EXPLAINERS

Almost perfect moment na sana ang marriage proposal ng isang lalaki sa kaniyang nobya sa Disneyland sa City of Love, ngunit bigla na lamang umeksena ang isang staff bago pa man maisuot ang singsing sa babae.

Kung ano ang buong pangyayari, alamin.

Tila isang fairytale ang naging proposal ng isang lalaki sa kaniyang nobya sa Disneyland sa Paris, France.

Makikita ang magkasintahan sa isang platform at mayroon pang background na malaking castle habang nagsisigawan at nagpapalakpakan ang mga turista na nanonood nang bigla na lang lumuhod ang lalaki.

Bago pa man maisuot ng lalaki ang singsing sa kaniyang nobya ay bigla na lamang humahangos na lumapit ang isang lalaking staff at pumagitna sa magkasintahan.

Hindi lang yan, hinablot pa ng staff ang singsing mula sa lalaki bago pinababa ang magkasintahan ng hagdan.

Depensa ng lalaki ay pinayagan daw siya ng isang babaeng staff na gawin ang proposal sa platform, ngunit katwiran ng lalaking staff ay mas maganda raw kung sa baba ng platform gawin ang proposal.

Sa isang pahayag naman, sinabi ng German na lalaki na kinilalang si Ante na ikinalungkot nila ng kaniyang fiancee ang nangyari dahil nasira ang kanilang moment.

Dagdag pa ni ante na limang buwan niya raw pinagplanuhan ang kaniyang marriage proposal. Labis lang na nakapanghihinayang ang nasirang proposal lalo pa at mayroong malaking role na ginagampanan ang disney sa kanilang relasyon.

Samantala, humingi naman ng paumanhin ang Disneyland Paris at nag-offer pa sa magkasintahan ng libreng entry pass sa kanilang park at libreng stay sa mapipili nilang hotel ngunit tinanggihan ito ng magkasintahan.

Ayon kay ante, ayaw niya nang magpunta pa ulit sa disneyland at ang gusto lang daw niya ay ikalawang pagkakataon para ma-perfect na ang kaniyang proposal.

Ikaw, ano ang masasabi mo sa ginawang pag-eksena ng nasabing staff?

Isang maling post mula sa page ng Department of Environment and Natural Resources ang umani ng mahigit isandaang libong reactions at nakakaaliw na comments dahil sa napakarandom na picture na hindi inaasahan ng mga tao na makita sa kanilang official account.

Kung ano ang buong kwento, alamin.

Bago natapos ang 2024 ay isang kakatuwa at hindi inaasahang picture ang nabungaran ng mga social media user sa “my day” ng official page ng DENR na wala namang koneksyon sa ahensya.

Ang picture na bumungad sa mga netizen? Mirror selfie lang naman ng isang babae.

Agad naman itong nag-viral matapos i-post ng isang kilalang page kung saan umani ito ng mahigit isandaan libong reactions, mahigit dalawang libong comments, at mahigit labing-isang libong shares.

Sa comment section ng post, lumabas ang tinataglay na kulit at talas ng isip ng mga Pilipino dahil sa palitan ng mga komento kung saan binansagan siya ng iba’t ibang palayaw katulad ng “She is the environment,” “Go ses you’re the environment and natural resources now,” at mayroon pang nagsabi na “I like this diva, she never switches accounts.”

Katulad ng huling komento, ang babae sa picture ay ang social media moderator pala ng DENR na tila nalimutang magpalit ng account kung kaya naman aksidente niyang nai-post ang kaniyang personal photo sa official page ng DENR.

Bagama’t disente naman ang nasabing picture dahil nakaupo ang nasabing babae at medyo balot ang katawan sa suot nitong damit, ngunit ginawan pa rin ito ng mga nakakatuwang komento ng mga netizen.

Ikaw, ano ang gagawin mo kung ikaw ang aksidenteng nakapagpost sa inyong company social media account?

