EXPLAINERS

Kung gusto mong pumorma o mag-shopping but you’re on a budget, maraming pwedeng puntahan katulad ng Divisoria, mga tiangge, at kamakailan lang ay nauso ang thrift shopping o ukay-ukay. Pero hindi pahuhuli ang one-stop shop na Greenhills Shopping Center na kabilang pala sa U.S. Counterfeit List o nagbebenta ng mga peke.

Ang buong kwento, alamin.

Nito lamang January 8 ay inilabas na ng United States Trade Representative o USTR ang Review of Notorious Markets for Counterfeiting and Piracy para sa katatapos lamang ng taon.

Sa ikatlong pambihirang pagkakataon, kabilang na naman sa nasabing listahan ang Greenhills Shopping Center na matatagpuan sa San Juan, Manila.

Kilala ang Greenhills Shopping Center bilang one stop shop para sa maraming Pilipino dahil sa nakakalulang kaliwa’t kanang mga tindahan na bubungad sa’yo pagpasok mo rito.

Katulad ng sinabi sa report, samu’t-sari ang mabibili sa nasabing mall at kabilang diyan ang mga damit, relo, pabango, accessories, at gadgets. Pero makasisiguro ka nga ba na totoo ang tatak na binabayaran mo?

Ayon sa kaparehong report, nakikipagtulungan ang National Committee on Intellectual Property Rights sa management ng Greenhills Shopping Center upang gawin itong high-end mall na kung saan ay puro original lang ang mga ibebenta.

Nagsagawa na rin daw ng raid sa nasabing mall na may kasama pang three-strike rule upang aksyunan ang talamak na pagbebenta ng mga pekeng produkto.

Gayunpaman, sa kabila ng mga ginawang hakbang upang matigil na ang pagbebenta ng mga pekeng produkto, makikita pa rin daw sa social media na puntahan pa rin ang Greenhills Shopping Center para sa mga peke o imitation products.

Dahil dito, ang Greenhills Shopping Center ay napabilang na sa listahan ng U.S. Counterfeit List simula pa noong 2022.

Samantala, 2011 pa nang mag-umpisa ang USTR na maglabas ng notorious market list upang magbigay ng awareness at maprotektahan ang American businesses at kanilang mga empleyado.

Ikaw, sa tingin mo ba ay kabilang pa rin ang Greenhills Shopping Center sa nasabing watchlist para sa taong 2025?

Isang asong pagala-gala sa Laoag city ang natagpuan ng mga good samaritan sa kalsada at nakauwi sa kaniyang pamilya.

Ang buong kwento, alamin.

Isang gabi habang bumi-biyahe ang magkasintahang Denise Anne at David sakay ng motor nang mapansin nila ang isang aso na nakasunod sa kanila.

Hindi tumigil ang aso sa paghabol sa dalawa habang binabaybay ng mga ito ang Gilbert Bridge sa Laoag City hanggang sa makarating sa San Nicolas kung saan nakatira si David na may layo na tatlong kilometro.

Nagdesisyon naman sila Denise Anne at David na kupkupin na lang muna ang tila naliligaw na aso.

Mabuti na lamang din at naisipan ng magkasintahan na i-post sa social media ang eksena kung saan at paano nila natagpuan ang aso dahil mayroon palang naghahanap dito.

Matapos noon, dalawang araw ang lumipas ay natagpuan din ang aso na si Douglas ng kaniyang among si Clarence Salting na isang linggo na pala siyang hinahanap.

Labis na nagpasalamat si Clarence sa magkasintahan at sinabi sa isang panayam kung gaano kalambing at mapagmahal si Douglas at inihalintulad pa sa isang tao. Sinabi niya na kumakatok pa sa kwarto nila ang nasabing aso para manggising.

Ang panandaliang pagkawala ni Douglas ay isang patunay na gagawin ng isang furparent ang lahat para sa kaniyang minamahal na aso. Dahil katulad ng sinabi ng amo ni Douglas na si Clarence, para na ring tao ang mga ito, mayroong pakiramdam, at higit sa lahat ay mayroon ding buhay na dapat pahalagahan.

