EXPLAINERS

Sinong mag-aakala na ang simpleng paghawak sa isang sasakyan ay magreresulta sa katakut-takot na pang-aabuso? Katulad na lamang ng nangyari sa isang bata sa California na may autism.

Ang buong kwento, alamin.

Sa isang nag-viral na video, makikita ang isang batang lalaki na nakaupo sa isang bench sa waiting shed na kinilalang si Alfredo Morales, sampung taong gulang na mayroong autism.

Sa pagpapatuloy ng video, makikita ang paglapit ng isang lalaki kay Alfredo at sa nakatatandang kapatid na babae na kasama nito. Huminto ang lalaki sa harapan ng magkapatid bago sinampal si Alfredo at dinuro pa bago tuluyang umalis.

Ang rason kung bakit ito sinapit ng bata? Iyon ay dahil hinawakan lang nito ang emblem sa hood ng Mercedes-Benz Sedan ng nanampal na lalaki na kinilalang si Scott Sakajian habang tumatawid sila ng kaniyang ate.

Sinundan ni Scott ang magkapatid sa waiting shed at doon na nga nangyari ang pananakit sa bata. Dahil dito, sinampahan ng kasong child cruelty at battery si Scott.

Samantala, napag-alaman na nakatira ang pamilya ni Alfredo sa isang 2010 Ford F-150 na hindi na umaandar.

Dahil sa insidente, sunud-sunod ang suporta na natanggap ng pamilya Morales kabilang na ang alok ng rapper na si Swifty Blue na ipaayos ang kanilang sasakyan.

Noong Nobyembre 11 nang dinala ng Airport Marina Ford sa L.A. ang sirang sasakyan nila Alfredo, ngunit laking gulat na lang ng pamilya nang bigyan sila nito ng bagong 2023 Ford Explorer.

Bukod pa riyan, nagsagawa rin ng go fund me campaign para sa pamilya morales na umabot na ng milyong piso. Umaasa rin daw na muling mabuksan ng pamilya ang kanilang restaurant na nagsara nitong nakaraang taon.

Ikaw, anong masasabi mo sa naging kinalabasan ng insidente na ito?

Sa India, isang lalaki ang muntikan nang ma-cremate dahil sa maling deklarasyon ng mga doktor nito.

Ang buong kwento, alamin.

Isang 25-anyos na lalaking deaf and mute na kinilalang si Rohitash Kumar ang nawalan ng malay nitong nobyembre 21 dahil sa epileptic seizure.

Dinala si Kumar sa Bhagwan Das Khetan (BDK) District hospital at binigyan ng mga doktor ng cpr ngunit lumabas sa electrocardiogram na nag-flatline na ang heart rate nito.

Idineklarang patay si Kumar at ipinadala sa morge nang hindi man lang sumasailalim sa post-mortem examination upang malaman kung ano ba ang dahilan ng pagpanaw nito.

Inilagay sa funeral pyre si Kumar upang i-cremate alinsunod sa tradisyon ng mga Hindu.

Ngunit bago pa man paliyabin ang mga kahoy na susunog sana sa katawan ng lalaki ay napansin ng mga nanonood na bigla na lamang gumalaw si Kumar.

Ayon sa inisyal na imbestigasyon, “respiratory failure due to lung disease like chronic obstructive pulmonary disease at tubercolusis” ang sanhi ng pagkamatay nito at may time of death na 1:50 pm.

Pero ayon sa district collector na si Ramavatar Meena, nakasaad lamang ang post-mortem examination ni Kumar sa papel at hindi naman talaga aktuwal na isinagawa ng mga doktor.

Nagresulta ito sa imbestigasyon sa mga doktor sa nasabing ospital, habang tatlo naman sa mga ito ang nasuspinde dahil sa negligence.

Matapos ang insidente ay ibinalik si Kumar sa ICU ng BDK ngunit inilipat din sa isang ospital sa Jaipur dahil sa hindi pagbuti ng lagay nito.

Sa kasawiang palad naman ay tuluyang pumanaw ang lalaki habang nasa ambulansya.

