EXPLAINERS

Positibo ang Department of Finance (DOF) na aahon mula sa kahirapan ang higit sa 14 milyong Pilipino bago matapos ang termino ni Pangulong Ferdinand Marcos Jr. sa 2028.

Para kay Finance Secretary Ralph Recto, dahil ito sa “bright economic outlook” ng Pilipinas.

Ayon kay Sec. Recto, suportado ng ekonomiya ng bansa ang mas bukas at liberalized na patakaran pagdating sa pamumuhunan.

Mapapansing walang-humpay ang pagsisikap ni Pangulong Marcos sa pangangalap ng investments at pagpapadali sa proseso ng pagnenegosyo. Nakaaambag ang mga ito sa paglikha ng mas maraming oportunidad para sa mga Pilipino at sa paglago ng ekonomiya.

Kabilang sa growth-enhancing strategies ng administrasyong Marcos na magpapatuloy sa paglago ng ekonomiya ang pagpapanatili sa price stability, pagsunod sa fiscal discipline, at pagsusulong ng investments sa productivity-enhancing sectors.

Ayon sa Finance secretary, ang mga estratehiyang ito ang magbibigay sa bansa ng upper-middle income status sa 2025 na magpapaangat sa buhay ng mga Pilipino.

Bukod sa pagsabay sa pandaigdigang ekonomiya, lumilinang din ang mga inisyatiba ni Pangulong Marcos sa mga talento at kakayahan ng kabataang Pilipino na makatutulong upang magkaroon sila ng magandang trabaho at makapagbigay ng maunlad na buhay para sa kanilang pamilya.

Mas maraming oportunidad ang magbubukas para sa mga Pilipino.

Ito ang inihayag ni Pangulong Ferdinand Marcos Jr. sa ginanap na Philippine Business Forum sa Brunei kung saan niya binigyang-diin ang mga hakbang ng pamahalaan sa pagpapadali sa proseso ng pagnenegosyo.

Ayon kay Pangulong Marcos, masusuportahan ng repormang ito hindi lamang ang paglago ng bansa, kundi ang pagsusulong ng kaunlaran sa rehiyon.

Upang makamit ang layuning ito, hinimok ng pangulo ang malalaking negosyo sa Brunei na gawing pangunahing investment destination ang Pilipinas dahil maganda ang potensyal ng ekonomiya nito at mas pinahusay na ang proseso sa pagtatayo ng negosyo rito.

Halimbawa na lamang ang mas pinasimpleng proseso sa pagbabayad ng buwis at ang pagtatatag ng green lanes para sa mas mahusay at mabilis na pag-apruba ng investments.

Matatandaang naunang sinabi ni Pangulong Marcos na hadlang sa pag-unlad ng bansa ang red tape. Aniya, red carpet at hindi red tape ang dapat ang maging trato sa local at foreign investors na nais magnegosyo Pilipinas.

Positibo si Pangulong Ferdinand Marcos Jr. na upgraded at bagong Manila airport ang sasalubong sa mga Pilipinong babalik sa bansa.

Ito ang tiniyak ng pangulo sa kanyang naging talumpati nang makipagkita siya sa Filipino community sa Brunei sa unang araw ng kanyang state visit sa bansa.

Ayon kay Pangulong Marcos, mayroong P170.6 billion na pondo ang administrasyon na gagamitin para sa rehabilitation project ng Manila International Airport.

Aniya, pahuhusayin ng proyektong ito ang passenger terminals at airside facilities. Padadaliin din ang paglilipat mula sa isang terminal hanggang sa kabilang terminal.

Bagamat inaasahang tatagal ng 15 years ang implementasyon ng rehabilitasyon, mapapansin ang initial improvements sa paliparan sa susunod na taon dahil mananatiling prayoridad ng pangulo ang infrastructure projects.

Para kay Pangulong Marcos, napapanahon nang simulan ang rehabilitasyon ng paliparan sa Manila na matagal nang napabayaan ng mga nakaraang administrasyon.

Tiniyak ng administrasyon ni Pangulong Ferdinand Marcos Jr. sa publiko na maibabalik na ang suplay ng kuryente sa mga lugar na apektado ng bagyong Aghon.