Isa sa mga madalas tinatambayan o ginagawang meeting place ng maraming Pilipino ang sikat na sikat na coffee shop na Starbucks.

Pero kung isa ka sa mga tambay dito, dapat lang alam mo na nag-iba na ang timpla ng polisiya rito.

Kung ano ang mga nagbago, alamin.

Kasunod ng pagpapalit ng CEO ng Starbucks, nagbago rin ang dati nitong store policy na nagsimula seven years ago na “Open-door Policy” na siyang nagbigay ng pahintulot sa mga non-paying customers na gumamit ng kanilang facilities.

September nang nakaraang taon ng magsimula si Brian Niccol bilang bagong Chairman at Chief Executive Officer ng Starbucks.

At nito lamang January 13 ay in-announce ng Starbucks na babaguhin na ang kanilang Open-door Policy para bigyang prayoridad ang kanilang paying customers.

Sa isang pahayag, sinabi ng Director of Corporate Communications na si Jaci Anderson na gusto raw nila na maging komportable ang kanilang paying customers at makatutulong ang pag-iimplementa ng coffeehouse code of conduct.

Ang ibig sabihin ng bagong polisiya ay tanging mga paying customer at partners lang ng Starbucks ang maaaring gumamit ng facilities ng coffee shop kabilang na ang patio at banyo nito.

Iba’t-iba naman ang naging reaksyon ng mga Pilipino sa balitang ito ngunit wag munang kabahan dahil ang mga pagbabago na ito ay applicable lamang sa mahigit sampung libong company-owned stores sa North America.

Ikaw, ano ang gagawin mo kapag inimplementa rin ito sa Pilipinas?

Talaga nga namang malaki ang naitutulong ng AI dahil napapadali nito ang anumang trabaho, pero hindi ito magandang ideya para sa iba dahil marami rin ang nananamantala rito, katulad na lang ng nang-scam sa isang babae na nabiktima ng gumamit ng AI para magpanggap na si Brad Pitt.

Ang buong kwento, alamin.

Isang babae ang nawalan ng tinatayang 50 million pesos matapos mahulog sa patibong ng isang scammer na nagpanggap bilang Brad Pitt.

Kinilala ang biktima na si Anne, isang singkwentay tres anyos na interior designer na kinontak daw ng nagpakilala na ‘Jane’ o ang nanay ng sikat na aktor at sinabi na ang babaeng katulad daw niya ang kailangan ni Brad Pitt sa kaniyang buhay. Tumagal din daw ng mahigit isang taon ang kanilang pag-uusap.

Noong una ay hindi raw makapaniwala si Anne sa mga nangyayari lalo na at hindi raw siya maalam sa social media at inakala rin niya na nasa long-term relationship sila ni Brad Pitt.

Gamit ang AI, sinendan ng scammers si Anne ng AI generated pictures ni Brad Pitt na nasa ospital na siyang naging patibong para magpadala ito ng tinatayang limampung milyong piso.

Ang rason ng scammers? Hindi raw ma-access ng pekeng Brad Pitt ang kaniyang bank accounts dahil sa kaniyang high-profile divorce kay Angelina Jolie at nangangailangan daw ito ng pera para sa kidney treatment.

Ang masama pa nito, hindi lamang pera ang nawala kay Anne kundi pati na rin ang kaniyang asawa na hiniwalayan niya dahil sa nangyari na scam.

Nadiskubre na lamang daw ni anne na na-scam siya matapos makita ang mga balita tungkol sa tunay na girlfriend ng aktor na si Ines de Ramon.

Samantala, naghain na ng police report ang biktima laban sa mga scammer.

Ikaw, madali ka rin bang maniwala sa ganitong klase ng gimmick?

Isang lalaki ang tila nagamitan ng reverse card dahil agad itong kinarma matapos magtangka na magsagawa ng krimen noong araw ng Pasko.

Ang buong kwento, alamin.