Ikaw, anong masasabi mo sa kalunus-lunos na sinapit ng lalaki?

Tunay nga naman na marami-raming tao ang mayroong love-hate relationship sa subject na Math, kaya naman may iilan na pinili na lang mag-hire ng tutor, ngunit, ang isang sampung taong gulang na bata, sa halip na sa pamilya o tutor magpaturo, tumawag ito sa…… 911!

Kung ano ang buong kwento, alamin.

Kamakailan lang ay nag-post ang official social media account ng Shawano Sheriff’s Office ng isang kakaibang tawag na natanggap nila mula sa isang bata.

Ipinakita sa post na isang sampung taong gulang na bata ang tumawag sa kanila dahil nangangailangan ito ng tulong para sa kaniyang assignment sa math dahil hindi rin daw magaling sa subject na iyon ang kaniyang pamilya.

Ayon naman sa pahayag ni Sheriff George Lenzner, pinaliwanagan ng dispatcher na si Kim Krause ang bata na hindi ginagamit ang 911 para sa mga homework ngunit sinubukan niya pa rin itong tulungan.

Pero nang malaman ng dispatcher kung ano ang problem na kailangan sagutan ng bata at sinabi na hindi niya ito kayang sagutan, kung kaya naman naghanap siya ng ibang makatutulong dito at na-contact si Deputy Sheriff Chase Mason.

Inamin ni Deputy Mason sa isang report na hindi rin siya magaling sa nasabing subject ngunit sinubukan niya pa ring tumulong.

Dumating si Mason kasama ang kaniyang stepson na kasing-edad lang ng nasabing bata. Binigyan niya rin daw ito ng business card at sinabing handang tumulong ang 911 ngunit pinaalalahanan na kung ang concern nito ay hindi life-threatening, sa non-emergency line na lamang ito tumawag.

Umani naman ang post ng napakaraming comments, likes at shares na naglalaman ng samu’t-saring komento, kung saan may mga nagpasalamat dahil may nabasa raw silang feel-good news, at kung saan mayroon ding mga nagsabi na para sa isang bata, maituturing ang pagsagot ng math problem na isang emergency.

Ikaw, anong masasabi mo sa nakatutuwang kuwento na ito?

Bukod sa mismong seremonya ng kasal, ang pre-nuptial shoot ang isa sa pinaka-pinaghahandaan ng mga bride at groom dahil magsisilbi itong remembrance ng kanilang milestone.

Pero ang isang couple sa Iloilo, nagsagawa ng napakasimple ngunit sobra namang kakaibang prenup shoot.

Kung ano ang buong kwento, alamin.

Kamakailan ay nag-viral sa social media ang pre-nuptial photos ng couple na sina Ken at Arlyn na ngayon ay mayroon ng 19k reactions, 1.7k comments, at 6.5k na shares at patuloy pang dumadami.

Sa mga litrato na kinuhanan ng photographer na si Janno Hunkz Sonza, makikita ang magkasintahan na mayroong simpleng kasuotan na green long sleeves na mayroon pang malaking print ng “Tupad” sa harapan at parehong nakasuot lamang ng shorts at tsinelas.

At para makumpleto ang kanilang get up, mayroon pa silang props na walis, dustpan, at basurahan at umakto na para bang abala sila sa paglilinis sa kalsada habang may halong sweetness.

Ang “Tupad” o tulong panghanapbuhay sa ating disadvantaged/displaced workers ay isang programa ng department of labor and employment o dole na layuning magbigay ng oportunidad sa mga displaced, marginalized, at disadvantaged workers.

Kaugnay nito, kinagiliwan naman ng netizens online ang simple ngunit walang katulad na photoshoot na ito, kung saan agad na dinagsa ng pagbati at mga nakakatuwang komento mula ang couple mula sa mga netizen, tulad nang komentong, “natupad ang pangarap sa tupad.”

Ikaw, ano ang unique na pre-nup photoshoot ideas na naiisip mo?

Isang regular customer ng Sonu Kings Salon sa Ghaziabad, Uttar, Pradesh, India ang nagsagawa ng isang nakakaantig na fundraising activity para sa kaniyang barbero na ikinatuwa ng netizens online.

