EXPLAINERS

Naging usap-usapan sa social media ang Instagram story ng isang babaeng “influencer” na nagsabing nag-arkila umano ang kanyang asawa ng Highway Patrol Group (HPG) escort upang makaiwas sa trapik.

Agad na bumuhos ng pambabatikos mula sa mga netizen at maging ng ilang personalidad ang post at pinuna ang entitlement ng babaeng kinilalang si Mary Joy Santiago.

Sa isang media briefing, ibinahagi ni Philippine National Police (PNP) spokesperson Police Colonel Jean Fajardo na nakipag-ugnayan ang PNP-HPG sa babaeng sangkot sa isyu.

Noong una ay nakikipag-usap pa sa kanila si Santiago, ngunit ngayon, nagdadahilan na itong busy at maraming engagement.

Ayon sa PNP spokesperson, nakaladkad ang pangalan ng HPG dahil sa naturang post.

Dahil dito, intensyon ng Highway Patrol na sampahan ng kasong cyber libel ang babae.

Pagdidiin ng HPG, hindi nila kukunsintihin ang anumang pagkakasangkot o pag-endorso sa escort-for-hire services na lumalabag sa kanilang kasalukuyang protokol at regulasyon.

Dagdag pa ni Police Colonel Fajardo, mayroong serial number ang bagong uniform ng HPG. Mapapansing wala ito sa larawang ipinost ni Santiago. Wala ring markings ang side boxes ng motorsiklo nito.

Dalawang posibilidad ang tinitignan ng mga awtoridad: nagsuot ng HPG vest at nagpanggap na opisyal ang nasa larawan; o nakasabay lamang ni Santiago ang HPG official at ginawan ng content.

Patuloy man ang imbestigasyon sa isyung ito, maging paalala sana ito sa lahat na may kaakibat na responsibilidad ang paghahangad ng atensyon sa social media, lalo na kung hindi naman totoo ang impormasyong ipinakakalat.

Inilunsad na ng administrasyon ni Pangulong Ferdinand Marcos Jr. ang Pampamahalaang Programa at Serbisyo bilang pagsalubong sa ika-126 na selebrasyon ng Araw ng Kalayaan.

Pinangunahan kahapon, Hunyo 10, ng Manila Development Authority (MMDA) ang pormal na pagbubukas ng Pampamahalaang Programa at Serbisyo sa Rizal Park.

Ayon kay MMDA Acting Chairman Atty. Don Artes, nagbibigay ito ng pagkakataon para sa publiko na makakuha ng mga pangunahing serbisyo mula sa iba’t ibang ahensya ng pamahalaan, kabilang na ang Philippine Charity Sweepstakes Office (PCSO), Land Transportation Office (LTO), Department of Labor and Employment (DOLE), at Pag-IBIG.

Bukod rito, iba’t iba pang aktibidad ang inihanda ng administrasyong Marcos sa Quirino Grandstand at Burnham Green sa Rizal Park na maaaring salihan mula Hunyo 10 hanggang Hunyo 12.

Kasama rito ang paligsahan ng pagluluto sa mga pambansang pagkain, tiangge ng mga lokal na produkto, at Chili Festival.

Tampok din dito ang libreng concert at film showing ng mga pelikula na tungkol sa mga bayani ng Pilipinas.

Sa mismong Araw ng Kalayaan, Hunyo 12, magkakaroon naman ng Parada ng Kalayaan kung saan 22 float na gawang Pinoy ang lalahukan ng iba’t ibang probinsya sa bansa.

Masayang hinikayat ni Pangulong Ferdinand Marcos Jr. ang mga Pilipino sa mga programang inihanda ng pamahalaan para sa ika-126 na selebrasyon ng Araw ng Kalayaan ngayong Hunyo 12.

Mula ngayong Lunes, Hunyo 10 hanggang Hunyo 12, iba’t ibang aktibidad ang inilunsad ng administrasyong Marcos sa Quirino Grandstand at Burnham Green sa Rizal Park.

Kabilang dito ang paligsahan ng pagluluto sa mga pambansang pagkain, libreng concert, at tiangge ng mga lokal ng produkto.

Tampok din dito ang Chili Festival o ang pagkain ng siling labuyo at libreng pelikula tungkol sa mga bayani.

Siyempre, hindi mawawala rito ang one-stop shop caravan ng mga serbisyo ng pamahalaan.

Sa mismong Araw ng Kalayaan, magkakaroon naman ng Parada ng Kalayaan kung saan 22 float na gawang Pinoy ang lalahukan ng iba’t ibang probinsya sa bansa.

Panawagan ni Pangulong Marcos sa publiko, sama-samang iwagayway ang watawat ng Pilipinas at ipagdiwang ang pagiging Pilipino.

Alinsunod sa direktiba ni Pangulong Ferdinand Marcos Jr., mas pinaigting na ng pamahalaan ang kanilang mga aksyon upang matuldukan ang online child abuse.

Palalakasin ng Department of the Interior and Local Government (DILG) ang Violence Against Women and Children (VAWC) desks upang mapahusay ang paghawak sa mga kaso ng online sexual abuse and exploitation of children (OSAEC) sa mga barangay.

Ang VAWC desk ay isang barangay-level facility na tumutulong sa mga biktimang nakaligtas sa iba’t ibang uri ng pang-aabuso. Karaniwan itong matatagpuan a loob ng barangay hall at pinamamahalaan ng desk officer na itinalaga ng Punong Barangay.

