EXPLAINERS

Kadalasan, humihingi ng tulong ang mga tumatawag sa mga emergency hotlines, ngunit ibahin n’yo ang isang bata sa New Zealand na tumawag sa emergency line upang imbitahan ang mga pulis sa kaniyang birthday party.

Kung ano ang buong kwento, alamin.

Isang bata sa New Zealand na nagngangalang Zachary ang tumawag sa emergency hotline, hindi para magreport ng emergency o krimen, kundi para imbitahan ang mga pulis na um-attend sa kaniyang police-themed 5^th birthday party!

Upang masigurong maayos ang lahat, tumawag ang operator ng emergency line sa bahay ng bata kung saan ang nakasagot dito ay ang nanay mismo na si Sarah. Nang malaman ni Sarah ang ginawa ng anak ay nag-sorry ito sa mga otoridad dahil hindi niya raw alam ang ginawa ng kaniyang anak.

Kaugnay nito, hindi naman nangako ang dispatcher na makakapunta sila ngunit ipinaalam pa rin nito sa kaniyang mga kasamahan ang nasabing imbitasyon.

Sa mismong kaarawan ni Zachary, bigla na lamang dumating ang mga pulis at hinahanap ang celebrant.

Nagtawanan ang mga bisita nang tumanggi si Zachary sa alok ng pulis na makipag-usap dito. Pero nang abutan siya nito ng stuffed toy na may suot na police jacket ay inimbita niya ang mga pulis na pumasok sa kanilang bahay.

Matapos noon ay niyaya ng mga pulis ang mga bata na tingnan ang kanilang gears at pinahintulutan pa ang mga ito na sumakay sa kanilang police car.

Kasama ang mga pulis nang kantahan ng happy birthday song si Zachary at pinost pa ng Auckland City District Police sa kanilang social media page ang dinaluhan na birthday party.

Naging masaya ang mga dumalo na pulis sa paghahatid ng saya, gayunpaman, sinabi ng mga ito na mas mabuti kung handwritten invitations ang gagamitin sa susunod at hindi na ang emergency hotlines.

Ikaw, anong masasabi mo sa nakatutuwang kwento na ito?

Mayroong iba’t ibang klase ng hobbies na ginagawa at nade-develop ang mga tao depende sa kanilang trip o hilig. Pero ang isang lalaki sa Japan, mayroong hindi pangkaraniwang libangan at yan ay ang panghihimasok sa property ng ibang tao!

Kung bakit ito ginawa ng lalaki, alamin.

Kamakailan ay inaresto ng Fukuoka Prefectural Police ang isang trenta’y siyete anyos na lalaki sa siyudad ng Daizafu sa Japan na kinilalang si Yuta Sugawara dahil sa paghihinala na nanghimasok ito sa property ng isang magkasintahan.

Sa pinakahuli nitong pagtatangka, ang may-ari mismo ng bahay ang nakahuli kay Yuta habang nasa loob ng bakuran ng mga ito. Hinabol at napigilan ng lalaki si yuta sa pagtatangka nito na tumakas, habang ang kaniya namang asawa ang tumawag sa mga pulis.

Nang imbestigahan ito ay inamin ni Yuta na pumapasok siya sa property ng mga pribadong tahanan nang walang paalam. Sinabi pa nito na nakakawala raw ng stress ang kapag naiisip niya kung malalaman ba ng may-ari o hindi ang kaniyang pag-tresspass.

Kaswal na inamin mismo ni yuta sa mga imbestigador na ang nangyaring insidente ay hindi na bago sa kaniya dahil umabot na sa isang libong beses ang panghihimasok niya sa property ng ibang tao at ito raw ay kaniyang hobby.

Samantala, tinitingnan din ng mga otoridad kung si Yuta ba ay mayroong kinalaman sa iba pang naganap na krimen sa nasabing lugar.

Ikaw, anong masasabi mo sa pambihirang libangan ng lalaki na ito?

Sa tuwing sasapit ang pasko, pinag-iisipang mabuti ng mga tao kung ano ang magiging motif o theme ng kanilang Christmas tree at iba pang decorations sa bawat taon.

Pero ang bahay ng pamilya Jeromin sa Germany, nag-ala Christmas village dahil sa samu’t-sari at pambihirang bilang ng decorations sa loob nito!

Kung ilan ang kanilang Christmas decors, alamin.

Isang pamilya sa Germany ang mayroong kakaibang Christmas decoration display dahil ang bahay nila ay hindi katulad ng tipikal na bahay na makikita tuwing pasko, dahil ang pamilya Jeromin, mayroon lang namang 605 Christmas trees na naka-display sa loob ng kanilang bahay!