Ikaw, anong masasabi mo sa loyalty ng amo sa kaniyang alagang aso?

Isang babaeng factory worker sa China ang mayroong pambihirang kwento na nagsimula sa kakaibang pagbabago na naranasan niya sa kaniyang katawan, at dahil dito ay hindi lang siya basta-bastang naging nanay, isa na rin siyang tatay!

Ang buong kwento, alamin.

Sa Bishan District na matatagpuan sa Chongqing, China, isang singkwentay nuwebe anyos na babae na kinilalang si ‘Liu’ ang napaulat na nag-develop ng male reproductive system sa murang edad.

Pero bago ito mangyari, ikinasal muna si Liu sa isang lalaki na tinawag na ‘Tang’ noong siya’y disi otso anyos pa lamang at nagsilang ng isang batang lalaki.

Ngunit hindi nagtagal ay nakapansin si Liu ng hindi pangkaraniwang pagbabago sa kaniyang katawan na malayong-malayo sa nararanasan ng isang babaeng nagdalantao.

Si Liu kasi ay tinubuan ng balbas habang ang kaniyang dibdib naman ay lumiit. At higit pa riyan, tinubuan na rin siya ng male reproductive organs!

Dahil hindi kinaya ni Tang ang mga pagbabago na ito kay Liu, nakipaghiwalay siya at isinama ang kanilang anak.

Nagpatuloy ang buhay ni Liu sa ibang bayan at namuhay bilang isang lalaki. Nagtrabaho siya sa isang shoe factory kung saan napamahal siya sa babaeng katrabaho na si Zhou na siya namang naging pursigido na pakasalan siya sa kabila ng kaniyang kondisyon.

Ngunit hindi naging madali ang proseso nito dahil hindi legal ang same-sex marriage sa China, lalo pa at kinikilala pa rin si Liu bilang isang babae sa kaniyang ID.

Kung kaya naman naisip ni Liu na pakiusapan ang ex-husband na si Tang na pakasalan si Zhou kapalit ng pangako na magbibigay siya ng dagdag tulong pinansyal sa pagpapalaki sa kanilang anak na siya namang sinangayunan ni Tang.

Samantala, matapos ang lahat ng pinagdaanan ni Liu, nagbunga ang pagmamahalan nila ni Zhou nang magdalantao ito at nagsilang din ng isang baby boy.

Ikaw, anong masasabi mo sa napakaunpredictable na kwento na ito?

Ano ang gagawin mo kung ma-stranded ka na nga nang mahigit isang araw sa isang dagat, doon pa sa pinamumugaran ng mga pating? Ganyan ang nangyari sa mga turistang Chinese at mga kasama nitong dive guides matapos magtungo sa Palau Shark Sanctuary.

Kung ano ang nangyari sa mga na-stranded, alamin.

December 26 nito lamang katatapos na taon, nagtungo ang pitong turista at dalawang dive guides na kapwa mga Chinese sa Palau Shark Sanctuary na isang island country sa Micronesia.

Ayon sa ulat, na-stranded sa gitna ng dagat ang mga ito matapos silang makalimutang sunduin ng dive boat sa hindi pa rin matukoy na dahilan.

Ang maiwanan pa lamang na palutang-lutang sa gitna ng dagat ay isa nang makapanindig balahibo na karanasan dahil sa dami ng posibleng mangyari rito, pero para mas palalain pa ang sitwasyon, ang dagat ay pinamumugaran pa ng mga pating!

Isa sa mga ito ay ang whitetip reef sharks na hindi man agresibo ay umaatake naman kapag nakaramdam ng papalapit na panganib. Kabilang din dito ang grey reef sharks at leopard sharks na parehong iniiwasan ng mga diver at mangingisda.

Dahil sa hindi agarang pagbalik ng mga turista sa laot, agad itong inireport ng iba pa nilang mga kasama sa Chinese Embassy kung kaya naman agad na pinadalhan ng rescue ang mga na-stranded.

Sa nasabing search operation ay inilabas at ginamit daw ng Palau Police ang lahat ng barko at aircrafts na mayroon sila upang mahanap ang mga diver.

