EXPLAINERS

Isa na namang kaso ng animal cruelty ang naitala sa Davao del Norte kung saan inihagis ng isang miyembro ng LGBT ang isang pusa.

Kung ano ang buong kwento, alamin.

Sa isang nag-viral na video sa social media, makikita na pinaglalaruan ng nasabing gay ang isang pusa at hinawakan na para bang isa itong baril.

Hindi pa riyan nagtatapos ang kalupitan na ginawa ng miyembro ng LGBT sa pusa dahil inihagis pa ito sa semento matapos paglaruan.

Hindi naman nakaligtas sa animal advocates ang pang-aabuso na naranasan ng pusa sa taong nasa likod ng video at agad na ipinanawagan ng Bantay-Hayop Davao na ipaalam sa kanila kung saan maaaring matagpuan ang nasabing cat abuser.

Samantala, humingi ng tawad ang abuser sa pamamagitan ng pagpopost ng isang video sa social media at doon inamin na sila ay nakainom ng alak kung kaya nila ito nagawa at inakala pa na ang ginawa nilang panti-trip sa pusa ay nakakatuwa.

Gayunpaman, nailigtas na ang pusa at base sa resulta ng exam na isinagawa ng doktor ay wala itong tinamong sugat o injury.

Tinitingnan naman ng animal welfare agency kung ano ang susunod na hakbang at legal na parusa na maaaring ipataw sa nanakit sa pusa.

Ikaw, ano ang gagawin mo kung ikaw ang makasaksi sa ganitong klase ng insidente?

Binulaga ng isang magandang balita ang fast food crew na si Lyka Jane Nagal habang naka-duty sa kaniyang trabaho na isa na siyang ganap na teacher matapos makapasa sa licensure exam.

Kung ano ang buong kwento, alamin.

Sa isang viral video na umani na ng 1.6 million views, mahigit 200 thousand likes, at lagpas isang libong comments, makikita ang mga service crew ng isang fast food chain na nagkukumpulan habang mayroong tinitignan sa isang cellphone.

Maya-maya ay bigla na lamang nagtatalon at nagsisigaw sa tuwa ang babae na kinilalang si Lyka at masayang sinabi na, “Ma, board passer na ako” na siya namang sinundan ng malakas na palakpakan ng kaniyang mga katrabaho.

Si Lyka ay kabilang sa listahan ng mga takers ng Licensure Examination for Professional Teachers o LET o LEPT na inilabas kamakailan ng Professional Regulation Commission o PRC na matagumpay na naipasa ang nasabing exam.

Sa pagpapatuloy ng video, hindi nagtagal ay makikita si Lyka na napaupo sa isang tabi at tuluyang naging emosyonal dahil sa achievement na kaniyang nadiskubre habang nasa kalagitnaan ng trabaho.

Matapos ang maiksing pagdiriwang ay mabilis ding bumalik sa trabaho si Lyka at ang kaniyang mga kasamahan. Agad din namang ipinaalam ng board passer sa kaniyang pamilya ang napakagandang balita na nagbunga na ang kani-kanilang mga pagsisikap at sakripisyo.

Ikaw, anong masasabi mo sa nakakaantig na kwento na ito?

Sa panahon ngayon, hindi na bago sa paningin natin ang pagkahilig ng mga kabataan sa mga online o computer games. Ngunit ang mga kalalakihan na ito, ibang klase ang dedikasyon sa paglalaro dahil maski ang bagyo at baha ay hindi sila napigilan!

Ang buong kwento, alamin.

Nag-trending sa social media ang video ng mga kalalkihan sa isang bayan sa Cainta, Rizal na naglalaro sa isang computer shop habang kapansin-pansin ang maruming tubig-baha na umabot na hanggang hita.

Makikita na hindi alintana ng mga gamer ang baha na kung saan ay mayroon pang lumulutang na mga basura, at kaswal na nakaupo habang nakataas pa ang mga paa sa kaniya-kaniya nilang mga upuan at focused pa rin sa kanilang mga monitor.