Sa isang video, makikita na mula sa pintuan ng bahay ay kapansin-pansin na ang sunud-sunod na nakahilerang mga Christmas tree na mayroong iba’t ibang motif.

Samu’t-sari ang mga kulay na makikita sa bawat sulok ng bahay at tila isa nang discohan dahil sa makulay na christmas lights na nagkikislapan.

Sa dami ng christmas tree sa loob ng kanilang bahay, umabot sa 120,000 ang ornaments na ginamit upang ma-dekorasyunan ang mga ito.

Bukod pa riyan, 50,000 ang inabot ng bilang ng Christmas ligths na nakapalibot sa mga puno, at libo-libo naman ang mga figurines na nakasabit.

Dahil dito, hawak ng pamilya Jeromin ang world record na “Most Decorated Trees in One Place” simula 2017 hanggang 2021 pati na rin noong 2023.

Ikaw, anong masasabi mo sa pambihirang kwento na ito?

Isang litrato ng pamilya ang kumalat sa social media at nakatanggap ng batikos at samu’t-saring komento dahil daw hindi kamukha ng mga bata ang kanilang mga magulang?

Kung ano ang buong kwento, alamin.

Taong 2012 nang mag-viral ang picture ng isang pamilya sa social media kung saan ay makikita na hindi maipagkakailang hindi kamukha ng mga bata ang kanilang mga magulang.

Dahil sa pagkalat ng litrato na mayroong caption na “The only thing you’ll ever have to worry about is how to explain it to the kids,” ay ginawan ito ng mga tao ng kuwento na ang nanay sa litrato ay retokada.

Ngunit, ang totoo pala ay isa lamang itong advertisement para sa isang cosmetic clinic. Pero binigyang permiso ng ad agency na gumawa nito ang ibang plastic surgery clinic na gamitin din ang litrato.

Matapos nito ay iniugnay ang nasabing picture sa isang lumang kuwento na kung saan ay idinemanda ng lalaki ang kaniyang asawa matapos niyang madismaya sa itsura ng kanilang baby, at umamin din ang babae na siya raw ay nagparetoke para gumanda.

Taong 2015 naman nang magsalita ang gumanap na nanay sa viral family picture na si Heidi Yeh na isang modelo. Sinabi niya na hindi niya raw akalain na kakalat ang picture at magkakaroon pa ng mga gawa-gawang kwento. Isiniwalat niya rin dito na edited ang mukha ng tatlong bata.

Matindi raw ang naging epekto ng fake news na iyon sa career ni Heidi at maliliit na roles na lamang daw ang nakuha niya sa mga advertisement dahil dito at hindi raw siya pinaniwalaan ng mga tao na hindi siya retokada.

Nagkaroon pa noon ng banta si Heidi at ang ad agency na magsasampa ng kaso sa isa’t isa.

Makalipas ang ilang taon simula ng kontrobersiya, nag-iba ang buhay ni Heidi. Naging office worker siya kung saan kinuha siyang modelo ng mga inilabas nitong posters, at ngayon ay isa na siyang ganap na nanay.

Ikaw, magpapadala ka rin ba sa mga kuwentong nakikita mo sa social media?

Nakasanayan na natin na mga inumin at mga pagkaing kutkutin ang nakikita at nabibili natin sa mga vending machines na nakakalat kung saan-saan, kung kaya naman aakalain mo ba na magkakaroon ng vending machine na kung saan ay mga pabango ang babayaran mo?

Kung saan ito nagsimula, alamin.

Kung nagmamadali ka at nakalimutan mong magpabango o di naman kaya ay gusto mong makasubok ng iba’t-ibang brands ng perfume nang hindi gumagastos ng malaking halaga, may sagot diyan ang kumakalat ngayon sa social media na kakaibang klase ng vending machine na kung saan ay iba’t-ibang klase ng perfume ang binabayaran at hindi pagkain.

Mayroong klase ng perfume vending machines na sa isang pindot lang sa button matapos mong magbayad ay maii-spray-an ka na ng pabangong napili mo. Pero mayroon din namang tipikal na vending machine na nakasanayan natin na kung saan ay makukuha mo ang mismong perfume na nakabote.

Ngunit, ang perfume vending machines  na ito ay nauso na pala noon pang 1950s sa U.S.A sa brand na “Parfumatic” at naging trending na lamang ulit kamakailan.

Hindi naman maipagkakaila na tamang-tama lang ang pagbabalik ng machines na ito lalo na at mabilis na lamang ang takbo ng panahon ngayon, marami nang tao ang laging on-the-go at prayoridad ang kanilang convenience.

Sa kasalukuyan, mayroon na ring brand sa Dubai na “The Smart Vendor” na nag-didistribute ng smart vending machines na ang nilalaman naman ay mga pabango at makeup.

