EXPLAINERS

Hindi na lingid sa kaalaman ng karamihan na ang fashion ay pabago-bago at patuloy na nagiging modern. Pero sino nga ba ang mag-iisip na aabot sa punto na pati ang bubble wrap ay maaari na ring isuot ng mga tao?

Kung saan ito matatagpuan, alamin.

Sa isang video na pinost ng uploader na nagngangalang Yana Vansovich, na-feature ang panibago at kakaibang klase ng mga damit sa boutique na ZNWR na binansagang “Balenciaga of Belarus” na hindi maipagkakailang agaw pansin dahil maihahalintulad ito sa isang bubble wrap.

Sa video, makikita ang tila tipikal na bubble wraps na ginagamit para ipambalot sa mga fragile products, ngunit ang kaibahan nga lang ay korte itong bistida at coat na maaaring isuot ng isang tao.

Maririnig sa video na pabirong inalok ni Yana sa mga babaeng viewer na naghahanap ng dress ang nasabing bubble wrap dress na kaniyang nakita sa Minsk Dana Mall sa Belarus.

Mayroong pang mga nagsabi na ang mga damit na ito ay maaaring gamiting “anti-stress” dahil puwede itong putukin katulad ng ginagawa sa mga normal na bubble warp.

Pero huwag iismolin ang bubble wrap dress at jacket na ito dahil limited lang ito at nagkakahalaga ng 280 at 380 Belarussian Rubles na katumbas ng 5,000 pesos at mahigit 6 thousand Pesos.

At dahil sa kakaibang fashion statement kung kaya’t ayon sa social media account ng ZNWR, mabilis na na-sold out ang bubble wrap jacket.

Ikaw, gugustuhin mo bang suotin ang bubble wrap dress na ito?

Isang lolo ang hindi napigilang umiyak kahit na hindi pa nito nakikita ang regalo sa kaniya ng kaniyang apo noong Pasko.

Kung ano ang nasa loob ng regalo? Alamin!

Sa Marilao, Bulacan, isang nakakaantig na kwento ng pagbibigayan ang nasaksihan ng mga netizen online mula sa video na pinost ni Kris Angelica Guimbal kung saan makikita na inabutan nito ang kaniyang lolo na si tatay Vic ng isang paperbag na naglalaman ng kaniyang regalo para rito.

Maririnig na inasar pa ni Kris ang kaniyang 73 taong gulang na lolo na baka umiyak pa ito dahil sa natanggap na regalo, at hindi nagtagal ay maririnig na nga sa video ang paghikbi ng matanda.

Agad namang nilapitan ni Kris ang kaniyang tatay Vic at binigyan ito ng mainit na yakap habang binabati ng Merry Christmas.

Makikita rin sa video na kahit anong pilit ni Kris na labanan ang kaniyang emosyon ay hindi pa rin nito nagawang mapigilan ang maluha.

Sa isang pahayag, sinabi ni Kris na lumaki siya sa kaniyang lolo at lola, kaya naman ngayong mayroon na siyang sariling trabaho, gusto niyang maibigay sa kaniyang lolo ang mga pangangailangan nito.

Dagdag pa ni Kris, ang kanila raw lola ay pumanaw bago pa siya magkaroon ng sariling trabaho. May kani-kaniya na rin daw pamilya ang mga anak ni tatay Vic kung kaya naman ang mga apo na niya ang nag-spoil sa kaniya.

Ang dahilan naman kung bakit ganoon na lang ka-emosyonal si tatay Vic nang makita ang regalo ni Kris ay dahil pangarap pala nito na magkaroon ng polo shirt mula sa partikular na brand.

Ikinatuwa naman ng mga netizen na nakapanood ng video at mayroon pang mga nakiiyak kay tatay Vic, habang ang iba naman ay nagbahagi pa ng kani-kaniya nilang mga kwento at alaala kasama ang kanilang mga lolo at lola.

Isang kakaibang innovation ang ginawa ng mga miyembro ng Faculty of Engineering sa University Of Santo Tomas.

Ito ay ang pagpapakilala sa isang robot na malaki ang maitutulong sa mga ospital.

Kung paano ito nagsimula, alamin.

Muling sinubok ang Pilipinas nang tuluyang pumutok ang COVID-19 pandemic sa Pilipinas noong taong 2020, kaparehong panahon kung kailan nagsimulang i-develop ng project team leader na si Anthony James Bautista at ng kaniyang team ang robot na si Lisa.

Ang pangalang Lisa ay hango sa Logistics Indoor Service Assistant.

