EXPLAINERS

Sa panahon ngayon, mas pinipili na ng mga tao ang convenience at comfort kung kaya naman mas pinipili ng karamihan na sumakay sa escalator at tumayo sa mahabang pila ng elevator kaysa maghagdan. Pero gugustuhin mo pa rin bang mag-escalator kung lima lang naman ang steps nito?

Kung saan ito matatagpuan, alamin.

Kilala ang Japan bilang isa sa most innovative countries sa buong mundo dahil sa dami ng mga gamit na matatagpuan doon na ang hatid ay convenience. Bukod pa riyan, marami ring makikitang mga bagay na sobrang kakaiba at sa Japan lang available.

Katulad na lang ng escalator na ito sa basement ng Okadaya More’s department store na matatagpuan sa siyudad ng Kawasaki na tinatawag na “Petitcalator” o “Puchicalator.”

Kung bakit kakaiba ang naturang escalator? Napakigsi kasi nito at mayroon lamang limang steps at 83.4 centimeters o 32.8 inches lang ang sukat.

Binuksan ang mall noong 1989 at naisip daw ng designers na pagkonektahin na lang ang underground level nito sa kalapit na Azalea Underground Shopping Center.

Sa kalagitnaan ng pagpaplano, napagtanto ng mga designer na mayroon na palang malaking concrete beam sa paglalagyan sana ng motor ng escalator.

Gayunpaman, tinuloy pa rin ang implementasyon nito, ayun nga lang ay naging lima lang ang steps nito. Pero, wag iismolin ang escalator dahil record holder lang naman ito at tinaguriang Shortest Escalator in the World.

Ikaw, gagamitin mo pa rin ba ang escalator na to kahit lima lang ang steps nito?

Sa palagiang mainit na panahon sa Pilipinas at saksakan ng dami ng mga commuter, tamang-tama lang ang timing ng pagpapatayo ng de-aircon na waiting shed sa Pangasinan.

Ang buong kwento, alamin.

Sa Barangay Poblacion sa munisipalidad ng Mapandan, Pangasinan, makikita ang isang waiting shed na hindi maipagkakailang higit na mas komportable, convenient, at higit sa lahat ay mas presko kumpara sa nakasanayan natin na waiting shed.

Ang sagot sa maalinsangan na panahon at umiinit na ulo ng mga commuter dahil sa traffic at hirap na makasakay? Waiting shed na de-aircon.

Binuksan para sa mga residente ang waiting shed nito lamang katatapos na Disyembre at may kakayahan na mag-accommodate ng bente katao.

Ayon sa mayor ng mapandan na si Karl Christian Vega, mayroon daw mga naitalang insidente nitong nakaraan kung saan ay na-heat stroke ang ilang matanda noong panahon ng tag-init.

Kung kaya naman tamang-tama ang pagbubukas ng waiting shed na siya namang ikinatuwa ng mga residente, lalo na ang mga senior citizen na dahil nakakatulong daw ito na makaramdam sila ng ginhawa at hindi na kinakailangan pang tiisin ang init.

Bukas ang waiting shed mula alas sais ng umaga at magsasara tuwing alas diyes ng gabi para hindi ito gawing tambayan.

Ang 500,000 piso na ginamit sa unang phase ng pagpapagawa ng waiting shed ay nagmula sa development fund ng pamahalaan at lalagyan pa ng solar panel sa 2^nd phase ng pagpapagawa nito.

Samantala, plano raw ng LGU na magpatayo ng isa pang de-aircon na waiting shed sa ibang bahagi ng Pangasinan.

Ikaw, napa-sana all ka rin ba nang marinig ang kwento na ito?

Marami na ang kumasa sa nagdaang trend na “What are you willing to do challenge” pero ang doktor na ito sa Taipei, huwag na huwag hahamunin dahil paniguradong siya ang mananalo sa trend na ito.

Kung bakit? Alamin.

Sa Taipei, Taiwan, nag-viral ang in-upload na video ng plastic surgeon na si Chen Wei-Nong kung saan makikita kung paano siya nagsagawa ng vasectomy sa kaniyang sarili.

Si Chen ay mayroon ng tatlong anak at ginawa niya raw ang procedure na ito bilang regalo sa kaniyang asawa.

Ang vasectomy ay isang uri ng birth control ngunit ang kaibahan nga lang nito sa mga tipikal na birth control na alam ng karamihan ay sa mga lalaki ito isinasagawa.

Bagamat marami ang pumuri sa effort na ito ni Chen, mayroon ding mga pumuna sa safety ng pagsasagawa niya ng procedure sa kaniyang sarili na siyang tumagal ng isang oras.