Sa kabutihang palad naman ay kumpleto at ligtas na natagpuan ang mga turista at diver. Gayunpaman, dinala pa rin ang mga ito sa ospital upang suriin at masiguro na maayos ang lagay ng mga ito.

Ikaw, anong diskarte ang gagawin mo kapag ikaw ang nalagay sa sitwasyon na ito?

Sa isang tipikal na araw, sinong mag-aakala na sa loob lamang ng limang minuto ay mahaharap sa dalawang magkasunod na aksidente ang isang lola sa Türkiye habang tumatawid?

Kung ano ang buong kwento, alamin.

Sa isang cctv footage na nakuhanan sa isang kalsada sa northwestern sa türkiye, makikitang malinaw na malinaw na tumatawid ang isang matandang babae sa pedestrian lane.

Sa isang iglap, bigla na lamang itong tumilapon sa gitna ng daan matapos salpukin ng isang puting sasakyan na mabilis ang takbo at hindi man lang nag-menor kahit na may pedestrian lane.

Huminto naman ang driver ng nasabing sasakyan at tinulungan ang matanda at dali-dali ring sumaklolo ang iba pang mga tao na nasa pinangyarihan ng insidente.

Sa kasamaang palad, hindi pa man din nakakabawi ang matanda mula sa unang disgrasya na sinapit ay agad itong nasundan nang dumaan ang isang pulang kotse na dire-diretsong tumama sa matanda at sa mga taong nakapalibot dito.

Agad namang dinala ang matanda sa ospital kung saan himalang nakaligtas ito at ngayon ay nagpapagaling na sa icu.

Samantala, wala namang balita kung kinasuhan ba ang dalawang driver ng kotseng nakabangga kay lola.

Ikaw, ano ang masasabi mo sa tila kamalasang sinapit ng matanda?

Sa panahon ngayon, mayroon pa bang umaayaw at nagpapalagpas sa mga sale kung saan mabibili ang mga produkto sa mababang presyo? Katulad na lang ng mga customer na nagdagsaan sa isang supermarket sa Cyffylliog na hindi naman pala talaga nag-e-exist.

Kung paano ito nangyari, alamin.

Huling linggo ng December nang bigla na lamang nagdagsaan ang mga mamimili sa aldi supermarket na matatagpuan daw sa tahimik na village ng Cyffilliog sa Denbighshire, Wales.

Ito ay matapos madiskubre ng mga shopper sa social media na magkakaroon ng malawakang sale sa nasabing branch.

Makakatipid na sana ang mga shopper para sa kapaskuhan, pero ang problema, wala pala talagang branch ng Aldi Supermarket sa Cyffylliog!

Ang dahilan pala kung bakit napunta ang mga biktima sa Cyffilliog ay dahil sa isinagawang prank ng mga internet troll na paglalagay ng nasabing branch sa Google Maps.

Dahil sa prank, hindi lamang shoppers ang naloko ng internet trolls dahil ayon sa mga residente, mayroon daw dumating na delivery men na naghatid ng mga grocery sakay ng maraming vans, at mayroon pa raw lalaki na nagsabing unang araw niya sa Aldi Supermarket para magtrabaho bilang tagapaglagay ng mga tinapay sa shelves.

Hindi ito ikinatuwa ng mag residente dahil nakasira raw ito sa araw ng mga nagpuntang shopper na naghahanda pala para sa kapaskuhan.

Dahil diyan, nakipag-ugnayan ang mga residente sa pamunuan ng Aldi Supermarket at matagumpay itong naipatanggal sa Google Maps nito lamang January 4.

Samantala, ang German Supermarket na Aldi ay mayroon nang mahigit 12,000 branches ngunit sinabi ng kanilang spokesperson na wala sa plano nila ang magpatayo ng branch sa Cyffilliog.

Ikaw, ano ang gagawin mo kung ikaw ang nabiktima ng scam nito?

Pamamanhikan ng isang lalaki sa pamilya ng kaniyang girlfriend, nag-viral dahil sa agaw eksenang dambuhalang lechon na inihanda rito!

Ang buong kwento, alamin.