Makikita naman sa social media kung gaano tinanggap ng mga tao ang muling pagbabalik ng perfume vending machines dahil marami ang nagtatanong tungkol sa presyo nito at nagnanais na madala ito sa kani-kanilang mga bansa.

Ikaw, tatangkilikin mo rin ba ang perfume vending machines kung mayroon nito sa Pilipinas?

Madalas na nagha-hiking ang mga tao dahil itinuturing nila itong exercise, nakatutulong sa mental health, at mayroong sense of accomplishment dahil sa ganda ng view na makikita sa tuktok ng bundok. Ngunit, ang isang bundok sa China nilagyan ng escalator!

Kung bakit, alamin.

Mayroong bundok na tinatawag na Tanyu mountain sa probinsya ng Zhejiang sa China na mayroong taas na 350 meters na mayroong tatlong bundok sa paligid na kinakailangan upang marating ang tuktok.

Dahil dito, naging mas mahirap para sa mga matatanda at mga bata na marating ang summit. Pero maniwala man kayo o hindi, posible at madali na para sa lahat na marating ang peak ng bundok nang walang kapagud-pagod dahil mayroon na itong… escalator.

Ayon naman sa isang trabahador na tumulong sa pag-install ng escalator, ang orihinal daw na dahilan ng paglalagay nito sa bundok ay upang maresolba ang trapiko sa pag-akyat dito.

Mayroon itong ticket na nagkakahalaga ng 30 Yuan o 4 U.S. Dollars at bumaba rin ang 50 minute travel time nito sa sampung minuto.

Ayon pa sa trabahador, kinunsidera rin daw nila ang pagkakabit ng cableway ngunit mas ligtas at mas mataas ang kapasidad ng escalator kumpara rito, at isa pa ay mas matatanaw at mararamdaman ng mga turista ang magandang view mula roon.

Gayunpaman, kahit na maituturing itong convenience para sa ilang mga turista, sa paningin ng mga hiking enthusiasts tinatanggal nito ang tunay na purpose ng hiking.

Ikaw, anong masasabi mo sa kakaibang inobasyon na ito na makikita sa isang bundok?

Kamakailan ay nauso ang food delivery services na talaga nga namang nagbibigay ng convenience sa maraming tao. Tulad na lamang sa Saudi na mas napadali pa ang pagdi-deliver ng mga pagkain dahil gumagamit na rin sila ng… jetpack?

Kung ano ang buong kwento, alamin.

Nag-viral sa social media ang video ng isang lalaki na makikitang lumilipad sa ere, nakasuot ng safety gears, at may hawak na kahon.

Sa unang tingin ay iisipin mo na baka isa lamang itong eksperimento ng panibagong innovation, pero alam mo ba na ang lalaking ito ay isa palang delivery man?

Sa caption ng video, nakasaad dito na nakuhanan ang video sa Saudi Arabia at ito ang pinakaunang flying man na nagdi-deliver ng pagkain sa nasabing bansa.

Makikita na lumipad ang lalaki mula sa isang building papunta sa katapat nitong establishment at lumapag sa isang balcony kung saan mayroong tao na tila naghihintay na sa pagdating nito.

Nakatutuwa mang tignan dahil mas mapapabilis ang paghahatid ng pagkain sapagkat hindi na kinakailangan pa ng delivery man na dumaan sa mga ma-traffic na kalsada, mayroon namang kumuwestyon kung magkano ang magiging delivery fee dahil baka raw mas mahal pa ito kumpara sa biniling pagkain.

Mayroon ding nagsabi na peke at edited ang video, at hanggang ngayon ay hindi pa rin tiyak ang katotohanan nito at kung talaga bang ginagamit na ang naturang services sa Saudi Arabia.

Natural sa isang magkasintahan na lubos na paghandaan ang kanilang kasal dahil isa nga naman itong malaking milestone sa kani-kanilang mga buhay. Kaya naman kahit ang pagdating ng bagyong Pepito sa mismong araw ng kasal nila Reychelle at Raegan Gatuz ay hindi sila napigilan.

Kung ano ang buong kwento, alamin.

Nitong nakaraang buwan ay isa si bagyong Pepito sa mga sunud-sunod na bagyong humagupit sa maraming probinsya, at sa pambihirang pagkakataon ay natapat pa ang pagtapak nito sa Aurora sa kaparehong araw ng kasal nila Reychelle at Raegan.

Sa isang interview, ibinahagi ng groom na si Raegan na nangamba raw sila na baka hindi makarating ang mga bisita dahil sa banta ng bagyo at baka ang kani-kanilang mga pamilya na lamang ang dumating.