Ayon sa Department of Energy (DOE), inaayos na ng power distributors at local government units (LGUs) ang mga nasirang power lines.

Sa isang virtual press conference sa DOE, ibinahagi ni Energy Undersecretary Felix William Fuentebella na binabantayan na ng Task Force on Energy Resiliency ang mga bumabalik na power plant. Aniya, kailangan ito ma-synchronize o sumabay sa mga linya ng kuryente.

Siyam na planta ng kuryente ang naapektuhan ng bagyong Aghon na naging sanhi sa pagsasara ng kanilang kapasidad sa pagsu-suplay ng kuryente.

Bagamat inaasahang bubuti na ang suplay nito sa mga susunod na araw, hinikayat pa rin ng DOE ang publiko na magtipid sa kuryente upang mabawasan ang paggamit ng mas mahal na oil-based power plants.

Kaugnay nito, namahagi ng relief package na may lamang food packs, hygiene kits, at iba pang pangangailangan ang administrasyon ni Pangulong Marcos para sa mga pamilyang nasalanta ng bagyo.

Bagamat iginiit niyang isa lamang siyang “simpleng mamamayan”, kinuwestiyon sa Senado at maging ng mga netizen ang tila “luxurious lifestyle” ni Bamban, Tarlac Mayor Alice Guo na pinaghihinalaang sangkot sa pagpapatakbo ng ilegal na Philippine Offshore Gaming Operators (POGO) sa kanyang bayan.

Batay sa mga dokumentong nakalap ni Senator Risa Hontiveros, napag-alamang mayroong pagmamay-aring 16 na sasakyan si Mayor Guo. Kabilang sa mga sasakyang ito ang ilang sports utility vehicles (SUVs), pick-up trucks, dump trucks, at closed van. Ngunit ayon sa alkalde, hindi niya ito assets dahil bahagi ito ng kanyang buy and sell business.

Hiniram lamang din umano ni Mayor Guo para sa ginanap na car show sa lalawigan ang kontrobersyal na McLaren 620R na hinihinalang nagkakahalaga ng P33 million.

Wala man siyang naturang luxury car, nagkaroon naman siya ng helicopter na nais niyang gamitin sa pagnenegosyo bilang air taxi. Ibinenta niya na raw ito ngayong taon.

Kaugnay nito, napansin naman ng mga netizen ang luxury items na sinuot at ginamit ng alkalde na inilista sa isang social media post.

Isa rito ang Bulgari Serpenti Viper Necklace na tinataya ng mga netizen na nagkakahalaga ng P11.9 million. Nariyan din ang long-sleeve shirt ng Louis Vuitton na aabot sa P200,000.

Nakita ring may bitbit si Mayor Guo na Goyard bag na may presyong hindi bababa sa P100,000 at Chanel Trendy CC Flap bag na P350,000.

Patuloy naman ang imbestigasyon ng Senado at maging ng mga netizen sa totoong pagkatao ni Mayor Guo at ang tunay na dahilan kung bakit niya piniling maging pinuno ng Bamban.

Kasabay sa pagtitiyak ni Pangulong Ferdinand Marcos Jr. na handa ang lahat ng ahensya ng pamahalaan sa matinding tag-ulan, nagpaabot ng tulong ang Department of Social Welfare and Development (DSWD) sa mga pamilyang naapektuhan ng bagyong Aghon.

Batay sa ulat, tinatayang umabot sa 94 na barangay, 8,900 na pamilya, at 15,800 na indibidwal ang apektado sa pananalasa ng bagyong Aghon sa anim na rehiyon.

Dahil dito, higit sa P1.2 million ang ipinamahaging humanitarian assistance ng DSWD para sa kanila.

Naglaan din ng halos 25,000 family food packs ang ahensya sa mga apektadong rehiyon, kabilang na ang Bicol, Central Visayas, at Eastern Visayas.

Nagbigay naman ang pamahalaan ng relief package na may lamang hygiene kits at iba pang pangangailangan bilang suporta sa mga pamilyang nawalan ng tirahan dahil sa bagyo.

Pagtitiyak ni DSWD Assistant Secretary for Disaster Response and Management Group (DRMG) at spokesperson Irene Dumlao, mahigpit na binabantayan ng ahensya ang mga lugar na apektado ng bagyo at regular na nakikipag-ugnayan sa mga kinauukulang lokal na pamahalaan para sa agaran at naaangkop na tulong.