May kakayahang itong humalili sa mga healthcare worker sa pamamagitan ng pagbibigay ng minor assistance katulad ng paghahatid ng mga kagamitan kabilang na ang medical supplies, mga dokumento, at may kakayahan din na magsagawa ng remote consultation sa mga pasyente sa pamamagitan ng tablet na nakakabit dito.

Bukod pa riyan, gumagamit din ito ng Lidar sensor na siyang dahilan para matukoy ng robot ang mga direksyon at pasilidad na binabaybay niya sa loob ng ospital.

Ayon kay Dr. Bautista, ginawa nila ang robot para magsilbi itong means of communication sa mga doktor at mga pasyente, ngunit nabago ito at naging alinsunod na sa pangangailangan ng mga ospital.

Samantala, sa tulong ng pondo mula sa Department of Science and Technology-Philippine Council for Health and Research Development, naging posible at matagumpay ang nasabing proyekto.

Ikaw, may naiisip ka rin bang bagong innovation na makakatulong sa mga manggagawang Pilipino?

Kalimitan ay umiiwas ang ibang tao sa mga inuming may alcohol dahil kung masosobrahan ay magdudulot ito ng masamang epekto sa pangangatawan at maaari ring magresulta sa isang sakit. Ngunit sa Ohio, USA, isang centenarian ang nagsabi na ang alak daw ay nakatulong sa pagpapahaba sa kaniyang buhay!

Ang buong kwento, alamin.

Sa isang nakatutuwang kuwento, nitong december 16 ay nagdiwang ng kaniyang 106^th birthday si Florence Hackman na binansagang “Fireball Flo” dahil mahilig pala ito sa fireball whisky!

Kasalukuyang naninirahan si Flo sa isang assisted living community sa Ohio, USA na Traditions of Deerland sa Loveland.

At kahit lagpas isandaan na ang edad ni Flo, nanatili pa rin siyang aktibo pati na rin ang kaniyang mga kaibigan sa pagsali sa happy hour sa kanilang tinitirhan.

Pati na rin sa paglalaro ng bingo at iba pang activities ay hindi nawawala si Flo.

At para masagot ang tanong kung bakit humaba nang ganoon ang buhay ni Flo? Ito ay dahil sa pagiging positibo at masiyahin niya. Higit sa lahat, sinabi niya rin na ang paborito niya inumin na whisky ay malaki ang tulong para umabot siya sa ganitong edad.

Sa katunayan, sa pagdiriwang ni Flo ng kaniyang 105^th birthday ay niregaluhan siya ng manufacturer ng fireball cinnamon whisky!

Si Flo ay nabyuda nang pumanaw ang kaniyang husband of 71 years noong 2011 at nagkaroon ng maraming anak na siya namang nagbigay din sa kaniya ng maraming apo at apo sa tuhod.

Gayunpaman, hindi na kataka-taka na nakatuntong sa edad na 106 si Flo dahil nananalaytay na pala ito sa kaniyang dugo! Ayon kay Flo, ang kaniya raw nanay ay umabot din noon sa edad na 104!

Ikaw, nais mo rin bang mag-celebrate ng birthday ng hanggang sa 106 years old?

Dating magkasintahan, nagkabalikan after 49 years at muling nagpakasal sa edad na 94 at 89.

Ang buong kwento, alamin.

Sa Denver, Colorado, USA, nakilala ni Fay Shober ang kaibigan ng kaniyang mga kuya na si Robert Wenrich na sa murang edad ay nagsabi na agad na pakakasalan siya nito.

Nobyembre naman ng 1951 nang totohanin ito ni Robert dahil talaga ngang pinakasalan niya si Fay at nagkaroon sila ng mga anak.

Ngunit matapos ang 24 years na pagsasama ay nag-divorce ang dalawa noong 1975 at nagkaroon ng kani-kaniyang mga buhay, ikinasal sa iba, at nagkaroon ng mga bagong pamilya.

Ikinasal si Fay kay Don Gable at nagsama sila sa loob ng 42 years bago namatay ang lalaki 2 years ago. Habang si Robert naman na siyam na taon nang biyudo ay napangasawa si Carol Shultz, ngunit binawian din ng buhay si Carol.

Ngunit matapos maghiwalay sa loob ng 49 years, muling natagpuan nila Fay at Robert ang isa’t isa at muli ring nagpakasal!

Ayon naman sa kanilang bunsong anak na si Carol na siyang nag-asikaso sa ikalawang kasal ng kaniyang mga magulang, para raw teenagers ang mga ito na in love na in love pa rin sa isa’t isa.