Pero hindi naman binigo ng mga imbitadong bisita sina Raegan at Reychelle dahil kahit gaano pa kasungit ang panahon ay dumalo pa rin ang mga ito sa selebrasyon ng kanilang pag-iibigan.

Sinabi rin ni Reychelle na dream niya raw simula pagkabata ang magkaroon ng beach wedding na siya namang natupad dahil ginanap ang kanilang kasal sa isang beach sa Dipaculao sa Aurora.

Pero ang dream wedding na ito ay binagyo ni Pepito. Sa isang video, makikita na umagos ang tubig dagat dahil sa malakas na alon dulot ng bagyo papunta sa bride at groom na nakaupo sa harap ng make-shift na altar.

Gayunpaman, hindi raw alintana ni Reychelle ang paghampas ng malalaking alon dahil si Raegan lang daw ang nakikita niya nang mga oras na iyon.

Walong taon nang magkarelasyon ang dalawa bago nagdesisyon na magpakasal, at sa haba nito, maski ang bagyo ay hindi sila natinag.

Ikaw, anong masasabi mo sa nakakaantig na kwentong pag-ibig na ito?

Isang pasyente na inooperahan sa mata ang sa halip na gumaling ay nauwi sa pagkabulag dahil sa panununtok sa kaniya ng doktor sa kalagitnaan ng operasyon.

Kung bakit ito ginawa ng doktor, alamin.

Isang kontrobersyal na video ng operasyon na nakunan sa isang ospital sa China noong 2019 ang muling naungkat matapos mag-viral online.

Kung titingnan ay tila isang normal na medical procedure lamang ang isinasagawa rito, ngunit makikita na bigla na lamang pinagsusuntok ng doktor sa ulo ang kaniyang otsenta’y dos anyos na babaeng pasyente.

Nang dumaing ang pasyente ay mabilis na nagsilapitan sa kaniya ang iba pang staff na nasa loob din ng operating room.

Dahil sa hindi matagumpay na operasyon, nagsampa ng reklamo ang pasyente, kung saan nabulag din ang kaliwang mata nito.

Sinabi naman ng doktor sa isinagawang imbestigasyon ng ospital na hindi raw tumalab ang inilagay niyang anaesthesia at naging magalaw din daw ang ulo at mata ng matanda. Bukod pa riyan, hindi rin daw fluent ang pasyente sa Mandarin kung kaya’t hindi sila nagkaintindihan nito.

Agad namang humingi ng tawad ang ospital sa pamilya ng pasyente at aminado rin sila na hindi tama ang ginawa ng doktor.

Matapos nito, nagpaabot ang ospital ng 500 yuan o halos apat na libong piso sa pamilya ng pasyente.

Samantala, hindi na natukoy kung sino ang naglabas ng lumang video kung saan agad na sinuspinde ang CEO ng ospital at ang nasabing doktor na isa na palang hospital director.

Ikaw, anong masasabi mo sa inasal ng nasabing doktor?

Kadalasang nakikita sa mga museum o itinatabi para gawing koleksyon ang mga makasaysayang kagamitan ng mga taong mayroong malaking kontribusyon sa ating nakaraan. Ngunit, kamakailan lang ay ipinagbili ng pamilya ni Rizal ang isa sa kaniyang mga obra.

Ang buong kwento, alamin.

Sa isinagawang auction kamakailan sa Leon Gallery sa Makati, kabilang sa mga ibinentang kagamitan at art pieces na may kaugnayan sa mga Filipino hero ay ang “Josephine Sleeping.”

Ito ay ang pigura ng natutulog na nakarelasyon ni Jose Rizal na si Josephine Bracken na kaniyang iniukit habang nakakulong siya sa Dapitan.

Sinabi ng direktor ng Leon Gallery na si Jaime Ponce de Leon na bukod sa pagiging representasyon ng nasabing sculpture ng huling pag-ibig ng pambansang bayani, isa rin daw itong obra na kaniyang ginawa dahil sa pagmamahal.

Ang “Josephine Sleeping” daw na pinakahuling nilikha ni Jose Rizal bago ito pumanaw ay ipinabenta ng mga apo ng kapatid ng bayani na si Narcisa Rizal at mayroong initial bidding price na 5 million Pesos.

Bukod pa riyan, kabilang din sa mga art pieces na isinama sa auction ay ang obra ng national artist na si Guillermo Tolentino na “Bonifacio Bust,” pati ang nasabing huling seal na ginamit daw ng Katipunan sa mga importanteng dokumento na mayroon namang 1.5 million Pesos na initial bidding price.

Ikaw, anong masasabi mo sa makasaysayang kwento na ito?