EXPLAINERS

Ika nga nila, kaniya-kaniyang trip lang ‘yan at walang pakialamanan. Pero ang lalaking ito sa China, kakaiba ang trip. Kung ang iba ay madaling-madali na hubarin ang kanilang maruruming damit pagkatapos ng mahabang araw sa labas ng bahay, ang lalaki na ito mula sa China, sinisinghot muna ang kaniyang gamit na medyas bago ito labhan.

Kung ano ang naging resulta ng trip na ito ng lalaki, eto.

Nakatanggap ang southwest hospital of the army medical group ng isang pasyente na nagdesisyong magpa-checkup dahil sa pagkakaroon ng bloodshot eyes o labis na pamumula ng mga mata.

Pero bago pa ‘yan maranasan ng lalaki ay hindi raw muna siya pinatulog ng kaniyang persistent cough kahit na umiinom naman daw siya ng gamot.

Dahil dito ay nagsagawa ang mga doktor ng CT Scan at MRI at doon nadiskubre sa kanang bahagi ng kaniyang baga ang mga sintomas ng severe infection.

Matapos nito ay sumailalim naman ang lalaki sa bronchoscopy kung saan napag-alaman na mayroon na pala itong fungal lung disease dulot ng aspergillus infection.

Katulad ng kadalasang ginagawa ng mga doktor, kinausap nila ang lalaki at tinanong ang kaniyang medical history at kung ano ang nakikita nitong rason para magkaroon ng impeksyon.

Doon na sinabi ng lalaki ang nakaugalian niya na pagsinghot sa kaniyang maruming medyas. Isang middle-aged office worker ang lalaki at sa tuwing uuwi raw ito galing sa trabaho, inaamoy niya muna ang kaniyang gamit na medyas bago pa ito labhan.
In-examine naman ng mga doktor ang maruming medyas ng lalaki at ayon sa deputy director ng Department of Respiratory Medicine ng nasabing ospital na si Lao Hu, ang mga medyas daw ay isa sa mga kagamitan na posibleng pamugaran ng fungus dahil sa pagkakakulob sa loob ng sapatos at matagal na pagkakasuot dito.

Dagdag niya pa, maaari raw dumaan sa ilong o bibig ang fungi at pumasok sa lower respiratory tract ng tao kapag inamoy nito ang medyas na mayroong fungus.

Samantala, na-discharge naman na sa ospital ang lalaki dahil sa tulong ng mga epektibong anti-fungal medications.

Ikaw, pwede mo bang i-share kung ano ang pinaka-weird na habit mo?

Talaga namang kaniya-kaniyang gimmick ang mga tao ngayon para lang makapandaya at makalikom ng easy money. Katulad ng isang babae sa Spain na lagpas isang dekadang nagpanggap na hindi nakakapagsalita para lang kumita ng pera sa pension.

Kung ano ang kinahinatnan ng babae, eto.

Isang araw noong 2003 sa Andalucia, Spain, habang nagtatrabaho ang isang babae sa isang grocery story ay bigla na lang daw itong inatake ng customer na naging rason para mag-develop at ma-diagnose ito ng post-traumatic stress disorder o PTSD.

Dahil dito ay pinagkalooban ng Social Security ng permanent disability pension ang babae na nanggagaling sa isang insurance company dahil work-related daw ang kaniyang kaso.

Makalipas ang 16 na taon ay nagsuspetsa ang nasabing isnurance company nang i-review nila ang medical records ng babae at napansing wala namang record na hindi ito nakakapagsalita kung kaya nanghingi na sila ng tulong sa ibang doktor at isang psychologist ang nagsabi na posibleng mayroong fraud na nangyayari.

Matapos nito ay nag-hire na ng private detective ang insurance company at doon nadiskubre na normal naman pala itong nakakapagsalita. Bukod sa nakita nito ang babae na nakikipag-usap sa mga nanay sa labas ng eskwelahan at sumasali pa sa mga zumba classes, kinausap din mismo ng private detective ang babae at nagkunwaring nagtatanong ng direksyon papunta sa isang department store.

Gamit ang mga video recorded na ebidensyang walang speaking disability ang babae, dinala ng insurance company sa korte ang kaso kung saan napatunayan na hindi na nila kinakailangang bigyan ng pensyon ang babae. Sinubukan din umapela ng babae dahil nalabag daw sa recorded video ang kaniyang constitutional rights ngunit binasura ito ng korte.