Nauna rito, inihayag ni Pangulong Marcos ang pagpapatupad ng whole-of-government approach sa paghahanda sa matinding tag-ulan.

Ayon sa pangulo, kailangan ang pinagsama-samang puwersa at pagkakaisa upang malagpasan ang lahat ng pagsubok na kinakaharap ng bansa.

Inatasan na ni Pangulong Ferdinand Marcos Jr. ang mga ahensya ng pamahalaan na makipag-ugnayan sa local government units (LGUs) bilang paghahanda sa paparating na La Niña phenomenon.

Sa kanyang talumpati sa ginanap na pamamahagi ng tulong pinansyal para sa mga magsasaka at mangingisdang apektado ng El Niño sa Maguindanao del Sur, tiniyak ni Pangulong Marcos ang pagpapatupad ng whole-of-government approach upang paghandaan ang La Niña.

Ayon sa pangulo, nakikipagtulungan na ang Department of Public Works and Highways (DPWH) sa Asian Development Bank (ADB) at iba pang ahensya ng pamahalaan upang maisakatuparan ang Flood Risk Management Project upang pagaanin ang epekto ng matinding pagbaha.

Nauna na ring ibinahagi ni Pangulong Marcos na gagawa ang pamahalaan ng irigasyon na gagamitin sa pag-iipon ng tubig at tutulong sa pagkontrol ng pagbaha.

Bilang hakbang sa unti-unting pagbabalik sa dating school calendar, inaprubahan na ni Pangulong Ferdinand Marcos Jr. ang pagbubukas ng klase sa Hulyo 29 para sa school year 2024-2025.

Nakipagpulong si Pangulong Marcos kay Vice President Sara Duterte sa Malacañang para pag-usapan ang mga hakbang upang maibalik ang school year mula Hunyo hanggang Marso, gaya ng nakasanayan ng karamihan bago mangyari ang pandemya.

Ang unang option na iprinisenta sa pangulo ay ang pagkakaroon ng tinatayang 180 school days at 15 in-person Saturday classes.

Ang ikalawa naman ay ang pagkakaroon ng tinatayang 165 school days, ngunit walang Saturday class.

Ngunit para kay Pangulong Marcos, napakaikli ng 165-day school calendar dahil posibleng makompromiso nito ang pag-aaral ng mga estudyante.

Ayaw rin niyang papasukin sila ng Sabado dahil aniya, malalagay sa alanganin ang kanilang kapakanan. Mas magastos din ito para sa mga magulang.

Dahil dito, iminungkahi ng pangulo na sa halip na piliting magtapos sa March 31, 2025 ang klase, dapat i-adjust ng Department of Education (DepEd) ang school year sa April 15 upang makumpleto ang tinatayang 180 days nang hindi na kailangang pumasok ng Sabado.

Sa ganitong paraan, babalik na sa Hunyo ang pasukan at magtatapos sa Marso pagsapit ng school year 2025-2026.

Sa gitna ng paghahanda ng administrasyon ni Pangulong Ferdinand Marcos Jr. sa pagtama ng La Niña sa Pilipinas, ilang malalaking manufacturer ang magpapatupad ng voluntary price freeze.

Ayon sa Department of Trade and Industry (DTI), suportado nila ang whole-of-government approach ni Pangulong Marcos sa paglaban sa price manipulators at sa pagprotekta sa mga konsyumer sa pamamagitan ng nationwide price monitoring.

Pinaigting din ng kagawaran ang kanilang pagsisikap na tiyakin ang epektibong pangangasiwa rito, bilang paghahanda sa matinding tag-ulan.

Kaugnay nito, limang malalaking manufacturer ang nagsabing magpapatupad sila ng voluntary price freeze sa kanilang mga produkto

Ayon kay DTI Assistant Secretary Amanda Nograles, kabilang sa mga produktong ito ang karne, gatas, bottled water, at instant noodles.

Ibinahagi rin ni Asec. Nograles na maglalabas ng price guide ang kagawaran bilang basehan ng mga konsyumer sa mga produktong hindi gagalaw ang presyo sa loob ng 60 araw.