EXPLAINERS

Aakalain mo ba na ang mga barya na madalas na ini-ismol at itinuturing na pampabigat sa ating mga pitaka ay nagamit ng isang lalaki na pambili ng isang second hand na van?

Kung paano ito nangyari, alamin.

Sa isang video, makikita ang isang lalaki na si Rolly na nakaupo sa ibabaw ng isang nakatumbang laundry basket at kapansin-pansin ang sangkaterbang mga baryang nagkalat sa sahig na ginagamitan na ng pala upang tuluyang mailabas.

Ngunit hindi pa iyon ang lahat ng mga barya na mayroon ang lalaki, dahil pati ang compartment ng kaniyang motor ay ginawa na rin niyang alkansya!

Ayon sa isang pahayag, nanggaling daw ang mga barya mula sa pisonet business ni Rolly na may tatlong branches. Bukod pa rito, mayroon din daw siyang mga kliyente na nagpapaset-up ng computer at nagpapagawa ng computer shop na barya ang ginagamit pambayad sa kaniya.

Kung kaya naman hindi na kataka-taka na nakaipon ito ng ganoon karaming barya. Ngunit, gaano naman ba kalaki ang sumatotal nito?

Ang mga barya na inipon ni Rolly sa loob ng tatlong buwan ay umabot lang naman ng tumataginting na 115,000 pesos!

Aniya, dinagdagan niya na lang ang mga naipong barya para mabili ang second hand na van na gagamitin niya raw para sa kaniyang negosyo.

Samantala, ang tip naman na ibinigay ni Rolly para makaipon ng pera ay sipag at disiplina. Mas pinaiiral niya raw ang praticality at nag-iinvest lamang sa mga bagay na makatutulong para sa kaniyang self-improvement.

Ikaw, anu-ano ang techniques ang ginagawa mo para makaipon ng pera?

Nagreresulta sa mainit na diskusyon sa pagitan ng mga babae at lalaki kung sino nga ba ang dapat na manlibre sa isang date. Naging patunay nito ang nating experience ng isang Russian man nang tumanggi ang kaniyang ka-date na maghati sila sa bill.

Ang dahilan ng babae? Alamin.

Dalawa lang naman ang maaaring maging resulta ng isang date. Posibleng makabuo ng magandang koneksyon ang dalawang tao at masundan pa ito ng isa pang date, o di kaya naman ay mauwi na lang sa hindi pagpapansinan o pagdedesisyon na maging magkaibigan na lamang.

Pero para sa isang bente otso anyos na lalaki sa Moscow, Russia, ang kaniyang first date ay nauwi sa pagsasampa ng reklamo!

Bago ang nasabing date, nagkakilala muna ang dalawa sa social media at doon pansamantalang nag-usap at kinilala ang isa’t isa bago naisipang magkita nang personal.

Napagdesisyunan nila na magkita sa isang kapehan sa Mira Avenue sa Moscow.

Naging maganda naman daw ang takbo ng kanilang meet up, ngunit bigla na lang nag-iba ang ihip ng hangin nang dumating ang kanilang bill.

Nag-suggest ang hindi pinangalanang lalaki na hatiin ang bill pero agad itong inalmahan ng babae at sinabing mas maraming inorder na pagkain at inumin ang lalaki kung kaya naman marapat lang na bayaran niya ito nang buo.

Nauwi sa pag-wawalk out ng babae ang ilang minuto nilang pagtatalo at naiwan sa lalaki ang bill.

Hindi naman nagpadaig ang lalaki sa ginawa ng babae at hindi hinayaan na umalis ito nang ganun-ganon na lang, kung kaya dumiretso ang lalaki sa police station upang magsampa ng reklamo sa kaniyang runaway date.

Samantala, hanggang ngayon ay hindi na nagkaroon pa ng balita kung paano nga ba talaga nagtapos ang masalimuot na date ng dalawa at kung ano ang nangyari sa isinampang reklamo.

Para sa’yo, sino ba talaga ang dapat na magbayad ng bill sa isang date?

Napatunayan na tunay na malakas ang ‘lukso ng dugo’ nang malaman ng singkwenta anyos na lalaki na ang ina na matagal na niyang hinahanap ay ang may-ari pala ng bakeshop kung saan siya ay suki.