Ngunit bilang doktor, siniguro niya naman na magiging ligtas at successful ang pag-undergo niya rito at sinabi na isa siyang lisensyadong surgeon at hindi niya ito ginawa sa gitna ng oras ng trabahao. Nilinaw niya rin na mayroon itong supervision ng isang Urologist.

Dagdag pa ni Chen, nakaramdam daw siya ng pananakit matapos ang operasyon ngunit maayos naman ang kaniyang naging lagay kinabukasan at binansagan pa na “Bravest man in Taiwan.”

Samantala, kinumpirma naman ang department of health ng Taipei na legal ang ginawa ng doktor na pag-oopera sa sarili.

Successful man ang ginawang effort na ito ni Chen, nabigay pa rin siya ng paalala na ang ganitong medical procedure ay hindi basta-bastang ginagawa sa sarili at dapat ay kumonsulta at ipagawa sa mga lisensyadong doktor.

Ikaw, kaya mo rin bang gawin ang ginawa ni Chen sa ngalan ng pagibig?

Aakalain mo ba na pati pala sa paghihikab ay kailangan mo na ring mag-ingat dahil pwede pala itong magdulot ng lockjaw? Ganyan ang nangyari sa isang lalaki na na-lock ang panga dahil sa paghikab.

Ang buong kwento, alamin.

Sa isang video, makikita ang lalaki na si Rommel na nakanganga at hindi maisara ang bibig dahil bigla na lamang nag-lock ang kaniyang mga panga matapos maghikab.

Mabuti na lamang at natulungan si Rommel ng massage therapist na si Marco at ibinalik sa dating porma ang kaniyang panga.

Naging mabilis lang ang pag-aadjust ni Marco sa panga ni Rommel, at wala pang limang minuto ay nakaramdam na ulit ng ginhawa si Rommel kung saan naisara na nito ang kaniyang bibig.

Ayon kay Marco, dapat ay manatili lamang relaxed ang pasyente at huwag magpupumilit na isara ang bibig.

Sinabi rin nito na ang lockjaw ay tinatawag din na TMJD o Temporo-Mandibular Joint Displacement, at ang nangyari raw kay Rommel ay isang halimbawa ng displacement ng Condyle o isang buto na kinakailangan daw itulak pababa upang maibalik sa dating pwesto.

Ikaw, ano ang gagawin mo kung ikaw ang ma-stuck ang panga dahil sa sobrang paghihikab?

Kinaawaan ng mga netizen online ang isang kabayo sa Calle Crisologo matapos itong tumumba habang inililibot ang mga sakay na pasahero sa kaniyang karwahe.

Kung bakit natumba ang kabayo? Alamin.

Sa isang video na kuha ni JM Castillo Tan, makikita ang isang kabayo sa karwahe na nakatumba sa daan habang may mga sakay na turista.

Pinagtulungan ng mga kutsero na itayo ang kabayo bago pinababa ang mga sakay nitong pasahero.

Sinabi ng kutsero ng natumbang kabayo na ang horse shoe o ang sapatos nito ang sanhi kung bakit ito nadulas at tuluyang tumumba sa Calle Crisologo sa Vigan City.

Dagdag pa niya, bago niya ilabas ang kabayo para bumiyahe ay sinisiguro niya na nasa kondisyon ito at maayos ang kalusugan.

Sinabi naman ng Vigan City Cultural Affairs and Tourism Office, ang insidente raw ay isang isolated case at bibihirang mangyari.

Nagbigay din sila ng kasiguraduhan na nabibigyang pansin ang mga pangangailangan ng mga kutsero at kabayo sa pamamagitan ng mga bitamina buwan-buwan.

Samantala, ligtas at wala namang nasaktan sa mga turista, pero ang ikinababahala ng mga netizen online ay ang kalagayan ng kabayo.

Marami ang nagpahayag ng pagtutol sa patuloy na paggamit ng mga kalesa dahil bagama’t maganda itong tingnan dahil alaala ito ng kasaysayan, nalalagay naman sa alanganin ang kalusugan ng mga kabayo.

Ikaw, tutol ka rin ba sa patuloy na paggamit ng mga kalesa?

Isang estudyante mula Davao del Sur ang matagumpay na nakapagpalago at nakapag-ani ng mansanas dahil lang sa kaniyang curiosity.

Kung paano ito ginawa ng lalaki, alamin.

Itinala ang dating Agriculture student sa Davao del Sur State College na si Benzone Kennedy F. Sepe ng Department of Agriculture bilang pinakaunang nakapagpalago ng puno ng mansanas sa Mindanao.

Partida, curious lang daw noon si Benzone kung kaya naman kinuha niya ang buto ng mansanas na kinakain niya at pinatubo muna sa seashells.

