisilbi itong paalala sa kahalagahan ng development at improvement ng mga lokal na komunidad. Paiigtingin naman ng administrasyon ang panghihikayat sa lahat na maging bahagi sa pagpapaganda ng barangay, siyudad, probinsya, at sa kalaunan, sa buong bansa. Pangako ng Pangulo, sa mga susunod na linggo, lalo pang mauunawaan at mararamdaman ng mga Pilipino ang ibig sabihin ng Bagong Pilipinas.

Sabi ni Pangulong Marcos, walang Bagong Pilipinas kung walang Bagong Pilipino. Ika nga niya, “Isang magandang bahagi sa landas natin tungo sa Bagong Pilipinas ay ang individual and community involvement–ang pakikilahok ng taongbayan, ang pakikilahok ng bawat isa. Ang bawat barangay, pamilya o indibidwal ay tinatawag na maging bahagi ng pagbabago. Lahat naman ay may magagawa, lahat naman ay may maiaambag, lahat ay kabilang.”

Binuksan na para sa overseas Filipino workers (OFWs) ang libreng 24/7 VIP lounge sa Terminal 1 ng Ninoy Aquino International Airport (NAIA). Alinsunod ito sa direktiba ni Pangulong Ferdinand Marcos Jr. na bigyan ng malawak na espasyo ang OFWs sa mga paliparan.

Naging posible ang pagpapatayo ng OFW lounge dahil sa pinagsama-samang pagsisikap ng House of Representatives, Overseas Workers Welfare Administration (OWWA), Department of Migrant Workers (DMW), at Manila International Airport Authority (MIAA).

Ayon kay House Speaker Martin Romualdez, dedicated space para sa mga papaalis na OFWs ang VIP lounge.

Tumutukoy ang VIP lounge sa designated area na itinatayo ng airline companies para sa mga pasaherong nasa business-class o first-class. Kadalasan itong may exclusive amenities para sa mga pasaherong mas malaki ang binayad.

Pero sa OFW VIP lounge, libre ang paggamit, anumang uri ng ticket ang hawak ng isang OFW.

Katulad ng ibang VIP lounge, mayroong comfortable seating, Wi-Fi access, charging docks and power outlets, at information desk ang OFW lounge. Mayroon din itong resources, tips, and information tungkol sa pagtratrabaho sa ibang bansa at online community para makapag-connect ang OFWs sa isa’t isa.

May iaalok namang pagkain at inumin para sa mga OFW na naghihintay ng kanilang flight, katulad ng sandwich, biskwit, lugaw, itlog, tubig, kape, at juice.

Matatagpuan sa 4th floor ng NAIA Terminal 1 ang bagong bukas na OFW lounge. Ayon kay Speaker Romualdez, isa lang ito sa OFW lounge na ipapatayo sa international airports sa Metro Manila, Clark, Cebu, at Davao. Nakatakda ring magbukas ng OFW lounge sa NAIA Terminal 3.

Hindi maikakaila ang malaking kontribusyon ng OFWs sa ekonomiya ng bansa, kaya nga sila itinuring bilang modern-day heroes. Nais ng administrasyong Marcos na ipakita ang kanilang deep gratitude at appreciation sa kanila sa pamamagitan ng OFW lounge, kung saan magiging kumportable sila sa kanilang pag-alis. Sabi nga ni Speaker Romualdez, ang OFW lounge ay legacy ni Pangulong Marcos.

Tiniyak ni Pangulong Ferdinand Marcos Jr. na ipagpapatuloy ng administrasyon ang kanilang anti-communist insurgency campaign upang mapaigting ang internal security sa bansa.

Sa isang video message na inilabas ng Pangulo sa kanyang social media page, iniulat niyang wala nang aktibong New People’s Army (NPA) guerrilla front sa bansa as of December 2023. Dahil dito, maaari na aniyang masabing matagumpay ang pamahalaan sa laban nito kontra sa terorismo.

Sa isang press briefing, sinabi ni National Security Council (NSC) Assistant Director General Jonathan Malaya na sa 55 years of existence ng NPA, nasa “weakest” version na ito.

Ayon kay Pangulong Marcos, umabot sa 1,399 members ng communist at local terrorist groups ang na-neutralize ng pamahalaan noong 2023. Higit sa 1,750 firearms naman ang nakuha ng administrasyon sa pamamagitan ng capture, confiscation, recovery, at surrender.

Kaugnay nito, matatandaang noong November 24, 2023, inanunsyo ng Malacañang na naglabas si Pangulong Marcos ng ilang proklamasyon na magbibigay ng amnesty sa mga rebeldeng susuko sa pamahalaan.

Tumutukoy ang amnesty sa pagbibigay ng official pardon sa mga nahatulan ng political offenses. Sa ilalim ng Article VII, Section 19 ng 1987 Constitution, mayroong kapangyarihan ang Pangulo ng Pilipinas na magbigay ng amnestiya kung karamihan sa mga miyembro ng Kongreso ang sang-ayon dito.

Ibinibigay ang amnesty sa mga sumukong miyembro ng mga rebeldeng grupo upang mahikayat silang magbalik-loob sa pamahalaan at sumunod sa batas. Bahagi ito ng comprehensive peace initiatives ng administrasyong Marcos. Hindi naman sakop ng amnestiya ang paglabag sa rape, massacre, illegal drugs, war crimes, at iba pang karumal-dumal na paglabag sa karapatang-pantao.

