EXPLAINERS

Sa mahal ng bilihin ngayon, lahat naman yata tayo ay excited kapag narinig na discounted ang bill na babayaran natin. Pero matutuwa ka pa rin ba kung kakailanganin mo pang lumusot sa butas ng karayom para lang maka-discount? Ganyan ang siste sa isang restaurant sa Thailand na nakatanggap ng criticism dahil sa kakaiba nitong paraan para magbigay ng discount sa customers.

Ang buong kwento, eto.

Sa social media account ng user na si amonthego, makikita ang sunud-sunod niyang travel videos.

Sa pinakabago niyang post, makikita si amina at ang iba pang customers na tila naglalaro at lumulusot sa mga bars sa restaurant na Chiang Mai Breakfast World.

Ang bawat bars ay mayroong magkakaibang sukat at may kani-kaniyang equivalent na discount mula 5 percent hanggang 20 percent, habang ang bar naman mayroong pinakamalaking gap ay walang discount. Ibig sabihin, kapag mas maliit ang gaps, mas malaki ang discount.

Kung saang bar kakasya ang mga customer, ‘yon din ang halaga ng discount na makukuha nila.

Makikita sa kaparehas na video ang isang lalaki na pilit na pinagkakasya ang kaniyang sarili sa bars na mayroong 15% at 10% discounts pero hindi pa rin siya kumasya. Kung kaya lumipat ang lalaki sa bar na mayroong 5% discount at doon matagumpay na nakalusot.

Samantala, hindi nagustuhan ng ilang netizen online ang gimmick na ito ng nasabing restaurant. Isang commentator ang nagsabi na maaari raw itong mag-rpomote ng eating disorder. Habang mayroon ding nagtanong na paano raw kung hindi pa rin siya kakasya sa full price o ‘yong bar na mayroong pinakamalaking gap.

Mayroon ding concered citizen na nagtanong kung ano mangyayari kung magkaroon ng injury ang isang tao para lang makakuha ng maliit na discount?

Ikaw, pipiliin mo rin bang lumusot sa butas ng karayom para lang makamura?

Ang isang video na ginawa ng isang makeup artist para sana ipamalas ang skills niya sa pagme-makeup, na-bash dahil tila pinopromote raw nito ang dishonesty sa trabaho.

Kung paano nila ito nasabi, alamin.

Aktibo na nagpo-post sa kaniyang social media account ang indian makeup artist na si Pritam Juzar Kothawala ng videos kung saan ipinapakita ang final look ng kaniyang clients.

Pero bukod sa magagandang makeup looks, marunong din gumawa ng fake wounds and scars si Pritam at kamakailan lang ay nag-uplaod siya ng video kung saan nagtuturo siya kung paano gumawa ng pekeng sugat na mayroong paalala na ang video na ‘yon ay hindi para mapanood ng mga it managers.

Sa video, ipinakita ni Pritam ang step by step procedure kung paano gumawa ng fake wounds na may kasama pang stitches at fake blood.

Useful ang ganitong tutorials lalo na sa holloween season, ang kaso, sa dulo ng video, ipinakita si Pritam na nagpapaalam sa kaniyang boss na umabsent at idinahilan ang mga pekeng sugat na nasa mukha niya. Sa huli, pinayagan si pritam na mag-sick leave sa loob ng limang araw na ginamit niya lang naman para magbakasyon.

Sinabi rin ni Pritam na ang video na ‘yon ay para rin sa mga it professionals na hirap makapag-leave sa trabaho. Bukod diyan, hinikayat niya rin ang mga viewers na i-share ang video at huwag na huwag ipapakita sa kanilang mga boss.

Ang video na umani na ng 39.4 million views, tinawag na unethical at nonsense. Mayroon din namang naka-appreciate sa skills ng artist pero hindi raw tama ang content at message ng video.

Gayunpaman, nagbigay naman ng disclaimer si Pritam sa caption ng post na ang video ay isa lamang skit at ginawa for entertainment purposes.