Ayon sa may-ari ng computer shop na si Sio Samson na isa palang computer engineer, hindi raw nila inasahan ang pagtaas ng baha noong araw na iyon.

Dahil dito, agad niyang inilipat ang mga computer sa mas mataas na pwesto dahil batid niya ang dala nitong panganib kung sakaling mabasa ng tubig.

Bukod pa riyan, pinatay din ng may-ari ang mga computer upang maiwasan ang ano pa mang trahedya na maaari nitong idulot.

Pero, ang computer shop naman ni Samson ay handa pala sa palagiang pagbaha kung kaya naman nakalagay ang mga kable at saksakan ng kuryente sa matataas na lugar.

Gayunpaman, ikinatuwa ng ilan ang hindi pagpapatalo ng mga gamer na ito, pinuna naman ng iba ang peligro ng pagkakakuryente.

Ikaw, ganito ka rin ba kaadik sa computer games?

Sa ilang lugar sa Pangasinan, ipinagbabawal ang pakikipagchismisan at pagpapakalat ng maling balita!

Kung ano ang parusa sa mga lalabag, alamin.

Sa isang barangay sa bayan ng Binalonan sa Pangasinan, hindi pupwede ang pagchichismisan at pagkakalat ng fake news dahil kapag nahuli ang sinuman na nilabag ang patakaran na ito, mayroong karampatang parusa na kakaharapin!

Ayon sa pahayag ng dating barangay captain ng Capas sa Binalonan, pangasinan na si Danilo Tabucol Sr., ang bagong ordinansa na ito ay nakatulong sa pagpapanatili ng kaayusan sa kanilang komunidad.

Ang nasabing ordinansa ay ipinatupad daw upang pigilan ang nakasanayan ng mga tao na pagpapakalat ng tsismis na nakasisira sa reputasyon ng isang tao.

Ang mga lalabag dito sa unang pagkakataon ay aatasan na magsagawa ng community service at magbabayad ng multa na tatlongdaang piso, limangdaang piso naman para sa second offense, at isang libong piso naman para sa third offense.

Marami raw ang pumuna sa ipinatupad na ordinansa ngunit para sa dating kapitan, ang layunin naman nito ay para sa ikabubuti ng mga residente.

Dahil sa magandang epekto nito sa capas, ipinatupad na rin ang anti-chismis ordinance sa iba pang barangay sa binalonan.

Ikaw, pabor ba sa’yo na magkaroon ng ganitong klaseng ordinansa sa inyong barangay?

Isa na namang kaso ng walang muwang na bata ang inabandona na kasalukuyang kumakalat sa social media.

Kung ano ang kwento, alamin.

Kamakailan ay natagpuan ng mga residente ng barangay San Miguel, Tagum City ang isang bagong silang na babaeng sanggol.

Nakakabit pa ang umbilical cord ng nasabing sanggol, palatandaan na bagong silang ito at natagpuan sa damuhan sa isang bakanteng lote.

Sa video, maririnig kung paano pinagkaguluhan ng mga residente ang natagpuang sanggol sa kalagitnaan ng damuhan at makikita na wala itong saplot bukod sa isang maliit na tela na hinihigaan nito.

Isang babae ang lumapit sa sanggol ang mayroong hawak na kumot na siya namang ginamit nito upang ibalabal sa bata bago ito tuluyang buhatin.

Nang kargahin ng babae ang sanggol ay maririnig ang malakas na pag-iyak nito na siyang naging kompirmasyon na ligtas at buhay ang bata.

Kasalukuyang nasa pangangalaga ng City Social Welfare and Development Office ang sanggol at nasa maayos na kalagayan.

Iniimbestigahan naman ngayon ng pulisya kung sino ang nanay ng inabandunang sanggol.

Tila hango sa sikat na pelikulang “Hatchiko” ang buhay ng aso na si Milo dahil katulad ng bida rito, nahirapan din si Milo na ipagpatuloy ang kaniyang buhay matapos maulila sa kaniyang amo.