Matatandaang nagkasundo rin ang Pilipinas at National Democratic Front of the Philippines (NDFP) na magkaroon ng “principled and peaceful resolution of the armed conflict.” Panawagan ni Pangulong Marcos sa mga Pilipino, suportahan ang pagpapatuloy ng peace process sa NDFP.

Nakapagbigay rin ang administrasyong Marcos ng kabuuang P91.47 million worth of financial assistance sa mga sumukong rebelde sa ilalim ng Enhanced Comprehensive Local Integration Program (E-CLIP) package ng Department of the Interior and Local Government (DILG). Sa year-end report ng DILG, lumabas na higit sa 1,119 former rebels mula sa NPA at Militia ng Bayan (MB) ang nakatanggap ng financial assistance mula sa pamahalaan as of November 2023.

Upang mapaigting naman ang peace-building efforts ng local government units (LGUs), ipinagpatuloy ng DILG ang pagpapatupad sa Communicating for Perpetual End for Extreme Violence and Forming Alliance Towards Positive Peace and Enriched Communities (C4PEACE) Program.

Ayon kay Pangulong Marcos, nagbibigay-diin ang tagumpay ng pamahalaan sa commitment nitong makapagbigay ng peace at stability sa bansa. Pangako niya, patuloy lang ang anti-communist insurgency campaign ng pamahalaan, katulong ang Armed Forces of the Philippines (AFP), Philippine National Police (PNP), Department of National Defense (DND), at iba pang government intelligence agencies.

Isang milestone ang nakamit ng Board of Investments (BOI) sa ilalim ng administrasyong Marcos matapos nitong makapagrehistro ng tumataginting na P1.16 trillion investments noong 2023. Ayon sa BOI, ang record na ito ang pinakamataas sa loob ng 56 years.

Para kay Department of Trade and Industry (DTI) Undersecretary Ceferino Rodolfo, resulta ang investments na ito sa foreign trips ni Pangulong Ferdinand Marcos Jr. Ang naturang investments ay magiging actual registrations at kalaunan, magiging proyekto.

Ayon kay Usec. Rodolfo, hindi laway lang ang tinutukoy na actual registration. Paliwanag niya, nakapag-rehistro na ang mga ito sa Securities and Exchange Commission (SEC).

Bago makapagpatayo ng negosyo ang local at foreign investors sa bansa, kailangan muna nilang magparehistro sa SEC. Pagbibigay-diin ni Usec. Rodolfo, nakapag-incorporate at nakapag-set up na ng opisina sa bansa ang ilang investors.

Dagdag pa ng Trade official, dati, nahuhuli sa Thailand at Malaysia ang Pilipinas pagdating sa investments. Ngunit ngayon, naungusan na ng Pilipinas ang mga kapitbahay nitong bansa.

Isa sa major factors nito ang aggressive promotional efforts ng administrasyong Marcos sa ibang bansa at ang mga reporma sa polisiya na ipinatupad ng pamahalaan.

Sa katunayan, matatandaang noong December 15, 2023, inilabas ni Pangulong Marcos ang Executive Order (EO) No. 49 na magtatatag sa Office of the Special Assistant to the President for Investment and Economic Affairs (OSAPIEA), ang opisinang nakatuon sa epektibong integrasyon, koordinasyon, at implementasyon ng iba’t ibang polisiya at programang pang-ekonomiya at pang-investment.

Dahil sa investment pledges na nakalap ni Pangulong Marcos mula sa ibang bansa noong 2023, nakapag-uwi siya ng higit 200,000 na karagdagang trabaho para sa mga Pilipino ayon sa tala ng DTI.

Sa patuloy na pagsisikap ng administrasyon na makakalap ng investments na magpapasigla ng ekonomiya, hindi imposible ang hangad ni Pangulong Marcos na maging leading investment hub ng Asya ang Pilipinas.

Hindi lang central office ang Department of Social Welfare and Development (DSWD) kung hindi isang “headquarters of our war against poverty.”

Ito ang sinabi ni Pangulong Ferdinand Marcos Jr. sa kanyang mensahe para sa 73rd anniversary celebration ng DSWD na ginanap nitong January 12, 2024 sa Batasan Hills, Quezon City. Sa naturang selebrasyon, nagbigay ang Pangulo ng ilang mahahalagang paalala para sa ahensya.

Ayon kay Pangulong Marcos, dapat ipagpatuloy ng DSWD ang pagsisilbi sa mga Pilipino nang may kindness, understanding, at compassion. Aniya, kasabay ng mabilis na serbisyo, inaasahan niya ang ahensya na magbigay ng sincere public service, lalo na sa mga Pilipinong underprivileged.

Hinikayat din ng Pangulo ang mga empleyado ng DSWD na panindigan ang “brand of public service” ng ahensya.

Samantala, binigyang-diin ni Pangulong Marcos na dapat magkaroon ng access ramps sa mga serbisyong pang-gobyerno ang Persons with Disabilities (PWDs). Panawagan ng Pangulo sa ahensya, huwag maging bingi at bulag sa mga hinaing ng PWDs.

Sabi nga ni Pangulong Marcos, “care is a hallmark of public service.” Giit niya, ang pagkakaroon ng empathy ay ang diwa ng pagtulong at pagkalinga sa itinatatag niyang Bagong Pilipinas.