Kung paano ito nangyari? Alamin.

Nasa edad trenta’y singko anyos na ang isang lalaki mula South Shore, Chicago na si Vamarr Hunter nang kaniyang matuklasan na siya pala ay isang ampon.

Sa tulong ng genetic-genealogist na si Gabriella Vargas ay nagsimula ang paghahanap ni Hunter sa kaniyang nanay.

Ayon sa isang interview, sinabi ni Vargas na mayroong naka-match si Hunter sa malaking genealogy company na Ancestry.com.

Dahil na rin sa tulong ng dna sample ni Hunter ay natagpuan nila ang sisenta’y siyete anyos na babae na si Lenore Lindsey na hinahanap din pala ang anak.

Matapos mag-match ng dalawa, kahit na nasa recovery period pa mula sa kaniyang breast cancer surgery si Lindsay ay agad na tinawagan nito ang numero na binigay ng Ancestry.com.

Hindi naman agad nabosesan ni Lindsey na isa palang regular customer ang kausap niya sa telepono, habang labis na pagtataka naman ang naramdaman ni hunter nang makatanggap ng tawag mula sa ‘Give me some sugah’ kung saan ay suki siya ng lemon bars.

Agad naman daw nakaramdam ng koneksyon si Lindsey sa kausap nang matuklasan kung sino ito, habang labis namang hindi makapaniwala ang anak na si Hunter.

Ayon kay Lindsey, ang rason kung bakit sila nagkahiwalay ng anak ay dahil napilitan siyang ipaampon ito dahil sa mahirap na katayuan sa buhay noong disi-siyete anyos pa lamang siya.

Samantala, nito lang Abril ay binitawan na ni Hunter ang kaniyang trabaho para tulungan ang kaniyang ina sa bakeshop na balak niya namang ipamana sa kaniyang anak sa tamang panahon.

Ikaw, anong masasabi mo sa nakabibilib na kwento na ito?

Napatunayan na talaga nga namang magpa-hanggang ngayon ay buhay pa rin ang alaala ng malaking trahedya sa dagat na naganap noong 1912 na sumikat mula nang gawin itong pelikula, ang Titanic.

Kung bakit? Alamin.

Kamakailan ay naibenta sa isang auction ang gold pocket watch ng kapitan ng barkong RMS Carpathia na si Arthur Rostron sa halagang 2 million U.S. dollars o 117.7 million Pesos.

Ayon sa auctioneer na si Aldridge, na siyang nagmamay-ari ng gold pocket watch, umabot sa ganung presyo ang gold pocket watch niya dahil pakonti na nang pakonti ang mga memorabilia mula sa lumubog na barko.

Una rito, noong araw na maganap ang trahedya, personal na inisyatiba ni Captain Rostron na baybayin ang direksyon ng lumubog na Titanic kahit pa may kalayuan ito mula sa kinaroroonan nila.

Matatandaang lumubog ang Titanic noong unang araw ng paglayag nito noong 1912 matapos bumangga sa isang iceberg sa North Atlantic.

Kabilang nga sa mga pasahero ng Titanic ang tatlong babaeng nagregalo ng gold pocket watch sa kapitan ng barko.

Ang nasabing mga babae ay mga misis ng mga mayayamang pasahero

Isa sa mga ito ay nakilalang si Madeleine Astor na misis ng pinakamayamang pasahero sa lumubog na barko na si John Jacob Astor.

Iniregalo ng tatlong misis ang 18-carat Tiffany & Co. gold watch kay Rostron bilang pasasalamat dahil nakaligtas sila sa tulong ng kapitan.

Si Rostron ay binawian ng buhay noong November 4, 1940 sa edad na 71 dahil sa sakit na pneumonia.

Ikaw, anong masasabi mo sa nostalgic na kwento na ito?

Pinaglalaanan ng oras ng mga babae ang pagpapaganda sa tuwing sila ay makikipagdate, ngunit ang isang babae sa Auburn, Alabama, USA, nasayang ang effort dahil sa date niya na hindi man lang inabot ng isang minuto.

Kung ano ang buong kwento, alamin.