Sa unang subok ni Benzone ay isa lang ang nabuhay sa dami ng mga tinanim niyang mansanas, na siyang nag-udyok na pag-aralan pa ito.

Ginamit ni Benzone ang pruning method na kung saan ay tinatanggalan o binabawasan ng stem ang halaman. Sinabi niya rin na upang mas ma-expose ito sa araw ay dapat nakatungo ang sanga.

Ang naging inspirasyon pala ni Benzone para gawin ito ay ang pagtatanim ng Korean farmers ng mangga sa greenhouses na kaniyang nadiskubre nang bumisita siya sa Korea.

Kung bakit nakakabilib ang ginawa ni Benzone? Iyon ay dahil mababa pala ang germination rate ng mga mansanas o ang tyansa na tumubo ito.

Sa mga lugar na mayroong temperate climate o moderate temperature ay inaabot ng lima hanggang pitong buwan bago magbunga ang mga mansanas.

Ngunit sa karanasan ni Benzone ay apat na buwan lang ang inabot dahil may kalamigan sa kanilang lugar.

Pagdating sa produksyon ng mansanas, ang farm ni Benzone ang pinakaunang Agricultural Training Institute-certified Learning Site for Agriculture (LSA) at bukas ito para sa mga nais bumisita.

Samantala, nagbibigay naman ng libreng kaalaman at ipinipakita ni Benzone ang kaniyang buhay farmer sa kaniyang YouTube channel.

Ikaw, ganito ka rin ba ka-tyaga na matuto kapag meron kang gusto?

Kinatuwaan at pinanggigilan ng mga netizen online ang picture ng aso na isa palang cashier sa restaurant!

Ang buong kwento, alamin.

Nag-viral ang isang social media post ng Tikya Garden Bistro sa San Jose City na naglalaman ng picture ng aso na si Popoy na mayroong nakasabit na Gcash QR code sa kaniyang collar.

Sa caption ng post, inanunsyo na si Popoy na ang bagong “Gcash-ier” ng tikya garden bistro at siya ang tatawagin kung Gcash ang nais gamiting mode of payment ng customer.

Kinagiliwan ng netizen ang post at umani na ng mahigit 100k reactions, mahigit dalawang libong comments, at mahigit 40k shares.

Marami ring netizen ang nag-share ng pictures ng kanilang furbabies sa comments section at pabirong nagsabi na mag-aapply din daw sila ng trabaho sa restaurant.

Pero ang hinahangaang aso, isa palang rescued epileptic dog ng family-owned restaurant at sa kasalukuyan ay anim na buwan na itong nagte-training kung paano umupo.

Samantala, humingi rin ng pasensya ang restaurant dahil kahit good boy si Popoy, lagi raw itong tulog o naka-break dahil bago pa lang ito sa kaniyang trabaho.

Para naman sa mga bibisita sa Tikya Garden Bistro, ang paboritong tip daw na matanggap ni Popoy ay crispy pata.

Gayunpaman, may ilang commentors na nagbigay din ng friendly reminder na huwag bibigyan ng buto ang mga aso dahil delikado raw ito at baka bumara sa kanilang intestines.

Ikaw, gusto mo rin bang bumisita sa Tikya Garden Bistro at magbayad ng Gcash kay Popoy?

Isang lalaki sa Nevada ang nadagdagan pa ang sintensya at nahatulan ng anim na dekadang pagkakakulong dahil sa pag-atake nito sa court judge.

Ang buong kwento, alamin.

January 3 nitong nakaraang taon nang mag-viral ang video na nakuhanan sa isang courtroom sa Las Vegas kung saan ay isinagawa ang sentencing hearing ng lalaki na si Deobra Redden para sa kaniyang attempted battery charge.

Nasa kalagitnaan ng pagbibigay ng sintensya ang Clark County District Court Judge na si Mary Kay Holthus nang bigla na lamang talunin ni Redden ang court bench at atakihin si holthus.

Makikita na sinubukan pang umilag ni Holthus mula sa biglaang pag-atake ni Redden ngunit tuluyan itong nahulog mula sa upuan at tumanggap ng mga suntok mula sa lalaki.

Dahil sa nangyaring gulo sa loob ng bench, tumumba ang mga nakatayong flag sa likod ng Judge at makikita kung paano nauwi sa pagkakasakitan si Redden at ang mga umawat sa biglaang pag-aamok nito.

Sinabi ni Holthus sa arrest report na inuntog ni Redden ang kaniyang ulo sa pader at hinila rin ang kaniyang buhok. Ginamot ang tinamo nitong injuries ngunit pumasok din sa korte kinabukasan.