Sinabi rin ng newlyweds na ngayon lang sila nagkaroon ng pagkakataon na mag-date dahil busy sila noon sa pagpapalaki sa kanilang mga apat na anak.

Kung kaya naman ngayon ay madalas mag-bonding ang mga ito sa magpalipas ng oras sa Hollywood Casino Morgantown at paglalaro ng baraha sa bahay.

Dagdag pa ni Carol, marami raw ang nakakakilala sa kaniyang mga magulang dahil ang pictures pala ng mga ito ay naka-display sa Parkhill Jewelry kung saan sila nagpasukat ng wedding ring.

Ikaw, naniniwala ka rin ba na love is sweeter the second time around?

Ang isang babae na hinahanap ang kaniyang tunay na pamilya, literal na natagpuan ito sa kaniyang mga kaibigan!

Ang buong kwento, alamin.

Sa isang pambihirang pagkakataon, natagpuan ng trentay sais anyos na si Cassandra Madison ang kaniyang mga kapatid na siyang nagsimula lamang sa isang haka-haka.

Habang nagtatrabaho sa isang restaurant sa Connecticut noong 2013 ay nakilala ni Cassandra ang kaniyang naging matalik na kaibigan na si Julia Tinetti.

Makalipas ang ilang taon ng pagkakaibigan, 2021 nang nadiskubre ng dalawa na sila pala ay siblings by blood! Hindi rin naman maipagkakaila ang koneksyon ni Cassandra at Julia dahil sa malaking pagkakahawig nilang dalawa.

Pero hindi pa riyan nagtatapos ang journey ni Cassandra sa paghahanap sa kaniyang pamilya dahil makalipas ang ilang taon, kamakailan lang ay napag-alaman ng dalawa na mayroon pa pala silang kapatid na lalaki!

Sa isa nga namang mapaglarong tadhana, ito pala ay ang lalaki na nakilala ni Cassandra noong siya ay elementary pa lamang na si Thomas Buonaguirio na kaniya ring naging childhood friend!

Ang tatlo pala ay pare-parehong adopted mula sa Dominican Republic, ngunit ayon kay Madison ay hindi raw nag-match ang kani-kanilang adoption papers.

Ngunit makalipas ang ilang taon ay nakilala na rin ni Cassandra ang kaniyang tunay na ama na si Adriano Luna at doon nakumpirma na tunay nga silang magkapatid ni Julia.

Samantala, matapos magkaroon ng panandaliang pagkalito sa pagitan ng mag-aama dahil ayon kay Adriano ay wala siyang pinaampon na baby boy.

Pero matapos alalahanin ang kanilang nakaraan at pagtagpi-tagpiin ang kwento, sinabi ng magkapatid na panandaliang naghiwalay ang kanilang mga magulang at nagibangbayan kung saan niya ipinanganak si Thomas.

Gayunpaman, ayon kay Julia ay hindi rin daw malinaw sa kanila ang lahat dahil hindi pa nasasagot ang lahat ng mga tanong nila.

Ikaw, anong masasabi mo sa pambihirang kwento na ito?

Sa probinsya ng Cagayan de Oro, isang magkasintahan ang sinalubong ang Pasko nang may alitan at krimen.

Ang buong kwento, alamin.

Noong bisperas ng kapaskuhan, sa halip na magkasiyahan at mapayapang ipagdiwang ang pinakahihintay na okasyon ng bawat Pilipino taun-taon, ay nauwi pa sa isang madugo at masalimuot na krimen sa pagitan ng magkasintahan sa Cagayan de Oro City.

Ito ay dahil tumanggi ang trentay siyete anyos na babae na bigyan ng pera pambili ng alak ang kaniyang kinakasama.

Ang simpleng pagtanggi na ito ay nauwi sa pagtatalo nila ng kaniyang nobyo, dahilan para doon na nangyari ang malagim na pananaksak ng lalaki sa kaniyang nobya.

Ayon sa ulat, tumakas ang lalaki matapos isagawa ang krimen at ngayon ay patuloy na tinutugis ng mga otoridad.

Samu’t sari naman ang mga naging komento ng mga netizen at mayroon pang nagsabi na huwag nang piliting uminom ng alak kung wala namang pambili, at kung talagang gustong mag-inom ay magtrabaho para magkaroon ng panggastos.

Samantala, posible namang kaharapin ng lalaki ang kasong Violence Against Women and Children’s Act.

Ikaw, anong masasabi malagim na insidente na ito?