Nag-viral sa social media ang post ni Roxanne Renomeron tungkol sa katatapos lamang na pamamanhikan ng kaniya na ngayong fiancee na si Bobby at ng pamilya nito na ginanap sa Brgy. San Agustin sa Talibon, Bohol.

Sa post kasi ni Roxanne, agaw eksena at talaga namang kapansin-pansin ang handa nilang lechon dahil hindi maipagkakailang dambuhala ito at higit na mas malaki kumpara sa kalimitan nating nakikita.

Sa isang panayam, sinabi ni Roxanne na ang higanteng lechon ay mayroong timbang na umabot sa 90 kilos kung kaya naman ipinalagay na lang niya sa gitna ng kanilang bahay ang lechon dahil baka raw hindi kayanin ng mesa ang bigat nito.

Dahil over sa laki ang baboy, OA rin sa laki ang planggana na ginamit ng isang bisita na lalagyan ng lechon sa halip na gumamit ng plato!

Sa ngayon, mayroon nang mahigit sa 24k likes ang nasabing post, mahigit 31k shares, at mahigit 3k comments kung saan nagpaabot ng pagbati ang mga netizen sa couple, pero ang iba ay hindi pinalagpas ang pagkakataon na magkomento rin tungkol sa extra big na lechon.

Mayroon pang nagtanong kung maayos ba ang pagkakaluto nito na sinagot naman ng soon-to-be-bride na 100% na luto ang lechon.

Kung sa pamamanhikan pa lang ay bigatin na ang handaan, paano pa sa mismong kasalan kung saan ipagdiriwang ang pagmamahalan nila roxanne at bobby na inabot na pala ng sampung taon.

Ikaw, gugustuhin mo rin ba na maghanda ng ganito kalaking lechon?

Hindi napigilan ng mga netizen na ilabas ang kanilang galit sa nag-viral na video ng isang insidente sa Pangasinan kung saan nagtamo ng maraming sugat ang pusa.

Kung ano ang buong nangyari, alamin.

Umani ng mahigit 32k angry reactions sa social media ang post ng uploader na si Ken Oriondo kung saan makikita ang isang tricycle sa Malasiqui, Pangasinan na mayroong kabilisan ang pagtakbo habang nakatali sa likuran nito ang isang pusa.

Makikita na noong una ay nagagawa pang tumakbo at makasabay ng pusa sa pag-andar ng tricyle kahit nahihirapan na ito, ngunit hindi nagtagal ay tuluyan na itong nakaladkad.

Maririnig din sa video ang maraming beses na pagtawag ng uploader sa pansin ng tricycle driver upang tanungin kung ano ang ginagawa nito sa pusa at para pahintuin ito.

Sumaklolo naman ang pamunuan ng barangay sa pinagganapan ng insidente at binigyan ng first aid ang pusa dahil sa tinamo nitong mga sugat.

Ayon naman sa kagawad ng Brgy. Gomez na si Brian Dave Austria, nakapanayam na nila ang pitumpu’t isang taong gulang na tricycle driver at katwiran nito ay mahina na raw ang kaniyang pandinig at sinabi na hindi niya alam kung paano napunta ang pusa sa kaniyang tricycle.

Ngunit sa sumunod na interview dito, inamin nito na siya nagtali sa pusa, kung saan humingi na rin ito ng tawad at sinabi na gusto lang daw niyang iligaw ang pusa dahil sa perwisyong dala nito dahil sa pangangalmot. Dagdag niya pa, hindi niya alam na brutal ang kaniyang ginawa, ngunit hindi niya raw intensyon na parusahan ang nasabing pusa.

Dahil sa insidente, muling nagbigay ng paalala ang PAWS na direktang i-report sa kanila ang mga ganitong klase ng mga kaso.

Kasalukuyan nang nasa pangangalaga ng isang veterinary ang pusa, habang ang driver ay maaaring humarap sa kaukulang reklamo.

Ikaw, ano ang gagawin mo kung ikaw ang makasaksi ng ganoong klase ng insidente?

Ano ang gagawin mo kung isang araw ay bigla na lamang pinatanggal ng landlord ng apartment na inuupahan mo ang pinto at bintana ng kuwarto mo nang wala man lang abiso?