Ikaw, ginagamit mo ba sa tamang paraan ang sick leave mo?

Ano nga ba ang ibig sabihin kapag biglaan kayong nagkita ng dati mong karelasyon ilang taon matapos ang breakup niyo? Closure o destiny? Nag-viral kasi ang dating magkasintahan na tila pinag-reunion ng isang ride-hailing app nang ma-book ng babae ang ex niyang MC taxi rider.

Ang nakakakilig na kwento, eto.

Sa isang video mula sa MC taxi rider na si Christian De Guzman, matutunghayan ang hindi inaasahang reunion nila ng kaniyang ex-girlfriend na si Ecca.

Tatlong taon na palang hiwalay ang dalawa nang muli silang magkita dahil sa unexpected booking na ito, at sa halip na magkailangan, nauwi pa sa pagre-reminisce ang dalawa!

Sa sobrang gulat sa muli nilang pagkikita, si Ecca, nabulol pa habang nag-uusap sila ng kaniyang dating boyfriend!

Habang pakiramdam naman daw ni Christian ay kakaiba ang tibok ng kaniyang dibdib nang mga oras na ‘yon.

Kinumusta rin nila ang mga nangyari sa buhay ng isa’t isa matapos mag-end ang kanilang 6-month relationship dahil sa minsundertsanding.

Pero nang magtanungan ang dalawa tungkol sa kani-kanilang mga relationship status, pareho nilang ni-reveal na mga single pa rin sila at nagparinig pa si Christian na baka siya lang din ang hinihintay ni Ecca.

Sa 20 minuto nilang byahe sa Pasay, hindi naiwasang magtanong ng dalawa kung bakit sa dami ng mga tao sa mundo ay si Ecca pa ang na-book na pasahero ni Cristian at baka raw may kakaibang ibig sabihin ang unexpected reunion nila.

Samu’t sari naman ang naging komento ng mga netizen online. Ang iba ay nag-share ng kani-kanilang love stories na kapareho ng kina Christian at Ecca. Habang ang iba naman ay umasa na sana ay muling magkabalikan ang dalawa at mapatunayan na love is sweeter the second time around.

Ikaw, ano ang una mong mararamdaman at gagawin kapag aksidente kayong nagkita ng ex mo?

Isa na namang kaso ng animal cruelty ang nadagdag sa mga sunud-sunod na naitalang pagmamalupit sa mga hayop nitong mga nakaraang linggo. Sa Biñan, Laguna kasi, isang aso ang pumasok lang naman sa isang subdivision pero binawian ng buhay matapos itong pagmalupitan ng nagbabantay na gwardya.

Ang malagim na sinapit ng aso, eto.

Sa isang CCTV footage na nakuhanan sa gate ng isang subdivision sa Biñan, Laguna, makikita ang isang lalaki na hila-hila ang isang aso papalabas ng subdivision.

Ayon sa isang witness, ang humihila raw sa aso ay ang security guard ng nasabing subdivision at gumamit ng control pole para palabasin ang aso.

Nakita rin daw ng mga saksi na duguan ang aso at may tinamong injury sa ulo kung kaya tumawag sila ng barangay para sana maitakbo ito sa veterinary clinic pero ang mga otoridad, hindi na raw kaya pang dalhin ang aso dahil nangangagat na ito at mamamatay din naman daw sa huli.

Dinala ng mga witness sa social media ang insidente at napukaw nito ang pansin ng magpinsan na agad na sumaklolo sa aso.

Sinabi pa ng isa sa magpinsan na si Julianne Bismonte, bukod sa tinamong innjuries ng aso ay muntik pa raw itong masagasaan.

Samantala, tumanggi naman ang gwardya na siya ang nasa likod ng mga injuries ng aso ngunit mayroong CCTV footage na nagpapakita na nasa maayos na kalagayan ang aso nang pumasok sa subdivision.

Sinabi rin ng barangay na wala silang kakulangan sa insidente at natugunan pa rin naman daw ang hinaing ng mga saksi. Handa rin daw ang Home Owner’s Association na bayaran ang mga nagastos sa pagpapagamot sa aso.