Plano ng DILG na i-capacitate ito dahil ayon kay Pangulong Marcos, mahalagang alam ng barangay kung ano ang kanilang gagawin sakaling magsumbong sa kanila ang inabusong bata.

Ipinag-utos din ng ahensya ang pagsasagawa ng mga seminar sa mga barangay at lokal na pamahalaan ukol sa online child abuse.

Bukod rito, mahigpit na pinagbabawalan ng DILG ang pag-areglo sa mga kasong may kinalaman sa pang-aabuso sa mga bata.

Patuloy ang pagtulong ng administrasyon ni Pangulong Ferdinand Marcos Jr. sa mga nasalanta ng El Niño phenomenon.

Sa katunayan, pinangunahan ni Pangulong Marcos ang paghahatid ng presidential assistance sa mga lokal na pamahalaan ng Davao.

Namahagi ang Department of Social Welfare and Development (DSWD) ng P10,000 na tulong pinansyal para sa bawat magsasaka at mangingisdang apektado ng matinding tagtuyot sa Davao del Oro, Davao del Norte, Davao Oriental, Davao del Sur, at Davao Occidental.

Nakatanggap din sila ng rice assistance mula sa opisina ni House Speaker Martin Romualdez.

Nagbigay naman ang Department of Agriculture (DA) ng mga kagamitang pansaka at pangingisda katulad ng rice combine harvester, tractor, inorganic fertilizers, fishing gears, at mga bangka.

Dagdag pa rito, nagsuplay ng coconut seedlings ang Philippine Coconut Authority (PCA) para sa mga magsasaka sa Davao del Sur.

Samantala, nagpaabot din ng tulong ang Department of Labor and Employment (DOLE) sa mga benepisyaryo ng DOLE Integrated Livelihood Program at Tulong Panghanapbuhay sa Ating Disadvantaged/Displaced Workers (TUPAD) sa rehiyon.

Kaugnay nito, nagkaloob ang Technical Education and Skills Development Authority (TESDA) ng allowance para sa trainees ng organic agriculture production at mga kagamitan sa pag-aalaga ng mga baboy sa ilalim ng kanilang Special Training for Employment Program (STEP).

Ayon kay Pangulong Marcos, ang mga magsasaka at mangingisda ang bumubuhay sa mga pamayanan dahil sa pagkaing kanilang inihahain sa hapag ng bawat tahanan.

Dahil dito, patuloy na tinutulungan ng kanyang administrasyon ang mga nagsisilbing tagapangalaga sa sektor ng agrikultura.

Asahan na umano ang pagbaba ng presyo ng bigas sa merkado.

Kasunod ito sa desisyon ni Pangulong Ferdinand Marcos Jr. na bawasan ang taripa na ipinapatong sa imported na bigas mula 35% sa 15%.

Ayon kay National Economic and Development Authority (NEDA) Secretary Arsenio Balisacan, inaprubahan ni Pangulong Marcos ang pagtapyas sa taripa ng bigas hanggang 2028 upang bumaba ang presyo nito sa P29 per kilo, partikular na para sa mga mahihirap na pamilya.

Naniniwala rin si House Speaker Martin Romualdez na makatutulong sa pagpapababa ng presyo ng bigas sa merkado ang naging desisyon ng pangulo, kasabay sa patuloy na pagtitinda nito sa Kadiwa stores.

Ang taripa ay ang buwis na ipinapatong ng bansa sa mga produkto at serbisyong inaangkat mula sa ibang bansa.

Napupunta ang nakolektang taripa sa bigas sa Rice Competitiveness Enhancement Fund (RCEF) na ginagamit sa mga programang nakatuon sa pagtaas ng ani at pagpapalaki sa kita ng mga magsasaka.

Bagamat mababawasan na ang naturang pondo dahil sa pagbaba ng taripa, tiniyak ng House Speaker na hindi dapat mag-alala ang mga magsasaka dahil batay sa datos noong nakaraang buwan, umabot na sa P16 billion ang buwis na nakolekta mula sa inangkat na bigas.

Samakatuwid, mayroong sapat na pondo ang pamahalaan sa RCEF upang patuloy na suportahan at tulungan ang mga Pilipinong magsasaka.

Ayon kay Speaker Romualdez, patunay ang naging hakbang ni Pangulong Marcos sa pangako ng kanyang administrasyon na gawing abot-kaya ang mga pangunahing bilihin para sa bawat Pilipino.

Sa pangunguna ng Department of Social Welfare and Development (DSWD), patuloy ang administrasyon ni Pangulong Ferdinand Marcos Jr. sa pamamahagi ng tulong para sa mga kababayan nating apektado ng pagsabog ng Mt. Kanlaon sa Negros Island.

Ayon kay Pangulong Marcos, tuloy-tuloy ang DSWD, National Disaster Risk Reduction and Management Council (NDRRMC), at Philippine Institute of Volcanology and Seismology (PHIVOLCS) sa masusing pagsubaybay at pagbibigay ng suporta.

Nagsimula nang mamahagi ang DSWD ng family food packs at serbisyo sa evacuation centers.

Mayroon na ring naipadalang Mobile Command Center sa mga lalawigan ng Negros Oriental at Negros Occidental para sa mas maayos na disaster response.

Panawagan ni Pangulong Marcos sa mga nakatira malapit sa lugar, iwasan ang 4 km radius permanent danger zone at sumunod sa mga payo at tagubilin ng mga lokal na awtoridad.