Samantala, mayroong malaking tyansa na magsampa ng reklamo ang insurance company laban sa babae.

Sa mga nagpapanggap diyan para lang makapanlamang, alam niyo ba na walang lihim na hindi nabubunyag?

Ang masakit at mahirap tanggapin na katotohanan kapag nawalan ng mahal sa buhay, nadagdagan pa ng pisikal na sakit nang madisgrasya at mahulog din sa hukay ang mga maghahatid sana sa isang lalaki sa kaniyang huling hantungan.

Kung ano ang buong pangyayari, eto.

Sa isang video, mapapanood ang tipikal na tagpo sa isang libing kung saan makikitang hinahatid ng kaniyang mga kaanak ang yumao sa kaniyang huling hantungan.

Tinatayang walong lalaki ang makikitang nagbubuhat sa kabaong papunta sa platform kung saan unti-unti itong ibababa para sana ilibing.

Ngunit sa kasamaang palad ay bigla na lang gumuho ang mga kahoy na ginamit para buohin ang platform, dahilan para mapa-sama at mahulog din ang mga pallbearer o ‘yung mga nagbubuhat sa kabaong pababa sa hukay.

Nangyari ito sa libing ni Benjamin Aviles sa Greenmount Cemetery na binawian ng buhay dahil sa komplikasyon sa puso habang nasa kaniyang bahay sa North Philadelphia.

Ayon sa stepdaughter ni Aviles na si Maribelle Rodriguez, nagtamo ng injuries ang mga nahulog na lalaki sa kanilang mga binti, mga kamay, at likod.

Kasama rin sa mga ito ang anak ni Aviles na na-stuck at pumailalim pa sa kabaong.

Dagdag pa ni Rodriguez, dapat daw ay magkaroon ng reimbursement sa mga ibinayad nila sa sementeryo at funeral home at dapat din daw na humingi ang mga ito ng tawad.

Gayunpaman, sinabi naman ng presidente at owner ng Greenmount Cemetery na aksidente ang nangyari at nakikisimpatya siya sa naiwanang pamilya.

Ikaw, papayag ka ba na magkaroon ng ganitong aberya sa pagbibigay ng respeto sa huling sandali ng mahal mo sa buhay?

Sa pataas nang pataas na bilihin ngayon, sino ba naman ang aayaw sa libre, lalo na sa pagkain? Pero ang mag-ama na ito sa France, hindi naghihintay ng libreng biyaya, kundi sila mismo ang gumagawa ng paraan para makalibre pero sa maling paraan nga lang.

Kung ano ang modus ng mag-ama, eto.

Sa Toulon region sa France, libreng nakakain sa mga restaurant ang 48-anyos at 18-anyos na mag-ama sa loob na ng tatlong taon.

Nakakalibre ang mga ito hindi dahil mga endorser sila o mga kilalang personalidad, kundi dahil sila ay mga scammer na nasa isandaang beses nanloko ng mga restaurant owners.

Para hindi mahalata na mayroon silang binabalak na masama, nagpupunta raw ang mag-ama sa mga restaurant nang maganda ang ayos at bihis.

Hindi lang simpleng meal ang inoorder ng mga ito at sinasamahan pa ng starters, desserts, wine, at digestif na madalas ay umaabot ng 80-150 euros o may katumbas na mahigit 5,000-9,000 pesos.

Kapag tapos nang kumain, magbabayad daw ang tatay gamit ang isang credit card na hindi gumagana. Pagkatapos ay uutusan niya ang kaniyang anak na mag-withdraw ngunit babalik ito nang walang dalang pera.

Dahil walang pambayad, magso-sorry na lang ang tatay sa staff ng restaurant at mag-iiwan ng ID kasama ng pangako na babalik ito kinabukasan para magbayad.

Hindi rin basta-bastang nambibiktima ang dalawa dahil nagre-research pa raw ang mga ito at ginagamit ang online reviews ng mga restaurant kung saan nakikita nila na customer-friendly ang mga owner.