Na-suspend naman ang nasabing gwardya at inireklamo na rin dahil sa paglabag nito sa Animal Welfare Act sa tulong ng Strays Worth Saving na nagpaalala na huwag mananakit ng mga stray dogs dahil katulad ng mga tao, may sarili ring pag-iisip at damdamin ang mga ito.

Gayunpaman, sa kasamaang palad ay binawian din ng buhay ang aso dahil sa tinamo nitong head injuries.

Sa mga pet lovers diyan, para sa inyo, ano ang parusa na dapat ipataw sa mga abusadong nananakit sa mga hayop na wala namang atraso?

Sa sobrang laki ng mundo, talaga namang hindi lang ang mga kilalang personalities ang may angking kagandahan at kagwapuhan, katulad na lang ng babaeng street sweeper na ito sa thailand na pinag-usapan sa social media matapos itong picturan ng isang dayuhan dahil sa natural nitong kagandahan.

Kung ano ang buong kwento, eto.

Kilala ang Russian photographer na si Semyon Rezchikov na nag-iikot sa iba’t ibang lugar sa iba’t ibang bansa at kinukuhanan ng litrato ang sinumang makapukaw sa kaniyang pansin at bibigyan ito ng kopya ng kaniyang picture.

Isa sa mga kinuhanan niya ng litrato ay ang street sweeper sa Thailand na si Noppajit “Meen” Somboonsate.

Nagtatrabaho noon si Meen nang kuhanan siya ni Semyon ng litrato.

Habang nagpapahinga ang babae ay doon inabot ni Semyon ang naka-develop na nitong picture at doon maka ilang beses niya itong pinuri dahil sa natural nitong kagandahan.

Umani na ng 4.1 million views ang video na punung-puno ng papuri para sa magandang mukha na bago sa paningin ng karamihan.

Pagkatapos nito ay muling nag-viral si Meen matapos itong imbitahan ng thai makeup artist na si Nong Chat at ginawan ng transformation video.

Sa ikalawa niyang viral video, makikita si Meen na suot ang uniform para sa mga street sweepers at umaakto na tila nagwawalis.

Sa isang kumpas ng hawak na walis ay nag-transition ang video at ipinakita si Meen na nakakulot ang buhok, may natural makeup look na lalong nag-define sa kaniyang facial features, at nakasuot ng damit na kung saan ay na-highlight ang kaniyang makintab na morenang balat at tattoos.

Umabot na sa 6.4 million views ang video kung saan umani ng magagandang komento si Meen. Karamihan pa nga sa mga ito ay pinansin ang kaniyang golden skin at natural beauty.

Matapos ang mga viral videos sa social media ay sunud-sunod na ang mga modeling gigs na natanggap ni Meen mula sa iba’t ibang brands. Nag-announce na rin ito na magfofocus na sa kaniyang bagong career at iiwanan na ang pagiging street sweeper.

Samantala, hindi na bago ang ganitong mga kwento sa pilipinas. Matatandaan na nadiskubre na noon si Jeyrick Sigmaton o Carrot Man at ang binansagang Badjao Girl na si Rita Gaviola.

Ikaw, ready ka na rin bang maging instant model? Labas-labas din at baka ikaw na ang sunod na ma-picturan.

Ang simpleng pagbisita lang sana ng isang lalaki sa kaniyang girlfriend, nauwi sa pagtatapos ng kaniyang buhay dahil lang sa maling akala.

Ang buong kwento, eto.

Binisita ng isang 36-anyos na lalaki mula Valencia, Negros Oriental ang kaniyang girlfriend sa bahay nito at nakipag-kwentuhan dito sa sala.

Bagamat hindi na naging malinaw ang sumunod na nangyari, pumasok daw ang lalaki sa kwarto ng babae kung saan natutulog pala ang lolo nito.

Biglang nagising ang 83-anyos na lolo at saka binaril ang lalaki dahil sa pag-aakala na magnanakaw ito.