Kung bakit ito ginawa ng lalaki? Alamin.

Nanakawan ng cellphone ang barbero na si Ghaziabad Ka Aalim Hakim o mas kilala sa kaniyang mga suki sa Sonu Kings Salon bilang Sonu.

Sa isang pambihirang tagpo ay nagkaroon ng inisyatiba ang hindi pinangalanang regular customer ni Sonu na magsagawa ng fundraising activity gamit ang crowdfunding app sa India na Milaap.

Hindi pa riyan nagtatapos ang effort na isinagawa ng lalaki dahil nagpagawa pa ito ng t-shirt na mayroong print ng QR code sa likod na kapag ini-scan ay makikita ang donation page na ginawa nito.

Kinuhanan naman ng X user na si Pooja Sanwal ang customer na suot ang nasabing t-shirt at in-upload sa kaniyang account na may caption na “spotted this guy in CP today (the qr code opens a fundraiser for his barber).”

Sinabi naman ng customer sa Milaap na gusto niyang tulungan ang barbero dahil nanakawan ito ng cellphone. Aniya pa, napakabait daw nito, hindi judgmental, at tinawag niya pang ‘kind soul.’

Bukod pa riyan, na-e-enjoy din daw niya ang playlist nito na naririnig niya sa tuwing nagpapagupit siya rito kung kaya naman pinlano niya na i-download ang lahat ng mga paborito nitong kanta sa bago nitong cellphone.

Dahil sa nag-viral na post ni Pooja, nakarating ang fundraising initiative niya sa London-based consumer electronics manufacturer na Nothing Phone at napansin ng co-founder at head marketing nito na si Akis Evangelidis.

Kaya naman pinahanap ng staff ng nothing phone si Sonu at sinorpresa ng brand new Nothing Phone 1.

Ikinatuwa naman ng online netizen ang success ng initiative ng loyal customer ni Sonu at nag-iwan ng samu’t-saring empowering comments.

Ikaw, anong masasabi mo sa nakaaantig na kwento na ito?

Sa panahon ngayon, nagiging biruan na sa mga magkakaibigan ang pagtatanong sa isa’t-isa kung kailan sila ikakasal. Pero ang isang brazilian woman, absent sa kasal ng kaniyang best friend dahil sa unhealthy na……. Handa?

Kung bakit, alamin.

Isang matalik na magkaibigan ang nagkaroon ng tampuhan dahil sa desisyon ng isa sanang bridesmaid na si Tiele Azambuja na hindi um-attend sa kasal ng kaniyang best friend.

Si Tiele ay isang bodybuilder at fitness influencer at natural sa kaniya na maging conscious sa shape ng kaniyang katawan at sa kaniyang food intake.

Kaya naman kahit ang kasal ng kaniyang hindi pinangalanang best friend ay hindi niya hinayaan na makaapekto sa kaniyang strict diet.

Sa isang pahayag, sinabi niya na seryoso siya sa kaniyang lifestyle at alam niya na maraming pagkain na puno ng carbs at sugar ang inihain sa kasal.

Dahil dito, naisipan niya na mag-request na sana ay mayroong healthy food sa menu ngunit inalmahan ito ng bride.

Dahil nagkasundo kung kaya’t tumanggi si Tiele na maging bridesmaid sa kasal dahilan para magkaroon sila ng tampuhan.

Kwento pa ni Tiele, nangatwiran pa raw ang bride na hindi makakaapekto sa kaniya kung hindi siya magbabaon ng pagkain dahil kumakain naman daw siya kada tatlong oras.

Gayunpaman, nanatiling buo ang desisyon ni Tiele na huwag nang dumalo kahit pa ito ay isa sa pinaka-importanteng kaganapan sa buhay ng kaniyang best friend dahl hindi niya kayang isakripisyo ang isang araw na ito para sa figure na ilang taon niyang pinaghirapan.

Ikaw, gagawin mo rin ba ito sa’yong kaibigan kung ikaw ang nalagay sa kaparehas na sitwasyon?