Kung ano ang buong kwento, alamin.

Sa isang sumikat na video sa social media, mapatutunayan na pati ang mga hayop ay mayroon ding pakiramdam katulad na lang ng aso na si Milo na bakas na bakas ang tamlay at lungkot sa mukha at mga mata.

Sa nasabing video na in-upload ni Rafael Zurbano, napag-alaman na yumao na pala ang amo ni Milo kung kaya tila balisa ito habang nagpapalabuy-laboy sa kalsada.

Dahil sa awa at kagustuhang masagip ang aso, nagmagandang-loob si Rafael na maghanap ng kukupkop kay Milo.

Ngunit ang paghahanap ng panibagong pamilya para kay Milo ay hindi raw naging madali dahil batid daw nila sa mga kilos nito na hindi nito kayang iwanan ang dating bahay kung saan dama pa rin nito ang presensya at alaala ng kaniyang dating amo.

Gayunpaman, ayon sa uploader, sa huli ay nahanapan din nila ng bagong kukupkop ang naulilang aso na si Milo na hanggang sa huli ay hindi basta-bastang iniwan at kinalimutan ang kaniyang amo.

Ikaw, sasagipin mo rin ba ang mga asong nasa kaparehong sitwasyon ni Milo?

Kadalasang nagpa-file ng leave ang isang empleyado sa tuwing mayroon itong sakit o kapag gustong magbakasyon o magpahinga, pero ang isang kumpanya sa China, binibigyang permiso ang mga empleyado nito na umabsent kapag nakakaramdam ng kalungkutan!

Kung ano ang buong kwento, alamin.

Sa ginanap na conference na tinatawag na China Supermarket Week ngayong taon, ibinalita ng founder at chairman ng retail company na Pang Dong Lai na si Yu Dong Lai sa kaniyang mga empleyado ang pagkakaroon ng bago at kakaibang klase ng “leave” sa kanilang kumpanya na tinatawag na unhappy leave.

Ang bawat empleyado ay mabibigyan ng sampung extra leave na mayroong kasamang benefits na maaari nilang gamitin sa tuwing hindi maganda ang kanilang mental at emotional state.

Binibigyan ng “unhappy leave” ng karapatan ang mga empleyado na huwag pumasok at magpahinga sa tuwing hindi sila masaya at para na rin ma-practice sa kumpanya ang work-life balance.

Ayon kay Yu Dong Lai, dapat hikayatin ng mga kumpanya ang kanilang mga empleyado na magpahinga dahil hindi lamang ito basta nakatutulong sa pag-boost ng kanilang morale, kundi pati na rin sa kanilang productivity.

Dagdag pa niya, ang hindi pagbibigay ng pahintulot sa mga empleyado na gamitin ang kanilang leave ay makukusiderang violation.

Ikaw, gusto mo rin bang magkaroon ng unhappy leave sa’yong pinagtatrabahuhan?

Isang dayuhang top executive ng isang automobile manufacturing company ang nasita matapos nitong magsuot ng uniporme ng Philippine National Police sa isang Christmas party.

Ano nga ba ang karampatang parusa sa kasalanan na ito?

Tara, alamin natin.

Isang dayuhan ang kasalukuyang iniimbestigahan ng Philippine National Police dahil sa pagsusuot nito ng unipormeng pang-pulis sa dinaluhang Christmas party.

Ang ginawa ng dayuhan ay isang halimbawa ng iligal na pagsusuot ng nasabing uniporme dahil hindi naman ito pulis kundi isa raw executive ng isang automobile manufacturing company.

Sinabi naman ni PNP Public Information Office Chief of Police Brigadier General Jean Fajardo sa isang press briefing na  iimbestigahan na kung saan at paano nakakuha ng unipormeng mayroong patch ng Special Action Force ang dayuhan.