Sa kasamaang palad, binawian agad ng buhay ang lalaki dahil sa tinamo nitong tama ng bala ng baril.

Ayon sa pamilya ng biktima, dati na raw itong nakulong ngunit nilinaw ng kapatid nito na hindi ‘yon dahil sa pagnanakaw.

Samantala, nasa kustodiya na ng mga pulis ang lolo at nahaharap sa mga kasong murder at illegal possession of firearm.

Sa mga nagmamay-ari ng baril diyan, responsable ba kayo sa paggamit ng mapanganib na weapon na pag-aari niyo?

Muling pinatunayan ng mga aso na para na rin talaga silang mga tao, dahil bukod sa angking talino ng mga ito, madalas, sila pa ang mas may puso. Katulad na lang dalawang stray dogs na hindi nag-alinlangang iligtas ang nakita lang nilang aso na nakahiga sa gitna ng daan.

Ang nakatutuwang kwento, eto.

Sa isang CCTV footage na nakuhanan sa isang kalsada sa Jiangsu, China, makikita ang isang aso na nakahiga lang sa gitna ng kalsada at hindi makatayo dahil mayroon pala itong injury.

Sa kabilang banda naman ng kalsada, makikita ang dalawang stray dogs na patakbong tumawid para puntahan ang kawawang aso.

Nakipagpatintero ang dalawa sa mga dumaraang sasakyan at ito rin ang dahilan kung bakit hindi nila agad nadala sa gilid ng kalsada ang nakahigang aso.

Bagamat marami ang nakakita sa sitwasyon ng mga aso, ni isa sa mga sasakyan na dumaan ay hindi man lang huminto para tulungan sila.

Nang lumuwag ang daan, tuluyan nang nahila ng mga stray dogs ang injured na aso at tila chinecheck up pa nila ito pagdating nila sa gilid ng kalsada.

Ang injured na aso, dati rin palang stray dog at inampon ng kaniyang amo na si Mr. Xue 6 months ago. Sinabi niya na nakalabas daw ang kaniyang aso at na-hit and run ng isang motorista.

Agad namang dinala ni Mr. Xue ang kaniyang alaga sa veterinary clinic at nagpapagaling na mula sa tinamo nitong minor injuries.

Samantala, ang dalawang stray dogs na may mga mabubuting puso, hindi na kailangan pang magpalabuy-laboy dahil nagpaplano na si Mr. Xue na ampunin na rin ang mga ito at magkakasama na ang tatlong instant friends na mga aso.

Sa mga fur parents diyan, ano ang mga maipagmamalaki ninyong good characteristics ng mga alaga niyong aso?

Walang duda na nakakaengganyo ang pag-browse sa internet, pero huwag kalimutan ang limitasyon dahil kapag sobra-sobra, talagang mapapasama ka. Katulad na lang ng tatlong magkakapatid sa Texas na nag-amok dahil lang pinatayan ang mga ito ng Wi-Fi.

Ang buong kwento, eto.

Isang gabi sa isang bahay sa Houston, Texas U.S.A., pinatay ng 39-anyos na may-bahay ang kanilang Wi-Fi sa hindi tukoy na dahilan.

Dahil dito, ang mga anak niyang babae na nasa edad 14, 15, at 16, pinagtangkaan na ang buhay niya.

Ayon sa Harris County Sheriff na si Ed Gonzalez, sinubukan daw saksakin ng magkakapatid ang nanay nila gamit ang kitchen knives at hinabol pa raw nila ito sa loob ng kanilang bahay hanggang sa kalye.

Hindi lang kutsilyo ang ginamit ng magkakapatid para maisagawa ang kanilang plano at gumamit pa ang isa sa mga dalagita ng brick na ibinato naman sa ankle ng kanilang nanay.

Nadamay din ang kanilang lola na sinubukan lang namang iligtas ang nanay mula sa masamang binabalak ng magkakapatid.