Ayon sa mga otoridad, matapos mag-iwan ng ID sa mga restaurant ay kumukuha na lang ng panibagong id ang tatay at dinadahilan na nawala niya raw ito.

Natapos lang ang tatlong taong pandaray na ginagawa ng mag-ama nang i-post sa social media ng isa sa mga restaurant owners na nabiktima nila ang id na iniwan nila bilang collateral.

Sa huli, umabot sa 43 restaurant owners ang nagreklamo sa mga pulis kung kaya nagsagawa ng imbestigasyon ang mga ito at pagkalipas ng ilang buwan ay naaresto rin ang mag-ama.

Ikaw, hanggang saan ang kaya mong gawin para lang makalibre ng pagkain?

Ang isa sanang masayang trip ng magkasintahan mula sa India, nauwi sa trahedya ilang segundo lang matapos nilang sumakay sa rollercoaster.

Kung ano ang buong pangyayari, eto.

April 3 ng kasalukuyang taon nang magpunta ang magkasintahang sina Nikhil Singh, 26-anyos, at Priyanka Rawat, 24-anyos, sa Fun N Food Water & Amusement Park sa New Delhi, India.

Ayon sa police complaint ni Singh, dumating sila ni Priyanka sa amusement park pasado ala una ng hapon sakay ng isang scooter mula sa bahay ng babae sa Chanakyapuri.

Sinulit ng dalawa ang oras nila sa park at in-enjoy ang mga water rides simula nang dumating sila roon hanggang sa mag alas sais ng gabi. Pagkatapos nito ay ang rollercoaster naman ang naisipang sakyan ng magkasintahan.

Ilang segundo lang nang umandar ang rollercoaster, agad na nahulog ang babae mula sa taas na tinatayang aabot ng 20 feet.

Ayon medical documents na inilabas ng ospital kung saan dinala si Priyanka, nagtamo ang babae ng laceration sa kanan niyang binti, puncture wounds sa kaliwang binti, at maraming gasgas sa kaniyang right forearm at kanang tuhod.

Nadiskubre ng mga pulis na ang puno’t dulo ng pagkahulog ng babae mula sa rollercoaster ay mulfunction sa kaniyang seatbelt.

Matapos nito ay ipinasara ang nasabing ride para maimbestigahan ng mga pulis at dadaan din sa mechanical inspection.

Sinabi naman ng owner at adviser ng amusement park na si Santokh Singh Chawla, iyon daw ang pinakaunang beses na nangyari ang ganoong klase ng insidente sa loob ng 33 taon na pag-ooperate nito.
Aniya pa, agad din nilang ipinadala ang babae sa ospital gamit ang sarili nilang ambulansya ngunit idineklara ang babae na dead on arrival.

Sa mga nag-ooperate ng amusement parks diyan, sa paanong paraan niyo ba sinisiguro na safe ang inyong rides bago magpasakay ng mga customer?

Bukod sa mismong kasal, importante rin ang gagawing wedding proposal ng isang lalaki para sa kaniyang girlfriend. Pero ang babae sa kwentong ito, naiyak lang nang mag-propose sa kaniya ang kaniyang boyfriend. Hindi dahil sa saya, kundi dahil sa takot.

Ang buong kwento, eto.

Sa isang viral video, makikita ang isang babae na nagsisisigaw at umiiyak habang humahangos papalapit sa isang lalaki na nakahandusay sa damuhan.

Tinanggal ng babae ang tela na nakatakip sa katawan ng lalaki at patuloy na nag-histerikal hanggang sa tuluyan na nga itong napaupo sa damuhan dahil sa sobrang pagpa-panic.

Ayon sa caption ng video, tila sinet up ang babae dahil sinabihan daw ito ng mga kaibigan ng lalaki na patay na ito.

Pero ang lalaking inakalang patay na, biglang bumangon habang mayroong hawak na bouquet of flowers para sana mag-propose.

Pero sa halip na kiligin sa surpresa, walang ibang ginawa ang babae kundi ang umiyak at rinig na rinig din ang takot sa kaniyang boses dahil sa pag-aakala na wala ng buhay ang kaniyang boyfriend.

Nang kumalma na ang babae, doon na lumuhod ang lalaki para alukin ito ng kasal, at sa dulo ng video, makikita ang dalawa na sinusuotan ng singsing ang isa’t isa.