Sa isang video na ipinost ng 32 years old na si Maggie Smith, ikinuwento niya ang itinuturing niyang “shortest date ever” sa lalaking nakilala niya sa isang dating app nang mag-decide sila na magkita sa isang restaurant.

Nagtagpo ang dalawa sa labas ng kainan at binati pa raw si Maggie ng lalaki ng isang yakap at tinanong kung siya ay nagugutom na ba.

Hindi pa nagtatagal sa loob ng restaurant ay biglang nagyaya ang lalaki na lumabas para makapag-usap silang dalawa.

Pagkatapos noon, bigla na lamang humingi ng sorry ang lalaki at sinabing “I’m not feeling it” bago ito umalis.

Matapos nito ay walang nagawa si Maggie kundi ang bumalik sa kaniyang sasakyan at umuwi na lang.

Para sa babae, 45 seconds lang ang tinagal ng nasabing date na inakala niyang magiging maganda ang takbo kaya nag-effort pa siya na mag-ayos para rito.

Ang duda ni Maggie, ang kaniyang pagiging malusog ang dahil kung bakit nag-backout ang lalaki.

Bilang resulta ng pangyayari, napagtanto raw ni Maggie na nagbago na ang panahon ngayon at mas mabilis nang manghusga ang mga tao.

Marami naman sa comment section ng video ang nagpaabot ng simpatya para sa babae, ngunit mayroon ding pinagbintangan siya ng catfishing o iba ang ipinakitang hitsura sa lalaki sa personal niyang hitsura o sa madaling salita, pagnanakaw ng identity ng ibang tao, na agad namang pinabulaanan ni maggie sa pamamagitan ng pag-upload ng kaniyang dating profile.

Samantala, binura na raw ni Maggie ang dating apps sa kaniyang cellphone dahil hindi ito nakabubuti sa kaniyang mental health. Willing pa rin naman daw siyang makipag-date ngunit mas prefer niya raw na makilala ito sa personal at hindi na sa pamamagitan ng online.

Ikaw, ano ang gagawin mo kung ikaw ang mapunta sa ganiyang posisyon?

Kung anong pag-aalala ng cat owner na si Carrie nang madiskubreng nawawala ang kaniyang alaga, ay siya ring gulat niya nang malaman na nakarating pala ito sa isang lugar na milya-milya ang layo sa kanila.

Kung paano ito nangyari, alamin.

April ngayong 2024 nang bigla na lang mawala ang anim na taong gulang na alagang pusa ni Carrie Clark na si Galena na may breed na American shorthair.

Kung kaya naman nagpaskil si Carrie sa kanilang lugar sa Lehi, Salt Lake City, Utah, USA ng “missing cat” posters upang mapadali ang paghahanap dito.

Makalipas ang ilang araw, bigla na lamang may veterinarian mula sa Riverside, California na tumawag kay Carrie at nagsabing nakita nito si Galena.

Noong una ay inakala pa ni Carrie na prank call lamang ito dahil paano nga naman makakarating ang pusa sa California samantalang 500 miles ang layo nito mula sa kanilang tirahan.

Ngunit, nagsasabi pala ng totoo ang caller at ang dahilan kung bakit niya natagpuan si Galena ay dahil pumasok pala ito sa isang 3-by-3 foot cardboard Amazon returns package na may laman na limang pares ng boots at napasama sa warehouse sa California.

Hindi nagsayang ng oras si Carrie at ang kaniyang asawa at agad na nagtungo sa California upang kunin si Galena sa clinic ng veterinarian na tumawag sa kaniya.

Nang alalahanin naman ni Carrie kung paanong napasama ang pusa sa package, naisip niya na baka pumasok ito habang nagpa-pack ang kaniyang asawa at siya naman ay kumuha ng tape para selyuhan ito.

Gayunpaman, sa tulong ng Amazon employee na si Brandy Hunter ay nadala sa veterinary si Galena, habang ang veterinarian naman ay nadiskubre kung sino ang owner nito dahil sa nakasabit na microchip sa pusa.

Pinaalalahanan naman ni Carrie ang ibang pet owners na lagyan din ng microchip ang kanilang mga alaga upang madali itong mahanap kung sakaling ito ay mawala.