Samantala, sinabi ni Redden sa ginanap na hearing noong December na hindi raw niya intensyong patayin si Holthus, at ayon din sa kaniyang abogado ay mayroon daw Paranoid Schizoprenia ang kaniyang kliyente at hindi nakainom ng gamot kung kaya naman wala ito sa tamang pag-iisip nang mangyari ang insidente.

Gayunpaman, ang 19-48 months na pagkakakulong ni Redden dahil sa kaniyang attempted battery charge ay nadagdagan ng sintensyang 26-65 years na pagkakakulong dahil sa pang-aatake sa Judge.

Ikaw, anong masasabi mo sa pambihirang court scene na ito?

Isang senior citizen na lalaki sa Vancouver, Washington ang hindi inaasahang pumanaw matapos matanggalan ng life support dahil sa maling akala.

Ang buong kwento, alamin.

Noong August 8, 2021, isinugod sa Peacehealth Southwest Medical Center ang noo’y 69-anyos na si David Wells matapos itong mawalan ng malay at tumigil sa paghinga matapos mabulunan ng kinaing steak.

Sa ospital ay naging roommate si Michael Beehler.

Ngunit makaraan lamang ang isang araw ay pumanaw si Wells matapos na magkamaling tanggalan ito ng life support.

Ayon sa kapatid ni Beehler na si Debbie Danielson, tinawagan siya ng ospital at tinanong kung tatanggalan na ba ng life support ang kaniyang kapatid na kaniya namang sinang-ayunan.

Dahil sa nangyari kung kaya’t nagpasulat pa si Debbie sa obituary section ng isang dyaryo para sa kapatid na inakala niyang pataya na at ipinaayos na rin ang burol nito.

Ngunit august 14 nang magulat na lamang si Debbie nang makatanggap siya ng tawag mula sa kapatid at nalaman na buhay pala ito.

Doon na napag-alaman na maling tao pala ang tinanggalan ng life support kayat agad itong inireport ng magkapatid sa mga otoridad.

Ang nangyari, si Wells pala ay napagkamalan na si Beehler kung kaya biglaan itong pumanaw.

Kinuhanan naman ng Clark County Medical Examiner ng fingerprint si Wells upang kumpirmahin na hindi nga ito si Beehler, at inabisuhan din ang anak nito na si Shawn Wells.

Sinabi naman ni Shawn na hindi siya nasabihan ng medical xaminer, ospital, at ng funeral home sa nangyaring pagkakamali sa kaniyang ama at nalaman na lang ito mula sa isang report.

Samantala, tumanggi naman ang ospital na magbigay ng kanilang official statement kaugnay sa nangyaring pagkakamali, ngunit nagsampa ng kaso si Shawn, Beehler, at Debbie sa ospital dahil sa negligence na nagdulot ng severe emotional distress sa kanilang tatlo.

Ikaw, anong masasabi mo sa hindi inaasahang pagkawala ng lalaki?

Karamihan sa atin ay madalas na nakakaligtaan kung saan natin nailalapag ang ating mga salamin na nasa mga noo lang pala natin o kaya’y sa ulo. Pero ang isang matanda sa Peru, nakalimutan kung nasaan ang kaniyang pustiso! Sa kasamaang palad, nalunok niya pala!

Kung paano ito nangyari, alamin.

Isang matanda sa peru ang dumaan sa isang kakaibang operasyon dahil sa kaniyang kakaibang karanasan.

Ayon sa mga doktor, ang reklamo ng 81-anyos na pasyente ay apat na araw na raw siyang nahihirapan at nakakaramdam ng sakit sa paghinga.

Nang sumailalim ito sa X-ray, napag-alaman kung ano ang bagay na siyang nagpapahirap sa matanda na huminga.

Ang kaniyang nawawalang pustiso, nakabara pala sa kaniyang lalamunan!

December 13 nitong nakaraang taon nang atakehin ang hindi pinangalanang pasyente ng kaniyang sakit na epilepsy.

Matapos daw nito ay hindi na niya nakita ang kaniyang pustiso kaya naman inakala niya na naibuga niya ito, ngunit kabaligtaran pala ang nangyari …. Dahil nalunok niya pala ang kaniyang pustiso.

Naging maayos naman ang lagay ng pasyente matapos ang operasyon at ilang araw lang ay nakalabas din ng ospital.

Samantala, hindi pala ito ang unang beses na nangyari ang kaparehong insidente dahil noong 2015, isang pasyente sa India ang walong araw na nawalan ng pustiso na kaniya ring nalunok matapos ding makaranas ng seizure.

Ang kaibahan lang ay wala itong naramdamang kakaiba sa kaniyang katiwan, maliban na lang nang mahirapan itong lumunok noong iinom na siya ng gamot.

Ikaw, nasaranasan mo na o mayroon ka bang kilala na dumaan sa ganitong sitwasyon?