Ang dahilan ng landlord? Alamin.

Noong December 20 sa isang lugar sa Northern France na tinatawag na Pas de Calais, bigla na lamang dumating sa isang property ang mga trabahador at tinanggal ang pinto at bintana na inuupahan ng isang tenant na nanay.

Ayon sa tenant, sinabi raw sa kaniya na papalitan lamang ang pinto at bintana sa kanilang inuupahan, ngunit bigla na lamang umalis ang mga trabahador matapos ilagay sa isang sasakyan ang mga tinanggal na pinto at bintana.

Sa kasamaang palad pa ay nataon sa kasagsagan ng taglamig sa nasabing lugar noong nangyari ang insidente.

Bukod pa riyan, maaari ring malagay sa panganib ang pamilya ng tenant dahil sa kawalan ng seguridad sa kanilang tinutuluyan.

Kaya naman, wala nang nagawa ang nanay kundi gumamit na lamang ng cardboard upang ipangtapal sa pintuan at bintana para maibsan ang lamig.

Pero ano nga ba ang dahilan ng landlord para gawin ito sa kaniyang kawawang tenant?

Napag-alaman sa pamamagitan ng isang local media na ang dahilan kung bakit ito nagawa ng landlord ay para paalisin ang nasabing tenant na mayroon daw utang na limang buwan na renta.

Sinabi rin ng tenant sa isang local media na sinubukan daw niyang mag-reach out sa kaniyang landlord ngunit hindi niya ito makausap.

Gayunpaman, inako at inamin naman ng landlord ang ginawa niyang pagpapaalis sa tenants sa maling paraan, lalo pa at taglamig noon at iligal ang pagpapaalis sa mga tenant kapag malamig ang klima sa France at sa maraming bansa sa Europe.

Samantala, nagsampa naman ng reklamong Breach of Trust ang tenant na naghahanap na ng malilipatan.

Ikaw, ano ang gagawin mo kung ikaw ang mapunta sa ganitong sitwasyon?

Normal ang magkaroon ng mga aberya o hindi inaasahang pangyayari sa mga okasyon na labis na pinaghahandaan katulad na lang ng kasal. Pero sa China, ang groom na mismo ang gumawa ng eksena na siyang ikinawindang ng mga bisita!

Ang buong kwento, alamin.

Sa isang video na in-upload sa social media, makikita ang bride at groom na naglalakad sa aisle patungo sa isang stage habang ang mga bisita ay nagsisigawan at nagpapalakpakan sa saya.

Unti-unting nanahimik ang mga bisita at sabay-sabay na tumutok sa isang malaking screen sa stage kabilang na ang ikinakasal.

Hindi nagtagal ay napalitan ng gulat at pagkadismaya ang boses ng mga tao dahil sa hindi inaasahang nasaksihan na video.

Matapos noon ay tinulak ng groom ang bride kung kaya napaatras ito at ibinato sa lalaki ang hawak na bouquet.

Kung bakit ganoon na lang ang panggagalaiti ng groom? Iyon ay dahil nabuking nito na nangangaliwa pala ang kaniyang bride at ang masaklap pa ay ang sariling brother-in-law pala nito ang kalaguyo!

Ang nasabing video na napanood ng mga bisita sa kasal ay ang sensitibong video ng bride kasama ang kaniyang brother-in-law!

Ayon sa ulat, aksidente lamang na nadiskubre ng groom ang pangangaliwa ng bride sa pamamagitan ng camera na inilagay niya sa kanilang bahay.

Dahil dito, naisipan ng groom na ibulgar ang tinatagong sikreto ng babae sa araw mismo ng kanilang kasal upang masiguro na malalaman ng kanilang mga pamilya at kaibigan ang kasalanang ginagawa nito.

Matagumpay man na nagawa ng groom ang plano, nakatanggap pa rin ito ng mga negatibong komento mula sa mga netizen katulad ng isang nagsabi na sana ay nakipaghiwalay na lang ang lalaki sa halip na nagsayang ng libu-libong pera sa kasal.

Ikaw, ano ang gagawin mo kung ikaw ang malagay sa sitwasyon ng groom?