Ikaw, anong masasabi mo sa kakaibang adventure na ito ng pusa na si Galena?

Madalas na nakakalimutan ng mga karakter sa pelikula ang kanilang love interest matapos magkaroon ng amnesia, pero, ibahin niyo ang mala-teleserye na love story na ito ng isang couple mula sa Utah, USA na nagkabalikan pa kahit nagkaroon ng amnesia ang lalaki!

Ang buong kwento, alamin.

Sa isang TikTok video, ikinuwento ni Jenna Brotherson ang kakaibang love story nila ng kaniya na ngayong asawa na si Mitchell Brotherson.

February 2020 nang makipaghiwalay si Jenna kay Mitchell dahil masyado raw siyang na-overwhelm sa mga nangyayari sa kaniyang buhay noong panahon na iyon.

Kinabukasan matapos ang kanilang breakup, nagkaroon naman ng ski accident si Mitchell sa Beaver Mountain sa Utah, kung saan ay ang ulo nito ang talagang naapektuhan ng magtamo ito  ng severe concussion.

Sa lakas ng impact ng pagkakabagsak ni Mitchell, imbis na makalimutan si Jenna ay kabaligtaran pa ang nangyari dahil hindi niya naaalala na naghiwalay sila nito bago siya maaksidente.

Nagtaka raw si Jenna kung bakit patuloy pa rin siyang mini-message ng lalaki samantalang hiwalay na sila. Inakala pa raw niya na baka raw masyadong sineryoso ni Mitchell ang sinabi niya na mananatili pa rin silang magkaibigan.

Aniya pa, pinagsisihan niya ang pakikipaghiwalay kay Mitchell dahil sobrang thoughtful at kind nito at tinutulungan pa siya sa tuwing siya ay may kinakaharap na problema.

Pinag-isipang mabuti ni Jenna ang kanilang break-up pagkalipas ng isang buwan at nang kausapin si Mitchell para yayain na makipagbalikan ay doon na napagtanto ng babae na wala palang ideya ang lalaki na sila ay hiwalay na!

Gayunpaman, apat na taon na silang nagsasama ngayon matapos mag-propose ni Mitchell noong August 2020 at ilang linggo lang ang nakalipas ay nagpakasal din pagdating ng September 4.

Tila tinodo ng isang Indian man ang pag-e-effort para sa kaniyang girlfriend dahil talagang iniba niya pa ang kaniyang itsura upang makapag-take ng exam para sa minamahal.

Kung ano ang buong kwento, alamin.

Sa ginanap na recruitment examination sa isang Punjab university, pumunta ang lalaki na si Angrez Singh na naka-all out female outfit at sinamahan pa ng bangles, bindi, at makeup para magpanggap bilang kaniyang girlfriend na si Paramjit Kaur.

Upang masagutan ang examination para sa babae at para makapasok sa exam hall, nagdala ng mga pekeng dokumento si Singh kabilang na ang voters at Aadhar cards na nakapangalan kay Kaur.

Ngunit, nabuking din ang lalaki nang hindi mag-match sa biometric device ang kaniyang fingerprint sa tunay na nagmamay-ari ng pangalan na kaniyang ginamit.

Doon na tuluyang nasira ang pagpapanggap ni Singh bilang babae at inireklamo siya ng mga opisyal ng unibersidad na nagsagawa ng exam para sa health workers.

Sa huli ay inaresto ang lalaki at ang application naman ng tunay na Paramjit Kaur ay na-invalidate na lamang.

Inimbestigahan naman ng mga otoridad kung parte ng isang malaking network si Singh, lalo pa at iminumungkahi ng mga ginamit niyang pekeng dokumento na hindi siya nag-iisa at mayroong katulong.

Kadalasan, sa pagkabata pa lang ay buo na sa imahinasyon ng mga babae ang magiging selebrasyon ng kanilang kasal. Pero ang pangarap na mala-fairytale na wedding ng isang bride sa Oregon, USA, hindi natupad dahil sa pang-iindian ng mga bisita.

Kung ano ang buong kwento, alamin.