Bilang resulta ng pag-aamok ng dahil lang sa pinatay na Wi-Fi, inireklamo ang tatlong dalita ng aggravated assault with a deadly weapon at dinala na sa Harris County Juvenile Detention Center.

Ikaw, isa ka rin ba sa mga nag-iinit ang ulo kapag bigla na lang nawawala ang Wi-Fi?

Nang dahil sa isang aksidente na nangyari sa mismong bahay kung saan ay dapat pinakaligtas ang mga tao, maagang binawian ng buhay ang isang baby, at sa kasamaang palad, involved ang kaniyang tatay sa insidente.

Ang buong pangyayari, eto.

Pasado alas dos ng madaling araw nitong March 29 nang aksidenteng mapahamak at nawakasan ang buhay ng isang taong gulang na baby girl sa mismong bahay nila sa Taman Desa Harmoni.

Ayon sa Police Chief ng Seri Alam District na si Mohd Sohaimi Ishak, paatras daw na inilalabas ng 27-anyos na tatay ang kaniyang sasakyan mula sa garahe ng kanilang bahay.

Ngunit bigla na lang daw nakarinig ng ingay ang lalaki sa kaliwang bahagi ng likuran ng kaniyang sasakyan.

Nang bumaba ang tatay para tingnan ito, nakita niya na lang na duguan ang isang taong gulang niyang anak na babae at wala ng malay.

Agaran niyang isinugod ang bata sa Sultan Ismail Hospital ngunit binawian din ito ng buhay dahil sa severe head injuries na tinamo nito mula sa aksidente.

Iniimbestigahan ng mga otoridad ang insidente sa ilalim ng Section 41 (1) ng Road Transport Act Of 1987 na tumutugon sa reckless o dangerous driving na nagresulta ng casualty.

Samantala, nagbigay ng paalala ang mga otoridad na maging mas maingat sa pagmamaneho lalo na kung mayroong mga bata sa paligid.

Ikaw, ano ang masasabi mo sa kalunus-lunos na pagkawala ng bata na ito?

Kakaiba man at nakapagtataka ang living conditions ng babae sa kwentong ito, nakakaantig naman ang dahilan kung bakit mas pinili niya na manirahan sa isang banyo kaysa maghanap ng boarding house at magbayad ng mataas na renta.

Ang buong kwento ng babae, eto.

Kung ang iba ay labanan ang aesthetic at palakihan ng bahay, ang 19-anyos babae na ito mula sa Hunan, China, ginulat lang naman ang mga netizen matapos niyang ipakita online ang tinitirhan niya.

Ang babae kasi, hindi sa magarang dorm o borading house nakatira kundi sa isang banyo.

Dahil sa hirap ng buhay, pinili ng dalagita na manirahan na lang sa 6-square-foot na hindi ginagamit na banyo sa loob ng furniture factory na pinagtatrabahuhan niya.

Dahil talaga nga namang kakaiba ang living conditions ng babae, hindi naiwasan ng ilang netizen na hindi maniwala sa kaniya, ngunit pinatotohanan ito ng kaniyang boss at sinabi pa na hindi niya tinatanggap ang 50 yuan na ibinabayad sa kaniya ng babae para sa tubig at kuryente.

Ang mabait na boss, nag-offer pa na hanapan siya ng ibang matutuluyan ngunit mas pinili pa rin nito ang nasabing banyo.

Ang rason sa pagtitipid ng dalagita ay dahil gusto niya raw palang makatulong sa kaniyang pamilya pagdating sa gastusin. Sa katunayan ay tumigil ito sa pag-aaraal sa edad na 16 para magtrabaho.

Umani naman ng iba’t ibang reaksyon ang post ng babae. Ang ilan ay humanga sa kasipagan nito, habang ang iba naman ay mas concerned sa kaniyang kalusugan.

Gayunpaman, ipinapaayos na raw ng kaniyang boss ang isa sa mga opisina na inaasahang lilipatan ng babae.

Ikaw, pipiliin mo rin bang tumira sa banyo para makapagtipid?