Hindi na bago ang kuwento ng ghosting o ang biglang paglaho na parang bula ng isang tao sa isang official relationship, pero ano ang gagawin mo kung ang nang-ghost sa’yo ay asawa mo na, katulad ng nangyari sa isang babae sa Massachusettes, USA.

Ang buong kwento, alamin.

Sa isang Facebook post ng licensed aesthetician na si Ashley Mcguire, ikinuwento niya kung paanong ghinost siya ng British national na asawa na si Charles na isa namang chef.

Aniya, susubukin daw niya ang kapangyarihan ng Facebook upang mahanap ang asawa na nang-ghost sa kaniya habang buntis siya sa pangalawa nilang anak.

Mayroon nang dalawang supling ang mag-asawa. Ang panganay ay isang taon nang hindi nakikita ng lalaki, habang ang bunso naman ay hindi pa nito nakita ni isang beses man lang.

Makikita rin sa caption ng post na kaya pala hinahanap ni Ashley si Charles ay dahil kailangan niya ang pirma nito para tuluyan na siyang ma-divorce sa lalaki at maka-move on na sa kaniyang buhay.

Balita rin ni Ashley na “Charlie” na ang ginagamit nitong pangalan at nagtatrabaho sa hospitality industry. Mayroon din daw tiyansa na hindi binabanggit ng lalaki na siya ay isa nang family man.

Sa kaparehong post, nanawagan ang babae sa mga maaaring nakakilala sa kaniyang asawa upang maabisuhan siya sa whereabaouts nito.

Samantala, makalipas lamang ang labing-apat na oras ay napatunayan nga ni Ashley ang kapangyarihan ng social media dahil sunud-sunod ang impormasyon na natanggap niya tungkol sa asawa.

Mayroong mga babae na nagsabing naka-match nila sa isang dating application si Charles at alam ang address at numero nito, habang ang iba naman ay sinasabing posibleng nasa Texas ito.

Nagpasalamat naman si Ashley sa mga nagbigay ng impormasyon tungkol sa kaniyang asawa at kahit ganun ang ginawa nito sa kaniya ay humiling siya sa mga tao na huwag itong pisikal na hanapin at huwag ding pagbabantaan.

Ikaw, ano ang gagawin mo kung sa’yo naman ito mangyari?

Talaga nga namang nakalulungkot ang matanggalan ng trabaho. Kadalasan ay tinatanggap na lang ito ng mga tao at naghahanap ng bago. Pero ang isang Indian man sa Singapore, naghiganti muna sa dating pinapasukan matapos siyang ma-terminate.

Ang buong kwento, alamin.

Si Kandula Nagaraju ay isang trenta’y nuwebe anyos na Indian national na natanggal sa kaniyang posisyon sa quality assurance computer system team ng National Computer Systems sa Singapore dahil ayon sa company assessment ay hindi raw maganda ang kaniyang work performance.

Natapos ang kaniyang kontrata sa kumpanya noong October 2022 ngunit pinahintulutan pa rin na mag-trabaho hanggang November 16 sa parehong taon.

Ikinalungkot naman ni Kandula ang termination at bumalik na lamang muna sa India dahil wala siyang nahanap na trabaho sa Singapore.

Habang wala pa siyang bagong trabaho, natuklasan ni Kandula na mayroon pa rin siyang access credentials sa sites at servers ng kumpanya, kaya naman pinag-aralan niya kung paano buburahin ang servers ng NCS bilang ganti rito.

Nakakita naman ng bagong trabaho si Kandula sa Singapore at bumalik doon noong February 2023 at nag-renta ng kuwarto kung saan nangungupahan din ang dati niyang katrabaho sa ncs at naki-connect sa wifi nito upang maisagawa ang plano.

Sa sumunod na buwan ay paunti-unti nang binura ni Kandula ang servers upang hindi makahalata ang kumpanya.

Makalipas lang ang isang araw ay nadiskubre na ng kumpanya na burado na ang lahat ng kanilang 180 servers at ginawan na lamang ng paraan para hindi mag-panic ang kanilang mga kliyente at siniguro na safe ang mga data na hawak nito.