Ayon naman sa mga nagbebenta ng mga uniporme sa labas ng Camp Crame, mahigpit sila pagdating sa pagbebenta ng kanilang mga produkto at nanghihingi pa ng I.D. upang kumpirmahin na isa nga itong pulis, lalo pa at mayroong mga nagtatangka na bumili ng uniporme upang gamitin pang-costume.

Nagbigay naman ng babala ang otoridad na ang iligal na pagsusuot at paggamit ng uniporme ng pulis at ng insignia ay mayroong karampatang parusa na Arresto Mayor na siyang nakasaad sa Article 197 ng Revised Penal Code.

Ikaw, anong masasabi mo sa kuwentong ito?

Isang lalaki sa Cagayan de Oro ang nagpa-home service ng hilot mula sa isa raw chiropractor noong November 18, ngunit sa halip na gumaling ay nabalian ito ng buto!

Ang buong kwento, alamin.

Sa isang video, makikita at maririnig ang malakas na pagtunog ng mga buto sa iba’t-ibang parte ng katawan ng lalaki na kinilalang si Leobert Yurong.

Sa unang bahagi ng video, makikita na tila normal pa ang takbo ng paghihilot ng umano’y chiropractor, hanggang sa bigla na lamang dumaing sa sakit si leobert matapos patunugin ang kaniyang buto sa tuhod.

Base sa x-ray results ni Leobert, makikita na nauwi ang paghihilot na iyon sa pagkabali ng kaniyang buto.

Dahil dito, kinailangan pang lagyan ng bakal ang kaniyang nabaling binti na kung saan ay inabot na ng mahigit 170,000 Pesos ang kaniyang nagastos.

Sinabi naman ng lisensyadong chiropractor at mister ng artistang si Patricia Javier na si Rob Walcher, na ang propesyon na iyon at ang pagsasagawa ng ganoong procedure ay hindi basta-basta at inaabot ng walong taon upang matutunan.

Kasalukuyang nagrerecover si Leobert mula sa kaniyang tinamong injury at may balak na magsampa ng kaso sa pekeng chiropractor na nagsagawa sa kaniya ng procedure.

Ang insidente na ito ay isang paalala na siguruhing kumunsulta sa mga lisensyadong doktor anuman ang kinahaharap na kasong medikal.

Ikaw, anong masasabi mo sa nakakatraumang pangyayari na ito?

Kamakailan ay naitala na ang pinakaunang beses na nakaranas ng snowfall ang disyerto ng Al-Nafud sa Saudi Arabia.

Kung paano ito nangyari, alamin.

Kilala ang Saudi Arabia sa mga naggagandahan at naglalawakan nitong mga disyerto na ang alam ng lahat ay mayroong mainit na temperatura.

Ngunit nito lamang Nobyembre a-tres ay naitala ang pambihirang pangyayari kung saan ang isang disyerto sa rehiyon ng Al-Jawf sa Saudi Arabia ay nakaranas ng pinakauna nitong snowfall.

Nag-trending sa social media ang mga litrato at video kung saan makikita ang paghahalo ng tipikal na kulay kayumangging disyerto at ng puting niyebe na nakapaibabaw rito.

Ayon sa United Arab Emirates National Center of Meteorology, ang low-pressure area mula sa Arabian Sea ang nagdulot ng hindi pangkaraniwang temperatura sa Al-Jawf na mayroong tipikal na temperatura na umaabot sa 55°c.

Nagresulta sa thunderstroms, pag-ulan ng yelo, at rainfall ang nakakapanibagong panahon na ito sa disyerto at maaring magdulot ng pagbaba ng visibility level nito at maantala ang pagbiyahe rito.

Ang pangyayaring ito ay isang patunay na ang mga disyerto ay nakararanas din ng ibang temperatura bukod sa init at isang halimbawa na nito ay ang Sahara desert ma magtatagpuan sa North Africa na makailang beses nang nagkaroon ng snowfall.

Ikaw, gugustuhin mo rin ba na magkaroon ng snow sa Pilipinas?