Bagamat todo effort sa pag-acting ang lalaki sa kaniayng proposal, hindi naman ito ikinatuwa ng mga netizen online. Para sa ilan ay sobra-sobra ang ginawa ng lalaki at nakakatrauma raw ito para sa babae. Mayroon namang nagbiro na dahil sa naging reaksyon ng babae, at least nalaman ng lalaki na talagang mahal siya nito. Habang karamihan naman ay nag-alala sa kalusugan ng babae dahil maaari raw mauwi sa heart attack ang paghi-histeria nito.

Ikaw, gusto mo rin bang makaranas ng eksaherada o intimate na wedding proposal?

Isa ang graduation sa pinakainaabangang tagpo ng mga magulang sa buhay ng kanilang mga anak. Indikasyon kasi ito na matagumpay nilang nagabayan ang kanilang mga anak sa pag-aaral, at sine-celebrate rin ang sipag at tyaga ng mga ito na makatapos para sa sarili nilang mga pangarap. Kung kaya kinaantigan ng mga netizen ang video na ito ng isang mag-ina na pinaglayo ng rehas sa araw ng graduation.

Ang madamdaming kwento ng mag-ina, eto.

Panahon na naman ng graduation. Kani-kaniyang flex na ulit ang mga proud parents sa achievements at milestone ng kanilang mga anak.

Pero ang isang nanay na ito sa Santiago, Agusan del Norte, walang nagawa kundi tingnan na lang mula sa malayo ang limang taong gulang niyang anak na masayang bumisita sa kaniya habang nakasuot pa ng toga.

Ito ay dahil sampung buwan nang nakakulong ang nanay ng batang babae sa Bureau of Jail Management and Penology aa Cabadbaran City Jail sa Mindanao dahil sa kasong may kinalaman sa droga. Ayon sa uploader na si Relyn Egos, ang kapatid ng nanay ng bata, hindi raw ang nanay ang target ngunit nakita raw ito sa ni-raid na bahay.

Nag-viral kasi ang video ng mag-ina kung saan makikita ang nanay na tinatanaw lang ang kaniyang anak mula sa bintana na may rehas.

Ayon sa tiyahin ng bata, hiling daw ng kaniyang kapatid na makita ang anak nito na nakasuot ng toga. Kung kaya pagkatapos ng graduation ay dumeretso agad ang mag-tita sa kulungan para tuparin ang wish ng nanay ng bata.

Hindi na rin daw pumasok pa sa loob ng city jail ang mag-tita dahil wala raw silang pambili ng pagkain kung kaya madalas ay sa labas lang nila tinatanaw ang nakakulong na nanay.

Marami ang naantig sa tila magkabilang mundo na tagpo ng mag-ina sa isa sa pinaka-memorable na event at milestone sa buhay ng bata. Nagpaabot naman ng tulong ang mga netizen online para sa mga pangangailangan ng bata na ngayon ay nasa pangangalaga ng kaniyang tita.

Ikaw, isa ka rin ba sa mga pinaluha ng viral video na ito?

Ang kwento na ito ng dalawang lalaki, tila isang halimbawa ng kasabihan na, “Kung gaano mo kabilis nakuha, ganoon din kabilis mawawala.” Paano ba naman kasi, walang kahirap-hirap na nakapagnakaw ang mga ito pero caught in the act na pala.

Ang buong kwento, eto.

Katulad ng ibang mga nabibistong kawatan, nabuking din sa CCTV ang ginawang krimen ng dalawang lalaki na ito sa England nang isang gabi ay manghimasok sila sa isang market stall.

Nang lumabas mula sa loob ng tindahan ay bitbit na ng isa sa mga lalaki ang estatwa ng isang gorilla.

Tuluy-tuloy lang na lumabas mula sa establishment ang dalawa at dinala ang ninakaw na estatwa sa tinutuluyan nila sa Durham.

Ang kaso lang, hindi alam ng dalawa na ang inaakala nilang smooth-sailing na pagnanakaw nila ay sinusundan pala ng isang CCTV operator mula sa Darlington Borough Council.

Dahil dito ay agad na natunton ng mga otoridad ang mga kawatan na itinanggi pa ang ginawa nilang panloloob at pangnanakaw.