Pasado alas dos ng madaling araw noong Pasko nang makuhanan sa isang CCTV footage na inilabas ng Victoria Police ang dalawang lalaki na kapwa nakasuot ng hoodie, pants, at gloves.

Makikita na parehong nakatayo sa harap ng isang fast food restaurant sa Doncaster East ang mga lalaki.

Ang isa sa mga ito ay bigla na lamang yumuko at tila mayroon munang kinuha mula sa kaniyang medyas bago tumayo at mas lumapit pa sa kainan kung kaya naman nawala ito sa frame ng CCTV.

Maya-maya lang ay bigla na lamang lumiwanag dahil sa pagsiklab ng apoy bilang pagtatangka ng mga ito na sunugin ang fast food restaurant.

Ngunit hindi pala ang restaurant ang inaapoy kundi ang pantalon ng lalaki!

Bigla na lamang nagtatakbo ang mga ito at nahuli-cam pa sa ibang anggulo ng CCTV kung paanong hinubad na lamang ng lalaki ang kaniyang pantalon bago muling tumakbo papalayo.

Ayon sa Spokesperson ng Victoria Police, bukod sa pagbuhos ng “flammable liquid” at pagtatangka sa nasabing fast food restaurant ay nagsunog din ng iba pang tindahan sa Doncaster East ang mga lalaki.

Pinaniniwalaan din na mayroon pang isang kasabwat ang dalawang lalaki at naghihintay sa isang sasakyan na ginamit nila papalayo sa pinangyarihan ng insidente.

Ikaw, anong masasabi mo sa instant karma na nangyari sa lalaki?

Laking gulat ng isang babae sa Australia nang madiskubreng kasal na pala siya dahil may bisa pala ang wedding prank na ginawa ng kaniyang boyfriend.

Kung paano ito nangyari, alamin.

Taong 2023 nang magkakilala ang isang hindi pinangalanang magkasintahan sa isang dating application. Pagkalipas lamang ng tatlong buwan na pagkakakilala ay na-engage sila agad noong December 2023.

Pagkaraan ng dalawang araw ay naimbitahan ang magkasintahan sa isang event sa Sydney na kung saan ay required na magsuot ang mga dadalo ng kulay puting damit.

Ganon na lang ang gulat at galit ng babae nang tanging ang kaniyang boyfriend, isang photographer at kaibigan nito, at isang celebrant lang ang inabutan niya sa event.

Nang tanungin ang lalaki ay sinabi nito na hinanda niya raw ang lahat ng iyon para i-boost ang kaniyang content at ma-monetize ang kaniyang social media page sa pamamagitan ng pagsasagawa ng isang wedding prank.

Tinanggap ng babae ang paliwanag ng kaniyang boyfriend at naniwala rin siya na magkakaroon lang ng bisa ang civil wedding kung sa korte ito ginanap.

Sa huli, sinakyan ng babae ang prank at pagkalipas lang ng dalawang buwan ay nabunyag ang mga ginawa ng lalaki matapos nitong sabihin sa babae na gawin siyang dependant nito sa kaniyang permanent residency application.

Sinabi naman ng babae na hindi ito posible dahil hindi naman sila kasal ngunit doon na isiniwalat ng lalaki na totoo ang kanilang kasal at mayroon pang patunay na marriage certificate at notice of intended marriage na na-file, isang buwan bago sila na-engage.

Ayon naman sa lalaki, pumayag daw ang babae na pakasalan siya nito sa isang intimate ceremony sa Sydney, ngunit sinabi naman ng judge na ang paniniwala raw ng babae ay isa lamang itong prank at acting lamang ang kanilang ginawa.

Samantala, napawalan naman agad ng bisa ang kanilang kasal noong October 2024.

Ikaw, ano ang gagawin mo kapag ikaw ang nalagay sa ganitong setup?

Sa isang pambihirang pagkakataon, nabiyayaan ng anak ang isang trenta’y sais anyos na babae sa China kahit na ang pagkakaalam nito ay hindi ito magkaakanak dahil sa kaniyang kondisyon.