Gayunpaman, natuklasan din agad sa imbestigasyon na si Kandula ang nasa likod ng insidente at pinatawan ng dalawang taon at walong buwan na pagkakakulong.

Samantala, mas pinaigting na ng kumpanya ang kanilang system matapos hindi agad mabura ang access ni kandula sa kanilang servers kung kaya kinailangan nilang magbayad ng halos 678,000 Singaporean dollars na may katumbas na 29.4 million Pesos para ma-retrieve ang mga ito.

Ikaw, anong masasabi mo sa termination revenge na ito?

Isang babae ang aktibong ibinahagi sa kaniyang Instagram account ang marangya niyang buhay ngunit mayroong mga tuntunin mula sa kaniyang asawa na kailangang sundin.

Kung ano ang mga ito, alamin.

Sa Instagram account ng social media influencer na si Soudi Al Nadak na mayroong 427k followers, makikita kung gaano ka-garbo ang lifestyle na mayroon siya sa Dubai.

Sunud-sunod kasi ang videos sa kaniyang profile na kung saan ay naka-display ang marangyang pamumuhay na mayroon sila ng kaniyang asawang milyonaryo.

Ngunit, may isang kakaibang video sa kaniyang account na mayroong caption na “Strict rules my millionaire husband has for me in Dubai.” Na nakakuha na ng 11.6m views, 300k likes, at 3,352 comments.

Ipinakita rito ni soudi ang rules na sinusunod niya mula sa kaniyang mister katulad ng “I can’t have a bag that doesn’t match my shoes” na kung saan ay ipinakita niya ang kaniyang mamahaling bag at sandals na magkapareho ng kulay.

Kabilang pa sa mga ito ang “The bills are his responsibilities, I don’t work,” “I never cook, we always eat out,” “My hair and makeup has to be done professionally daily,” at “No guy friends ever.”

Kahit pa pangarap ng ilan ang ganitong level ng financial stability, marami sa comments section ng partikular na video na ito ni Soudi ang nagpahayag ng negatibong sentimyento tungkol sa kaniyang buhay.

Ayon sa mga netizen, tila nakakulong ang misis sa isang golden cage at kahit gaano pa ka-sopistikada ang buhay nito ay malungkot at boring pa rin sa paningin ng iba. Ngunit mayroon din namang nagtanggol sa babae at sinabi na ‘she’s living the life’ at ang iba ay naiinggit lang dito.

Ikaw, ano ang gagawin mo kung ikaw ang mayroong milyonaryong partner?

Ano ang gagawin mo kung sa isang normal na araw ay bigla ka na lamang makasalubong ng daan-daang mga unggoy katulad na lang ng nangyari sa isang probinsya sa Thailand?

Ang buong kwento, alamin.

Sa isang pambihirang pagkakataon, nagkalat sa probinsya ng lopburi sa thailand ang tinatayang 200 unggoy nang bigla na lamang makawala ang mga ito mula sa kanilang kulungan.

Makikita sa video na ginapang ng napakaraming unggoy ang bakod ng kanilang kulungan kung kaya naman nakarating ang mga ito sa kalsada.

Hindi pa riyan nagtapos ang pagkakalat ng mga unggoy dahil pati ang isang police station ay hindi nila pinalampas! Pumalibot ang mga ito sa istasyon at makikitang umabot pa hanggang sa rooftop nito.

Para naman maiwasan ang pinsala na maaaring idulot ng mga unggoy, sinara na lamang ng mga pulis ang mga pinto at bintana upang mapigilan ang mga ito sa pagpasok at walang masirang mga importanteng kagamitan at records.

Gumamit na lamang daw ang mga pulis ng pagkain upang pagsama-samahin ang mga unggoy at tuluyang mahuli.

Samantala, sa isang pahayag ay sinabi ng Agence France-Presse na ang paglaki ng populasyon at tinataglay na pagka-agresibo ng mga unggoy ay matagal nang lumalaganap kung kaya naglaan ng kulungan ang mga otoridad para sa mga ito.

Ikaw, anong masasabi mo sa pambihirang kuwento na ito?