Sa isang viral na video sa social media, in-upload ng bride na si Kalina, makikita ang pagbukas ng pinto ng isang events place na nilagyan ng decorations at naggagandahang mga ilaw na nagbigay ng kakaiba at romantic na ambiance rito.

Sa pagpapatuloy nito, naglakad ang bride at groom kasama ang kanilang anak patungo sa unahang bahagi ng venue na talaga nga namang napakaintimate at sincere na tagpo.

Ngunit, sa simula pa lang ng video ay kapansin-pansin na agad na halos walang mga bisita na dumalo!

Ayon sa caption nito, sa 75 katao na pinadalhan niya ng digital invitations, lima lang ang dumating sa araw ng kanilang kasal.

Nakasaad daw sa invitation na magsisimula ang selebrasyon, ala una ng hapon. At pagkalipas naman ng labinlimang minuto ay nakatanggap siya ng message mula sa kaniyang ina na walang tao sa venue.

At sa kasamaang palad, nang dumating sila ng kaniyang groom pagpatak ng alas dos ng hapon ay limang tao lamang ang inabutan nila.

Dagdag niya pa na nasayang ang mga nakahandang pagkain, at ang mga mesa at upuan naman ay nanatili lamang bakante. Dahil dito, napilitan sila na i-adjust na lang ang program.

Naging masaya pa rin naman ang bagong kasal kahit na masalimuot ang naging outcome ng selebrasyon nito. Ngunit, hindi naiwasang mapaisip si Kalina kung bakit hindi sumipot ang mga bisita.

Nakadagdag pa raw sa sama ng loob niya na ang iba sa mga kaibigan niya ay hindi man lang siya minessage para batiin o sabihin man lang kung bakit hindi sila nakarating.

Gayunpaman, marami naman ang nagpaabot ng pakikisimpatya sa comment section ng video na siya namang pinasalamatan ng bride dahil nakatulong daw ang mga ito para maka-get over sa nangyari.

Ikaw, ano ang gagawin mo kung sa’yo mangyari ito?

Sa probinsya ng Buriram sa Thailand, isang nanay ang gumawa ng kakaibang paraan para proteksyunan ang sarili at mga kapitbahay mula sa sarili niyang anak.

Kung ano ang buong kwento, alamin.

Isang 64-anyos na nanay ang mahigit 20 taon nang namumuhay sa takot dahil sa kaniyang anak na adik sa droga at sa sugal.

Kamakailan ay nagpagawa siya ng kulungan sa loob ng kanilang bahay upang doon panatilihin ang kaniyang 42-anyos na anak dahil sa pagiging bayolente nito.

Naniniwala ang nanay na sa ganoong paraan ay mapoprotektahana siya at ang kanilang mga kapitbahay.

Sinabi ng nanay sa mga otoridad na sa ilang taon na nakalipas ay dinala na niya sa mahigit sampung iba’t-ibang rehabilitation center ang kaniyang anak ngunit mas naging bayolente lamang daw ito at nag-develop pa ng gambling addiction.

Sa isang pahayag, sinabi ng nanay na silang mag-ina na lang ang magkasama simula nang mamatay ang kaniyang asawa at isa sa mga rason nito ay ang depresyon at stress sa kanilang anak.

At nitong Oktubre lang ay tumawag siya ng mga pulis dahil out of control na ang kaniyang anak. Dinala pa ito sa ospital ngunit sigurado siya na babalik din ito kung kaya naman nagpagawa na siya ng jail cell.

Kumpleto naman daw ang mga pangangailangan ng anak katulad ng kama, banyo, at Wi-Fi. Mayroon din itong maliit na butas ang pagkain at inumin nito. Nag-install na rin siya ng CCTV para buong araw niyang ma-monitor ang behavior nito.

Hindi tukoy kung paano nalaman ng mga pulis ang sitwasyon nila ngunit, sinabi ng spokesperson na ang ginawa raw ng nanay ay lumalabag sa Article 310 ng Criminal Code na patungkol sa unlawful detention resulting in death or serious injury at may karampatang parusa na pagkakakulong ng tatlo hanggang labinlimang taon.

Samantala, pinangakuan ng mga pulis ang ginang na hahanapan ng solusyon ang kaniyang problema kung kaya naman pinatanggal na ang jail cell sa loob ng bahay.