Kung paano ito nangyari, alamin.

Isang trenta’y sais anyos na Chinese woman na kinilala sa kaniyang apelyido na Gong ang nagtungo sa Zhejiang Provincial People’s Hospital para ipagamot ang kaniyang hypertension matapos itong makaramdam ng pamamanhid sa kaniyang braso.

Ngunit matapos malaman ng mga doktor na ilang buwan na siyang hindi dinadatnan ng kaniyang period, inabisuhan siya na magpa-ultrasound.

Ganon na lang ang gulat ng babae nang malaman na mahigit walong buwan na pala siyang nagdadalantao.

Ang dahilan kung bakit gulat ang unang naramdaman ni Gong ay dahil mayroon pala siyang problema sa kaniyang sinapupunan at sinabihan na siya ng mga doktor na hindi raw siya magkakaroon ng anak.

Dahil dito, ikinunsidera na raw nila ng kaniyang asawa na magsagawa ng In Vitro Fertilization o IVF para magkaroon sila ng anak, ngunit hindi ito pinahintulutan ng kanilang doktor at inabisuhan na magpapayat muna dahil si Gong daw ay overweight.

Samantala, apat na oras matapos malaman ni Gong na siya ay nagdadalantao ay nagsagawa ng caesarean section procedure ang doktor dahil kritikal na raw ang kaniyang kalagayan.

Hindi naman daw si Gong ang pinakaunang pasyente na nakaranas ng ganoong kalagayan.

Ayon pa sa obstetrician na si Yang Liwei, may mga babae na hindi nakakapansin sa mga pagbabago sa kanilang katawan pati na rin sa mga fetal movement na dala ng pagbubuntis dahil sa kanilang timbang.

Ikaw, anong masasabi mo sa himala na nangyari sa babae?

Hindi nakatayo ang isang lalaki matapos itong maaksidente sa loob ng kanilang bahay, at mas malala pa ay hindi rin nito nagawang sumigaw kung kaya naman gumamit na lamang ito ng morse code.

Kung paano ito ginawa ng lalaki, alamin.

Sa Washington, USA, isang hindi pinangalanang lalaki ang apat na araw na raw na hindi nakikita at hindi nakokontak ng kaniyang mga kakilala.

Pero nakapagtataka na mayroong kakaibang tunog ng pagkatok mula sa loob ng kaniyang bahay.

Dahil sa pagkabahala, nagdesisyon ang mga kaibigan at kaanak ng lalaki na humingi na ng tulong sa mga otoridad.

Sa video na nagmula sa Pierce County Sheriff’s Department, makikita na nagsagawa ang mga pulis ng welfare check sa bahay ng lalaki kung saan personal nilang narinig ang pagkatok mula sa loob ng bahay.

Kasunod nito ay ang sandali na kung saan ay makikita kung paano unti-unting na-decode ng mga otoridad na ang ibig sabihin pala ng mga pagkatok na ilang araw nang maririnig sa loob ng bahay ay morse code.

Nang mapagtanto ang sitwasyon ng lalaki sa loob ng bahay, agad na binuksan ng mga pulis ang pinto at doon nadiskubre na ito pala ay natumba at hindi makatayo.

Ang dahilan pala kung bakit gumamit na lamang ng morse code ang lalaki ay dahil hindi ito makasigaw at apat na araw nang nakahandusay sa sahig ng kanilang sala.

Tiniyak naman ng mga otoridad na maayos ang kalagayan ng nasabing lalaki at dinala ito sa ospital sa tulong ng fire department.

Ikaw, marunong ka rin bang gumamit ng morse code?

Sa China, kontrobersyal ang isang kilalang personalidad na si Liu Liange hindi lamang dahil sa career nito, kundi maging sa kaniyang nakakagulat na personal na buhay.

Kung ano ang buong kwento, alamin.