Bukod pa riyan, kung gaano kabilis naiuwi ng mga lalaki ang estatwa, ganoon din sila kabilis nahuli. Paano ba naman kasi, tatlong minuto lang ang tinagal bago sila nahanap ng mga pulis.

Nabawi naman ng pulisya ang dinekwat na gorilla at naibalik na rin sa tindahan.

Samantala, inaresto na ang mga lalaki at sasampahan ng kasong burglary.

Ikaw, anong masasabi mo sa literal na mabilis na pangyayari na ito?

Ano nga ba talaga ang purpose ng pagha-hiking? Para makapag-exercise? Para magtanggal ng stress? O para ma-enjoy lang ang magandang view sa tuktok nito? Ang isang bundok kasi sa China, nilagyan ng escalator para raw madaling akyatin?

Kung saan ito matatagpuan, eto.

Sa Jianxi province sa China, matatagpuan ang isang bundok sa Lingshan Scenic Area na mayroong taas na 1,500 meters at inaabot ng dalawang oras bago marating ang tuktok.

Pero kung balak mong mag-hiking sa bundok na ito, hindi mo na kakailanganin pang magpagod at asahan mo nang hindi nito pasasakitin ang mga hita at mga binti mo dahil nilagyan na ito ng escalator.

Sinimulan ang project na ito noong 2022 at inaasahang magiging bukas sa publiko sa susunod na buwan.

Iba’t iba naman ang naging komento ng mga netizen online. Para sa iba ay magandang ideya ang paglalagay ng escalator sa bundok para sa convenience ng mga matatada at sa mga tinatamad na mag-effort sa pag-akyat ng bundok. Ngunit mayroon ding mga tumutol dahil mawawala raw ang tunay na purpose ng pagha-hiking at nasira raw ang kagandahan ng lugar dahil sa escalator.

Samantala, hindi naman ito ang unang bundok sa China na napabalitang nilagyan ng escalator dahil nauna na noong 2023 ang Tanyu mountain sa Zhejiang China na mayroong taas na 350 meters.

Para sa mga mahilig mag-hiking diyan, ano ang masasabi niyo sa mga ganitong klase ng projects?

Talaga namang malaki ang naiaambag ng teknolohiya sa pang araw-araw na buhay ng mga tao. Hindi lang nito napapadali ang mga gawain, nakatutulong din ito na mahanap ang mga nawawala. Katulad na lang ng isang pusa na biglaang nawala ngunit ligtas ding nakauwi sa kanilang bahay dahil sa tulong ng microchip.

Ang buong kwento, eto.

Labis na takot ang gumapang sa 25-anyos na si Sophie Carty mula sa Darlington, England nang bigla na lang mawala ang alaga niyang pusa na si Luna noong November 2024 sa hindi niya malamang dahilan.

Makalipas ang apat na buwan, pagdating ng Marso, nakatanggap ng tawag si Sophie mula sa Highland Vet Referral.

Doon nalaman ni sophie na ang alaga niyang si Luna, nakarating na pala sa Scottland na anim na oras ang layo sa lugar kung saan ito nawala.

Natagpuan daw si luna sa shed ng isang hotel sa Inverness at dinala sa nasabing veterinary clinic. Nasa mabuting kalagayan na raw ito bagamat nangayayat at dumaan sa operasyon.

Mabuti na lang at mayroong kautusan sa England na lagyan ng microchip ang mga alagang pusa bago sila tumuntong ng 20 weeks.

Sa tulong ng kasing laki ng butil ng bigas na microchip, natagpuan si Luna dahil ang nilalaman nito ay ang contact information ng owner at iniimplant sa balat ng mga pusa.

Samantala, walang kaide-ideya si Sophie kung paano nawala ang kaniyang alaga. Pero suspetsa niya na baka sumakay ito sa isang delivery van o di naman kaya ay nanakaw.

Gayunpaman, nakauwi na si Luna sa England at nakararanas ng malourishment, infection, at suspetya rin ni Sophie ay mayroon itong nerve damage. Muli rin itong dinala sa veterinary clinc at tuluyan nang nagpapagaling sa tulong ng mga gamot na inireseta rito.

Ikaw, sa paanong paraan mo sinisiguro na laging ligtas ang mga fur babies mo?