Taong 2024 nang gumawa ng ingay sa China ang balitang nahatulan ng parusang kamatayan ang dating chairman ng bank of China na si Liu Liange.

Ito ay dahil sa pagtanggap nito ng suhol na nagkakahalaga ng 121 million Yuan at iligal na pagpapautang na umabot sa 3.32 billion Yuan, ngunit nasuspinde ang parusa dahil nakatanggap ito ng dalawang taong reprieve.

Bukod dito, napag-usapan din ang kaniyang lovelife dahil pabata nang pabata at paganda nang paganda ang sumunod na mga naging asawa nito matapos makipag-divorce sa kaniyang unang asawa.

Pero higit pa riyan ay ang sapilitang pagpapahiwalay ni Liu sa kaniyang anak at sa gilrfriend nito dahil hindi raw maganda ang background ng pamilya ng babae at habol lamang ang kanilang pera.

Sinubukang ipaglaban ng kaniyang anak ang relasyon nila ng babae ngunit hindi ito umubra kay Liu dahilan para tuluyan maghiwalay ang anak nito at ang girlfriend.

Hindi rin nagtagal at ipinagkasundo ni Liu ang kaniyang anak sa anak ng kaniyang kaibigan para hindi na nito balikan ang ex-girlfriend.

Matapos nito ay ipinahanap ni Liu ang ex-girlfriend ng kaniyang anak at niligawan. Pinadalhan niya ito ng mga mamahaling regalo katulad ng alahas at matagumpay itong napa-oo.

Nauwi sa pagpapakasal ang relasyon ni Liu sa babae na siyang nagdulot ng depression sa kaniyang anak at matagal na na-confine sa ospital.

Samantala, napilitan namang bumaba sa pwesto si Liu dahil sa sunud-sunod na kaso na kaniyang ikinaharap matapos may magsumbong sa kaniya sa commission for discipline commission at kasalukuyang nang nakakulong.

Ikaw, anong masasabi mo sa mala-telenovela na kwento na ito?

Ano ang gagawin mo kung maabutan mo ang pinaghirapan mong apartment na makalat, sira-sira ang pader at sahig, at nangangamoy dahil sa tenant mo?

Kung ano ang ginawa ng tenant, alamin.

Isang hindi pinangalanang lalaking landlord mula Shanghai, China ang inireklamo ang kaniyang tenant dahil sa pinsalang idinulot nito sa kaniyang pinauupahang apartment.

Hindi na raw nabibisita at nasusuri ng landlord ang kaniyang paupahan at nakuntento na lang sa natatanggap na buwanang renta na ibinabayad ng kaniyang tenant sa tamang oras.

Naalerto na lang daw siya ng mga kapitbahay nang magreklamo ang mga ito na mayroon daw ingay at masangsang na amoy na nagmumula sa kaniyang apartment.

Kaya naman hindi na kataka-taka ang panggagalaiti at gulat na naramdaman ng landlord nang maabutan niyang tila naging pugad ng mga manok ang kaniyang apartment at nakita pa na lumilipad at pakalat-kalat ang mga ito.

Pero bago pa man ito makarating sa landlord ay nauna na pala itong ireklamo ng mga kapitbahay sa admin ng apartment building dahil sa mabahong amoy na nanggagaling dito.

Pero ang makulit na tenant, isinara lang ang bintana para maibsan ang amoy!

Labis naman ang lungkot ng landlord dahil bukod sa pinagkagastusan niya ang pagpapaayos ng apartment upang gawing paupahan, iyon din daw pala ang unang beses na pinarentahan niya ito.

Reklamo niya rin na hindi pa raw sapat ang mga kinita niya mula sa tenant upang ipaayos ang mga napinsala kabilang na ang mga sahig at dingding.

Gayunpaman, agad naman itong itinawag ng landlord sa mga pulis matapos na madiskubre ang gulo sa kaniyang paupahan.

Ikaw, ano ang gagawin mo kung ikaw ang landlord ng nasabing apartment?